བཞི་པ་ཁྱད་པར་ཅན་གྱི་དོན་གཏན་ལ་དབབ་པ།

བཞི་པ་ཁྱད་པར་ཅན་གྱི་དོན་གཏན་ལ་དབབ་པ་ལ་གཉིས་ལས།

ཁྱད་པར་ཅན་གྱི་གཞིའི་རྗེས་བཅས་འབྱུང་བའི་དུས་དང༌། ཁྱད་པར་གྱི་ཆོས་ལྟུང་བ་ཆེ་ཆུང་ངེས་པར་བྱ་བའོ། །དང་པོ་ནི་རང་རང་གི་སྔར་བཅས་ཀྱི་རྒྱུ་མཚན་ལྟ་བུ་སོ་ན་ཡོད་ཅིང་གང་ཟག་གི་ལོག་རྟོག་བཟློག་པའི་དགོས་པ་ཡོད་པའི་ཚེ་ན་རྗེས་བཅས་མ་དོར་བ་མུ་གསུམ་འབྱུང་ངོ༌། །སྔར་གྱི་དགག་བྱའི་རྒྱུ་མཚན་དོར་ནས་དགག་དགོས་མེད་པའི་རྒྱུ་མཚན་ཞུགས་པའི་ཚེ་ན། དགག་པ་བཅས་པའི་རྗེས་སུ་གནང་བ་རྗེས་བཅས་འབྱུང་ལ། སྔར་གྱི་དགོས་པའི་རྒྱུ་མཚན་དོར་ནས་དགག་དགོས་མེད་པའི་རྒྱུ་མཚན་ཞུགས་པའི་ཚེ་ན། སྒྲུབ་པ་བཅས་པའི་རྗེས་སུ་གནང་བ་རྗེས་བཅས་འབྱུང་ངོ༌། །དགག་དགོས་ལོག་པ་ལ་ཞུགས་པའི་ཚེ་ན་དགག་པ་ལས་སྒྲུབ་པ་རྗེས་བཅས་དང་སྒྲུབ་པ་ལས་དགག་པ་རྗེས་བཅས་འབྱུང་ངོ༌། །དགག་དགོས་ལོག་པ་དེ་ལ་ཡང་གཉིས་ཏེ། ངེས་པ་བཞིར་དགག་དགོས་ལོག་པ་དང༌། ངེས་པ་བཞི་ལས་གཞན་དུ་དགག་དགོས་ལོག་པའོ། །ངེས་པ་བཞིར་ནི་དགག་དགོས་ལོག་ཙམ་གྱིས་བཅས་པ་ལྡོག་སྟེ། དེ་ཡང་ཡུལ་ངེས་པ་ནི་ཨསྨ་པ་རན་ཏར་ཁྲུས་ཇི་ཙམ་བྱེད་ཀྱང་ལྟུང་བ་མེད་པ་ལྟ་བུའོ། །དུས་ངེས་པ་ནི་ཟླ་བ་ཕྱེད་ཅིང་ཁྲུས་བྱེད་པ་ལ་ལྟུང་བ་མེད་པ་ལྟ་བུའོ། །དངོས་པོ་ངེས་པ་ནི་རྡོའམ་སོ་ཕག་རིམ་པ་གསུམ་ལས་ལྷག་པར་བརྩིགས་ཀྱང་ལྟུང་བ་མེད་པ་ལྟ་བུའོ། །གང་ཟག་ངེས་པ་ནི་བ་ལང་བདག་ལྟ་བུ་མིད་པ་གཉིས་པས་ཕྱི་དྲོ་སྒྲེགས་པ་མིད་པ་ལ་ལྟུང་བ་མེད་པ་ལྟ་བུའོ། །དེ་ལྟར་ངེས་པ་བཞིར་ནི་དགག་བྱའི་ཤུལ་དུ་དགོས་པའི་རྒྱུ་མཚན་ཞུགས་ན་དགག་བཅས་ལས་སྒྲུབ་བཅས་སུ་འགྱུར་ཏེ། སྔར་གྱི་དགག་བཅས་ཀྱི་རྒྱུ་མཚན་དོར་ནས