སྒྲུབ་བརྒྱུད་ཀྱི་གདན་རབས།
སྤྲུལ་སྐུ་སྣ་ཚོགས་རང་གྲོལ།
༈ ད་ནི་རང་ཅག་རྣམས་ཀྱི་སྒྲུབ་བརྒྱུད་ཀྱི་གདན་རབས་བརྗོད་པར་བྱ་སྟེ། དེ་ལ་སྤྲུལ་སྐུ་སྣ་ཚོགས་རང་གྲོལ་ནི། གཏེར་ཆེན་རཏྣ་གླིང་པའི་སྐྱེ་བ་དེ་མ་ཐག་པ་སྟེ། ལྷོ་བྲག་སྨན་ཐང་ཞོལ་དུ་ཡབ་ཚེ་དབང་བསམ་གྲུབ་དང་། ཡུམ་ཨོ་རྒྱན་སྐྱིད་ཀྱི་སྲས་སུ་ཤིང་སྟག་ལ་འཁྲུངས། བྱིས་པའི་དུས་ནས་དད་པ་དང་སྙིང་རྗེ་ཆེ་ཞིང་དམ་པའི་བག་ཆགས་སད། དགུང་ལོ་བདུན་བརྒྱད་ལ་བྲིས་ཀློག་སྦྱངས་པ་ཚེགས་མེད་དུ་མཁྱེན། བཅོ་ལྔ་ལ་ལྷ་ལུང་དུ་མཁན་ཆེན་ཚུལ་དཔལ་བ་དང་། ལྷུན་བཀྲས་པ་ལས་རབ་ཏུ་བྱུང་། ཆོས་སྤྱོད་ཕྲིན་སྒྲུབ་གར་འཆམས་དཀྱིལ་འཁོར་བྲི་ཐིག་སོགས་སྦྱངས་པས་མི་རིང་བར་གཞན་གྱི་སློབ་དཔོན་ཕེར་བ་བྱུང་། ཕྱིས་སྤོས་ཁང་པ་ཀུན་དགའ་བློ་གྲོས་དང་། ཆོས་ལུང་པ་ཚུལ་དཔལ་ལ་མཁན་སློབ་ཞུས་ནས་བསྙེན་པར་རྫོགས་ཤིང་འདུལ་བའི་བསླབ་བྱ་དང་ལག་ལེན་རྣམས་ཀྱང་ལེགས་པར་སྦྱངས། མཁན་སློབ་གཉིས་དང་། མཁས་གྲུབ་རིན་ཆེན་བཟང་པོ། གཏེར་ཆེན་པདྨ་གླིང་པ། སྤྲུལ་སྐུ་བྱང་ཆུབ་གླིང་པ། ཀུན་སྤངས་ལེགས་པའི་ཤེས་རབ་སོགས་བཤེས་གཉེན་དམ་པ་དྲུག་ཅུ་ཙམ་སྔ་ཕྱིར་བསྟེན་ནས་བཀའ་གདམས་པ་ས་རྙིང་དྭགས་ཤངས་ཞི་གཅོད་ཇོ་ཞལ་བོ་དོང་པ་སོགས་ཡོངས་སུ་གྲགས་པའི་ཆོས་ཚུལ་དུ་མའི་དབང་ཁྲིད་ལུང་བཤད་མན་ངག་སོགས་གྲངས་འཛིན་པ་ཙམ་ཡང་དཀའ་བའི་གནས་སུ་གྱུར་པ་གསན་ཅིང་། ཁྱད་པར་མཚུངས་མེད་ཀུན་དགའ་རྒྱལ་མཚན། རྫོགས་ཆེན་པ་ཀུན་དགའ་བཀྲ་ཤིས། སྨན་རྩེ་བ་བློ་གྲོས་རྒྱལ་མཚན། མཁས་གྲུབ་མ་ཏི་དྷྭ་ཛ། བྱམས་སྡིངས་པ་ཁུ་དབོན་ལ་སོགས་ལས་ཆོས་རྗེ་ཀུན་མཁྱེན་ཆེན་པོའི་བཀའ་སྲོལ་སྙིང་ཐིག་ཡ་བཞི་མཛོད་བདུན་ངལ་གསོ་སྐོར་གསུམ་གྱིས་མཚོན་ཕྲིན་ལས་བཀའ་སྲུང་དང་བཅས་པ་མཐའ་དག་དོན་གཉེར་ཆེན་པོས་གསན་ནས་བསམ་སྒོམ་གྱིས་ཀུན་ཆུབ་པར་མཛད་ཅིང་། ཤེལ་བྲགམཆིམས་ཕུ། མཁར་ཆུ། ཡང་རྫོང་སོགས་དབེན་པའི་སྒྲུབ་གནས་དུ་མར་བསྐྱེད་རྫོགས་ཟབ་མོའི་རྣལ་འབྱོར་
ལ་རྩེ་གཅིག་པའི་ཉམས་ལེན་ལོ་ཟླ་དུ་མར་སྦྲེལ་བ་ལན་མང་དུ་མཛད་པས་རང་བཞིན་རྫོགས་པ་ཆེན་པོའི་ལྟ་སྒོམ་འབྲས་བུའི་དྲོད་ཚད་མཐར་ཕྱིན། ཡི་དམ་ལྷག་པའི་ལྷ་དུ་མས་ཞལ་གཟིགས་ཤིང་ལུང་བསྟན་པ་ཐོབ། ཆོས་བརྒྱད་ཀྱི་འཆིང་བས་མ་གོས་པའི་འགྲོ་ཕན་གྱི་འཕྲིན་ལས་ལྷུན་གྲུབ་ཏུ་ཤར། དགུང་ལོ་ཞེ་གཉིས་པ་ཤིང་ལུག་ལོར་དར་རྒྱས་ཆོས་སྡིངས་ཀྱི་རི་ཁྲོད་བཏབ། ཐར་པ་དོན་གཉེར་གྱི་ཚོགས་པའང་ལྔ་བརྒྱར་ལོངས་ཙམ་འདུས། ཆོས་དང་མཐུན་པའི་རྣམ་ཐར་ལ་བཀོད། དབྱར་དགུན་གྱི་དུས་ཆོས་ཁྲིགས་སུ་བཅད་ནས། དུས་མེད་ཀྱི་དབང་ཆོས་སོ་སོའི་མོས་པ་དང་འཚམ་པར་གསུངས་ནས་ཉམས་རྟོགས་ཅན་མང་དུ་ཐོན། ཕྱོགས་ཀྱི་དད་ལྡན་རྣམས་ཀྱི་ཞིང་དུ་དབུས་གཙང་ལྷོ་མོན་ལ་སོགས་པར་བྱོན་ནས་སྒྲུབ་དབང་ཁྲིད་ལུང་མན་ངག་སོགས་ཆོས་སྒོ་རིས་མེད་སྐལ་བ་བཞིན་བསྟན་པས་འབྲེལ་ཚད་དོན་ཡོད་པར་མཛད། དམ་པའི་ཆོས་ལ་བརྟེན་པའི་སློབ་མའང་ཞྭ་དམར་བ་དཀོན་མཆོག་འབངས་དང་། འབྲི་གུང་ཟུར་པ་སོགས་ཆེ་དགུ་དུ་མ་དང་། སྤྲུལ་སྐུ་བྱང་ཆུབ་གླིང་པ། སྣང་རྩེ་བ་གར་གྱི་དབང་པོ། བདེ་ཆེན་གླིང་པ་སོགས་ཟབ་གཏེར་གྱི་བཀའ་བབས་པ་རྣམས་དང་། དཔལ་སྡིངས་རབ་འབྱམས་པ་དང་དཔལ་སྒང་ལོ་ཙཱ་བ་སོགས་མཁས་པ་དུ་མ་དང་། གྲུབ་ཆེན་ཀུན་བཟང་དཔལ་འབར་དང་། ཀློང་ཡངས་པ་སོགས་སྒོམ་ཉམས་ཅན་གྱི་རྣལ་འབྱོར་པ་དུ་མ་དང་། ཁྱད་པར་བསྟན་འཛིན་ཆོས་ཀྱི་རྒྱལ་པོ་དང་། ཐུགས་སྲས་ཀུན་དགའ་གྲགས་པ། ཤ་མི་དཔལ་འབྱོར་རྒྱལ་མཚན་པ་སོགས་བཀའ་སྲོལ་སྙིང་པོར་འཛིན་པ་དུ་མ་དང་། ས་སྐྱོང་ཡར་འབྲོག་པ་དང་། འཕྱོངས་རྒྱས་པ་སོགས་སྡེ་བདག་མང་པོ་དང་། གཞན་ཡང་རབ་བྱུང་། སྔགས་པ། སྒོམ་ཆེན་ཕོ་མོ་ཁྱིམ་བདག་སོགས་གདུལ་བྱ་མང་པོའི་དོན་མཛད་པས་དབུས་གཙང་མངའ་རིས་ཁམས་ཀོང་མོན་སོགས་སུ་ཆོས་བརྒྱུད་འཛིན་པའི་སློབ་མ་ཡང་སློབ་དང་བཅས་པ་མང་དུ་བྱུང་བས་མཚོན་རྙིང་མའི་བསྟན་འཛིན་ཞིག་ལ། ཆོས་ཀྱི་ཕྲིན་ལས་ཆེ་བར་མངོན་སུམ་དུ་གྲུབ་བོ། །དེ་ལྟར་ཞིང་འདིར་ལོ་གྲངས་དོན་བདུན་དུ་བཞུགས་ནས་ལྕགས་རྟ་ལ་གཡོ་རུ་ཁྲ་འབྲུག་གི་ཉེ་འདབས་སུ་གཤེགས་སོ། །
སྤྲུལ་སྐུ་བསྟན་འཛིན་གྲགས་པ།
༈ སྤྲུལ་སྐུ་བསྟན་འཛིན་གྲགས་པ་ནི། སྔན་ལུང་རྒབ་ལར་ཡབ་བཀྲ་ཤིས་དང་ཡུམ་བསམ་གཏན་བཟང་མོའི་སྲས་སུ་མེ་སྤྲེལ་ལ་འཁྲུངས། གཏེར་ཆེན་པདྨ་གླིང་པའི་སྤྲུལ་པར་ལུང་གིས་ཟིན། གསུང་བྱེ་བ་ཙམ་ནས་སྔོན་གྱི་བག་ཆགས་གསལ་བར་གསུངས། དགུང་ལོ་བཞི་པ་ལ་གཏེར་སྟོན་གྱི་སྲས་རྣམས་ཀྱིས་བུམ་ཐང་དུ་སྤྱན་དྲངས་སོ་སོའི་སར་རྙེད་བཀུར་ཕུན་སུམ་ཚོགས་པས་མཆོད། པདྨ་གླིང་དུ་སྲས་དཀོན་མཆོག་བཟང་པོའི་གདུང་ཚབ་ཏུ་བཞུགས་པར་བྱས་ཏེ་རབ་ཏུ་བྱུང་། གོང་མའི་གཏེར་ཁའི་དབང་ལུང་སྒྲུབ་ཕྲིན་རྣམས་གསན་སྦྱོང་ལ་ཞུགས་ནས་མི་རིང་བར་ཆོས་རྗེ་དཀོན་མཆོག་བཟང་པོ་གཤེགས་པས་བདེ་ཆེན་གླིང་དུ་སྲས་ཟླ་བའི་སར་རེ་ཞིག་བཞུགས་ཏེ་ཆོས་བཀའ་ཅི་རིགས་པ་གསན། དགུང་ལོ་བཅུ་གཉིས་པ་ལ་སྤྲུལ་སྐུ་སྣ་ཚོགས་རང་གྲོལ་གྱིས་བོད་དུ་སྤྱན་དྲངས། ལྷོ་བོད་ཀྱི་བསྟི་གནས་རྣམས་སུ་བཞུགས་སུ་གསོལ་ཏེ། རྙེད་བཀུར་གྱིས་རིམ་གྲོ་དང་། མདོ་སྔགས་གསར་རྙིང་གི་ཆོས་སྒོ་མཐའ་ཡས་པ་དང་། ཁྱད་པར་ཆོས་རྗེ་ཀུན་མཁྱེན་ཆེན་པོ་དང་། གཏེར་སྟོན་པདྨ་གླིང་པའི་ཆོས་སྐོར་རྣམས་ཀྱི་དབང་ཁྲིད་ལུང་མན་ངག་ཕྱག་ལེན་དང་བཅས་པ་ཐམས་ཅད་བུམ་པ་གང་བྱོར་གསན་ཅིང་དེ་དག་གི་དོན་བསྐྱེད་རྫོགས་ཟབ་མོའི་རྣལ་འབྱོར་གྱིས་སྒོམ་སྒྲུབ་དང་སྦྱངས་པ་རྣམས་བླ་མའི་དྲུང་དུ་སྒྲོ་འདོགས་ཆོད་པར་མཛད། ཉི་ཤུ་པ་ལ་ལྷོ་བྲག་ཏུ་བྱོན། མཚོ་ཡུལ་བྲག་དཀར་བས་དགོན་གནས་སོགས་ཀྱི་འབུལ་བས་མཚོན་སྔོན་གྱི་བུ་སློབ་དང་ཡོན་བདག་ཐམས་ཅད་ཀྱིས་བཏུད་ཅིང་མཆོད། དེར་བླ་མ་དབུ་མཛད་པ་ལས་དབང་ལུང་ཅི་རིགས་པ་དང་འཆམས་དབྱངས་སོགས་གསན་ཅིང་སྦྱངས། བུམ་ཐང་དུ་སྲས་ཟླ་བའི་སྤྱན་སྔར་བཀའ་བརྒྱད་སྒྲུབ་དབང་སོགས་དབང་ལུང་འགའ་ཞིག་གསན། ཕྱོགས་དེའི་སྐྱེ་བོ་མཆོག་དམན་ཀུན་གྱིས་མཆོད་ཅིང་མོས་པ་དང་འཚམ་པའི་ཆོས་ཀྱིས་དོན་ལྡན་དུ་མཛད་སླར་ཡང་བོད་དུ་བྱོན་ནས་རིགས་བདག་སྤྲུལ་སྐུ་ཆེན་པོ་ཉིད་དང་། གཞན་ཡང་ས་སྐྱ་སྔགས་འཆང་ཆེན་པོ། རྗེ་བཙུན་གྲོལ་མཆོགསྣང་རྩེ་རིག་འཛིན་སོགས་ཡོངས་འཛིན་དུ་མ་ལ་ཆོས་སྒོ་རྣམ་གྲངས་མཐའ་ཡས་པ་གསན། མཆིམས་ཕུ་ལ་སོགས་པར་ཟབ་
ལམ་གྱི་སྒྲུབ་པ་ནན་ཏན་དུ་མཛད་ཅིང་གནས་ལུགས་ཟབ་མོའི་དོན་རྟོགས། ལྷག་པའི་ལྷ་དུ་མའི་ཞལ་གཟིགས་ཤིང་ལུང་བསྟན་པའང་ཐོབ། དེ་ནས་ཆོས་རྗེ་ཉིད་ཀྱི་དགོན་གནས་རྟེན་གསུམ་དང་བཅས་པ་ཕོག་ནས་གདན་སར་དབང་བསྐུར། ཞི་བར་གཤེགས་རྗེས་དགོངས་རྫོགས་རྟེན་བཞེངས་སོགས་སྒྲུབ་པའི་ཁུར་བཞེས་ཤིང་། ཕྱིས་གུ་རུ་གཙོ་འཁོར་གྱི་གསེར་སྐུ་མི་ཚད་མ་སོགས་རྟེན་བཞེངས་དུ་མ་དང་། དབྱར་དགུན་གྱི་སྒྲུབ་དབང་དུས་ཁྲིད་གསུང་བས་མཚོན་བུ་སློབ་ཡོན་བདག་གི་འཛིན་སྐྱོང་སོགས་བླ་མའི་འཕྲིན་ལས་སྐྱོང་བའི་ཁུར་བཞེས་ཤིང་། རྒྱལ་སྲས་པདྨ་ཆོས་རྒྱལ་དང་། བྱང་བདག་དབང་པོའི་སྡེ་སོགས་ཀྱིས་ཀྱང་གུས་པར་བཏུད་པས་མཚོན། ལྷོ་མོན་དང་གཙང་རོང་སོགས་ཀྱི་གདུལ་བྱ་སོ་སོའི་ཞིང་དུ་བྱོན་ཏེ་དེ་དག་གི་རེ་བ་དང་མཐུན་པའི་དོན་མཛད། རིགས་སྲས་པདྨ་འཕྲིན་ལས་ཆོས་དང་ཟང་ཟིང་གཉིས་ཀས་བསྐྱངས་ཏེ། རང་གི་འཁྲུངས་ཡུལ་དང་ཉེ་བའི་རི་ལ་དགོན་གནས་འདེབས་པར་བཀའ་བསྒོས་པ་ལྟར་སྒང་སྟེང་གསང་སྔགས་ཆོས་གླིང་གི་དགོན་སྡེ་བཏབ་ཅིང་བསྟན་པའི་རྒྱུན་བཟུང་བ་ཡང་འདིའི་ཕྲིན་ལས་ཀྱི་རྒྱུན་ཡིན། དབུས་སུ་རྗེ་སྣ་ཚོགས་རང་གྲོལ་གྱི་སྤྲུལ་སྐུ་གདན་སར་སྤྱན་དྲངས། དབང་ལུང་མན་ངག་དང་བཅས་པ་མཐའ་རྒྱས་སུ་སྩལ་ཏེ་བསྟན་པའི་བདག་པོར་མངའ་གསོལ་ནས། མི་རིང་བར་དགུང་ལོ་དྲུག་ཅུ་རེ་གཉིས་པ་མེ་མོ་བྱ་ལོ་ནག་ཟླའི་ཉེར་བརྒྱད་ལ་དར་རྒྱས་ཆོས་སྡིངས་ཀྱི་དབེན་གནས་སུ་ངོ་མཚར་བའི་ལྟས་དང་བཅས་ཏེ་གཤེགས་སོ། །
