སྒྲོལ་མ་རལ་གཅིག་མའི་བློ་འཕེལ།
རྟག་པའི་རྡོ་རྗེ།
༄། །སྒྲོལ་མ་རལ་གཅིག་མའི་བློ་འཕེལ་བཞུགས། འཕགས་མ་སྒྲོལ་མ་རྡོ་རྗེ་དབྱངས་ཅན་མ། །བ་ལིཾ་གཏོར་མ་ཕུལ་བ་བཞེས་ནས་སུ། །འགྲོ་རྣམས་མ་རིག་མུན་པ་བསལ་ནས་སུ། །ཤེས་རབ་བློ་ཡི་པདྨ་ཁ་འབྱེད་ཤོག །དམར་མོ་རབ་འཇིགས་ནམ་མཁའི་མདོག །ཞལ་གཅིག་ཕྱག་བཞི་སྟང་སྟབས་མཛེས། །མི་ཤེས་ཡིད་འཇོམས་ལ་བཏུད་དེ། །གཞུང་དོན་སྒོམ་རིམ་འདི་གསལ་བྱ། །དང་པོ་ཁོ་ནར་རིག་པ་དང་ལྡན་པའི་གང་ཟག་གིས། །དུར་ཁྲོད་དམ་ཕྱི་ནང་གི་རྟེན་སྟོབས་ལྡན་བཞུགས་པའམ། རབ་ཏུ་དགའ་ཞིང་དབེན་པའི་ས་ཕྱོགས་སུ་གནས་ཁང་བྱི་དོར་བྱ། །རྟེན་དང་མཆོད་པ་དངོས་སམ་ཡིད་ཀྱི་རྣམ་འཕྲུལ་གྱིས་བཀོད་དེ། བུ་ཆུང་གི་རོ་འཇམ་ཞིང་མཉེན་པ་དྲི་ཞིམ་པོའི་ཆུས་བཀྲུས་ལ། མེ་ཏོག་གི་ཕྲེང་བ་བཏགས་ལ། རང་ཉིད་བདེ་བར་གནས་པའམ། དེ་མེད་ན་ཡང་སྟན་འབོལ་བ་ལ་གནས་ཏེ། བདག་གིས་རལ་གཅིག་མ་བསྒྲུབས་ལ། རང་གཞན་གྱི་མི་ཤེས་པའི་མུན་པ་རྣམ་པར་གཞོམ་པར་བྱའོ་སྙམ་དུ་བསམ་མོ། །དེ་ནས་སྐད་ཅིག་གིས་རྣམ་པ་ཀུན་ཏུ་རྟོག་པའི་ཚོགས་རང་སར་དག་པའི་ཏིང་ངེ་འཛིན་ལ་མཉམ་པར་གཞག་གོ །རྗེས་ལ་སྤྱི་བོ། །མགྲིན་པ། སྙིང་ག་གསུམ་དུ། ཨོཾ་དཀར་པོ་དང༌། ཨཱཿདྨར་པོ་དང༌། ཧཱུཾ་སྔོན་པོ་དང་གསུམ་ཤིན་ཏུ་གསལ་བར་བལྟ་ཞིང༌། འོད་ཟེར་གྱི་ཚོགས་སྤྲོས་པས་འགྲོ་བའི་མི་ཤེས་པའི་མུན་པ་རྣམ་པར་བཅོམ་ནས་གནས་གསུམ་གྱི་ཡི་གེ་ལ་བསྡུས་ལ། སྐུ་གསུང་ཐུགས་རྣམ་པར་དག་ཅིང་འཕོ་འགྱུར་མེད་པའི་ཏིང་ངེ་འཛིན་བསྒོམ་པར་བྱའོ། །དངོས་པོའམ་མཚན་མ་ཐམས་ཅད་རང་གི་ངོ་བོས་སྟོང་པའི་དོན་དེ་ཉིད་བལྟ་བར་བྱ་བའི་ཕྱིར། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭཱ་བྷཱ་བ་ཨཱཏྨ་ཀོཉཧཾ། ཞེས་བརྗོད་ཅིང༌། དངོས་པོ་དང་མཚན་མའི་བག་ལ་ཉལ་ཕྲ་མོ་ཙམ་ཡང་མེད་པའི་ཏིང་ངེ་འཛིན་
༄། །ལ་གནས་པར་བྱའོ། །དེའི་ངང་ལས་ཨཱཿདང་ཊཱཾ་རིམ་གྱིས་གྱུར་པ་ལས། པདྨ་དམར་པོ་དང་ཐོད་པ་ཁྲག་གིས་བཀང་བ། །དེའི་སྟེང་དུ་ཉི་མའི་དཀྱིལ་འཁོར་ལ་ཧཱུཾ་སྔོ་ཞིང་དངས་པ་ལ་བལྟ་བར་བྱའོ། །ཧཱུཾ་ཡོངས་སུ་གྱུར་པ་ལས་གྲི་གུག་གི་ཡུ་བ་ནས་ཉི་མའི་སྟེང་ན་ཧཱུཾ་གནས་པའ། །དེ་ཡོངས་སུ་གྱུར་པ་ལས་བཅོམ་ལྡན་འདས་རལ་པ་གཅིག་མ་སྐུ་སྦོམ་ཞིང་ཐུང་བ། མདོག་བཻ་ཌཱུཪྻ་ལྟར་སྔོ་ཞིང་དངས་པ། ཞལ་གཅིག་ཕྱག་བཞི་མ། དང་པོ་གཉིས་རལ་གྲི་དང་ཨུཏྤལ་བསྣམས་པ། འོག་མ་གཉིས་གྲི་གུག་དང་ཐོད་ཁྲག་ཐུགས་ཀར་འཛིན་པ། ཞབས་གཡས་བསྐུམ་གཡོན་བརྐྱང་བས་དབུགས་བྲལ་གྱི་སྙིང་དང་རྐང་བ་མནན་པ། ཕྱག་རྒྱ་ལྔ་དང༌། བརྒྱ་ཕྱེད་དང༌། སྟག་ལྤགས་དང༌། ཀླུ་བརྒྱད་སྤྲུལ་སྔོན་པོའི་གཟུགས་ཀྱིས་དབུ་རྒྱན་དང༌། རྣ་རྒྱན་དང༌། མགུལ་རྒྱན་དང༌། དབུང་རྒྱན་དང༌། ཕྱག་གདུབ་དང༌། ཞབས་གདུབ་དང༌། སྐ་རགས་དང༌། སེ་རལ་ཁ་རྣམས་ཀྱིས་རབ་ཏུ་དཔའ་བའི་ཆས་སུ་ཞུགས་པ། སྤྱི་གཙུག་ན་ཐུབ་པ་མི་བསྐྱོད་པ་བཞུགས་པ། སྤྱན་གསུམ་མེ་མངག་ལྟར་དམར་ཞིང་ལ་འཁྲུག་བ་ཅུང་ཟད་གཡོན་དུ་གཟིགས་པ། ལྕེ་གློག་ལྟར་འཁྱུག་པ། གང་རྒྱངས་ཆེན་པོ་སྒྲོགས་པ། ཕྱི་ནང་གི་བདུད་ཐམས་ཅད་རླག་པར་བྱེད་པར་བསྒོམ་མོ། །དེའི་ཐུགས་ཀར་པདྨ་དམར་པོ་འདབ་མ་བཞི་པའི་སྟེང་དུ་ཉི་མའི་དཀྱིལ་འཁོར་ལ་གནས་པའི་ཧཱུཾ་སྔོན་པོ་བལྟ་ཞིང༌། མདུན་གྱི་འདབ་མ་ནས་གཡས་སྐོར་དུ། ཧྲཱིཾ་ཏྲིཾ་ཧཱུཾ་ཕཊ་རྣམས་བསྒོམ་ཞིང་ཡིག་འབྲུ་དེ་དག་ལས་དཔག་ཏུ་མེད་པའི་འོད་ཟེར་གྱི་ཚོགས་འཕྲོས་པས་འགྲོ་བའི་མི་ཤེས་པའི་མུན་པ་ཐམས་ཅད་བསྲེག་པར་བསམ་ཞིང༌། འཇིག་རྟེན་དང་འཇིག་རྟེན་ལས་འདས་པའི་ཡོན་ཏན་བློ་གྲོས་ཀྱི་སྣང་བ་ཐམས་ཅད་ཚུར་འདུས་ཏེ་རང་ལ་བསྟིམ་ཞིང་བདག་ཉིད་ཡོན་ཏན་དང་བློ་གྲོས་ཀྱི་སྣང་བ་ཐམས་ཅད་ཕུན་སུམ་ཚོགས་པས་བརྒྱན་པར་བསམ་མོ། །དེ་ནས་བཟླས་པ་བྱ་སྟེ། གཡས་དང་པོའི་རལ་གྲི་མི་རུས་ཀྱི་ཕྲེང་བར་བསྒྱུར་ལ། ཐུགས་པདྨ་ཉི་མར་རིག་སྔགས་ཀྱི་ཏིང་ངེ་འཛིན་ལ་མ་གཡོས་པའི་དང་ལས་
༄། །ཧྲཱིཾ་ཏྲིཾ་ཧཱུཾ་ཕཌ་ཅེས་ཅི་ནུས་བཟླས་སོ། །དེ་ལས་སྐྱོ་ན་པད་འདབ་ཀྱི་ཡི་གེ་ཧཱུཾ་ལ་བསྡུ། བདག་གཞན་གྱི་བློ་གྲོས་ངན་པའི་མུན་པ་ཐམས་ཅད་གཏན་ནས་དག་པར་གྱུར་ཅིག་སྙམ་པའི་སྨོན་ལམ་དྲག་པོ་གདབ་བོ། །རྗེས་ཤེས་ཀྱི་སྐབས་སུ་ཡང་རྟག་ཏུ་དཔའ་མོའི་ང་རྒྱལ་དང་མ་བྲལ་བར་བྱའོ། །དེ་འདྲའི་ཏིང་འཛིན་བཟླས་པར་བསམ། །བརྟན་ཞིང་ཚད་དུ་སྐྱོལ་གྱུར་ན། །མི་ཤེས་སྤྲིན་ཚོགས་དཔག་མེད་རྣམས། །དབྱར་ཟད་བཞིན་དུ་དེངས་པར་འགྱུར། །སྒྲོལ་མའི་བློ་འཕེལ་སློབ་དཔོན་ཀླུ་སྒྲུབ་ཀྱི་མན་ངག་སྙན་དངགས་མཁན་རྟག་པ་རྡོ་རྗེས་ཚིག་ལེའུར་བྱས་པ། རྒྱ་གར་ཤར་ཕྱོགས་ཀྱི་པཎྜི་ཏ་ཆེན་པོ་དཱ་ན་ཤཱི་ལའི་གསུང་ལྷག་ཆད་མེད་པར་བཀོད་པ་རྫོགས་སོ།།