། སྒྲུབ་བཅས་རྣམ་པར་འཇོག་བྱེད་ཀྱི་དགོས་པའི་རྒྱུ་མཚན་ཞུགས་པའི་ཕྱིར་རོ། །སྐབས་འདིར་ཊཱི་ཀ་ལས་ཞག་བཅོ་ལྔ་ཁྲུས་ཀྱི་ཉིན་མོ་ལ་ཁྲུས་བྱ་བ་གང་ཡིན་པ་དེ་ནི་གྲགས་པ་ཡིན་པས། དེར་ཁྲུས་བྱ་བ་ལ་ནི་དུས་བྱིན་གྱིས་བརླབ་པར་བྱ་མི་དགོས་སོ་ཞེས་གསུངས་པ་དེ། ངེས་པ་བཞི་པོ་གཞན་ལ་ཡང་དུས་བྱིན་གྱིས་བརླབ་མི་དགོས་པར་སྦྱར་ཏེ་དེ་ལྟར་ན་ངེས་པ་བཞི་པོ་གང་རུང་རེ་རེས་ཀྱང་བཅས་པའི་ས་མཚམས་ཟིན་ཏོ། །དུས་དྲན་པ་ལ་སོགས་པ་བཅས་པའི་ས་མཚམས་འཛིན་བྱེད་གཞན་མི་དགོས་སོ། །དམིགས་བསལ་ནི། ཡུལ་ངེས་པ་བྱང་གི་སྒྲ་མི་སྙན་དུ་བྱིན་ལེན་མ་བྱས་པར་ཟ་བ་ལ་ནི་དུས་བྱིན་གྱིས་བརླབ་དགོས་པར་ལུང་དང་བྱིན་ལེན་གྱི་ཊཱི་ཀ་ལས་གསུངས། གནས་དེར་བྱིན་ལེན་མ་བྱས་པར་ཟ་བའི་ལྟུང་བ་དངོས་དེ་མི་འབྱུང་ཡང་དུས་དྲན་པར་མ་བྱས་ན་བསླབ་བྱའི་ཉེས་བྱས་འབྱུང་བའོ། །གཉིས་པ་ངེས་པ་བཞི་ལས་གཞན་དུ་ནི་དགག་དགོས་ལོག་པ་ཙམ་གྱིས་བཅས་པ་མི་ལྡོག་སྟེ། གནས་ངན་ལེན་མ་བརྗོད་ན་ཁྱིམ་པ་རྣམས་མ་དད་པ་སྐྱེ་བའི་དགག་བྱ་འབྱུང་སྟེ། དགག་དགོས་ལོག་ཀྱང༌། དགག་བྱ་སོ་ན་གནས་སོ། །དེའི་ཚེ་ནའང་གནས་ངན་ལེན་བརྗོད་དུ་རུང་བ་དེ་བསྐོ་བའི་ཆོ་ག་ལ་ལྟོས་པར་གསུངས་པས་མ་བསྐོས་ན་དེའི་ཚེ་ནའང་གནས་ངན་ལེན་བརྗོད་དུ་མི་རུང་བར་གྲུབ། གནས་ངན་ལེན་མ་བརྗོད་ན། མ་དད་པ་སྐྱེ་བའི་དགག་བྱ་བྱུང་ནའང་གནས་ངན་ལེན་མི་བརྗོད་པའི་ཕྱིར་ཏེ། རྩ་བར། བསྐོ་བ་མ་བྱས་པ་ལའོ། །ཞེས་གསུངས་པས་གྲུབ་བོ། །རིགས་པས་ཀྱང་བྱ་བ་དེ་འབྲེལ་གྱི་དགག་དགོས་ལོག་ཙམ་གྱིས་བཅས་པ་ལྡོག་ཅིང་དགག་བཅས་ལས་སྒྲུབ་བཅས་སུ་འགྱུར་ན་ནི། བཅས་པ་ཧ་ཅང་མི་བརྟན་པའི་སྐྱོན་དུ་འགྱུར་བའི་ཕྱིར་བྱ་བ་དེ་འབྲེལ་གྱི་དགག་དགོས་ལོག་ཙམ་གྱིས་བཅས་པ་མི་ལྡོག་གོ །ངེས་པ་བཞི་ལས་གཞན་དུ་ཡང་དགག་དགོས་ལོག་པའི་སྟེང་དུ་བཅས་པའི་ས་མཚམས་འཛིན་བྱེད་ཡོད་ན་ནི་བཅས་པ་ལྡོག་སྟེ། གནས་ངན་ལེན་བརྗོད་པའི་དགག་དགོས་ལོག་ཅིང༌། བཅས་པའི་ས་མཚམས་འཛིན་བྱེད་དུ་གནས་ངན་ལེན་བརྗོད་པ་བསྐོ་བའི་ཆོ་ག་བྱས་ན། སྔར་ནི་གནས་ངན་ལེན་བརྗོད་པ་དགག་པར་བཅས་ཀྱང༌། ཕྱིས་གནས་ངན་ལེན་བརྗོད་པ་སྒྲུབ་བཅས་སུ་འགྱུར་ཏེ། དེའི་ཚེ་ན་གནས་ངན་ལེན་མི་བརྗོད་ན་ཉེས་པ་བསྐྱེད་པ་ལྟ་བུའོ། །གཉིས་པ་ཁྱད་པར་གྱི་ཆོས་ལྟུང་བ་ཆེ་ཆུང་ངེས་པར་བྱ་བ་ནི་ངེས་པ་བཞིར་དགག་དགོས་ལོག་སྟེ། དགག་བཅས་ལས་སྒྲུབ་བཅས་སུ་གྱུར་ན། སྔར་གྱི་དགག་བཅས་ལས་འདས་པའི་ལྟུང་བ་དང་ཕྱིས་ཀྱི་སྒྲུབ་བཅས་ལས་འདས་པའི་ལྟུང་བ་དེ་གཉིས་ལྟུང་བ་མཉམ་པོར་འབྱུང་སྟེ། ཡུལ་ཨསྨ་པ་རན་ཏ་དང༌། ཚད་པ་མཉམ་པའི་ཡུལ་ངེས་པ་འགའ་ཞིག་ན་ཡུལ་ཁམས་དེ་ན་ཡུལ་མི་ཐམས་ཅད་ཉིན་རེ་བཞིན་ཁྲུས་བྱེད་པའི་ཡུལ་ཆོས་ཡོད་པའི་དབང་དུ་བྱས་ནས། དེར་དགེ་སློང་གིས་ཉིན་རེ་བཞིན་ཁྲུས་མ་བྱས་ན་ཡུལ་ཆོས་དང་འགལ་ཞེས་དགེ་སློང་ལ་ཡུལ་མི་ཐམས་ཅད་མ་དད་ཅིང་སྡིག་རྐྱེན་དུ་འགྱུར་ན། དེའི་ཚེ་ན་ཡུལ་དེར་དགེ་སློང་གིས་ཉིན་རེ་བཞིན་ཁྲུས་བྱའམ་མི་བྱ་སྙམ་ན་ཡུལ་ངེས་པར་དགག་དགོས་ལོག་པས་དགག་བཅས་སྒྲུབ་བཅས་སུ་གྱུར་པ་སྟེ། དེར་དགེ་སློང་གིས་ཉིན་རེ་བཞིན་ཁྲུས་མི་བྱེད་ན་འདུལ་བ་མདོར་བསྡུས་ལས་འདས་པའི་ལྟུང་བྱེད་སྐྱེད་པ་ལྟ་བུ་དང༌། ཊཱི་ཀ་ལས། ཡུལ་གང་ན་བལ་དཀར་པོ་རིན་ཆེ་ཞིང་དཀོན་ལ། སྲིན་བལ་དང་བལ་ནག་པོ་རིན་ཆུང་ཞིང་ཤིན་ཏུ་མོད་པ་དེར་ནི་སྲིན་བལ་དང་བལ་ནག་པོའི་གནས་སུ་བལ་དཀར་པོ་རིག་པར་བྱའོ། །ཞེས་དང