མཁས་གྲུབ་མདོ་སྔགས་བསྟན་འཛིན།
༈ མཁས་གྲུབ་མདོ་སྔགས་བསྟན་འཛིན་ནི། གཡོ་རུ་དོལ་དུ་ཡབ་སྨྱོས་རྡོ་རྗེ་ཚེ་དབང་དང་ཡུམ་བསོད་ནམས་བུ་ཁྲིད་ཀྱི་སྲས་སུ་མེ་བྱི་ལ་འཁྲུངས། རྗེ་སྣ་ཚོགས་རང་གྲོལ་གྱི་སྔོན་རབས་གསལ་བར་གསུངས་པས་མཚོན་དམ་པའི་བག་ཆགས་བཟང་པོ་སད། དགུང་ལོ་དྲུག་པ་ལ་གོང་མའི་གདན་སར་སྤྱན་དྲངས། བྲི་ཀློག་དང་ཕྲིན་སྒྲུབ་སོགས་ཀྱི་ཐུགས་སྦྱོང་ཚེགས་མེད་དུ་ཆུབ། བརྒྱད་པ་ལ་ཞྭ་དམར་དཀོན་མཆོག་འབངས་ལས་དགེ་བསྙེན་གྱི་སྡོམ་པ་ནོད། དཀོན་མཆོག་འོད་ཟེར་དུ་བཏགས། བཅུ་གསུམ་པ་ལ་རྒྱལ་དབང་བསྟན་འཛིན་
གྲགས་པ་ལས་རབ་ཏུ་བྱུང་། མདོ་སྔགས་བསྟན་འཛིན་བཟང་པོར་གསོལ། ཆོས་རྗེ་ཀུན་མཁྱེན་ཆེན་པོ་དང་། གཏེར་ཆེན་པདྨ་གླིང་པའི་ཆོས་སྐོར་ཡོངས་སུ་རྫོགས་པའི་དབང་ལུང་ཁྲིད་མན་ངག་ཕྱག་བཞེས་དང་བཅས་པ་མཐའ་རྒྱས་དང་། གཞན་ཡང་ཐུགས་སྲས་ཀུན་དགའ་གྲགས་པ། གྲུབ་ཆེན་ཀུན་དགའ་རྡོ་རྗེ། སྔགས་འཆང་ཀུན་བཟང་དཔལ་འབྱོར། རྒྱལ་སྲས་ནོར་བུ་དབང་རྒྱལ། བྱང་བདག་དབང་པོའི་སྡེ་སོགས་ལས་རྙིང་མ་དང་། ས་སྐྱ་པ་ཁྲི་ཆེན། ཞྭ་དམར་ནག་སོགས་བཤེས་གཉེན་མང་པོར་གསར་རྙིང་གི་ཆོས་བཀའ་ཇི་སྙེད་པ་སྔ་ཕྱིར་གསན། བཅོ་བརྒྱད་པ་ལ་འབྲས་ཡུལ་སྐྱེད་ཚལ་དུ་འབུམ་རམ་པ་ཐར་པ་རྒྱལ་མཚན་ལ་བསྟེན་ནས་བསྡུས་ཚད་དབུ་ཕར་འདུལ་མངོན་སྡོམ་རིག་དང་བཅས་པའི་གཞུང་ལུགས་རྣམས་ལ་ནན་ཏན་ཆེན་པོས་སྦྱངས་ཤིང་། ཆོས་གྲྭ་དེར་ལུང་རིགས་སྨྲ་བའི་འགྲན་ཟླ་མེད་པའི་མཐུན་སྣང་དུ་གྲུབ། སྒྲ་དང་སྙན་ངག་སྡེབ་སྦྱོར་གསོ་རིག་བཟོ་གནས་སོགས་ཀྱང་ལས་དེ་དང་དེ་ལ་མཁས་པའི་སློབ་དཔོན་འགའ་ཞིག་ལས་ཐུགས་སུ་ཆུད་པར་སྦྱངས་པས་མཁས་པའི་གནས་ཐོབ། དགུང་ལོ་ཉེར་ལྔ་པ་ལ་ཀརྨ་པ་དགུ་པ་མཁྱེན་པས་ཐུགས་ཕྲོགས་ཏེ། སྒར་ཆེན་གྱི་འབེལ་གཏམ་གླེང་བར་བཀས་བསྐུལ་བ་ལས་ལོ་གསུམ་དུ་མདོ་སྔགས་རིག་གནས་ལོ་རྒྱུས་དང་བཅས་པའི་གསུང་རབ་འབེལ་མཆིད་ཀྱིས་འཆད་པ་དང་། རྩོད་ངག་གིས་རྒོལ་ཞིང་ལན་འདོན་པ་སོགས་གང་ལ་ཡང་ཐོགས་པ་མེད་པའི་རྣམ་དཔྱོད་ཀྱིས་བློ་ལྡན་ཐམས་ཅད་ཀྱིས་བསྔགས་པའི་གནས་སུ་གྱུར། སྐབས་གཞན་དུ་གདན་ས་ཕན་ཚུན་དང་། མཆིམས་ཕུ། གཡའ་མ་ལུང། ལྷོ་བྲག་མཁར་ཆུ་སོགས་དབེན་གནས་དུ་མར་ཡི་དམ་ལྷའི་བསྙེན་སྒྲུབ་དང་། རང་བཞིན་རྫོགས་པ་ཆེན་པོའི་རྣལ་འབྱོར་ལ་རྩེ་གཅིག་པའི་སྒྲུབ་པ་ལོ་དང་ཟླ་བ་མང་པོར་སྦྲེལ་བ་སོགས་སྔ་ཕྱིར་མཛད་པས་བསྐྱེད་རྫོགས་ཟབ་མོའི་ཉམས་རྟོགས་མཐར་ཕྱིན། གུ་རུ་རིན་པོ་ཆེ་དང་། རྗེ་བཙུན་སྒྲོལ་མ་སོགས་ཡི་དམ་དུ་མས་ཞལ་གཟིགས་ཤིང་དབུགས་དབྱུང་བ་ཐོབ། ལྷོ་དབུས་ཀྱི་གདན་ས་རྣམས་དང། དད་པའི་ཞིང་དུ་མར་བླ་མ་དང་ཐུགས་རྗེ་ཆེན་པོ་ཞི་ཁྲོ། བཀའ་བརྒྱད་རྣམས་ཀྱི་སྒྲུབ་ཆེན་ལ་བརྟེན་ནས་
དམ་རྫས་ཀྱི་འགྲོ་ཕན་དང་། དབང་ཁྲིད་ལུང་མན་ངག་མང་པོ་དུས་དང་དུས་མེད་དུ་གསུངས་པ་ལས། རིགས་སྲས་གསང་བདག་ཆེན་པོ་དང་། རྫོགས་ཆེན་པ་ནམ་མཁའ་འབྲུག་སྒྲ། མངའ་བདག་བསྟན་འཛིན་ཆོས་བཟང་། སྤ་གྲོ་བ་ཆོས་དབང་ལྷུན་གྲུབ། སྤོ་བོ་རྦ་ཁ་སྐུ་སྐྱེ་རིག་འཛིན་རྒྱ་མཚོ། མང་ཐོས་དམ་ཆོས་བཟང་པོ་སོགས་བཀའ་སྲོལ་སྐྱོང་བ་དུ་མ་དང་། ལུང་རིགས་སྨྲ་བའི་སྟོན་ཆེན། ཐ་སྙད་འཛིན་པའི་མཁས་པ། སྒོམ་ཉམས་ཅན་གྱི་རྣལ་འབྱོར་ཕོ་མོ་སོགས་དམ་པའི་ཆོས་ཀྱིས་བསྡུས་པའི་བུ་སློབ་དབུས་གཙང་ལྷོ་མོན་གྱི་ཕྱོགས་ཐམས་ཅད་ཁྱབ་པ་དང་། ས་སྐྱོང་སྐུ་རབ་པ་དང་། བྱ་ས་ཁྲི་དཔོན་འཕྱོངས་རྒྱས་སྟག་རྩེ་བ། ཡར་ཀླུང་ཕོ་བྲང་པ་སོགས་རིགས་དང་ལོངས་སྤྱོད་ཀྱིས་མཐོ་བས་མཚོན་ཡོན་བདག་དུ་མས་དད་པས་བསྙེན་བཀུར། དབང་ཆོས་དང་ཕྲིན་ལས་བཞིའི་ཡུལ་གང་ལ་གང་འཇུག་པ་དེས་ལས་འབྲས་དོན་ལྡན་གྱིས་རེ་བ་བསྐངས། ལྐོག་གྱུར་གྱི་གནས་ལུང་དུ་བསྟན་པ་རྣམས་ཀྱང་ཇི་ལྟ་བ་བཞིན་མངོན་དུ་གྱུར་པས་བླང་དོར་གྱི་དམིགས་ཕྱེ། ལྷོ་བྲག་བཀྲ་ཤིས་སྒང་གི་རི་བོར་དང་ཚུགས་ཅན་གྱི་འདུས་སྡེ་བཏབ་པ་ཡང་རེ་ཞིག་གནས། བྱང་ཆུབ་གླིང་དུ་རྫོགས་ཆེན་བླ་བརྒྱུད་ཀྱི་སྣང་བརྙན་ངོ་མཚར་བའི་འབུར་སྐུ་དང་། ཐུབ་པ་གནས་བཅུ་དང་། སྒྲུབ་སྡེ་དགུ། མཚན་བརྒྱད་སོགས་བྲིས་ཐང་མང་པོ་དང་། འདུལ་བ་ལུང་སོགས་བཀའ་བསྟན་གྱི་གླེགས་བམ་ཇི་སྙེད་པ་བཞེངས་ཤིང་། ཆོས་འཁོར་བསམ་ཡས་དང་། ལྷ་ས་ལ་སོགས་པར་སྔ་ཕྱིར་མར་མེ་སོགས་མཆོད་འབུལ་སྨོན་ལམ་དང་བཤད་སྒྲུབ་ཀྱི་འདུས་སྡེ་མང་པོར་ཚོགས་གསོག་གི་ཡོ་བྱད་དུ་མས་བསྙེན་བཀུར་བས་མཚོན་སྐུ་གསུང་ཐུགས་ཀྱི་ཕྲིན་ལས་འཁོར་ལོ་གསུམ་གྱི་འཇུག་པ་ཅི་རིགས་པ་ལས་ནམ་ཡང་མི་གཡེལ་བས་བསྟན་པ་དང་འགྲོ་བའི་དོན་རྒྱ་ཆེན་པོ་མཛད་ནས། དགུང་ལོ་ང་གསུམ་པ་ས་ཕོ་འབྲུག་གི་ལོའི་བར་གྱི་རྣམ་ཐར་ཞལ་གསུང་མའི་མཐར། ཁྱད་པར་བརྒྱུད་འཛིན་བུ་ལ་དབང་ལུང་དང་། །མན་ངག་ཁྲིད་ལུང་མང་པོ་བར་མེད་བཤད། །གསང་ཆེན་བསྟན་པ་འཛིན་པའི་རྟེན་འབྲེལ་བསྒྲིགས། །ད་ནི་བྱ་བ་ཟིན་གྱིས་འགྱོད་པ་མེད། །འཆི་བར་དགའ་བའི་མདོ་སྔགས་བསྟན་
འཛིན་ང་། །གདོད་མའི་ས་ལ་གཏན་སྲིད་འཛིན་དུ་འགྲོ། །ཞེས་སོགས་ཀྱིས་དོན་བསྡུས་ཞལ་གདམས་སུ་མཛད་ནས་ཟླ་བ་གསུམ་འདས་པ་ཆུ་ཟླའི་ཚེས་བཞི་ལ་དར་རྒྱས་ཆོས་སྡིངས་སུ་སྤྲུལ་པའི་དཀྱིལ་འཁོར་ངོ་མཚར་བའི་ལྟས་དང་བཅས་པ་བསྡུས་ཤིང་དགོངས་པ་སྐོང་བའི་མཆོད་འབུལ་ཕྱི་ནང་གི་རྟེན་བཞེངས་ཕྲིན་ལས་མི་ཉམས་པའི་རྒྱུན་སྐྱོང་བ་རྣམས་རིགས་སྲས་གསང་བདག་ཆེན་པོས་མཛད་དོ། །
རིག་འཛིན་ཆེན་པོ་འཕྲིན་ལས་ལྷུན་གྲུབ།
༈ རིག་འཛིན་ཆེན་པོ་འཕྲིན་ལས་ལྷུན་གྲུབ་ནི། ཡབ་སྨྱོས་སྟོན་མཁས་གྲུབ་མདོ་སྔགས་བསྟན་འཛིན་དང་ཡུམ་རྒྱལ་རིགས་དགོས་དགོས་འཛོམ་པའི་སྲས་སུ་ལྕགས་ཕག་ལོར་ལྷོ་བྲག་བྱང་ཆུབ་གླིང་དུ་འཁྲུངས། གསུང་བྱེ་བ་ཙམ་ནས་དམ་པའི་ངང་ཚུལ་འབའ་ཞིག་པས་བློ་ལྡན་ཐམས་ཅད་དང་བར་མཛད། དགུང་ལོ་ལྔ་ནས་བྲི་ཀློག་གཉིས་ཀ་བྱང་བར་མཁྱེན། བརྒྱད་ལ་ཡབ་རྗེ་ལས་རབ་ཏུ་བྱུང་། མཚན་ཨོ་རྒྱན་ཚེ་འཕེལ་དུ་གསོལ། རིམ་བཞིན་ཕྲིན་སྒྲུབ་ཕྱག་བཞེས་དང་བཅས་པ་ནས་བརྩམས་ཡིད་བཞིན་མཛོད་དང་། སེམས་ཉིད་ངལ་གསོ་རྩ་འགྲེལ་རྣམས་དང་། སྒྲ་དང་རྩིས་སོགས་ཤེས་བྱ་རྣམས་ལ་ཐུགས་སྦྱོང་མཛད་པས་ཐུགས་རབ་ཕུལ་དུ་བྱུང་བའི་བློ་གྲོས་ཀྱི་མཐུ་ཐོབ། ཁྱད་པར་ཡབ་རྗེ་ཉིད་ལས་བླ་རྫོགས་ཐུགས་གསུམ། སྙིང་ཐིག་ཡ་བཞི། ཞི་ཁྲོ་བཀའ་བརྒྱད་སོགས་གསང་ཆེན་བཀའ་གཏེར་དུ་མའི་དབང་ཁྲིད་བཤད་ལུང་མན་ངག་སོགས་མཐའ་ཆོད་པར་གསན་ཅིང་། བསམ་པ་དང་སྒོམ་པའི་ཉམས་བཞེས་ཀྱིས་གཏན་ལ་ཕབ་སྟེ་ཀུན་ཆུབ་པར་མཛད། སྐབས་དེར་ལྷོ་རྒྱུད་ཀྱི་བདག་པོ་འཕོས་པའི་དབང་ལས་རེ་ཞིག་ལྷ་ལུང་གི་འདུས་སྡེར་བཞུགས་ཏེ། དཔའ་བོ་གཙུག་ལག་རྒྱ་མཚོ་ལ་དགེ་ཚུལ་དང་། ཀུན་རིགས་ཕག་མོ་དུས་འཁོར་སོགས་ཀྱི་དབང་ལུང་རྣམས་གསན་ཅིང་། དེ་དག་གི་སྒྲུབ་དཀྱིལ་བྲི་ཐིག་གར་འཆམས་སོགས་ཀྱང་ཚེགས་མེད་མཁྱེན། ཁྱད་པར་རྒྱུད་བླ་དང་ཟབ་མོ་ནང་དོན་འགྲེལ་པ་དང་བཅས་པར་སྦྱངས་ཏེ་མདོ་སྔགས་ཀྱི་ཟབ་དོན་མཐའ་དག་ཐུགས་སུ་ཆུད། སླར་ཡང་རང་གནས་སུ་ཡབ་རྗེ་ཉིད་ལས་སྙིང་ཐིག་གི་དབང་ཁྲིད་ནན་ཏན་ཆེན་པོས་གསན་པས་མཚོན་ཟབ་ཆོས་མང་པོའི་མཐའ་
རྒྱ་བཅད་ཅིང་བསྟན་པའི་གཉེར་ཁ་གཏད་པ་བཟུང་། མི་རིང་བར་ཡབ་རྗེ་ཉིད་དར་རྒྱས་ཆོས་སྡིངས་སུ་ཞི་བར་གཤེགས་པའི་སྐུ་གདུང་གི་མཆོད་འབུལ་ཕྱི་ནང་གི་རྟེན་བཞེངས་སོགས་དགོངས་པ་རྫོགས་པར་མཛད། སྤྱིར་ཡབ་རྗེ་ཉིད་གཙོ་བོར་གྱུར་པའི་བླ་མ་ཡང་གསུང་སྤྲུལ་ཚུལ་ཁྲིམས་རྡོ་རྗེ། ལོ་ཆེན་གཞན་ཕན་རྡོ་རྗེ། ལྷ་བཙུན་ཀུན་བཟང་རྣམ་རྒྱལ། རྫོགས་ཆེན་ནམ་མཁའ་འབྲུག་སྒྲ། བོན་ལུང་པ་ཚུལ་ཁྲིམས་རྒྱལ་མཚན། ཟུར་ཆེན་ཆོས་དབྱིངས་རང་གྲོལ་སོགས་རྙིང་མ་དང་། དཔའ་བོ་གཙུག་ལག་རྒྱ་མཚོ། གུ་ཤྲི་གྲགས་པ་མཆོག་དབྱངས། གནས་གསར་བཀའ་འགྱུར་བ། སྤྲུལ་སྐུ་ཀརྨ་བསྟན་བསྲུང་སོགས་གསར་མ་སྟེ། བཤེས་གཉེན་དམ་པ་བཅུ་ཕྲག་གསུམ་ལྷག་པ་ལས་མདོ་དང་སྔགས་ཀྱི་ཆོས་ཚུལ་རབ་འབྱམས་གསན་ཅིང་། དེ་དག་གི་སྙིང་པོའི་ལམ་སྲོལ་ཇི་བཞིན་པ་བསྐྱེད་རྫོགས་ཟབ་མོའི་གནད་ཀྱི་སྒྲུབ་པ་ལོ་ཟླ་དུ་མར་སྦྲེལ་བ་ལན་མང་པོ་དང་། རྒྱུན་གྱིས་ཐུགས་དམ་ཁྲིགས་སུ་བཅད་པ་ལས་མི་གཡེལ་བས་རྫོགས་པ་ཆེན་པོ་རང་སྣང་རིས་མེད་ཀྱི་དགོངས་པ་མངོན་དུ་གྱུར། འཁོར་འདས་ཡེ་ཤེས་ཀྱི་རོལ་པར་ཤར་བས་ཡི་དམ་དུ་མའི་གཟིགས་སྣང་ལ་དབང་འབྱོར། ཆོས་ཀྱི་རྗེས་སུ་འབྲང་བའི་བུ་སློབ་ནི། ཡབ་རྗེ་དང་། གསུང་སྤྲུལ་རིན་པོ་ཆེ། དཔའ་བོ་རྒྱལ་ཚབ་པ་ཙམ་མ་གཏོགས་རང་གི་ཡོངས་འཛིན་རྣམས་ཀྱིས་ཀྱང་ཆོས་ཀྱི་བདུད་རྩི་ངོམས་མེད་དུ་གསོལ་ཞིང་གུས་པར་བཏུད། གཞན་ཡང་དཔལ་རི་སྤྲུལ་སྐུ་ཕྲིན་ལས་རྣམ་རྒྱལ། ལོ་ཆེན་ཆོས་རྒྱལ་བསྟན་འཛིན། དམ་པ་ཀློང་ཡངས་འོད་གསལ། ཁྲི་དཔོན་སྔགས་འཆང་ཆེན་པོ་སོགས་རིགས་དང་སྐྱེ་བརྒྱུད་ཡོན་ཏན་གྱིས་མཐོ་བ་དུ་མས་མཚོན། བླ་མ་སློབ་དཔོན། རབ་བྱུང་། སྔགས་པ། སྒོམ་ཆེན། ཁྱིམ་བདག་སོགས་སྐལ་ལྡན་དུ་མ་ལ། སྤྱིར་སྒྲུབ་དབང་ཁྲིད་ལུང་མན་ངག་སོགས་ཐུན་མོང་དུ་སྩལ་བ་དང་། ཁྱད་པར་བཞེད་པ་ཐ་དད་པའི་ཆོས་ཀྱི་རྣམ་གྲངས་སོ་སོའི་སྐལ་བ་བཞིན་སྩོལ་བ་ལ་ཐོགས་པ་མི་མངའ་བས་སྔ་འགྱུར་གྱི་བསྟན་འཛིན་ཐོག་མཉམ་གཅིག་ལ་ཆོས་ཀྱི་ཕྲིན་ལས་འགྲན་དུ་མེད་པ་མངོན་སུམ་དུ་གྲུབ། ངོ་བོ་ཆོས་ཉིད་མཉམ་པ་ཆེན་པོའི་གནས་ལུགས་ལས་མ་གཡོས་བཞིན་དུ་
རྣམ་འགྱུར་རྡོ་རྗེ་སློབ་དཔོན་ཉིད་ཀྱི་དེ་ཉིད་བཅུ་ལ་དབང་འབྱོར་བས་དེ་དང་དེའི་ལས་ལ་ངེས་ཤེས་འདྲེན་ཅིང་། ཁྱད་པར་དབང་དུས་སུ་ཡེ་ཤེས་ཀྱི་བྱིན་ཕེབས་པས་དབང་དོན་རྒྱུད་ཐོག་ཏུ་འབྱོར། ཁྲིད་བཀའ་གསུང་དུས་སོ་སོའི་ཉམས་མྱོང་གི་སྣེ་ནས་ཁྲིད་མཁས་པས་ཟབ་ལམ་གྱི་རྟོགས་པ་འཁྲུལ་མེད་ངོ་འཕྲོད་པས་ཉམས་མྱོང་དྲོད་ཚད་ཐོབ་པ་མང་དུ་ཐོན། གདུལ་བྱ་ཐུན་མོང་པ་རྣམས་ཀྱི་ངོར་ཡང་བསྲུང་བཟློག་སོགས་ཕྲིན་ལས་བཞིའི་ལས་ཕྲན་དོན་ལྡན་དུ་གྲུབ་པ་ལ་ཐོགས་པ་མེད་ཅིང་། གདོན་དྲག་པོས་བཟུང་བའི་ནད་པ་ལུས་རེངས་པ། ངག་ལྐུགས་པ། སེམས་སྨྱོ་འབོག་གིས་འཆི་བར་ཐག་བཅད་པ་དུ་མ་ཡང་། བཀའ་བསྒོ་བྱིན་རླབས་རྟེན་འབྲེལ་གྱི་བསྒྱུར་ཁ་ཅི་རིགས་མཛད་པའི་མོད་ལ་གསོས་པ་དང་མཛེ་འཕྲོ་ཆོད་པའང་མང་དུ་བྱུང་། འཆི་ཁར་འཕོ་བའི་མཚམས་སྦྱོར་དང་རྗེས་འཛིན་མཛད་པ་ལ་སྤྱི་བོ་འཕར་ཞིང་སྐྱེ་བ་ངོས་ཟིན་ཡང་མང་། སད་སེར་དང་མི་ཕྱུགས་ནད་རིམས་ཀྱིས་མནར་བ་ལ་ཐུགས་གཏད་པ་ཙམ་གྱིས་བཟློག་ཅིང་ཞི་བ་སོགས་འགྲོ་བ་སོ་སོའི་རེ་བ་ཡིད་བཞིན་དུ་སྐོང་བ་ལ་དབང་འབྱོར། དོན་དེ་རྣམས་མཆོག་དམན་སུས་བསྐུལ་ཡང་མི་ཆོས་ངོ་འཛིན་གྱིས་དབྱེ་བ་མི་འབྱེད་པར་ཐམས་ཅད་ཀྱི་རེ་བ་ཡིད་བཞིན་དུ་སྐོང་། ཕྱག་ཏུ་འབྱོར་བའི་ཡོ་བྱད་ཀྱི་དངོས་པོ་ཆེ་ཆུང་གང་ལ་ཡང་འཁོར་འདབས་ཀྱི་བསྲི་ཚགས་མེད་པར་དཀོན་མཆོག་གི་རྟེན་བརྟེན་པ་མང་པོ་དང་ཁྱད་པར་བཀའ་གཏེར་གྱི་གླེགས་བམ་བརྒྱ་ཕྲག་བརྒལ་བ་གསར་དུ་སྤེལ་ཞིང་། མཆོད་སྦྱིན་གྱི་ཡུལ་ལ་ཚོགས་གཉིས་ཀྱི་རྒྱུར་སྨིན་པར་མཛད་པས་མཚོན། མདོར་ན་ཆོས་བརྒྱད་ཀྱི་འཆིང་བས་མ་གོས་ཤིང་བསྟན་འགྲོའི་ཕན་བདེ་ཁོ་ན་སྐུ་སྲོག་ལས་ཀྱང་གཅེས་པར་འཛིན་པའི་ཐུགས་བསྐྱེད་ཀྱིས་དབུས་གཙང་ལྷོ་མོན་སོགས་གདུལ་བྱའི་ཞིང་རྣམས་སུ་འཁོར་ལོ་གསུམ་གྱི་རྣམ་ཐར་གཞན་ཕན་གྱི་ཕྲིན་ལས་རིས་མེད་དུ་བསྐྱངས་པས་དོན་གཉིས་ཀྱི་འབྲས་བུ་ལྷུན་གྲུབ་ཏུ་སྩོལ་བ་ལས་གཡེལ་བ་མི་མངའ་བའི་ངང་ནས་དགུང་ལོ་ལྔ་བཅུ་རྩ་གཉིས་པ་ཆུ་སྟག་དབོ་ཟླའི་ཉེར་གཉིས་ལ་དབུ་གཙུག་འཕྱུར་པོར་འཕར་བ་ལས་སྤོས་དུད་ལྟ་བུའི་རླངས་པ་འཕྲོ་བཞིན་དུ་སྤྲུལ་པའི་དཀྱིལ་འཁོར་འོད་གསལ་ཆོས་
སྐུའི་དབྱིངས་སུ་བསྡུས་སོ། །མཆོད་འབུལ་རྟེན་བཞེངས་ཕྲིན་ལས་ཀྱི་རྒྱུན་སྐྱོང་བ་གཏེར་ཆེན་ཆོས་ཀྱི་རྒྱལ་པོ་གཏེར་བདག་གླིང་པ་ཉིད་ཀྱིས་མཛད་དོ། །
གཏེར་ཆེན་ཆོས་ཀྱི་རྒྱལ་པོ་གཏེར་བདག་གླིང་པ།
༈ བདག་ཅག་གི་དཔལ་ལྡན་བླ་མ་དམ་པ་གཏེར་ཆེན་ཆོས་ཀྱི་རྒྱལ་པོ་གཏེར་བདག་གླིང་པ་ནི། ངོ་བོ་རྒྱལ་བ་ཐམས་ཅད་དང་རྣམ་དབྱེར་མ་མཆིས་ཀྱང་གནས་སྐབས་གདུལ་བྱའི་དོན་དུ་སྤྲུལ་པའི་ཟློས་གར་བསྟན་པའི་ཚུལ་ནི། རང་གཏེར་གབ་རྒྱ་ཅན་གྱི་ལུང་བསྟན་ལས། བཻ་རོ་ཁྱོད་ནི་སྐྱེ་མཐའི་བྱང་སེམས་ཏེ༔ཁྱོད་ཀྱི་འདི་གོང་སྐྱེ་བ་འདས་པ་ནི༔སྨྲ་བསམ་བརྗོད་འདས་ཡེ་ཤེས་སྙིང་པོའི་དོན༔སེམས་ཅན་སངས་རྒྱས་མཉམ་ཉིད་ཁྱབ་བརྡལ་ཡང༔ཁམས་གསུམ་འགྲོ་བའི་འདྲེན་པ་རྡོ་རྗེ་ཆོས༔ཤཱཀྱའི་ཉེ་གནས་ཨཱ་ནྟན་ཞེས་དང༔རྒྱལ་པོ་ཛཿདང་ཤིནྟཾ་གརྦྷ་དང༔བོད་འདིར་སམྦྷོ་ཊ་སོགས་དག་པ་ཡི༔སྐྱེ་བ་དེ་ཙམ་སྣང་གི་མ་དག་པའི༔སྐྱེ་ཚུལ་བརྗོད་དུ་ལང་བའི་གནས་མ་ཡིན༔དེ་ལྟར་དག་པའི་སྐྱེ་བ་དེ་དག་གིས༔འགྲོ་ལ་སྙིང་རྗེ་ཆེན་པོའི་ཐུགས་བསྐྱེད་པས༔བཻ་རོ་ཁྱོད་དུ་སྐྱེ་བ་བླངས་པ་ཡིན༔ཁྱོད་ཀྱང་ཤྲཱི་སེངྷ་ཡེ་ཤེས་མདོ༔པདྨ་བདག་སོགས་གཙུག་གི་བླ་མར་བསྟེན༔གདམས་པའི་གནད་རྣམས་ཕུ་ཐག་བཅད་བྱས་ནས༔ཆོས་སྐུའི་རང་ཞལ་མངོན་སུམ་རྟོགས་འགྱུར་བས༔ལས་འཕྲོ་མ་དག་སྐྱེ་བ་ལེན་མི་སྲིད༔འོན་ཀྱང་སེམས་བསྐྱེད་སྨོན་ལམ་བཟང་པོ་ཡིས༔མཚམས་སྦྱར་མཐའ་ཡས་འགྲོ་བའི་དཔལ་ཉིད་དུ༔དབང་ཕྱུག་འབར་དང་རཀྴ་རྡོ་རྗེ་གླིང༔ཀུན་སྐྱོང་གླིང་དང་མདོ་སྔགས་གླིང་པ་སོགས༔པདྨ་བདག་གི་ཟབ་གཏེར་བདག་པོ་དང༔གཞན་ཡང་ཐེག་པ་ཆེ་ཆུང་སྣ་ཚོགས་ལ༔དེ་དང་མཐུན་པའི་ངོ་མཚར་སྐྱེ་བའི་གྲངས༔བཅུ་ཕྲག་གཅིག་དང་གསུམ་ཙམ་འདས་པའི་མཐར༔ཞེས་གསུངས་པ་ལྟར། སྟོན་པས་ལངྐའི་ཡུལ་དུ་ལི་ཙ་བི་དྲི་མེད་གྲགས་པ་སོགས་རིག་འཛིན་གྱི་འཁོར་རྣམས་ལ་གསང་སྔགས་ཀྱི་རྒྱུད་རྣམས་གསུངས་ནས་ཕྱག་ན་རྡོ་རྗེ་ལ་གཏད་དེ་རྡོ་རྗེ་ཆོས་ཞེས་མིང་བཏགས་ཏེ་བཀའི་བསྡུ་བ་པོར་གྲགས་པ་དང་། དེ་ནས་བསྐལ་བཟང་གི་སངས་རྒྱས་བཞི་པ་ཤཱཀྱ་ཐུབ་པ་འཇིག་རྟེན་དུ་བྱོན་པའི་དུས་ཤཱཀྱའི་རིགས་ལས་ཐོས་པ་འཛིན་པའི་མཆོག་འཕགས་པ་ཀུན་དགའ་
