ཕྱོགས་ཆོས་ཀྱི་དབྱེ་བ།

གཉིས་པ་ཕྱོགས་ཆོས་ཀྱི་དབྱེ་བ་ནི།

གཏན་ཚིགས་རིགས་པའི་དོན་བསྡུས་ལས། ཡང་དག་གི་ཕྱོགས་ཆོས། མ་ངེས་པའི་ཕྱོགས་ཆོས། འགལ་བའི་ཕྱོགས་ཆོས་ཏེ་གསུམ་མོ། །ཡང་ན། ཕྱོགས་ཆོས་ཅན་དགུ་སྟེ། དགུ་པོ་རིམ་པ་བཞིན་དཔེར་བརྗོད་ན། སྒྲ་ཆོས་ཅན། རྟག་སྟེ། གཞལ་བྱ་ཡིན་པའི་ཕྱིར། མི་རྟག་སྟེ། བྱས་པ་ཡིན་པའི་ཕྱིར། དུང་སྒྲ་ཆོས་ཅན། རྩོལ་བ་ལས་བྱུང་སྟེ། མི་རྟག་པའི་ཕྱིར། རྟག་སྟེ། བྱས་པའི་ཕྱིར། རྟག་སྟེ། མཉན་བྱ་ཡིན་པའི་ཕྱིར། དུང་སྒྲ་ཆོས་ཅན། རྟག་སྟེ། རྩོལ་བ་ལས་བྱུང་བའི་ཕྱིར། རྩོལ་བ་ལས་མ་བྱུང་སྟེ། མི་རྟག་པ་ཡིན་པའི་ཕྱིར། དུང་སྒྲ་ཆོས་ཅན། མི་རྟག་སྟེ། རྩོལ་བ་ལས་བྱུང་བའི་ཕྱིར། རྟག་སྟེ། རེག་བྱ་ཅན་མིན་པའི་ཕྱིར་ཞེས་པ་རྣམས་ཏེ། དང་པོ་གསུམ་མཐུན་ཕྱོགས་ལ་ཁྱབ་བྱེད་དུ་འཇུག་པར་མཚུངས་པ་ལ། མི་མཐུན་ཕྱོགས་ལ་ཁྱབ་བྱེད་དུ་ཡོད་པ། གཏན་ནས་མེད་པ། ཆ་གཉིས་པ་གསུམ་མོ། །བར་བ་གསུམ་མཐུན་ཕྱོགས་ལ་གཏན་ནས་མེད་པར་མཚུངས་པ་ལ། མི་མཐུན་ཕྱོགས་ལ་ཡོད་མེད་ཆ་གཉིས་པ་གསུམ་མོ། །ཕྱི་མ་གསུམ་མཐུན་ཕྱོགས་ལ་ཆ་གཉིས་པར་མཚུངས་ལ། མི་མཐུན་ཕྱོགས་ལའང་ཡོད་མེད་ཆ་གཉིས་པ་གསུམ་སྟེ་དགུའོ། །ཞེས་གསུངས་ལ། དེ་ལྟར་འཐད་དེ། ཕྱོགས་གླང་གི་གཏན་ཚིགས་འཁོར་ལོ་ལས། གསུམ་ལ་རྣམ་པ་གསུམ་གསུམ་སྟེ། །སྟེང་འོག་གཉིས་ལ་ཡང་དག་གཉིས། །ལོགས་གཉིས་འགལ་བ་གཉིས་ཡིན་ཏེ། །ཟུར་བཞི་དངོས་ཀྱི་མ་ངེས་བཞི། །དབུས་ན་ཐུན་མོང་མིན་མ་ངེས། །གཞལ་བྱ་བྱས་དང་མི་རྟག་དང༌། །བྱས་དང་མཉན་བྱ་རྩོལ་བྱུང་དང༌། །མི་རྟག་རྩོལ་བྱུང་ལུས་ཅན་མིན། །རྟག་དང་མི་རྟག་རྩོལ་བྱུང་དང༌། །རྟག་དང་རྟག་དང་རྟག་པ་དང༌། །རྩོལ་བྱུང་མིན་དང་མི་རྟག་དང༌། །རྟག་པ་ལ་ནི་སྒྲུབ་པ་བཀོད། །ཅེས་དང༌། ཚད་མ་མདོ་ལས། ཕྱོགས་ཆོས་མཐུན་ཕྱོགས་ཡོད་མེད་དང༌། །རྣམ་གཉིས་རེ་རེ་དག་ལ་ཡང༌། །རྣམ་གསུམ་མི་མཐུན་ཕྱོགས་ལ་ཡང༌། །ཡོད་མེད་རྣམ་པ་གཉིས་ཕྱིར་རོ། །ཞེས་གསུངས་སོ། །རེག་བྱ་ཅན་མིན་པ་འདི་སྒྲ་རྟག་པར་སྒྲུབ་པར་བྱེད་པའི་མཐུན་ཕྱོགས་ལ་ཆ་གཉིས་སུ་གསུངས་པ་གང་ཡིན་ཞེ་ན། དོན་ལ་རྟག་པ་ལ་རེག་བྱ་ཅན་ཡིན་པ་མེད་ཀྱང་བྱེ་བྲག་པས་འབྱུང་བཞིའི་རྡུལ་ཕྲན་རྟག་པར་འདོད་པས་དེའི་བློ་ངོ་ལ་ལྟོས་ཏེ་ཆ་གཉིས་སུ་འཇུག་པར་བཤད་པ་ཡིན་ནོ། །མཉན་བྱ་དེ་སྒྲ་རྟག་པར་སྒྲུབ་པར་བྱེད་པའི་མཐུན་ཕྱོགས་མི་མཐུན་ཕྱོགས་གཉིས་ཀ་ལ་གཏན་མེད་དུ་གསུངས་པ་སྐབས་ཀྱི་རྒོལ་བའི་བློ་ངོར་ལྟོས་པ་ཡིན་པར་སྣང་ངོ། །