༌། རང་གི་རྣམ་བཤད་ལས། བལ་ནག་པོ་འབའ་ཞིག་ལ་ལྟུང་བ་མེད་དེ། དཀར་པོ་ལ་ནི་ལྟུང་བ་ཡོད་དོ་ཞེས་གོ་ལྡོག་ནས་བརྗོད་དེ་ཞེས་གསུངས་པ་ལྟ་བུའོ། །གཞི་དཀར་ནག་ལྡོག་པའི་ལྟུང་བ་མཉམ་པོར་གསུངས་པའི་གནད་ཀྱིས། བྱས་ན་ལྟུང་བ་བསྐྱེད་པ་ལས་སྐབས་འདིར་ནི་བྱ་བ་དེ་མ་བྱས་ན་ལྟུང་བ་བསྐྱེད་ཅེས་བྱ་བ་དགག་སྒྲུབ་ལྡོག་པའི་ལྟུང་བ་ཡང་མཉམ་པོར་འོང་སྟེ། བཅས་པ་རྣམ་འཇོག་གི་རྒྱུ་མཚན་མཚུངས་པའི་ཕྱིར་རོ། །ངེས་པ་བཞི་ལས་གཞན་དུ་ནི་དགག་དགོས་ལོག་པའི་སྟེང་དུ་བཅས་པའི་ས་མཚམས་འཛིན་བྱེད་ཀྱང་ཡོད་པར་འགྱུར་ཏེ། དགག་བཅས་ལས་སྒྲུབ་བཅས་སུ་གྱུར་པ་ལྟ་བུ་ལ་ནི། སྔར་བཅས་ཀྱི་ལྟུང་བ་བས་རྗེས་བཅས་ཀྱི་ལྟུང་བ་ན་སྨད་པར་འགྱུར་ཏེ། སྔར་བཅས་ལ་གནས་ངན་ལེན་བརྗོད་ན་ལྟུང་བྱེད་དུ་འགྱུར་ཡང༌། རྗེས་བཅས་ལ་གནས་ངན་ལེན་མ་བརྗོད་པ་ལ་ནི་ཉེས་བྱས་སུ་འགྱུར་གྱི་ལྟུང་བྱེད་དུ་མི་འགྱུར་ཏེ། འབྱུང་རིང་འབྲེལ་ཆུང་དགག་བྱ་གནས་སྐབས་ཀྱི་སྒོ་ནས་མི་རྫོགས་པའི་ཕྱིར་རོ། །དཔེར་ན་དགེ་སློང་མས་ཡང་ཡང་ཟ་བ་ལ་ལྟུང་བྱེད་མི་བསྐྱེད་པའི་རྒྱུ་མཚན་ནི་ཊཱི་ཀ་ལས། དགེ་སློང་མ་རྣམས་ནི་ཤས་ཆེར་མཆོད་པར་བྱ་བ་མ་ཡིན་པའི་ཕྱིར་རོ། །ཞེས་གསུངས་པ་བཞིན་ནོ། །འོ་ན་སྔར་བཅས་ཀྱི་ལྟུང་བ་བས་རྗེས་བཅས་ཀྱི་ལྟུང་བ་ན་སྨད་དུ་འགྱུར་ན། སྔར་བཅས་ལ་དགེ་སློང་མས་དགེ་སློང་ལ་ཕྱག་བྱ་དགོས་པ་ན་ཕྱག་མ་བྱས་ན་ཉེས་བྱས་སུ་འགྱུར་བ་ལས་རྗེས་བཅས་དགེ་སློང་གནས་ནས་ཕྱུངས་པ་ལ་ཕྱག་འཚལ་བ་བཀག་པ་ན། ཕྱག་བྱས་པ་ལ་བརྟེན་ནས་བཟློག་པའི་ཕམ་པ་བསྐྱེད་པས། སྔར་བཅས་ཀྱི་ལྟུང་བ་བས་རྗེས་བཅས་ཀྱི་ལྟུང་བ་ཆེ་བ་དང་འགལ་ཞེ་ན། དེ་ནི་དམིགས་བསལ་ཡིན་ནོ། །ཞེས་མཚོ་ཊཱིཀ་ལས་གསུངས་སོ། །བཀག་པ་ནི་དགག་བྱ་དང་ལྡན་པ། སྲོག་ལ་བབ་ཀྱང་མ་གནང་བ་སྟེ། ཊཱི་ཀ་ལས། བཀག་པ་ཞེས་བྱ་བ་ནི་སྲོག་ལ་བབ་ཀྱང་གཞི་འདི་རྣམ་པ་ཐམས་ཅད་དུ་མི་བྱའོ་ཞེས་བྱ་བ་སྟེ། དཔེར་ན་ང་ལ་སྟོན་པར་སྨྲ་བ་རྣམས་ཀྱིས་ཐ་ན་རྩྭའི་མཆོག་མས་ཀྱང་ཆང་མི་བླུད་མི་བཏུང་ངོ༌། །ཞེས་དང༌། སྲོག་གཅོད་པ་ལ་སོགས་པ་རང་བཞིན་གྱི་ཁ་ན་མ་ཐོ་བ་དང་བཅས་པ་མི་བྱའོ་ཞེས་གསུངས་པ་ལྟ་བུའོ། །ཞེས་གསུངས་པའི་ཕྱིར་རོ། །གནང་བ་ཞེས་པ་ནི་དགག་དགོས་ཀྱི་རྒྱུ་མཚན་དང་མི་ལྡན་པ་ཅི་དགར་སྤྱད་པར་གནང་བ་སྟེ། ཊཱི་ཀ་ལས། གནང་བ་ཞེས་བྱ་བ་ནི་ཅི་དགར་སྤྱད་པའི་ཡུལ་ལ་བྱ་བ་གང་ཡང་རུང་བ་ཞིག་མི་བྱེད་དམ་བྱེད་ན་ལྟུང་བ་ཞེས་བྱ་བའི་ཉེས་པ་མེད་པ་སྟེ། དཔེར་ན་ཕས་ཀྱི་རྒོལ་བ་ཚར་བཅད་པའི་ཕྱིར། ཕྱི་རོལ་པའི་བསྟན་བཅོས་བཀླག་པར་ངས་རྗེས་སུ་གནང་ངོ་ཞེས་གསུངས་པ་ལྟ་བུའོ། །ཞེས་སོ། །ཅུང་ཟད་དཔྱད་ན་འདི་ནི་དགག་སྒྲུབ་གནང་གསུམ་གྱི་ནང་ནས་སྒྲུབ་པ་ཡིན་ཏེ། རྒོལ་བ་ཚར་གཅོད་པའི་ནུས་པ་ཡོད་པ་དག་གིས་འདི་བྱ་དགོས་པ་ཡིན་པའི་ཕྱིར་ཏེ། ཕྲན་ཚེགས་སྒོ་གཉིས་པ་ལས། དགེ་སློང་དག་གིས་འཇིག་རྟེན་རྒྱང་འཕེན་པ་ལ་སོགས་པ་ཕྱི་རོལ་བའི་བསྟན་བཅོས་ལ་བསླབ་པར་བྱའོ། །ཞེས་དང༌། ཕྲན་ཚེགས་ལས། ཕས་ཀྱི་རྒོལ་བ་ཚར་གཅོད་ནུས་པ་གང་ཡིན་པ་དེ་དག་གིས་འཇིག་རྟེན་རྒྱང་འཕེན་པ་ལ་སོགས་པ་ཕྱི་རོལ་བའི་བསྟན་བཅོས་ལ་བསླབ་པར་བྱའི་བྱིས་པ་དང་རྨོངས་པ་དང་མི་གསལ་བ་དང་མི་མཁས་པ་དག་གིས་མ་ཡིན་ནོ། །ཞེས་གསུངས་པའི་ཕྱིར་ཟེར་ན་དཔྱད་པར་བྱའོ། །ལྔ་པ་འདི་དང་འོག་ནས་ལྟུང་བ་དང་ཞེས་བྱ་བ་ལ་སོགས་པའི་ལྔ་པས་ནི་འདུལ་བ་འབའ་ཞིག་ཤེས་པ་ཉིད་བསྟན་ཏོ་ཞེས་ཊཱི་ཀ་ལས་བཤད་དོ། །