བོར་གྱུར་ནས་དེ་བཞིན་གཤེགས་པའི་རིམ་གྲོ་བ་མཛད་པ་དང་། དེའི་འོག་ཏུ་ཟ་ཧོར་གྱི་རྒྱལ་པོ་ཛཿརུ་གྱུར་ནས་རྒྱ་གར་ཤར་ཕྱོགས་སུ་རྣལ་འབྱོར་ཕྱི་ནང་གི་རྒྱུད་རྣམས་ཆེས་དར་བར་མཛད་པ་དང་། དེའི་འོག་ཏུ་སློབ་དཔོན་ཤིནྟཱཾ་གརྦྷར་སྐྱེ་བ་བཞེས་ཏེ། བསིལ་བའི་ཚལ་དུ་སློབ་དཔོན་བརྒྱད་ལ་སྒྲུབ་སྡེ་ཆེན་པོ་བརྒྱད་མ་མོ་དང་མཁའ་འགྲོ་མ་རྣམས་ཀྱིས་གཏད་པའི་ཚེ་སློབ་དཔོན་འདི་ཉིད་ལ་གཟིའི་སྒྲོམ་བུ་བབས་ཏེ་དྲག་སྔགས་དམོད་པའི་སྒྲུབ་པ་ལ་མཁས་པར་མད་པ་དང་། དེའི་འོག་ཏུ་ཆོས་རྒྱལ་སྲོང་བཙན་སྒམ་པོ་བོད་རྗེར་བྱོན་པའི་དུས། དེ་ཉིད་ཀྱི་བློན་པོ་ཐུ་མི་སྣང་གྲགས་ཀྱི་བུ་ཐུ་མི་སམྦྷོ་ཊ་ཞེས་བྱ་བར་སྐྱེ་བ་བཟུང་ནས་བོད་དུ་འདྲི་ཀློག་གིས་སྲོལ་མེད་པ་ལ། པཎྜི་ཏ་ལྷ་རིག་པའི་སེང་གེ་ལ་སྒྲ་བསླབ་སྟེ་བོད་སྐད་དང་བསྟུན་ནས་ཀཱ་ལི་སུམ་ཅུ་དང་། ཨཱ་ལི་བཞིར་བསྡུས། གཟུགས་ཁ་ཆེའི་ཡི་གེ་དང་བསྟུན་ནས་བཅོས། བྱཱ་ཀ་ར་ཎའི་བསྟན་བཅོས་བརྒྱད་མཛད་དེ་རྒྱལ་པོ་ལ་བསླབས། དཔང་སྐོང་། མདོ་ཟ་མ་ཏོག་བཀོད་པ། དཀོན་མཆོག་སྤྲིན་སོགས་བསྒྱུར་ཏེ་བསྟན་པའི་སྲོལ་བཏོད་པར་མཛད་པ་དང་། དེའི་འོག་ཏུ་རྒྱལ་མོ་ལེགས་ཞེར་དཔལ་མོའི་བུ་དགེ་སློང་པུརྞ་ཞེས་བྱ་བར་སྐྱེ་བ་བཞེས་པའི་ཕྱི་མ་ལ་ལོ་ཙཱ་བ་བཻ་རོ་ཙ་ནར་སྐུ་འཁྲུངས་པ་ཡིན་ཏེ། རང་གཏེར་ཤ་འུག་ལུང་བྱང་ལས། ཤཀ་ཐུབ་ཉེ་གནས་ཀུན་དགའ་བོ༔ཨིནྡྲ་བྷུ་ཏི་རྒྱལ་པོ་ཛཿཐུ་མི་པུརྞ་ལ་སོགས་པ༔འགྲོ་འདུལ་སྐྱེ་སྲིད་དེ་དག་ལས༔བཻ་རོ་ཁྱོད་དུ་འཕོས་པ་ཡིན༔ཞེས་གསུངས་ཏེ། ལོ་ཙཱ་བ་ཆེན་པོ་བཻ་རོ་ཙཱ་ན་ནི་གཙང་སྙེ་མོ་བྱེ་མཁར་དུ་སྤ་གོར་ཧེ་འདོད་ཀྱི་སྲས་སུ་འཁྲུངས། མཁན་པོ་ཞི་འཚོ་ལས་རབ་ཏུ་བྱུང་། རྒྱ་གར་དུ་ལན་གྲངས་མང་དུ་བྱོན་ཏེ། པཎྚི་ཏ་ལྔ་བརྒྱ་ལ་རྒྱུ་འབྲས་ཀྱི་ཆོས་སྤྱི་དང་ཕྱི་མ་བདུན་ལ་གསང་སྔགས་ནང་གི་ཆོས་མང་དུ་བསླབས། ཁྱད་པར་ཤྲཱི་སེངྷ་གཙོ་བོར་བསྟེན་ཅིང་། དེའི་སློབ་མ་ཡེ་ཤེས་མདོ་དང་བཱི་མ་ལ་སོགས་ལའང་གཏུགས་ཏེ་རྫོགས་པ་ཆེན་པོའི་ཆོས་ལ་མཁས་པར་སྦྱངས། རྐང་མགྱོགས་གྲུབ་པས་བོད་ཡུལ་དུ་ཉིན་གཅིག་ལ་བརྟོལ། རྗེ་བློན་རྣམས་ལ་ཉིན་པར་རྒྱུ་འབྲས་སྤྱི་དང་ནམ་གུང་མན་ངག་གི་ཆོས་རྣམས་བསྒྱུར་བཤད་ཀྱིས་གཏན་ལ་ཕབ། སློབ་དཔོན་སངས་
རྒྱས་གཉིས་པས་རྗེ་འབངས་ཉེར་ལྔ་ལ་དབང་བསྐུར་བའི་ཚེ་སྟོབས་ལྡན་ནག་པོའི་མེ་ཏོག་ལ་དབང་བར་གྱུར་ཏེ་དྲག་སྔགས་ཀྱི་གྲུབ་པ་བརྙེས། གཡའ་མ་ལུང་སོགས་བོད་ཡུལ་གྱི་དབེན་གནས་རྣམས་དང་། གཞན་ཡང་རྒྱལ་མོ་རོང་། རྒྱ་ནགལི་ཡུལ། སོག་ཡུལ་སོགས་སུ་བྱོན་ནས་འགྲོ་དོན་མཛད་མཐར་འོད་ཀྱི་སྐུར་ཡལ་ལོ། །དེའི་འོག་ཏུ་དགེ་བའི་བཤེས་གཉེན་དབང་ཕྱུག་འབར་དུ་སྐྱེ་བ་བཞེས་ཏེ་སྔར་གྲྭ་པ་མངོན་ཤེས་ཀྱི་ལོ་རྒྱུས་བརྗོད་པ་དེའོ། །དེའི་འོག་ཏུ་རཀྴག་ཆོས་འབར་ཏུ་སྐྱེ་བ་བཞེས་ནས་སྦས་པའི་རྣལ་འབྱོར་གྱི་ཚུལ་བཟུང་སྟེ་མ་མོ་སྒང་ཤར་སོགས་མདོས་ཆོག་གི་ཕྲིན་ལས་འབའ་ཞིག་སྐྱོང་བར་མཛད་པ་དང་། དེའི་འོག་ཏུ་རྒྱལ་སྲས་རྡོ་རྗེ་གླིང་པར་གྲྭའི་ཕུ་གྲོག་གད་དུ་སྐུ་འཁྲུངས། ཞང་ཡེ་ཤེས་མཛེས་པ་ལས་རབ་ཏུ་བྱུང་། ཀུན་མཁྱེན་འཁྲས་པ། སྨན་ལུང་པ་ཤཱཀྱ་འོད། ཁྱབ་བརྡལ་ལྷུན་གྲུབ་སོགས་ལ་ཆོས་མང་དུ་གསན། གནམ་ལྕགས་བྲགཡང་རྫོང་། སྤ་གྲོ། མཆིམས་ཕུ་སོགས་དབུས་གཙང་ལྷོ་མོན་གྱི་གཏེར་གནས་མང་པོ་ནས། སྙིང་ཐིག་བཅུ་གསུམ། བོན་རྫོགས་ཆེན་གསེར་ཞུན། ལྟ་བ་ཀློང་ཡངས། གུ་རུ་ཞི་དྲགབཀའ་བརྒྱད། བླ་མ་རྒྱལ་བ་རྒྱ་མཚོ་སོགས་གཏེར་ཆོས་ཤིན་ཏུ་མང་བ་བཏོན་ཏེ་འགྲོ་དོན་མཛད་པ་དང་། དེའི་འོག་ཏུ་ཀུན་སྐྱོང་གླིང་པར་སྐྱེ་བ་བཞེས་ཏེ་ཟབ་བུ་ལུང་། བསམ་ཡས་མཆོད་རྟེན་དཀར་པོ་སོགས་ནས། རྡོར་སེམས་སྙིང་ཐིགགུ་རུའི་ཟངས་སྐུ་མེ་ཐུབ་མ། བྲམ་ཟེ་དྲི་མེད་བཤེས་གཉེན་གྱི་དབུ་ཐོད་སོགས་ཆོས་དང་དམ་རྫས་ཀྱི་ཟབ་གཏེར་སྤྱན་དྲངས་ནས་འགྲོ་དོན་མཛད་པ་དང་། དེའི་འོག་ཏུ་མདོ་སྔགས་གླིང་པའམ། མཚན་གཞན་མཆོག་ལྡན་མགོན་པོ་སྟེ། ལྷོ་བྲག་བན་པ་ལུང་དུ་སྐུ་འཁྲུངས་ཏེ། མངའ་རིས་གུང་ཐང་རྒྱལ་པོས་བླ་མར་བཀུར་ཏེ་མཐའ་དམག་བཟློག་པ་ལ་སོགས་པའི་འགྲོ་ཕན་རྒྱ་ཆེར་མཛད་པ་དང་། དེའི་སྐུ་ཕྱི་མར་ལྷོ་ནུབ་རྔ་ཡབ་གླིང་དུ་སློབ་དཔོན་པདྨས་རྗེས་སུ་བཟུང་སྟེ་འཇའ་ལུས་འཕོ་བ་ཆེན་པོའི་སྐུ་བརྙེེས་པ་སྲིན་པོ་ཆོས་ཀྱི་གོ་ཆར་སྐྱེ་བ་བཞེས་ནས་བདག་ཉིད་ཆེན་པོ་ཉིད་དུ་སྐུ་འཕོས་པ་ཡིན་ནོ། །གཞན་ཡང་རྡོ་རྗེ་གླིང་པའི་ལུང་བྱང་ལས། ཉི་མ་སེང་གེ་ཁྱུང་པོ་རྣལ་འབྱོར་དང་༔ སུམ་སྟོན་ཇོ་དར་གྲྭ་
པ་མངོན་ཤེས་དང་༔ བསྟན་པ་གཞུང་འཛིན་རོང་སྒོམ་ཆོས་བཟང་དང་༔ དགེ་བཤེས་ཉམས་བྲོ་གུ་རུ་རྣོན་རྩེ་དང་༔ ཁྱུང་གྲགས་ལྷ་འབུམ་ཤཱཀྱ་འབྱུང་གནས་དང་༔ གྲུབ་ཐོབ་དངོས་གྲུབ་གཡག་སྡེ་པཎ་ཆེན་དང་༔ མཚལ་ཐང་སྒོམ་སྡེ་སྤྲུལ་སྐུར་གྲགས་པའི་མཐར༔ཞེས་འབྱུང་བས། ཁྱུང་པོ་རྣལ་འབྱོར་དང་། དགེ་བཤེས་གྲགས་པ། རོང་ཟོམ། བོན་པོ་ལྷ་འབུམ་རྣམས་དུས་མཚུངས་ཀྱི་སྐུའི་སྤྲུལ་པས་འགྲོ་དོན་མཛད་པ་དང་། སུམ་སྟོན་ཇོ་དར། བསྟན་པ་གཞུང་འཛིན། དགེ་བཤེས་ཉམས་བྲོ་རྣམས་གང་དུ་བྱོན་དང་ཕྲིན་ལས་གང་བསྐྱངས་ཀྱི་ལོ་རྒྱུས་བདག་གིས་མ་ཐོས་ལ། དེ་ལས་གཞན་པ་ཉི་མ་སེང་གེ་ནི། རོག་ཤེས་རབ་འོད་ཀྱི་གཅུང་ཞིག་པོ་རིན་ཆེན་ཞེས་བསམ་གྱིས་མི་ཁྱབ་པའི་ཡོན་ཏན་མངའ་བ་སྟེ། རྒྱལ་བ་ཏེ་ནེའི་ཆིག་བརྒྱུད་ཀྱི་བཀའ་བབས་པ་ཞི་བྱེད་བཀའ་བབས་ཕྱི་མ་ཕྱོགས་ཀུན་ཏུ་རྒྱས་པའི་ཆུ་མགོ་ལྟ་བུར་གྱུར་པ་དེའོ། །ཁྱུང་གྲགས་ཀྱང་། ཡེ་ཤེས་ཁྱུང་གྲགས་ཞེས་པའི་གཏེར་སྟོན་ཞིག་བྱུང་བར་སྣང་། བོན་པོ་ལྷ་འབུམ། གཏེར་སྟོན་བོན་པོ་ལྷ་འབུམ་ཞེས་གྲགས་པ་དེའོ། །ཤཱཀྱ་འབྱུང་གནས་ནི། བདེ་གཤེགས་ཟུར་པོ་ཆེ་ཞེས་མཚན་ཉི་ཟླ་ལྟར་གྲགས་པ་དེའོ། །གྲུབ་ཐོབ་དངོས་གྲུབ་ནི་གཙང་གི་རི་བོ་ཆེའི་གཏེར་སྤྱན་འདྲེན་པ་པོ་སྟེ། འདི་གཏེར་བཞེས་དུས་དགུང་ལོ་དྲུག་བརྒྱ་ཡིན་པར་གྲགས་པས། སྔ་མོ་ཞིག་ནས་བྱུང་བར་མངོན། གཡག་སྡེ་པཎ་ཆེན་ནི། རང་བྱུང་པ་དང་གཡུང་སྟོན་པ་སོགས་ཀྱི་སློབ་མ་མཁས་གྲུབ་ཆེན་པོར་གྱུར་པ་དེའོ། །མཚལ་ཐང་སྒོམ་སྡེ་སྤྲུལ་སྐུ་ནི། མཚལ་གྱི་གདན་རབས་བཞི་པ་སངས་རྒྱས་འབུམ་གྱི་དུས། བླ་ཚང་དང་དབོན་ཚང་ཞིག་ནས་ཁོང་གི་ཟུར་དུ་ཕྲིན་ལས་བསྐྱངས་པ་ལས་སྒོམ་སྡེ་བྱུང་བར་གྲགས་པས་སངས་རྒྱས་འབུམ་ལགས་སོ། །གཞན་རྣམས་སྔར་སྨོས་པ་དང་། དེར་མ་ཟད་སྤྲུལ་པའི་ཟློས་གར་ཙ་མི་སངས་རྒྱས་གྲགས། ཆོས་རྗེ་ས་པཎྜི་ཏ། ལོ་ཆེན་བསོད་ནམས་རྒྱ་མཚོ། གཏེར་སྟོན་ཡང་སངས་རྒྱས་བླ་མ། རྒྱ་ལོ་ཙཱ་བ། ལྡང་མ་ལྷུན་རྒྱལ། གཡག་འཕྱར་སྔོན་པོ་སོགས་མཐའ་ཡས་ཏེ་འཕགས་ཆེན་རྣམས་ཀྱིས་མཛད་པ་བསམ་གྱིས་མི་ཁྱབ་པའི་གནས་ཡིན་པའི་ཕྱིར་ན་རྨོངས་པ་བདག་ལྟ་བུས་བརྗོད་པར་མི་ནུས་སོ། །དེའི་
