བཅུ་དགུ་པ་གནས་འཆར་གཞུག་ནུས་ཀྱི་ལྔ་བ་དང་ཉི་ཤུ་བ་རེ་ཞིག་གནས་འཆར་ཞུགས་ནུས་ཀྱི་ལྔ་བ་གཉིས་ཡོད།

བཅུ་དགུ་པ་གནས་འཆར་གཞུག་ནུས་ཀྱི་ལྔ་བ་དང་ཉི་ཤུ་བ་རེ་ཞིག་གནས་འཆར་ཞུགས་ནུས་ཀྱི་ལྔ་བ་གཉིས་ཡོད་དེ།

རྩ་བར། བར་དུ་གཅོད་པ་དང༌། བར་དུ་གཅོད་པ་མ་ཡིན་པ་མངོན་པར་ཤེས་པ་ཉིད་དང་སྨྲ་བ་པོ་ཉིད་དང་རྗེས་སུ་སྟོན་པ་ཉིད་དང་གནས་དང་རེ་ཞིག་གནས་འཆར་ནུས་པ་ཉིད་དང་སྦྱར་རོ། །ཞེས་སོ། །ཡན་ལག་སྔ་མ་བཞི་ལ་གནས་འཆར་གཞུག་དང་རེ་ཞིག་གནས་འཆར་གཞུག་གཉིས་སོ་སོར་སྦྱར་ན་ལྔ་བ་གཉིས་སུ་འགྱུར་ཏེ། ཊཱི་ཀ་ལས། ཡན་ལག་འདི་གཉིས་ཡན་ལག་སྔ་མ་བཞི་དང་སྦྱར་ན་ལྔ་བ་གཉིས་སུ་འགྱུར་རོ། །ཞེས་གསུངས་པའི་ཕྱིར་རོ། །ཡན་ལག་དང་པོ་བཞི་ནི། ཊཱི་ཀ་ལས། བར་དུ་གཅོད་པ་ནི་འདུལ་བ་ལས་སྲོག་གཅོད་པ་ལ་སོགས་པ་བྱ་བ་མ་ཡིན་པ་གང་ཡིན་པ་སྟེ་དེ་ནི་བར་དུ་གཅོད་པར་ནུས་པའི་ཕྱིར་རོ། །ཞེས་སོ། །འགྲེལ་ཆུང་ལས། སྡིག་ཏུ་འགྱུར་ཞིང་དགྲ་བཅོམ་པའི་རིམ་པར་འགྱུར་བ་ལ་བར་དུ་གཅོད་པ་ལ་བྱ་ཞེས་པས་སྡིག་པ་དང་ཉོན་མོངས་པ་རྣམས་སོ། །དེ་དག་ལས་བཟློག་པ་བར་དུ་གཅོད་པ་མ་ཡིན་པ་སྟེ་བསྒྲུབ་པར་བྱ་བ་གང་ཡིན་པ་དེ་དག་མངོན་པར་ཤེས་པ་ཉིད་དང༌། བར་དུ་གཅོད་མི་གཅོད་གཉིས་པོ་དེ་དག་གཞན་ལ་སྨྲ་ཞིང་གོ་བར་བྱེད་པ་ལ་མཁས་པའི་སྨྲ་བ་པོ་ཉིད་དང༌། རྗེས་སུ་སྟོན་པ་ནི་རང་ཉིད་ཚུལ་བཞིན་དུ་གནས་པའི་རྗེས་སུ་སྟོན་པ་སྟེ་སློབ་མ་ལ་སོགས་པ་རྣམས་ཉེས་པ་ལས་རྣམ་པར་བཟློག་ཅིང་དགེ་བ་ལ་སྦྱོར་བ་ཉིད་དེ། དེ་ལྟར་ཡང་ཊཱི་ཀ་ལས། སློབ་མ་ལ་སོགས་པ་དག་བྱ་བ་མ་ཡིན་པ་དག་ལས་ལེགས་པར་འཇོག་