སྨིན་གླིང་ལྷ་ཆེན་གསོལ་བསྡུས་བཞུགས།།
ཧྲཱིཿ མདུན་དུ་པདྨ་རཱ་གའི་ཁང་བཟང་དབུས། །ཆུ་སྐྱེས་དམར་སེར་ཉི་མའི་གདན་གྱི་སྟེང་། །ལྷ་ཆེན་དབང་ཕྱུག་མ་ཧཱ་དེ་ཝ་ནི། །སྐུ་མདོག་པདྨ་རཱ་གའི་མདངས་ལྡན་པ། །ཆགས་པའི་ཉམས་ལྡན་སྒེག་ཅིང་ཁྲོ་འཛུམ་ཅན། །ཞལ་གཅིག་ཕྱག་གཉིས་ཉི་ཟླའི་སྤྱན་གསུམ་བསྒྲད། །ཕྱག་གཡས་ལྕགས་ཀྱུ་གཡོན་པས་ཞགས་པ་བསྣམས། །ཞབས་གཉིས་གཡས་བརྐྱང་གཡོན་བསྐུམ་དོར་སྟབས་ཅན། །དབུ་སྐྲ་ཐོར་ཚུགས་ཟུར་ཕུད་ཟླ་བས་མཚན། །གཅེར་བུ་བདེ་བ་རྒྱས་པའི་ལིང་ག་བསྒྲེངས། །སྣ་ཚོགས་དར་གྱི་སྟོད་གཡོག་རིན་ཆེན་བརྒྱན། །རབ་མཛེས་ཨུཏྤལ་དམར་པོའི་དོ་ཤལ་ཅན། །དབང་ཕྱུག་ཆེན་པོའི་སྐུ་ཡི་གཡོན་ཟུར་ན། །གསང་བའི་ཡུམ་ཆེན་ལྷ་མོ་དཀའ་བཟློག་མ། །དམར་མོ་མཛེས་འཛུམ་གཞོན་ནུའི་ལང་ཚོ་ཅན། །གཅེར་མོ་སྐྲ་དཀྲོལ་ལྕགས་ཀྱུ་ཞགས་པ་བསྣམས། །སྣ་ཚོགས་དར་དང་མེ་ཏོག་དམར་པོས་བརྒྱན། །བཞེངས་སྟབས་ཡབ་ལ་འདུད་ཅིང་ཆགས་པའི་ཚུལ། །ཕྱོགས་བཞིར་གནས་པའི་གསང་བའི་ཌཱཀྐི་བཞི། །འགུགས་དང་འཆིང་དང་རྨོངས་དང་མྱོས་བྱེད་ཚོགས། །བཞི་ཀ་མདོག་དམར་ཞལ་གཅིག་ཕྱག་གཉིས་མ། །ཕྱག་གཡས་ལྕགས་ཀྱུ་གཡོན་པས་ཞགས་པ་བསྣམས། །རབ་མཛེས་བཅུ་དྲུག་ལང་ཚོའི་དཔལ་སྟེར་ཅན། །སྲིད་པ་གསུམ་གྱི་འཁོར་ཚོགས་སྤྲིན་ལྟར་གཏིབས། །སྤྱན་འདྲེན་མཆོད་པའི་གནས་འདིར་གཤེགས་སུ་གསོལ། །ཕྱི་ནང་གསང་བའི་མཆོད་པ་བླ་ན་མེད། །ཁྱད་པར་མེ་ཏོག་ཕྲེང་བ་རིན་ཆེན་དབྱིག །འབྲུ་ལྔའི་ཕྱེ་མར་མྱོས་བྱེད་མངར་གསུམ་གྱི། །དྲི་ཞིམ་སྨན་གྱིས་བཏབ་པའི་དཔལ་གྱི་བཤོས། །ལ་དུ་རང་བྱུང་མེ་ཏོག་ཏིལ་མར་སྒྲོན། །དཀར་གསུམ་མངར་གསུམ་ཤ་ཆེན་ཁུར་བ་དང་། །འབྲས་ཆང་རྒུན་ཆང་ཙནྡན་དམར་པོའི་ཆབ། །བྱང་སེམས་དཀར་དམར་བཙོས་དང་རྗེན་ཤ་སོགས། །རྣམ་མང་སྣ་ཚོགས་མཆོད་པའི་སྤྲིན་ཕུང་འདི། །ཕུལ་བས་བདག་ཅག་ནད་མེད་ལང་ཚོ་ལྡན། །ཚེ་དཔལ་རྒྱས་ཤིང་ཁམས་གསུམ་དབང་དུ་བསྡུས། །མ་རུང་དགྲ་ལས་རྣམ་པར་རྒྱལ་གྱུར་ཏེ། །དངོས་གྲུབ་མ་ལུས་ཡིད་བཞིན་སྩལ་དུ་གསོལ། །རྫོགས་སྤྲུལ་ལྔ་པས་སོ། །