ཕྱིར་སྐུ་ཚེ་སྔ་མའི་ཕྲིན་ལས་དང་སྐྱེ་བའི་ཕྲེང་བ་ཟུར་ཙམ་ཞིག་སྨོས་ནས། ད་ནི་སྐུ་ཚེ་འདི་ཉིད་ཀྱི་མཛད་པ་ཆ་ཙམ་ཞིག་བརྗོད་པ་ནི། བདག་ཉིད་ཆེན་པོ་འདིའི་རིགས་ནི་འོད་གསལ་གྱི་ལྷ་ལས་ཆད་པ་ཞིག་སྟེ། དེ་ཡང་སྔོན་གྱི་དུས་ན་བོད་ཡུལ་གྱི་སའི་ཆ་ཁ་རག་ཏུ་སྔོན་ཆད་མཐོང་མ་མྱོང་བའི་སྐྱེས་བུ་གཟུགས་བཟང་ཞིང་མཛེས་པ་ལྟ་ན་སྡུག་པ་མིག་གི་བདུད་རྩི་གྱུར་པ་ཞིག་སྣང་བས། དེར་མི་རྣམས་ཡ་མཚན་པར་གྱུར་ཏེ་བླའི་གནས་སུ་བཀུར་བར་བྱས་སོ། །དེའི་ཚེ་མིའི་གྲིབ་ཀྱིས་ལྷའི་བུ་ཉིད་མྱོས་པར་གྱུར་པ་ན་སྨྱོས་ཞེས་པའི་རིགས་རྒྱུད་དུ་གྲགས་པ་ལས་ཕྱི་རུས་སྨྱོས་སྟོན་ཡོན་ཏན་གྲགས་པ་སོགས་ཁ་རག་གི་ལྷ་པ་རྣམས་ཡིན་ཅིང་། ནང་རུས་མཐིང་སྟེ། མཐིང་མ་སྨྱོས་ཞིག་ཆེན་པོ་ནས་སྨྱོས་སྒོམ་ཆེན་པོ་པདྨ་རྡོ་རྗེ་སོགས་ནས་སྨྱོས་སྟོན་གྲགས་པ་རིན་ཆེན་གྱི་སྲས་གྲགས་པ་རྒྱལ་མཚན། དེའི་སྲས་ཇོ་འབུམ་དཔལ་ལ་གོང་མའི་ཞལ་ཏས། སྔོན་ལྷ་སྲས་མུ་རུབ་བཙན་པོས་གྲ་དོལ་གཞུང་གསུམ་གྱི་བདག་པོར་དབང་བར་བྱས་པའི་ཞང་རྣམ་སྣང་གི་སར་སྐུ་མག་ཏུ་བྱོན་པ་ལས་མི་རབས་ལྔའི་མཐར་ཡབ་སྨྱོས་ཚེ་དབང་རྡོ་རྗེ་དང་ཡུམ་སྤ་གོར་གྱི་རིགས་ཚེ་རིང་བུ་དགའ་གཉིས་ཀྱི་སྲས་སུ་ལང་གྲོའི་རྣམ་འཕྲུལ་ཀུན་མཁྱེན་མདོ་སྔགས་བསྟན་འཛིན་སྐུ་འཁྲུངས། དེའི་སྲས་སུ་ཡབ་རྗེ་རིག་འཛིན་ཕྲིན་ལས་ལྷུན་གྲུབ་སྐུ་བལྟམས་པ་དེ་དང་ཡུམ་ཡང་བོད་ཆོས་རྒྱལ་གྱི་གདུང་རྒྱུད་དྲི་མ་མེད་པ་ཐ་སྙད་རིག་གནས་ཀྱི་དབང་ཕྱུག་གོང་མ་རྒྱལ་མཆོག་ལྔ་པས་རྩིས་རིག་གྱི་སློབ་དཔོན་དུ་བཀུར་བ་ཁྱིམ་ན་གནས་ཀྱང་བྱང་ཆུབ་སེམས་དཔའི་སྤྱོད་པས་འཚོ་བ་རྗེ་དོན་འགྲུབ་དབང་རྒྱལ་གྱི་སྲས་མོ་ལྷ་འཛིན་དབྱངས་ཅན་སྒྲོལ་མ་སྟེ། མཁའ་འགྲོ་མ་བདེ་ཆེན་རྒྱལ་མོས་ཡབ་ལ་སྩལ་བའི་ལུང་བྱང་ལས། རྟ་ནག་ཤེལ་དཀར་མཚོ་སྒྲོན་གྱི༔སྤྲུལ་པ་བྱི་ལོ་དབྱངས་ཅན་མིང༔རང་གནས་གྲ་ཡི་ཕྱོགས་ནས་འབྱུང༔ཞེས་གསུངས་པའི་ཡབ་ཡུམ་དེ་གཉིས་ཀྱི་སྲས་སུ་མེ་ཁྱི་ཧོར་ཟླ་གཉིས་པའི་ཡར་ངོའི་ཚེས་དགུའི་མཚན་མོའི་ཐོ་རངས་ཀྱི་ཐུན་གྱི་ཆ་ལ། གྲ་ནང་རིག་པའི་འབྱུང་གནས་སྤྲུལ་པའི་སྐྱེས་མཆོག་སྣ་ཚོགས་རང་གྲོལ་གྱི་གདན་ས་དར་རྒྱས་ཆོས་གླིང་གི་འོད་གསལ་རྩེ་ཞེས་པའི་གཟིམས་ཆུང་
དུ་ས་གཡོ་བ་དང་འོད་འབྱིན་པ་དང་མཁའ་ལ་འཇའ་ཚོན་འཁྲིགས་པ་སོགས་ངོ་མཚར་བའི་དགེ་མཚན་དང་བཅས་བལྟམས་ཏེ། གབ་རྒྱ་ཅན་གྱི་ལུང་བྱང་ལས། སུམ་ཅུ་ཁ་རལ་སྙིགས་མ་ལྔ་བདོའི་དུས༔བསམ་ཡས་ལྷོ་ནུབ་གྲ་ཞེས་གཡོ་རུའི་སར༔ལུང་པ་བྱང་ལྟ་དོར་མ་བརྐྱང་འདྲའི་ཚིགས༔སྲིན་མོ་འཛེགས་འདྲའི་དགེ་བསྙེན་སྔགས་ཞོལ་དུ༔བུདྡྷ་ཛྙཱ་ནའི་སྤྲུལ་པ་ཚེ་མིང་ཕ༔ཤེལ་དཀར་མཚོ་སྒྲོན་སྤྲུལ་པ་དབྱངས་མིང་མས༔བསྐྱེད་པའི་རྣལ་འབྱོར་སྔགས་ཀྱི་བརྟུལ་ཞུགས་ཅན༔མེ་ཁམས་ཁྱི་ཡི་ལོ་པ་པདྨའི་མིང༔གཟུགས་བྱད་ཧ་ཅང་མི་རིང་མི་ཐུང་བ༔མདངས་སྣུམ་རིན་ཆེན་རིགས་ཀྱི་རྟགས་འཆང་བས༔པདྨ་ང་ལ་མོས་པ་ལྷག་པར་བྱེད༔བཅོ་བརྒྱད་ལོ་ལ་གཏེར་ཁ་དང་པོ་འབྱེད༔ཅེས་གསུངས་པ་བཞིན་ནོ། །དེ་ལྟར་སྐུ་བལྟམས་མ་ཐག་དོན་གྲུབ་དབང་རྒྱལ་གྱིས་རྡེའུ་བརྒྱ་སོ་དྲུག་པས་གཏན་ལ་ཕབ་པའི་བཙས་ཀླུང་སོགས་བརྩིས་པ་ལས་བྱུང་བའི་མཚན་ཀུན་དགའ་དངོས་གྲུབ་རིན་ཆེན་དབང་གི་རྒྱལ་པོ་ཞེས་གསོལ། ཡབ་རྗེ་ཉིད་ཀྱིས་དབང་བསྐུར་བྱིན་རླབས་དུ་མས་རྟེན་འབྲེལ་བསྒྲིགས། ལོ་གསུམ་བཞི་ཙམ་ནས་བྲི་ཀློག་ཉེར་མཁོའི་ཆོག་ཕྲིན་དབང་རབ་གནས་ལུང་དང་བཅས་པའི་ཚིག་དང་ལག་ལེན་ཚེགས་ཆུང་ངུས་མཁྱེན་པར་མཛད། དགུང་ལོ་བཅུ་གཅིག་པ་ལ་དཔལ་ལྡན་འབྲས་སྤུངས་སུ་འཛམ་གླིང་གཙུག་གི་ནོར་བུ་ཀུན་མཁྱེན་རྒྱལ་དབང་ལྔ་པའི་དྲུང་དུ་གཙུག་ཕུད་ཕུལ། མཚན་ངག་དབང་པདྨ་བསྟན་འཛིན་ཞེས་སྩལ། སྐྱིད་གྲོང་གི་རང་བྱུང་འཕགས་པ་ཐོག་མར་ཕེབས་པ་དང་དུས་འགྲིགས་པས་རྟེན་འབྲེལ་བཟང་ཞེས་དགྱེས་པས་དབུགས་དབྱུང་། རིམ་བཞིན་གནས་དུས་ཅི་རིགས་པར་ཀུན་མཁྱེན་རྒྱལ་བའི་དབང་པོ། རིག་འཛིན་ཕྲིན་ལས་ལྷུན་གྲུབ་སྟེ་བཀའ་དྲིན་མཚུངས་མེད་རྣམ་གཉིས། སྨིན་གྲོལ་ལམ་བཟང་སྟོན་པའི་བསྟན་འཛིན་ཆེན་པོ་བཅུ་དྲུགཟབ་ཆོས་སྣ་ཚོགས་གསན་པའི་ཡོངས་འཛིན་སོ་ལྔ་རྣམས་གུས་པར་བསྟེན་ནས། ཡོངས་རྫོགས་དགེ་བསྙེན་དང་། བྱང་སྡོམ་བཀའ་སྲོལ་གསུམ་བཀའ་བརྒྱད་ཡོངས་རྫོགས་ཀྱི་དབང་བསྐུར་བརྡ་དོན་འཕྲོད་པ་ཐོག་མའི་སྨིན་བྱེད་དུ་གསན་ནས་སྡོམ་པ་གསུམ་ལྡན་གྱི་གཞི་བཟུང་། མདོ་སྒྱུ་སེམས་གསུམ་
སོགས་སྔ་འགྱུར་བཀའ་མ་དེང་སང་རྒྱུན་ཡོད་དོ་ཅོག་དང་། གཏེར་མ་བླ་རྫོགས་ཐུགས་གསུམ་སྒྲུབ་སྡེ་སྤྱི་བྱེ་བྲག་མང་པོས་མཚོན་ཡོངས་གྲགས་ཕལ་ཆེ་བ། སྔགས་གསར་མ་རགས་པ་རྣམས་དང་། མདོ་ཕྱོགས་མང་པོ་དང་བཅས་པའི་དབང་ཁྲིད་བཤད་ལུང་ཇི་སྙེད་པ་རྣམས་གསན། དགུང་ལོ་བཅུ་གསུམ་ནས་གཞུང་ལུགས་ཅི་རིགས་པ་སྦྱོང་བ་ལ་ཞུགས་ཏེ། དཔལ་གསང་བ་སྙིང་པོ་དང་། རྒྱུད་བླ། སེམས་ཉིད་ངལ་གསོ། ཡིད་བཞིན་མཛོད་རྩ་འགྲེལ་གསན་ནས་གཞན་ལ་འཆད་སྤེལ་མཛད། ཁྱད་པར་ཀུན་མཁྱེན་ཆེན་པོའི་གསུང་རབ་རྣམས་ལ་གསན་གཟིགས་ནན་ཏན་དུ་མཛད་པས་སྔར་དོན་སྤྱི་ཙམ་གྱི་ཤུན་པ་བུད་ནས་དོན་གྱི་གནས་ལུགས་རྟོགས་པའི་སྤྲོས་པ་ཆོད་པར་མཛད། དེ་ནས་གནས་སྐབས་ཅི་རིགས་པར་མཆིམས་ཕུ་དང་། གཡའ་མ་ལུང་སོགས་གནས་ཆེན་དང་རང་གནས་ཀྱི་དབེན་པ་རྣམས་སུ་ལོ་སྦྲེལ་དང་། ཟླ་དྲུག་མ། ཟླ་གཅིག་གི་མཐའ་བརྟེན་པ་ཡན་གྱིས། གུ་རུ་ཞི་དྲགརྡོར་སེམས་བཀའ་བརྒྱད། ཡང་ཕུར་གཤིན་རྗེ་གཤེད། རྟ་མགྲིན། མཁའ་སྤྱོད་མ་སོགས་ཞི་ཁྲོ་སུམ་ཅུ་སོ་ལྔ་ཙམ་བསྙེན་པས་ཞལ་གཟིགས་དང་ལུང་བསྟན་གྱི་རིམ་པ་མཐའ་ཡས་ཏེ་གསང་བའི་རྣམ་ཐར་དུ་འཁོད་པ་ལྟར་དང་། ཁྱད་པར་ཐོད་རྒལ་དང་རླུང་སྦྱོར་གྱི་རྟགས་སྣང་མངོན་དུ་གྱུར། དགུང་ལོ་བཅོ་བརྒྱད་པ་ལ་གཡའ་མ་ལུང་ནས་ཟབ་ཆོས་རིག་འཛིན་ཐུགས་ཐིག་གི་ཆོས་སྐོར་མ་བུ་སོགས་དང་མྱོང་གྲོལ་བྱིན་རླབས་ཀྱི་རིལ་བུ་དང་བཅས་པའི་ཟབ་གཏེར་སྤྱན་དྲངས་ནས་སྐལ་ལྡན་མང་པོ་སྨིན་གྲོལ་ལ་བཀོད། དགུང་ལོ་ཉེར་གཅིག་པ་ནས་བཟུང་རྒྱལ་དབང་ལྔ་པ་ཆེན་པོ་དང་འཇམ་མགོན་སྡེ་སྲིད་སངས་རྒྱས་རྒྱ་མཚོ་གཉིས་ཀྱི་དབུའི་བླ་མར་བཀུར་བས་ལོ་རེ་བཞིན་རྐྱེན་སེལ་གྱི་སྐུ་རིམ་དབང་བཀའ་མང་པོ་དང་། ཁྱད་པར་བཀའ་གཏེར་གྱི་ཆོས་སྐོར་ཇི་སྙེད་པ་ཕུལ། རང་གི་ཡོངས་འཛིན་དུ་མས་ཀྱང་ཆོས་ཀྱི་རྣམ་གྲངས་མང་པོ་དོན་གཉེར་ཆེན་པོས་གསན་པའི་རེ་བ་བསྐང་། གཞན་ཡང་བསྟན་འཛིན་གྱི་སྐྱེས་མཆོག་དུ་མ་དང་། ཆེན་པོའི་གོ་སར་བཞུགས་པ་མང་པོ་སོགས་མཆོག་དམན་བར་གསུམ་ལ་དབང་དང་སྒྲུབ་ཆེན་ཁྲིད་ལུང་མན་ངག་སོགས་ཆོས་འཆད་པའི་རྣམ་གྲངས་འདི་
ཙམ་ཞེས་དཔག་པར་མི་ནུས། ཁྱད་པར་རྙིང་མ་རང་ལུགས་ལ་མེད་དུ་མི་རུང་བའི་ཆོས་བཀའ་ཁྱད་པར་ཅན་ཆད་དུ་ཉེ་བ་དུ་མ་འབད་རྩོལ་ཆེན་པོས་ཉན་བཤད་དང་། བཤད་སྒྲུབ་ཀྱིས་སྲོལ་བཏོད་ནས་སྲོག་མཐུད་པར་མཛད། དེ་བཞིན་དུ་བཀའ་རྩོམ་གྱི་རིམ་པ་ཡང་མཐའ་ཡས་སོ། །བསྟན་པའི་བདག་པོ་མཆོད་ཡོན་ཟུང་གིས་དབུས་ཕུལ་བའི་དངོས་པོ་རྣམས་དོན་ཡོད་པར་བྱ་བའི་ཕྱིར་དང་། གཏེར་ལུང་ལས་ཀྱང་། ཁྱད་པར་གཡོ་རུ་གཙང་མའི་སར༔ཚོམ་བུ་གཅིག་ཏུ་འདུས་པའི་སྡེ༔མ་འོངས་བསྟན་པ་ཆེར་འཕེལ་ནས༔བོད་ཀྱི་བདེ་སྐྱིད་དགུང་དུ་འདེགས༔ཞེས་ལུང་བསྟན་པ་ལྟར། འདུས་སྡེ་ཨོ་རྒྱན་སྨིན་གྲོལ་གླིང་འདི་ཉིད་མེ་འབྲུག་གསར་དུ་བསྐྲུན་ནས་རིམ་པར་གཙུག་ལག་ཁང་གསུམ་དུ་བཞེངས། གྲྭ་ཚོགས་ཀྱང་དང་པོ་བརྒྱད་གྲྭ་ཙམ་ལས་ཕྱིས་སུམ་བརྒྱར་ཉེ་བར་སྡོམ་པ་གསུམ་གྱི་བསླབ་ཁྲིམས་ལ་བཀོད་ནས་འཁོར་ལོ་གསུམ་གྱི་རྣམ་ཐར་ལྷུར་ལེན་པ་རྙེད་བཀུར་གྱིས་མི་བྲེལ་བ་རྒྱུན་ཆགས་པ་དང་། དེ་དག་གི་གནས་མལ་རྟེན་གསུམ་མཆོད་རྫས་དང་བཅས་པ་དང་། དཀྱིལ་འཁོར་ཆེན་པོ་དུ་མའི་སྒྲུབ་མཆོད་དུས་བཞིར་སྒྲུབ་པའི་གཞི་རྟེན་ཡོ་བྱད་དུ་མ་དང་། བྲིས་འབུར་གྱི་སྐུ་བརྙན་མང་པོ་དང་། གསེར་དངུལ་གྱི་བཀའ་འགྱུར་གྱིས་མཚོན་གླེགས་བམ་ལྔ་བརྒྱ་སྐོར་དང་། མཆོད་རྟེན་ཆེན་མོ་སོགས་ཐུགས་རྟེན་དུ་མ་སྟེ་ཡོ་བྱད་ཀྱི་དངོས་པོ་ཐམས་ཅད་མཆོད་རྫས་སུ་ཐིམས་པར་མཛད་པ་དང་། གནམ་ལྕགས་བྲག་དང་ཤེལ་བྲག་ཤ་འུག་སོགས་གཏེར་གནས་རྣམས་ནས་ཟབ་གཏེར་གྱི་ཆོས་སྒོ་མང་པོ་སྤྱན་དྲངས་ནས་སྐལ་ལྡན་རྣམས་སྨིན་གྲོལ་ལ་བཀོད་པ་སྟེ་མཛད་པ་ཆ་ཤས་ཙམ་ཞིག་སྨོས་སོ། །དེ་ལྟར་དགུང་ལོ་བཅུ་དྲུག་ནས་དྲུག་ཅུ་རེ་དགུའི་བར་ཆོས་ཀྱི་ཕྲིན་ལས་བསྐྱངས་པའི་སློབ་མ་ནི་བགྲངས་བ་ལས་འདས། མཐར་ཤིང་རྟ་ཧོར་ཟླ་དང་པོ་ནས་ཅུང་ཟད་བསྙུན་པའི་ཚུལ་བསྟན་ནས། ཁྱད་པར་ཉེར་ལྔ་ནས་ཁུ་དབོན་རྣམས་ལ་ཞལ་གདམས་ཕྱི་མཐའི་བསླབ་བྱ་རྣམས་སྩལ། དེ་ནས་བཟུང་ཞབས་རིམ་དུ་གནས་པ་རྣམས་ཀྱི་སྣང་ངོར་ནུབ་ཀྱི་ཕྱིའི་རྩིག་ངོས་ན་ཡོད་པ་འདྲ་བའི་རྒྱ་གླིང་ལྟ་བུའི་སྒྲ་ཤིན་ཏུ་སྙན་པ་རྒྱུན་ཆགས་སུ་བྱུང་ཞིང་དེ་མཚུངས་ག་བུར་ལྟ་བུའི་དྲི་ངད་