པ་དང༌། རྗེས་སུ་མཐུན་པ་དང༌། རྣམ་པར་བཟློག་པ་དང༌། རྗེས་སུ་མཐུན་པར་སྨྲ་བ་ཉིད་དང༌། བྱ་བ་དག་ལ་རྗེས་སུ་སྒྲུབ་པ་ལ་འཇུག་པ་དང༌། རྗེས་སུ་མཐུན་པར་སྨྲ་བ་ཉིད་དེ་ཞེས་ཚིག་དྲུག་གསུངས་སོ། །སྡེ་སྣོད་འཛིན་པ་གཞན་ལ་རང་གི་སློབ་མ་ཡུན་རིང་དུ་གནས་འཆར་འཇུག་ནུས་པ་དང༌། ཡུན་ཐུང་ངུར་རེ་ཞིག་གི་གནས་འཆར་འཇུག་ནུས་པ་ཉིད་དང་ཡང་སྦྱར་རོ། །ཁ་ཅིག་ན་རེ་དེ་གཉིས་ནི་གནས་སུ་བཟུང་བའི་ཆོ་ག་དང་བཅས་ཏེ་གནས་འཆར་འཇུག་པ་དང་རེ་ཞིག་གི་བྱ་བ་ཞུ་བའི་ཡུལ་གནས་ཙམ་བྱེད་དུ་འཇུག་པ་ཡིན་ཞེས་ཀྱང་འཆད་དོ། །འདི་གཉིས་ནི་གཏོང་ཕོད་ཆེ་བའི་ཆ་ནས་ཡོན་ཏན་དུ་བགྲངས་པ་སྟེ། ཊཱི་ཀ་ལས། འཆར་འཇུག་པ་ནུས་པ་ཉིད་ནི་ཕོད་པ་ཉིད་དོ། །ཞེས་སོ། །ཉེར་གཅིག་པ་ལྟུང་ཤེས་ཀྱི་ལྔ་བ་ཡོད་དེ། རྩ་བར། ལྟུང་བ་དང་ལྟུང་བ་མ་ཡིན་པ་དང་ཡང་བ་དང་ལྕི་བ་ཉིད་མངོན་པར་ཤེས་པ་ཉིད་དང་སོ་སོར་ཐར་བ་དང་རྒྱས་པ་ཐོན་པ་ཉིད་དོ། །ཞེས་གསུངས་པའི་ཕྱིར་རོ། །ལྟུང་བ་ནི་རང་བཞིན་དང་བཅས་པའི་ཁ་ན་མ་ཐོ་བ་ཐམས་ཅད་དེ། བཅས་པ་རྣམས་ཀྱང་ཁྱད་གསོད་དང་འབྲེལ་བའི་ཉེས་པས་ངན་སོང་དུ་ལྟུང་སྟེ། ལྕི་ཡང་བསྟན་པའི་མདོ་ལས། ཁྱད་དུ་གསོད་པའི་རྒྱུ་རྐྱེན་གྱིས། །ཚེ་ཡིས་དུས་བྱས་ངན་སོང་ལྟུང༌། །ཞེས་གསུངས་ལ། དུས་མ་ཡིན་པར་ཟ་བ་དང་ཆང་འཐུང་བ་ལ་སོགས་པ་རྣམས་ལ་ཡང༌། ལུང་རྣམ་འབྱེད་ལས། སྲེག་པར་བྱེད་འཚེད་པར་བྱེད་ལྟུང་བར་བྱེད་པའོ། །ཞེས་གསུངས་སོ། །ལྟུང་བ་མ་ཡིན་པ་ནི་སྒྲུབ་པ་དང་གནང་བའི་བྱ་བ་རྣམས་སོ། །ཡང་བ་དང་ལྕི་བ་ཞེས་པ་ལྕི་ཡང་གི་ཆོས་དྲུག་སྟེ་ལྔ་དང་གཅིག་གོ །ལྔ་ནི་འདུལ་བ་བསྡུ་བ་ལས། ལྟུང་བ་རྣམས་ཀྱི་ཆུང་ལ་སྩོགས། །རྣམ་པ་ལྔར་ནི་རིག་པར་བྱ། །ངོ་བོ་ཉིད་དང་བྱེད་པ་དང༌། །བསམ་དང་གཞི་དང་ཚོགས་པའོ། །ཞེས་གསུངས་ཏེ། ༡ངོ་བོའི་སྒོ་ནས་ལྕི་ཡང་དུ་ཕྱེ་ན་ཕམ་པ་ནི་ལྕི། དགེ་འདུན་ལྷག་མ་ནི་འབྲིང་དང༌། དེ་གཉིས་ལས་གཞན་ནི་ཡང་བ་ཡིན་ནོ་ཞེས་སློབ་དཔོན་ཐོགས་མེད་ཀྱི་འདུལ་བ་བསྡུ་བ་ལས་གསུངས་སོ། །དེ་རྣམས་ནི་གཙོ་ཆེར་ཆད་པ་ལྕི་ཡང་གི་དབང་དུ་བྱས་པ་སྟེ་སྤྱིར་བཏང་ཡིན་ནོ། །དམིགས་བསལ་ནི་ངོ་བོ་ལྕི་ཡང་གི་དབང་དུ་བྱས་ན་འཆབ་པའི་ཕམ་པ་བས་ནི་དགེ་འདུན་གྱི་དབྱེན་བྱེད་པའི་ལྷག་མ་ལྕི་བའམ་གཅིག་པུ་ལམ་དུ་འགྲོ་བའི་ལྷག་མ་བས་ཀྱང་དུད་འགྲོ་བསད་པའི་ལྟུང་བྱེད་ལྕི་བ་ཡོད་དེ། སློབ་དཔོན་ཁྱད་པར་བཤེས་གཉེན་གྱི་འདུལ་བ་བསྡུས་པ་ལས། དུད་འགྲོའི་སྲོག་གཅོད་པའི་ལྟུང་བ་ནི་ལྕི་ཡི་དགེ་འདུན་ལྷག་མ་ནི་དེ་ལྟ་མ་ཡིན་ནོ། ཞེས་གསུངས་སོ། །རྣམ་གྲངས་གཞན་ཡང་རང་བཞིན་གྱི་ཁ་ན་མ་ཐོ་བ་འདི་ངོ་བོ་ཉིད་ཀྱིས་ལྕི་ལ། བཅས་པའི་ཁ་ན་མ་ཐོ་བ་ངོ་བོ་ཉིད་ཀྱིས་ཡང་བའོ།།ཞེས་མཚོ་ཊཱིཀ་ལས་ཁྱད་པར་བཤེས་གཉེན་གྱི་འདུལ་བསྡུས་སུ་གསུངས་པ་དམིགས་བསལ་སྦྱར་བ་ལ། ཀུན་མཁྱེན་འཇམ་དབྱངས་བཞད་པས་ཐོགས་མེད་ཀྱིས་གསུངས་པ་ཆད་པས་དང༌། ཁྱད་པར་བཤེས་གཉེན་གྱི་གསུངས་པ་རྣམ་སྨིན་གྱི་སྒོ་ནས་ཡིན་པར་གསུངས་སོ། །༢ བྱེད་པའི་སྒོ་ནས་ལྕི་ཡང་ནི། མ་གུས་པས་བྱས་པ་ལྕི། ཉོན་མོངས་པ་མང་བས་བྱས་པ་འབྲིང༌། མི་ཤེས་པ་དང་བག་མེད་པས་བྱས་པ་ཡང་བ་ཡིན་ནོ། །༣ བསམ་པའི་སྒོ་ནས་ལྕི་ཡང་ནི། ཞེ་སྡང་ལྟ་བུའི་ཉོན་མོངས་པ་ཆེ་འབྲིང་ཆུང་གསུམ་ལས་ལྟུང་བ་ལྕི་ཡང་གསུམ་འབྱུང་ངོ༌། །༤གཞིའི་སྒོ་ནས་ལྕི་ཡང་ནི། སྲོག་གཅོད་པ་ལྟ་བུ་སྤྱིར་བཏང་ལ།གཞི་མི་དང་མི་མིན་དང་དུད་འགྲོ་གསུམ་ལ་ལྟུང་བ་ལྕི་ཡང་གསུམ་འབྱུང་ངོ༌། ། རྣམ་གྲངས་གཞན་ཡང་གཞིའི་སྒོ་ནས་ལྕི་ཡང་ནི་བྱེ་བྲག་ཕ་མའམ་དགྲ་བཅོམ་པ་བསད་པའི་ལྟུང་བ་ལྕི། དེ་ལས་གཞན་པའི་མི་བསད་པ་འབྲིང་དང་དུད་འགྲོ་བསད་ན་ལྟུང་བྱེད་སྔ་མ་གཉིས་ལས་ཡང་བའོ། ། ༥ ཚོགས་པའི་སྒོ་ནས་ལྕི་ཡང་ནི་ལྟུང་བ་གཅིག་དང་གཉིས་ཡང༌། གསུམ་ནས་གྲངས་ཤེས་པ་འབྲིང༌། གྲངས་མི་ཤེས་པ་ལྕི་བ་སྟེ། རྩ་འགྲེལ་འདིའི་ལུགས་སོ། །སློབ་དཔོན་ཐོགས་མེད་ཀྱི་འདུལ་བ་བསྡུ་བ་ལས་ལྟུང་བ་གཅིག་དང་གཉིས་ནས་ལྔའི་བར་དུ་བྱུང་བ་ནི་ཡང་བའོ། །དེ་ཡན་ཆད་ལྟུང་བ་གྲངས་ཤེས་པ་འབྲིང༌། ལྟུང་བ་གྲངས་ཤེས་པར་མི་ནུས་པ་ལྕི་བར་བཤད་དོ། ། ༦ གང་ཟག་གི་སྒོ་ནས་ལྕི་ཡང་ནི། འདུལ་བ་བསྡུས་པ་ལས། གང་ཟག་ནི་དགེ་བའི་རྩ་བས་མ་བརྟན་པ་བླུན་པོའི་རྒྱུད་དེ་ལྕི་བའོ། །དེ་ལས་གཞན་པ་ནི་ཡང་བའོ་ཞེས་བཤད་དོ། །ལྡང་བའི་ཐབས་ལ་མི་མཁས་པའི་ཕྱིར་དང་མཁས་པའི་ཕྱིར་ཏེ། མཛོད་འགྲེལ་ལས། མི་མཁས་པས་ནི་སྡིག་པ་ཆུང་ངུ་བྱས་ནའང་འོག་ཏུ་འགྲོ ། མཁས་པས་ཆེན་པོ་བྱས་ཀྱང་གནོད་པ་རབ་ཏུ་སྤོང་བར་འགྱུར། ལྕགས་ཀྱི་གོང་བུ་ཆུང་ཡང་ཆུའི་གཏིང་དུ་འབྱིང་འགྱུར་ལ། དེ་ཉིད་སྣོད་དུ་བྱས་ན་ཆེ་ཡང་སྟེང་དུ་འཕྱོ་བར་འགྱུར་ཞེས་བཤད་དོ། །རྣམ་གྲངས་གཞན་ཡང་མི་ཤེས་པ་དང་ཤེས་བཞིན་པའི་ལྟུང་བ་ནི་ཡང་པ་དང་ལྕི་བ་སྟེ། ཁྱད་གསོད་དང་མ་འབྲེལ་བའི་ཕྱིར་དང་འབྲེལ་བའི་ཕྱིར་རོ། །སོ་སོ་ཐར་པའི་མདོ་དང་རྒྱས་པ་ལུང