ཀྱིས་གཟིམ་ཆུང་ཕྱི་ནང་ཐམས་ཅད་ཁྱབ་པའང་བྱུང་། ཤར་ཕྱོགས་སུ་གོམས་པ་བདུན་འགྲོ་དགོས་ཡོད་གསུངས་བཞེངས་ཏེ་ཞབས་གོམ་བདུན་སྤོས་ནས་སྐྱིལ་ཀྲུང་གིས་བཞུགས་ནས། སྣང་གྲགས་རིག་གསུམ་ལྷ་སྔགས་ཆོས་སྐུའི་ངང་། །སྐུ་དང་ཡེ་ཤེས་རོལ་པར་འབྱམས་ཀླས་པ། །ཟབ་གསང་རྣལ་འབྱོར་ཆེན་པོའི་ཉམས་ལེན་ལ། །དབྱེར་མེད་ཐུགས་ཀྱི་ཐིག་ལེར་རོ་གཅིག་ཤོག། ཅེས་འདའ་ཁ་ཞལ་ཆེམས་ཀྱི་ཚུལ་དུ་གསུངས་ཏེ། ཤིང་རྟ་ཧོར་ཟླ་གཉིས་པའི་ཚེས་གཉིས་ཀྱི་ཉི་དྲོས་ལ་ད་སྟེ་མཁའ་འགྲོའི་བསུ་བ་ཡང་བྱུང་ངོ་གསུང་སྟེ། ཕྱག་གཉིས་ཌཱ་དྲིལ་འཁྲོལ་བའི་བརྡ་དང་སྤྱན་ལྟ་སྟངས་དང་བཅས་སྐད་ཅིག་ལ་མཁའ་སྤྱོད་དུ་གཤེགས་སོ། །དེའི་ཚེ་ནམ་མཁའ་འཇའ་སྤྲིན་གྱིས་ཁེབས་པ་དང་མེ་ཏོག་དཀར་པོ་འདབ་མ་དྲུག་པ་དང་བརྒྱད་པའི་ཆར་ངོ་མཚར་བ་བབས། དེ་ནས་བཟུང་ཞག་མང་པོའི་བར་དུ་མེ་ཏོག་གི་ཆར་དང་འཇའ་འོད་དང་ས་གཡོ་བ་ལ་སོགས་པའི་ལྟས་ངོ་མཚར་བ་དུ་མ་བྱུང་ངོ་། །དེ་ནས་ཞབས་དྲུང་ཁུ་དབོན་རྣམས་ཀྱིས་མཆོད་འབུལ་ཕྱི་ནང་གི་རྟེན་བཞེངས་ཕྲིན་ལས་ཀྱི་རྒྱུན་སྐྱོང་བ་ལ་སོགས་པ་མཛད་ཅིང་། ཁྱད་པར་གདུང་ཞུགས་ལ་ཕུལ་སྐབས་དབུ་ཐོད་དང་ཐུགས་མེས་མ་རྨས་པར་ཕེབས་ཤིང་། རིང་བསྲེལ་གྱི་ཚོགས་དང་ཞུན་ཐིགས་ལ་རྣམ་རོལ་མཐའ་ཡས་མགོན་པོའི་སྐུ་བརྙན་འབྱོན་གཙང་གཟི་བྱིན་དང་ལྡན་པ་ཕེབས་ཏེ། གཏེར་ལུང་ལས། འདས་དུས་གདུང་ལ་རིང་བསྲེལ་འབྱུང༔སུས་མྱོང་མཁའ་སྤྱོད་བཙན་ས་ཟིན༔ཞེས་གསུངས་པས་སོ། །ཐུགས་ཀྱི་སྲས་དང་གསུང་ཀྱི་སྲས་ཀྱིས་མཚོན་པའི་བུ་སློབ་གཏེར་ལུང་ནས་བཤད་པ་ནི། དམ་ལྡན་ཆོས་བདག་སློབ་བུ་ནི༔ད་ལྟའི་མངའ་བདག་ཡབ་སྲས་སོགས༔ས་ཐོབ་རྗེ་འབངས་སྐྱེ་བའི་མཐའ༔འགྲོ་དོན་ནུས་པ་སུམ་ཅུ་ལྔ༔རང་དོན་གྱུར་པ་བརྒྱ་རྩ་བརྒྱད༔ཆོས་ཀྱི་འབྲེལ་པ་སྟོང་ཚོ་གཉིས༔སྨོན་ལམ་འབྲེལ་པ་ཁྲི་ཕྲག་ལྔ༔ལས་ཀྱིས་འབྲེལ་པ་དྲུག་ཅུ་བདུན༔གདུགས་ཐོགས་བདུན་གྱིས་ཞབས་ནས་འདེགས༔མི་ཆེན་གསུམ་གྱིས་མངའ་ཐང་སྤེལ༔ཞེས་སོ། །རགས་ཙམ་ཞིག་བརྗོད་ན། མཆོད་ཡོན་ཉི་ཟླ་ཟུང་འབྲེལ། ས་སྐྱ་བདག་ཆེན་ཀུན་དགའ་བཀྲ་ཤིས། ཆབ་མདོ་རྒྱལ་བ་འཕགས་པ་ལྷ། ཐུགས་སྲས་
གསུང་སྤྲུལ། སྤྲེ་བོ་ཆོས་ཀྱི་དབང་པོ། ཀོང་པོ་ཐང་འབྲོག་སྤྲུལ་སྐུ། འཕྱོངས་རྒྱས་དཔལ་རི་སྤྲུལ་སྐུ། གཙང་ནས་དྲེགས་པ་སྤྲུལ་སྐུ། ཟངས་ལ་མཁར་སྤྲུལ་སྐུ། དྭ་ལའི་ཧུ་ཐོག་ཐུ་ངག་དབང་བཤད་སྒྲུབ་རྒྱ་མཚོ། བོན་པོ་སྤྲུལ་སྐུ། ཁམས་ནས་རྫོགས་ཆེན་པ་དང་ཀཿཐོག་རྒྱལ་སྲས། ཀོང་པོ་རྦ་ཁ་སྐུ་སྐྱེ། མེ་རག་བླ་མ་སོགས་དང་། གཞན་ཡང་དུས་དེའི་མཁས་གྲུབ་ཐོག་མཉམ་ཕལ་ཆེར་གྱིས་ཞབས་ལ་མ་གཏུགས་ཞེས་བྱ་བ་མེད་པས་མཐའ་ཡས་སོ། །ཁྱད་པར་དུ་ཡང་བཀའི་བུམ་པ་བྱོ་ཞིང་མཁྱེན་པའི་བཅུད་ཐོབ་པའི་ཐུགས་སྲས་དང་གསུང་གི་སྲས། མཁན་ཆེན་ལོ་ཙཱ་བ་ཆོས་དཔལ་རྒྱ་མཚོ། གདུང་སྲས་པདྨ་འགྱུར་མེད་རྒྱ་མཚོ། གཅུང་ཡིད་བཞིན་ལེགས་གྲུབ། གཅུང་རིན་ཆེན་རྣམ་རྒྱལ་ཏེ། འདི་རྣམས་ནི་ཆུང་ངུ་ནས་རྗེས་སུ་བཟུང་སྟེ། དབང་ལུང་ཁྲིད་མན་ངག་རྒྱུད་བཤད་ལག་ལེན་རིག་གནས་དང་བཅས་པ་བུམ་པ་གང་བྱོའི་ཚུལ་དུ་རྫོགས་པར་གནང་ནས་ཆོས་ཀྱི་རྒྱལ་སྲིད་ལ་དབང་བསྐུར་ཏེ་རྒྱལ་ཚབ་ཏུ་མངའ་གསོལ་བའོ། །
མཁན་ཆེན་ལོ་ཙཱ་བ་ཆོས་དཔལ་རྒྱ་མཚོ།
༈ དེ་ལ་མཁན་ཆེན་ལོ་ཙཱ་བ་ཆོས་དཔལ་རྒྱ་མཚོ་ནི། གཏེར་ལུང་ལས། གཡུ་སྒྲའི་སྤྲུལ་པ་བློ་ལྡན་དྷརྨའི་མིང༔བྱང་སེམས་དད་བརྩོན་སྙིང་སྟོབས་ལྡན་པ་འབྱུང༔ཞེས་ལུང་གིས་བསྟན་པའི་སྐྱེས་ཆེན་སྐུ་ཚེ་རིལ་པོར་འཆད་རྩོད་རྩོམ་གསུམ་གྱིས་ཕྲིན་ལས་བསྐྱངས་པས། རིག་གནས་མང་པོ་ལ་འགྲེལ་བཤད་སོགས་ཀྱི་བསྟན་བཅོས་དང་། མདོའི་སྐོར་ལ་སྡོམ་གསུམ་རྣམ་ངེས་ཀྱི་འགྲེལ་པ་དཔག་བསམ་སྙེ་མ་དང་། སྔགས་ཕྱི་ནང་སྐོར་ལ། དབང་སྒྲུབ་ཐབས་རྗེས་གནང་ལ་སོགས་པའི་བསྟན་བཅོས་མཐའ་ཡས་པ་དང་། ཁྱད་པར་གསང་བ་སྙིང་པོ་ལ་ཊཱི་ཀ་གསང་བདག་དགོངས་རྒྱན། སྤྱི་དོན་གསང་བདག་ཞལ་ལུང་ལ་སོགས་པའི་བསྟན་བཅོས་མཛད་ནས་དབྱར་དགུན་གྱི་ཆོས་གྲྭར་རྒྱུད་ཀྱི་བཤད་པ་ཚར་རེ་སྨིན་རྒྱས་སྟར་ཆགས་པ་དང་། གནས་དུས་ཅི་རིགས་པར་ལོ་དང་ཟླ་འབྲེལ་གྱིས་ཟབ་མོའི་ཉམས་བཞེས་ལ་སྙིང་པོར་མཛད་པས་རྫོགས་པ་ཆེན་པོ་རང་སྣང་རིས་མེད་ཀྱི་དགོངས་པ་མངོན་དུ་གྱུར། སློབ་མ་ཡང་ས་སྐྱ་བདག་ཆེན་ཀུན་དགའ་བཀྲ་ཤིས་དང་ཆབ་མདོ་རྒྱལ་བ་འཕགས་
པ་ལྷ་སོགས་ཆེ་གཉན་དུ་མས་བཀུར་ཞིང་མཆོད། དེ་ལྟར་མཆོག་དམན་བར་མའི་སྐྱེ་དགུ་ཐམས་ཅད་ལ་ཆོས་ཀྱི་ཕྲིན་ལས་རྒྱ་ཆེར་བསྐྱངས་ནས་མཐར་དགུང་ལོ་རེ་ལྔ་པ་:ས་ཁྱི་༼མེ་བྱ་༽ཧོར་ཟླ་བཅུ་གཉིས་པའི་ཉེར་བཞི་ལ། ལོག་སྨོན་སྟོབས་སུ་གྱུར་པའི་:སྦྱོངས་འགར་༼ཇུན་གར་༽བའི་དམག་དཔུང་གིས་དབུས་གཙང་གི་རྙིང་མའི་ཆོས་སྡེ་ཡོད་དོ་ཅོག་ཐམས་ཅད་ཀྱི་དགོན་སྡེ་དམིགས་མེད་དུ་བཤིགགྲྭ་པ་རྣམས་གཅེར་བུར་ཕྱུངས་ནས་སྐྱ་བོར་བསྒྱུར་ཏེ་ཁྱིམ་ཐབ་བྱེད་པའི་གན་སྡོམ་བླངས། བླ་མ་སྐྱེས་བུ་དམ་པ་རྣམས་བཀྲོངས་པའི་དུས་དེར་ཧོར་ཟླ་དང་པོའི་ཉེར་བཞི་ལ། ལྷ་ལྡན་ཕོ་བྲང་ཆེན་པོའི་མདུན་ཐད་ཀྱི་པདྨ་རགས་གསར་ཟེར་བའི་ས་དེའི་ཐད་དུ་སྤྱན་དྲངས་པར་སྐད་ཅིག་དེ་ཉིད་ལ་ཟབ་ལམ་འཕོ་བའི་མཚམས་སྦྱོར་གྱིས་དག་པའི་ཞིང་དུ་ཐ་ལེར་གཤེགས་པས། གཤེད་མ་རྣམས་ཡུ་བུར་གྱུར་ཏེ་ཁ་སྐྱེངས་སོ། །
རིགས་སྲས་པདྨ་འགྱུར་མེད་རྒྱ་མཚོ།
༈ རིགས་སྲས་པདྨ་འགྱུར་མེད་རྒྱ་མཚོ་ནི། གཏེར་ལུང་ལས། རིགས་སྲས་རྟ་མགྲིན་སྤྲུལ་པ་ནི༔ རྡོ་རྗེའི་མིང་གིས་འགྲོ་དོན་སྤྱོད༔ ཅེས་ལུང་གིས་ཟིན་པ་འདི་ཉིད། ཡབ་གཏེར་ཆེན་ཉིད་དང་ཡུམ་མཁའ་འགྲོའི་རྟགས་ཀྱིས་སྤྲས་པའི་ཡོན་ཏན་སྒྲོལ་མ་ཞེས་པའི་སྲས་སུ་མེ་སྟག་ལ་འཁྲུངས། བཙས་པའི་མཚན་ལས། ཤེས་རབ་རྣམ་རྒྱལ་རྡོ་རྗེ་འབུམ་ཞེས་གསོལ། ཆུང་ངུ་ནས་དམ་པ་རྣམ་གཉིས་ཀྱིས་ཆོས་ཀྱི་བདུད་རྩི་བུམ་པ་གང་བྱོའི་ཚུལ་དུ་གནང་། དགུང་ལོ་ཉི་ཤུ་པ་ལ་མཁན་པོ་ལོ་ཙཱ་བ་ངག་དབང་ཆོས་དཔལ་ལས་ཆིག་རྫོགས་ཀྱིས་བསྙེན་པར་རྫོགས་ནས། ཆོས་རྗེ་གཞན་ཕན་དབང་པོའི་དྲུང་དུ་འདུལ་མཛོད་ཕར་ཕྱིན་ལ་སོགས་པ་རིགས་ལམ་ནས་ལུང་རིགས་ཀྱི་བཤད་པ་མཐའ་ཆོད་པ་གསན། བླ་མ་དམ་པ་གཉིས་ཀྱིས་གསན་པ་གང་ཡོད་ཀྱི་སྟེང་དུ་གོང་དཀར་ཆོས་སྡེ་ནས་སློབ་དཔོན་དབང་ཕྱུག་པ་སྤྱན་དྲངས་ནས་རྡོ་རྗེ་ཕྲེང་བ་ལ་སོགས་པ་གསར་མའི་ཆོས་ཀྱི་རྒྱུན་ཡོད་དོ་ཅོག་ཀྱང་གསན། བསྟན་བཅོས་ཀྱང་སྙན་ངག་གི་ཊཱི་ཀ། ཕར་ཕྱིན་གྱི་སྤྱི་དོན། གསང་སྙིང་གི་སྤྱི་དོན། སྡོམ་གསུམ་གྱི་ཟུར་འདེབས། ཚེ་བདག་གི་ལས་སྦྱོར་ལ་གཅེས་པའི་མན་ངག་གི་སྒྲོན་མ་བདུན་པ་དབང་
དང་སྒྲུབ་ཕྲིན་ལས་ཁ་ཚར་དང་བཅས་པའི་བསྟན་བཅོས་མཐའ་ཡས་པས་ཡབ་ཀྱི་ཞལ་ཆེམས་སུ་ཡང་། ཆོས་ཀྱི་ཆ་ཕ་ལས་བུ་ལྷག་ཅེས་དབུགས་དབྱུང་། དེ་ལྟར་ཆོས་ཀྱི་ཕྲིན་ལས་བསྐྱངས་པའི་མཐར་དགུང་ལོ་སོ་གསུམ་པ་ས་ཁྱི་ཧོར་ཟླ་དང་པོའི་ཉེར་དྲུག་ལ་ལོག་སྨོན་ཅན་དེ་རྣམས་ལ་ལུས་སྲོག་ལྟོས་མེད་བཏང་སྟེ་ཡ་ང་དང་བག་ཚ་མེད་པའི་ལྟ་གདེངས་ཀྱིས་གཤེགས་སོ། །
གཅུང་ཡིད་བཞིན་ལེགས་གྲུབ་དང་རིགས་སྲས་རིན་ཆེན་རྣམ་རྒྱལ།
༈ གཅུང་ཡིད་བཞིན་ལེགས་གྲུབ་ཀྱང་རིག་གནས་སོགས་མཁས་པའི་ཕུལ་དུ་ཕྱིན་ཡང་ལོག་སྨོན་ཅན་དེ་རྣམས་ཀྱི་དབང་དུ་སོང་ངོ་། །༈ རིགས་སྲས་རིན་ཆེན་རྣམ་རྒྱལ་ནི། སྡིག་ཅན་དེ་རྣམས་ཀྱིས་བརྫི་བར་མ་ནུས་ཏེ། མོན་བོད་ཀྱི་ས་མཐའ་རྣམས་སུ་རེ་ཞིག་བསྐུང་ནས་བཞུགས། དེ་ནས་ཙཱ་རི་བརྒྱུད་ཁམས་ཕྱོགས་ཀྱི་དབེན་རིར་གསང་ཐབས་ཀྱིས་བཞུགས་ནས་གུ་རུ་ཞི་དྲག་ལ་སོགས་པའི་ཡི་དམ་དུ་མ་བསྙེན། སྐབས་སུ་དྲག་པོ་མངོན་སྤྱོད་ཀྱིས་ལས་ལ་ཡང་འབད་པ་གང་ཐོན་བྱས་ཏེ་ལོ་ངོ་གཉིས་ཙམ་བཞུགས་སྐབས། གནམ་བསྐོས་འཇམ་དབྱངས་གོང་མ་ཆེན་པོའི་ཐུགས་རྗེའི་ཉི་མས་བདུད་ཚོགས་མུན་པའི་དམག་དཔུང་དེ་དག་ཕ་མཐར་བསྐྲད་དེ་སྤ་བཀོང་བར་བྱས། གངས་ཅན་བོད་ཀྱི་ལྷ་གཅིག་འཛམ་གླིང་སྐྱེ་དགུའི་འདྲེན་པ་རྒྱལ་བ་སྐལ་བཟང་རྒྱ་མཚོ་གྲུ་འཛིན་འཇིག་རྟེན་དབང་ཕྱུག་གི་ཕོ་བྲང་ཆེན་པོའི་གསེར་ཁྲིའི་སྟེང་དུ་མངའ་གསོལ། བོད་ཡུལ་སྐྱེ་རྒུ་སོ་སོའི་ལུགས་ཀྱི་ཆོས་དང་སྲིད་ཀྱི་བྱ་བ་སྔར་ལུགས་བཞིན་སྐྱོངས་ཞེས་པའི་བཙན་པོའི་ལུང་བསྒྲགས་ནས། རྫོགས་ལྡན་གསར་པའི་ཉི་མ་ཕྱོགས་ཐམས་ཅད་དུ་བརྡལ་བས། སྔར་ཡབ་མེས་ཀྱི་བུ་སློབ་ཁམས་པ་བླ་དཔོན་རྣམས་ཀྱིས་བསྙེན་བཀུར་གྱིས་འབུལ་བ་རྒྱ་ཆེར་བསྟབ་ཅིང་། ཆོས་དང་ཟང་ཟིང་གིས་ཕྲིན་ལས་རྒྱ་ཆེར་གྱུར་པ་ན། གདན་ས་མ་ལག་དང་བཅས་པ་སྔར་ལྟར་ལྷོགས་པས། དབུ་ཆེན་ཁུར་བཞེས་པ་རྣམས་ཀྱིས་སྤྱན་འདྲེན་བྱུང་བར། དེ་འཕྲལ་ལམ་སྟེགས་ནས་ཕོ་བྲང་ཆེན་པོར་རྒྱལ་བ་སྐལ་བཟང་རྒྱ་མཚོར་མཇལ་ཕྱག་མཛད་པས། གོང་མ་གཏེར་ཆེན་ཆོས་ཀྱི་རྒྱལ་པོའི་ཁྲི་ཐོག་ཏུ་མངའ་གསོལ་བའི་བསྐོན་
ཆ་དང་:འཇགས་༼འཇའ་༽ས་སོགས་ཐམ་ག་སྤྱི་བོར་སྩལ་བས། གུས་འདུད་ཀྱིས་ཐོན་ཕྱག་ཞུས་ནས་ལམ་དུ་ཞུགས། རང་ཞབས་པ་རྣམས་ཀྱིས་བསུ་བ་སེར་སྦྲེངས་ཀྱི་བཀུར་སྟི་དང་བཅས་རང་དགོན་དུ་ཕེབས་སོ། །དམ་པ་འདི་ཉིད་ནི་སྔོན་ནས་གཏེར་ཆེན་ཉིད་ཀྱིས་ཕྱི་མཐའི་གཟིགས་པས་དོན་གྱི་གདན་སར་ཁྲི་ནོན་མཛད་པ་འདྲ་སྟེ། སྐུ་མྱ་ངན་ལས་འདའ་བར་ཕྱོགས་པའི་ལོ་དེའི་ནང་དུ་གཅུང་ཀུན་དགའ་ཚུལ་ཁྲིམས་ཀྱིས་དོ་ཁུར་ཆེན་པོས་བཀའ་འགྱུར་གསར་བཞེངས་དང་ཆོས་འཁོར་ལྷུན་པོའི་སྟེང་དུ་གསེར་གྱི་རྒྱ་ཕིབས་བཟོ་བཀོད་ཀྱིས་མཚར་བ་མཛེས་པར་སྤྲས་ནས་རབ་ཏུ་གནས་པ་གསོལ་བས་དེ་ལེགས་ཤིན་ཏུ་ལེགས་ཏེ་དེ་དུས་བུ་ཆུང་རྒན་པར་ཁྲི་ནོན་ཀྱང་བྱས་ངེད་ཀྱིས་ནས་ཞིག་འཐོར་བྱས་ན་ཡོང་གསུངས་པར། རེ་ཞིག་སྐུ་ཉིད་བཞུགས་རིང་ཁྲི་ནོན་ཀྱི་རིགས་མི་གནང་བ་ཞུ་ཞེས་ནན་གྱིས་བཤོལ་བས། སང་ཉིན་རབ་སྟོན་གྱི་ཚོགས་ལ་ཕེབས་རྒྱུའི་དགོངས་ཁ་ཚུན་ད་རེས་ངེད་ཀྱིས་བྱས་པ་དེ་རང་ལེགས་འདྲ་ཡང་། འོ་ན་ངེད་རང་ཕ་བུ་ཡང་ཡང་དུས་གཅིག་ཏུ་འཛོམས་པ་དཀའ་བས་སང་ཉིན་བུ་ཆུང་རིན་ཆེན་རྣམ་རྒྱལ་ཡང་ཚོགས་སུ་ཕྱིན་ན་ལེགས་གསུངས་པས། མགྲོན་གཉེར་གྱིས་གདན་གྱི་བཀོད་པ་རྣམས་ཚར་བས་བཞུགས་ས་གང་དུ་བྱེད་ཞུས་པར། གདོང་གྲལ་གཡོན་གྱི་མགོ་དེར་གདན་མཐོ་ལིང་ངེ་བ་ཞིག་བྱས་པས་ཡོང་གསུང་བ་ལྟར་ཐོག་མར་ཚོགས་སུ་ཕེབས་པ་དེ་ཡིན་པས་མ་འོངས་པའི་ཕྱི་མཐར་དེ་དུས་མངའ་གསོལ་བའོ། །དེ་ལྟར་གདན་སར་ཕེབས་ནས་གཙུག་ལག་ཁང་ཕན་ཚུན་སྔར་རྒྱུན་ལྟར་གསོས། འདུས་ཚོགས་སྔར་ཡོད་རྣམས་ལ་བར་སྐབས་སུ་ཁྲིམས་གཙང་མི་གཙང་གིས་དག་ཐེར་མཛད། གསར་ཞུགས་བརྒྱ་སྐོར་ཙམ་བསླབ་པ་གསུམ་གྱིས་བསྡམས་ནས་འཁོར་ལོ་གསུམ་གྱི་བྱ་བའི་གནས་ལ་བཀོད། ཡབ་མེས་ཀྱིས་བཙུགས་པའི་ཚུལ་སྒྲུབ་མཆོད་ཉམས་པ་རྣམས་གསོས་སོ། །གར་འཆམས་སྤྱན་གཟིགས་ལ་སོགས་པའི་ཡོ་བྱད་སྔོན་དུས་ཀྱི་གྲངས་ཚང་བ་བསྒྲིགས། དེ་ནས་དབུས་གཙང་གཉིས་ཀྱི་སྡེ་འཁྲུག་གིས་མཐར་ས་སྤྲེལ་ཧོར་ཟླ་ལྔ་པའི་ཚེས་ཉེར་ལྔ་ལ་བསོད་ནམས་དཔུང་པ་མཐོ་བས་སྟོབས་ཀྱིས་འཁོར་ལོས་སྒྱུར་བའི་རྒྱལ་པོར་མི་དབང་
འགྱུར་མེད་བསོད་ནམས་སྟོབས་རྒྱལ་ཤུགས་འབྱུང་དུ་སོན་པ། འཇམ་དབྱངས་གོང་མ་རྒྱལ་པོས་བོད་ཁྲི་སྐོར་བཅུ་གསུམ་གྱི་རྒྱལ་སྲིད་ལ་དབང་བསྐུར་བའི་མངའ་གསོལ་ལེགས་སྐྱེས་ཀྱི་མཇལ་འབུལ་ལ་ཕེབས། དད་མོས་ཀྱིས་གུས་པར་བཏུད་དེ་རྐྱེན་སེལ་གྱི་དབང་སོགས་གསན་ཏེ་ཏི་ཤྲཱིར་བཀུར། རྙེད་བཀུར་གྱི་གནང་སྐྱེས་མི་དམན་པས་དབུགས་དབྱུང་བའི་བསླབ་སྟོན་རྒྱ་ཆེར་སྩལ་བ་ཡི་རང་གི་གནས་སུ་མཛད། དེ་ནས་རང་དགོན་དུ་བླ་མ་གོང་མའི་རྣམ་ཐར་གྱི་རྗེས་སུ་ཞུགས་ཏེ་དབང་ལུང་ཁྲིད་སོགས་དང་། ཁྱད་པར་གསང་བ་སྙིང་པོའི་རྒྱུད་ཀྱི་བཤད་པ་ཆད་དུ་ཉེ་བ་འཆད་ཉན་གྱིས་སྤེལ་ནས་སྔར་གྱི་སྲོལ་བཏོད་དེ་ཆོས་ཀྱི་ཕྲིན་ལས་སྐྱོང་བཞིན་པ་འདིའོ། །གཞན་ཡང་གཏེར་ཆེན་དེ་ཉིད་ཀྱི་དངོས་སློབ་གྲྭ་ས་འདིར་སྒྲིགས་སུ་ཞུགས་པའི་བཤེས་གཉེན་ནི། འཆད་ཕྲིན་གྱི་ལས་སོགས་ལ་དབང་འབྱོར་བ། ཆོས་རྗེ་གཞན་ཕན་དབང་པོ། མངའ་བདག་རིག་འཛིན་རྒྱ་མཚོ། བླ་མ་སྐྱི་སྟོན་པ། སྙེ་མདོ་བླ་མ་ཨོ་རྒྱན་རྣམ་རྒྱལ། དགེ་སློང་བློ་གསལ་རྒྱ་མཚོ། འབུམ་རབ་འབྱམས་པ་ཨོ་རྒྱན་སྐལ་བཟང་། ཟེངས་སྟོན་ཨོ་རྒྱན་དཔལ་འབྱོར་རྣམས་དང་། འཚོ་བྱེད་གཞན་ཕན་མཆོག་སྦྱིན། འདུལ་མངོན་ཕར་ཚད་དབུ་མ་སྡོམ་གསུམ་སྟེ་པོད་ཆེན་དྲུག་གི་སྟེང་གསང་བདག་དགོངས་རྒྱན་ཏེ་གཞུང་ཚོགས་དེ་རྣམས་རིགས་ལམ་ནས་དྲངས་པའི་བཤད་སྦྱངས་མཐར་ཕྱིན་པའི་དགེ་བཤེས་རབ་འབྱམས་པ་བསྟན་འཛིན་གར་དབང་། རབ་འབྱམས་པ་ངག་དབང་དཔལ་བཟང་། རབ་འབྱམས་པ་ཕྲིན་ལས་རབ་འཕེལ། རབ་འབྱམས་པ་མཐུ་སྟོབས་རྣམ་རྒྱལ། རབ་འབྱམས་པ་ཨོ་རྒྱན་མཆོག་དགའ། རབ་འབྱམས་པ་ཨོ་རྒྱན་དཔལ་མགོན། བདག་ཀྱང་དེ་རྣམས་ཀྱི་ཕྱོགས་སུ་གཏོགས་ཙམ་དང་བཅས་པ་རྣམས་ལ་དམ་པ་དེ་ཉིད་ཀྱིས་དེང་སང་གྲྭ་ས་གཞན་ལ་བརྟགས་ན། དགེ་བཤེས་ཀྱི་གྲས་སུ་འདུག་ཅེས་དབུགས་དབྱུང་བས་མཚོན་དམ་པ་དེའི་བཀའ་དྲིན་གྱིས་རང་གཞན་གྱི་དོན་ནུས་པའང་མང་བར་སྣང་ངོ་། །
གཏེར་སྟོན་དང་གཏེར་གནས་རགས་ཙམ་ཞིག་གཏེར་ཆེན་བླ་མས་ཟིན་ཐོར་བཀོད་པ།
༈ གཏེར་སྟོན་དང་གཏེར་གནས་རགས་ཙམ་ཞིག་གཏེར་ཆེན་བླ་མས་ཟིན་ཐོར་བཀོད་པ་ནི། ཤེལ་གྱི་བྲག་ཕུག་གསང་གཏེར་བཀའ་འདུས་སྦས༔ལྷོ་བྲག་མཁོ་མཐིང་བདེ་གཤེགས་འདུས་པ། མཁར་ཆུ་གནམ་སྐས་ཅན་ལ་ཡོངས་རྫོགས། གཏམ་ཤུལ་སྲིན་མོ་སྦར་རྗེས་གསང་གཏེར། གྲ་ཡི་གཡུ་སྒོམ་བྲག་ལ་གཏེར་སྨྱོན། མུ་ཏིག་སྤ་མ་གོང་ལ་གསང་གཏེར། ཟར་ཕུ་ཟངས་ཀྱི་མཚོ་བྲག་གཏེར་ཕྲན། མགོན་མཁར་མགོན་པོ་གདོང་ལ་ཐུགས་གཏེར་ལྔ། ནོར་གཏེར་གཡུ་ཁྲབ་དབུལ་དང་བྲལ་བ་སྦས། གྲ་ཕྱི་བྲག་:གོ་༼པོ༽ཆེ་ལ་བོད་གཏེར། གྲ་ཡི་སྣེ་གདོང་ཟུར་ལ་རལ་གྲི། དོལ་གྱི་སྤྱི་སྡེའི་ཟུར་ལ་ཁྲབ་རྨོགགཞུང་གི་ར་གྲོང་རྒྱབ་ལ་གསེར་ཀ་སྦས། ཨོ་དཀར་བྲག་ཏུ་ཟླ་བ་གཉིས། སྙིང་པོའི་རྫ་ལ་ཟླ་བ་གཉིས། དབུ་རྩེར་ལོ་དྲུག་ཅུ། མཆིམས་ཕུར་ལོ་ལྔ། ཡང་རྫོང་ལོ་གསུམ། གཡའ་མ་ལུང་དུ་ལོ་བཞི། ཤེལ་བྲག་ཏུ་ལོ་གསུམ། སྤ་མ་གོང་དུ་ལོ་གཉིས། ཤམ་པོའི་གངས་ལ་ལོ་གསུམ། མཁར་ཆུར་ལོ་བདུན། ཏེ་སྒྲོར་ལོ་བདུན། ཡེར་པ་དང་ཆུ་བོ་རིར་ལོ་རེ། ཟབ་བུར་ལོ་གཉིས། གཡུ་སྒོམ་བྲག ་ལ་ཟླ་བ་གཉིས། རྡོར་འབུམ་ཆོས་གྲགས་ནི་འཁྲུངས་ས་མངའ་རིས་པའོ། །ཡབ་ཡུམ་གྱིས་རྡོར་གཅོད་དང་འབུམ་བཞེངས་པས་དེར་གྲགས། པྲ་དུན་རྩེའི་རྟ་མགྲིན་དྲེགས་པ་ཟིལ་གནོན་གྱི་ཐུགས་ཀ་ནས་བདུད་རྩི་བུམ་པ་དང་བྱམས་སྤྲིན་ནས་འབྲུམ་བསྲུང་སོགས་བཏོན། ལྷ་བཙུན་སྔོན་མོ་ནི། ཡུམ་བརྟན་གྱི་རྒྱུད་བོ་དྷི་རཱ་ཛ་ཇོ་བོ་རྗེའི་རབ་བྱུང་བབས་པའི་སྲས་ཡིན། དབུ་རྩེ་དང་། འོན་འཇང་ལྷ་རིངས་སོགས་ནས་སྨན་རྫས་ཀྱི་གཏེར་ཁ་འགའ་ཞིག་བཏོན། རི་བོ་ཆེའི་གཏེར་གྲུབ་ཐོབ་དངོས་གྲུབ་ཀྱིས་འདོན་པར་གསུངས་ཀྱང་མ་མཐོང་། ལྷ་ས་ནས་མ་ཎི་བཀའ་འབུམ་བཏོན་པ་ལས་གཞན་རྒྱུན་བཞུགས་པ་མ་མཐོང་། རཀྴག་ནི་ཡར་འབྲོག་གཉན་དུ་འཁྲུངས། སྒང་ཤར་མདོས་བཅུ་སོགས་གཏེར་མང་། དྭགས་སྒམ་སོགས་དུས་རྟགས། མི་ལས་ཚེ་རིང་མའི་སྒྲུབ་སྐོར་འདི་ལ་ཞུས་པར་ངེས། ཉང་༼རལ་ནི་༽གྲུབ་ཐོབ་དངོས་གྲུབ་དང་རཀྴག་གཉིས་ཀར་ཐུགགཏེར་ཁ་ནི་མང་། ༼མ་ཡིག་ཏུ་མི་གསལ༽ལྕགས་སྤྲེལ་གཏེར་ཁ་བཅོ་བརྒྱད།
རྒྱལ་སྲས་༼ལེགས་པ་༽ཡབ་དབང་ཕྱུག་རྒྱལ་པོ། ཨོ་རྒྱན་པ་གཉལ་དུ་ཕེབས་དུས་ད་སྟེ་ལོ་བཅོ་ལྔ་ན་ཁྱོད་ལ་བུ་ཁྱད་པར་ཅན་ཞིག་འབྱུང་ཞེས་ལུང་བསྟན་པ་དེའོ། །༼མ་ཡིག་ཏུ་མི་གསལ་༽དྲོར་དགུང་སྙིང་གླང་། མཁའ་འགྲོ་ཀུན་དགའ་འབུམ་ནི་འོན་གྱི་བཀྲ་ཤིས་དོ་མཁར་འཁྲུངས། ཚེས་བཞི་རྙིང་མ་གྲགས་རྒྱལ་གྱི་གྲྭ་པ་ཡིན། དེའི་སློབ་མ་དུང་མཚོ་རས་པ་ནི། དྭགས་པོ་ལྷ་རྗེའི་སློབ་མ་དུང་མཚོ་རས་པའི་སྐྱེ་བ་ཡིན་པས་དེ་སྐད་དུ་གྲགས། ཀོང་པོ་མོན་གནས་ཀྱི་སྒོ་ཕྱི་ཡང་ཏི་ཡང་འདིའི་གཏེར། དྲི་མེད་ལྷུན་པོ་ནི་ཀོང་པོ་འོ་ཤོད་དུ་ཆུ་འབྲུག་ལོ། ལྷ་སའི་རྟ་མགྲིན་གྱི་ཕྱག་གཡོན་འོག་ནས་དོན་ཏིགརྒོད་ལྡེམ་ནི་ཐང་ཡིག་ནས་མི་གསལ། ལ་སྟོད་བྱང་པ། མེ་ཕོ་རྟའི་ལོའི་སྦྲུལ་ཟླ་ལ་གཏེར་བཏོན། ཨོ་རྒྱན་གླིང་པ་གྲྭ་ཡར་རྗེར་འཁྲུངས། གཏེར་ཁ་ཉེར་བརྒྱད་ཙམ་བཏོན། དུས་རྟགས་ཕག་གིས་ས་སློག་ཅེས་པ་སྟེ་ཏི་སི་བྱུང་བ། རྡོར་གླིང་ནི་གྲྭ་གྲོག་སྐེད་དུ་མེ་ཁྱི་ལ་འཁྲུངས། ཁྲ་འབྲུག་གི་གཏེར་ནས་བརྩམས་ཏེ་གཏེར་ཁ་ཞེ་གསུམ་བཏོན་པ་གཏེར་སྟོན་ཉིད་ཀྱིས་མཛད་པའི་གཏེར་བྱུང་ན་གསལ། དེ་ནས་ཀྱང་འགའ་རེ་བཏོན་པར་སྣང་། སྲས་གྲོ་བོ་ལུང་དང་དབུས་ཀྱི་འུག་སྐད་སོགས་ཀྱང་བཟུང་། ཚེ་ཆུའི་སྣོད་ནི་བྱང་ཐང་ལྕགས་རུ་བ་ལ་ཡོད་འདུགདུས་རྟགས་ས་བཙན་རི་བོས་རི་ལ་ཞེས་པ། འདི་དང་དུས་མཚུངས་༼དོ་བན་༽རྒྱ་མཚོ། དུས་རྟགས་སིང་མ་ལ་ཁར། མོན་རྩེ་བ་ཡིན་ཟེར། གཏེར་གནས་མུ་ཏིགསངས་གླིང་པ། ཀོང་པོ་ལོང་པོ་གྱི་མ། དགུང་ལོ་ཉེར་ལྔ་ནས་སོ་དྲུག་ཡན་ལ་གཏེར་ཁ་བཅུ་དྲུག་བཏོན་པ་གཏེར་བྱུང་ཞལ་གསུང་མར་འདུགདེ་ནས་ཀྱང་འགའ་རེ་བཏོན་པར་སྣང་། བསམ་གཏན་བདེ་ཆེནགླིང་པ་ཀོང་པོ་ལོང་པོར་འཁྲུངས། ཞིང་སྐྱོང་གི་སྒྲུབ་སྐོར་ཞིག་འདུག།
ཀུན་སྐྱོང་གླིང་པ་ཤངས་ཀྱི་ཕུར་འཁྲུངས། དགུང་ལོ་བཅོ་ལྔ་ནས་གཏེར་བཏོན། གཏེར་ཁ་མང་། ད་ལྟ་ནི་རྡོར་སེམས་སྙིང་ཐིག་ཙམ་དར། རཏྣ་གླིང་དང་དུས་མཚུངས། དྲི་མེད་ཀུན་དགའ་གྲྭ་ཁང་དམར་དུ་འཁྲུངས། གྲྭ་ཕུག་པ་བའི་སློབ་མ་ཡིན། ཐུགས་རྗེ་ཆེན་པོ་འོད་མཆོག་གི་རྒྱུན་ཡོད། སོ་གསུམ་ལ་ཀོང་པོར་གཤེགས། མགོན་པོ་རིན་ཆེན་ནི། ཡུགས་སུ་ཤུད་བུའི་རིགས་ལས་འཁྲུངས། བཅུ་གསུམ་པ་ལ་གྲུབ་ཆེན་ཕྱག་རྡོར་པའི་དྲུང་དུ་ཆོས་སྒོར་ཞུགས། མོན་ཟངས་ཡག་ནས་གཏེར་བཞེས། རཏྣ་གླིང་པས་ཀྱང་ཆོས་གསན། གྱ་བཞི་པ་ཆུ་རྟ་ལ་གཤེགས། གུ་རུ་ཇོ་རྩེ་དང་། ཤུད་བུ་ཆོས་གྲགས་ཞེས་པ་མཚན་གྱི་རྣམ་གྲངས། གཏེར་ཆོས་ནི་པདྨ་སྙིང་ཐིག་སོགས། རཏྣ་གླིང་པ། གྲོ་ཤུལ་ཐང་དཀར་དུ་ཆུ་ལུག་ལ་འཁྲུངས། ཉེར་བདུན་པ་ལ་ཁ་བྱང་རྙེད། སུམ་ཅུ་པ་ལ་གཏེར་ཁ་དང་པོ་ནས་ཁྱོན་གཏེར་ཁ་ཉི་ཤུ་རྩ་ལྔ་བཏོན། དོན་བཞི་པ་ལ་ཞབས་ལ་ཚེར་མ་ཟུག་པའི་རྐྱེན་གྱིས་གཤེགས། པདྨ་གླིང་པ་རྟ་ལོ་ལ་བུམ་ཐང་དུ་འཁྲུངས། ཉི་ཤུ་རྩ་བདུན་པ་ལ་སྣ་རིང་བྲག་ནས་ཀློང་གསལ་བཏོན་པ་ནས་བཟུང་། གཏེར་ཁ་སོ་གཉིས་བཏོན། གྱ་བཞི་པ་ཆུ་སྦྲུལ་ཧོར་ཟླ་དང་པོའི་ཚེས་གསུམ་ལ་གཤེགས། ཀརྨ་གླིང་པ་དྭགས་པོ་སྒེར་སྟོད་ཉི་ཟླ་སངས་རྒྱས་ཀྱི་སྲས་སུ་འཁྲུངས། བྱར་གཡག་མགོའི་བཅུ་གཅིག་ཞལ་ནི་ཙཱ་རི་ནས་བཏོན། ཐོས་གྲོལ་སྒམ་པོ་གདར་གྱི་མཚོ་ནས་བཏོན། བསྟན་གཉིས་གླིང་པ་གཙང་བྱ་བཟངས་སུ་འཁྲུངས། ཆོས་ལུང་པའི་ཇོ་སྟན་སྐྱེད་ཚལ་དུ་སློབ་སྦྱོང་མཛད། དུས་རྟགས་ནི། ཡར་འབྲོག་མཚོ་གླིང་དགུ་ལ་དམག་སྒར་འཆའ། གཏེར་སངས་རྒྱས་དགོངས་འདུས་སོགས་མང་། མདོ་སྔགས་གླིང་པ་ནི་མཆོག་ལྡན་མགོན་པོ་སྟེ། བན་པ་སྣབ་མཁན་པ་ལུང་ནས་གཏེར་གྱི་ཁ་བྱང་དང་། སྟོང་རི་ཉི་ཤར་ནས་གཏེར་ཐོན། རྡོར་གླིང་གི་གཏེར་ཤུལ་དུ་གཏེར་སྟོན་
རྡོར་གླིང་གིས་གཏེར་ཁ་ཞེ་གསུམ་བཏོན་པའི་བཅུ་གསུམ་པ་ཟངས་མཚོའི་གཏེར་ནི་ས་སྤྲེལ་ཟླ་བ་བཅུ་པ་ལ་གཟའ་བདུད་ཀྱིས་འདོན་པར་བསྐུལ་བ་ལས་བཅུ་གཉིས་པའི་ཉེར་གཉིས་ལ་གནམ་ལྕགས་ཀྱི་ཁ་བྱང་བཞིན་མཚོ་གཉིས་ཀྱི་བར་བྲག་བྱ་ཁྱུང་འདྲ་བའི་དཀྱིལ་ནས་མི་བདུན་ཅུ་ཙམ་གྱི་དབུས་སུ་འདོམ་དོ་ཙམ་གྱི་བྲག་གཤགས་མ་རྙེད་པའི་ཚེ་གཏེར་བདག་བུད་མེད་གཅིག་ལ་བབས་ནས་ལྷོར་ལྟོས་ནས་བརྐོས་ཟེར། དེ་བཞིན་བྱས་པས་ལ་བསེའི་སྒྲོམ་བུ་མཐོ་སྐོར་མ་གཅིགགཟའ་བདུད་ཀྱི་སྐུ་ཁྲུ་གང་། ཁྲོ་ཆུ་ལས་བྱས་པ་གཅིག་པོ་ཏི་གཅིགཤོག་དྲིལ་གཅིག་བྱུང་། དེར་བཞུགས་ནས་ནངས་པར་ཁ་ཕྱེ་བས་རྡོར་སེམས་སྙིང་ཐིག་དང་འབྲས་མོ་གཤོངས་ཀྱི་ལམ་ཡིག་རྣམས་སྤེལ། ངན་སྔགས་སྐོར་གྱི་ཤོག་དྲིལ་བདུན་ཅུ་གཟའི་སྐུ་བཅས་བྲག་རིན་ཆེན་འདྲ་བ་ལ་སྦས། ཕྱིས་གཏེར་སྟོན་གཞན་གཅིག་དབང་གསུང་། གཏེར་ཁ་དགུ་པ། ལུག་ལོ་ཟླ་བ་བརྒྱད་པའི་ཚེས་བརྒྱད་ལ་ཟངས་མཚོའི་རི་ལ་ཕྱིན། མཚོ་འགྲམ་ནས་ཉམས་འུར། རྒོད་ཚང་ཡོད་པའི་རྩ་ན་བྲག་ལམ་གྱི་མཚམས་ནས་ཕུག་པ་མི་ལྔ་ཙམ་ཤོང་བ་ཅིག་འདུགདེའི་ནང་ནས་རྡོ་ཁ་སྦྱར་འདྲ་བའི་ནང་ནས་ཕུག་པ་ཁྲུ་གང་པ་གཅིག་ནག་ཧུར་རེ་སྣང་། དེ་ནས་ཟངས་ཀྱི་སྦུག་མ་གཅིག་བྱུང་། མར་ལམ་མ་ཐར་བར་མཆོངས་པས་རྟིང་པའི་རྗེས་གཅིག་བྱུང་། མཚོ་འགོར་ཟངས་སྦུག་དེ་ཁ་ཕྱེ་བས་ཚེ་སྒྲུབ་འོད་ཟེར་དྲ་བ་དང་། ཉི་ཟླ་གའུ་མ་གཉིས་ཆ་ལག་བཅས་བྱུང་། གྲུབ་ཐོབ་མེ་ལོང་རྡོ་རྗེ་ལོ་དགུ་པ་ལ། གྲྭ་ཕུའི་གྲུབ་ཐོབ་ཟ་ལུང་པ་དང་། མཁན་ཆེན་སེ་ལུང་པ་གཉིས་ལས་རབ་ཏུ་བྱུང་། ཞི་བྱེད་ཕག་མོ་ར་ལུགས་དང་ཨིནྡྲ་བྷོ་དྷིའི་ཐབས་ལམ་ཞུས། བཅུ་བདུན་ཡན་ཟངས་མཚོར་བསྒོམ་པས་ལྷ་འདྲེའི་ཆོ་འཕྲུལ་ཆེར་བྱུང་། ཕྱིས་ཆོས་ཐམས་ཅད་སྟོང་ཉིད་དུ་རྟོགས། བཅོ་ལྔ་པ་དཀྲི་ཞལ་སེང་གེ་རྒྱབ་ཏུ་གྲུབ་ཐོབ་ཟ་ལུང་པས་ལུང་བསྟན་པ་བཞིན་བྱོན། ཟླ་བ་བཞི་བརྟེན། ཟླ་བ་གཉིས་བསྙུང་། དྲུག་ལོན་པའི་ཚེས་བཅུ་གཉིས་ལ་གཤེགས། བཅོ་བརྒྱད་ལོན་ཚེ་སངས་རྒྱས་དབོན་པོ་རྒྱལ་མཚན་ལ་སྙིང་ཐིག་གསན་ནོ། །ཆོས་འབྱུང་བསྟན་པའི་ཉི་མ་ལས། གངས་ཅན་བོད་ཀྱི་སྐབས་ཏེ་གཉིས་པའོ།། །།