་དུམ་བུ་བཞི་སྟེ་འདུལ་བ་མཐའ་དག་བླ་མ་ལ་ཀླག་པའི་བསམ་པས་གཟུང་སྟེ་ཚིག་ཁ་ཏོན་དུ་ཐོན་པ་ཉིད་དོ། །ཊཱི་ཀ་ལས། སོ་སོ་ཐར་པ་དང་རྒྱས་པ་ཐོན་པ་ཉིད་ནི་ཚིག་ལས་རིག་པར་བྱའོ། །དོན་ལས་ནི་ལྟུང་བ་དང་ལྟུང་བ་མ་ཡིན་པ་ལ་སོགས་པ་ཉིད་ཀྱིས་གྲུབ་པའི་ཕྱིར་རོ། །ཞེས་སོ། །རང་བས་བསླབ་པ་རྒ༷ན་པ༷་ལྔ་ཕྲུགས་དང་ལྡན་པ་མེ༷ད་ན༷་གཞོ༷ན་པ༷་ལ༷་གན༷ས་བཅ༷འ་སྟེ། ལུང་གཞི་ལས། བཙུན་པ་དགེ་སློང་བསྙེན་པར་རྫོགས་ནས་ལོ་དྲུག་ཅུ་ལགས་ལ། དེས་སོ་སོ་ཐར་པའི་མདོ་གདོན་པ་དང་རྒྱས་པར་བཀླགས་པ་དང་ཐོན་པར་མ་ལགས་ན་དེས་ཀྱང་གཞན་ལ་གནས་པས་མཆི་བར་བགྱིའམ། ཉེ་བར་འཁོར་དེས་ཀྱང་གཞན་ལ་གནས་པས་འདུག་པར་བྱ༷འོ༷། །ཞེས་གསུངས་སོ། །ཊཱི་ཀ་ལས། འདིར་ལོ་དྲུག་ཅུ་ལོན་པ་ཉིད་ཀྱང་མཚོན་པ་ཙམ་དུ་ཟད་ཀྱི་ལོ་བརྒྱད་ཅུ་ལོན་པས་ཀྱང་གཞན་ལ་གནས་པས་འདུག་པར་བྱའོ། །ཞེས་སོ། །འོ་ན་གནས་ཀྱི་བླ་མ་བསླབ་པ་གཞོན་པ་ལ་སློབ་མ་བསླབ་པ་རྒན་པ་དེས་ཉེ་གནས་ཀྱི་ཚུལ་ཁྲིམས་ཐམས་ཅད་བྱའམ་ཞེ་ན། གནས་པའི་ཚུལ་ཁྲིམས་གཞན་ཐམས་ཅད་བྱ་ཞིང༌། ལུས་འདུ༷ད་པ༷་སྟེ་ཕྱག་འཚལ་བ་འབ༷འ་ཞི༷ག་ནི་བྱ་དགོས་པ་མ༷་གཏོ༷གས་སོ༷། །འགྲེལ་ཆུང་ལས། རྒན་པས་གཞོན་ནུ་ལ་གནས་བཅས་ན་ལུས་གནས་ལྔ་ས་ལ་གཏུགས་ཏེ་ཕྱག་འཚལ་བ་མ་གཏོགས་པར་ཐལ་མོ་སྦྱར། ཞེས་སོ། །དེ་ཡང་ལུང་ལས། ཕྱག་བྱ་བའི་ཡུལ་ནི་རྣམ་པ་གཉིས་ཏེ། བདེ་བར་གཤེགས་པ་དང་བསླབ་པ་རྒན་པའོ། །ཞེས་གསུངས་ལྟར་རོ། །བསྙེན་པར་རྫོགས་ནས་ལོ་བཅུ་མ་ལོན་པར་མི་གནས་པར་འདུག་པར་མི་བྱ་ཞེས་སྔར་སྨོས་ན། བསྙེན་པར་རྫོགས་ནས་ལོ་བཅུ་མ་ལོན་ན་ལམ་དུ་ཞུགས་པས་ཀྱང་མི་གནས་པར་འགྲོ་བར་མི་བྱའམ་ཞེ་ན། བསྙེན་པར་རྫོགས་ནས་ལོ༷་ལྔ༷་ལོ༷ན་ཞི༷ང་ལྔ་ཚན་དུ་ལྷ༷ན་ཅི༷ག་སྦྱ༷ར་བ༷་ཐ༷་མ༷་ལྟུང་བ་ད༷ང་ལྟུང་བ་མ་ཡིན་པ་དང་ཡང་བ་དང་ལྕི་བ་མངོན་པར་ཤེས་པ་ཉིད་དང་སོ་སོ་ཐར་པ་དང་རྒྱས་པ་ཐོན་པ་སྟེ་ཆོས་ལྔ་པོ་དེ་དག་དང་ལྡ༷ན་ན༷་གན༷ས་མ༷་བཅ༷ས་པ༷ར་ལྗོ༷ངས་རྒྱུ༷ར་འགྲོ༷་བ༷ར་བྱ༷འོ༷། །མཚོ་ཊཱིཀ་ལས། འོ་ན་ལྷན་ཅིག་སྦྱར་བ་ཐ་མ་འདི་ངེས་དོན་ཡིན་ནམ། མཚོན་དོན་ཡིན་ཞེ་ན། ཁ་ཅིག་ན་རེ་མཚོན་དོན་ཡིན་ཏེ། ལྔ་ཚན་གཞན་དང་ལྡན་ཡང་གནས་མ་བཅས་པར་ལྗོངས་རྒྱུར་རུང་ངོ་ཞེས་འཆད་དོ། །འོ་ན་བསྙེན་པར་རྫོགས་ནས་ལོ་ལྔ་ལོན་ཞིང་སྡེ་སྣོད་གསུམ་ཤེས་པའི་ལྔ་ཕྲུགས་དང་ལྡན་པ་གང་ཞིག འདུལ་བ་ལུང་རིལ་པོ་ཚིག་ཁ་ཏོན་དུ་བློ་ལ་ཐོན་པ་མ་ཡིན་པ་དེ་ཆོས་ཅན། གནས་མ་བཅས་པར་ལྗོངས་རྒྱུར་རུང་བར་ཐལ། བསྙེན་པར་རྫོགས་ནས་ལོ་ལྔ་ལོན་ཞིང་སྡེ་སྣོད་གསུམ་ཤེས་པའི་ལྔ་ཕྲུགས་དང་ལྡན་པ་ཡིན་པའི་ཕྱིར་རོ། །རྟགས་མ་གྲུབ་ན་ཆོས་ཅན་དང་འགལ། ཁྱབ་པ་མ་གྲུབ་ན་དམ་བཅའ་བུད་ཅིང༌། འདོད་ན། ཊཱི་ཀ་ལས། ཇི་སྟེ་ལོ་ལྔ་ལོན་ན་ཡང་ལྷན་ཅིག་སྦྱར་བ་ཐ་མ་དང་མི་ལྡན་ན་དེ་ལྟ་ན་ཡང་འགྲོ་བར་མི་བྱ་སྟེ་ཞེས་འདུལ་བ་ལུང་རིལ་པོ་ཚིག་ཁ་ཏོན་དུ་བློ་ལ་ཐོན་པའི་ལྔ་ཚན་དང་ལྡན་པ་མ་ཡིན་ན་གནས་མ་བཅས་པར་ལྗོངས་རྒྱུར་མི་རུང་བར་བཤད་པ་དང་འགལ་ལོ། །ལུང་གཞི་ལས། བཙུན་པ་དགེ་སློང་བསྙེན་པར་རྫོགས་ནས་ལོ་དྲུག་ལགས་ལ། དེས་སོ་སོ་ཐར་པ་དང་རྒྱས་པ་བཀླགས་པ་དང་ཐོན་པ་མ་ལགས་ན། དེས་ཀྱང་མི་གནས་པར་ལྗོངས་རྒྱུར་མཆི་བར་མི་བགྱིའམ། ཉེ་བར་འཁོར་མི་བྱ་སྟེ། ཞེས་གསུངས་པ་དང་ཡང་འགལ་ལོ། །ཞེས་ངེས་དོན་ཡིན་པར་གསུངས་ལ། རྒྱལ་བ་དགེ་འདུན་གྲུབ་དང་འཇམ་བཞད་སོགས་མཁས་པ་དུ་མས་ལོ་ལྔ་ལོན་པ་མཚོན་དོན་ཡིན་པ་ལྟར་ལྔ་བ་ཐ་མས་ཀྱང་ལྔ་པ་གཞན་མཚོན་པ་ཡིན་པས་མཚོན་དོན་ཡིན་པར་གསུངས་པའང་ཡོད་དོ། །སྐབས་འདིར་མཚོ་ཊཱིཀ་ལས། འདི་ལ་ཁ་ཅིག་ན་རེ་ལོ་ལྔ་ལོན་ཞིང་སྡེ་སྣོད་གསུམ་ཤེས་པའི་ལྔ་ཕྲུགས་དང་ལྡན་པ་ལ་འདི་མི་གནང་ངོ་ཞེས་ཟེར་རོ། །འོ་ན་བསྙེན་པར་རྫོགས་ནས་ལོ་ལྔ་ལོན་ཅིང་སྡེ་སྣོད་གསུམ་ཤེས་པའི་ལྔ་ཕྲུགས་དང་ལྡན་པའི་བྱེ་བྲག ལྟུང་བ་ཡིན་མིན་དང་ལྟུང་བ་ཡང་ལྕི་ཤེས་ཤིང་འདུལ་བ་ལུང་རིལ་པོ་ཚིག་ཁ་ཏོན་དུ་བློ་ལ་ཐོན་པ་དེ་ཆོས་ཅན། གནས་མ་བཅས་པར་ལྗོངས་རྒྱུ་བ་གནང་བ་མ་ཡིན་པར་ཐལ། བསྙེན་པར་རྫོགས་ནས་ལོ་ལྔ་ལོན་ཞིང་སྡེ་སྣོད་གསུམ་ཤེས་པའི་ལྔ་ཕྲུགས་དང་ལྡན་པ་ཡིན་པའི་ཕྱིར་རོ། །རྟགས་མ་གྲུབ་ན་ཆོས་ཅན་དང་འགལ། ཁྱབ་པ་མ་གྲུབ་ན་དམ་བཅའ་བུད་ཅིང༌། འདོད་ན། ལུང་གཞི་ལས། ལོ་ལྔ་ལོན་པ་ཆོས་ལྔ་དང་ལྡན་པས་མི་གནས་པར་ལྗོངས་རྒྱུར་འགྲོ་བར་རྗེས་སུ་གནང་ངོ༌། །ལྔ་གང་ཞེ་ན། ལྟུང་བ་ཤེས་པ་དང༌། ལྟུང་བ་མ་ཡིན་པ་ཤེས་པ་དང༌། ཡང་བ་ཤེས་པ་དང༌། ལྕི་བ་ཤེས་པ་དང༌། སོ་སོ་ཐར་པའི་མདོ་གདོན་པ་དང་རྒྱས་པ་བཀླགས་པ་ཐོན་པ་སྟེ། ལོ་ལྔ་ལོན་པ་ཆོས་ལྔ་པོ་དེ་དག་དང་ལྡན་པས། མི་གནས་པར་ལྗོངས་རྒྱུར་འགྲོ་བར་བྱ་སྟེ་འདི་ལ་འགྱོད་པར་མི་བྱའོ། །ཞེས་གསུངས་སོ། །འོ་ན་གང་ཞེ་ན། ལོ་ལྔ་ལོན་ཞིང་སྡེ་སྣོད་གསུམ་ཤེས་ཀྱང་འདུལ་བ་ལུང་རིལ་པོ་ཚིག་ཁ་ཏོན་དུ་བློ་ལ་ཐོན་པ་མ་ཡིན་ན་ནི་གནས་མ་བཅས་པས་ལྗོངས་རྒྱུ་བ་འདི་མི་གནང་སྟེ་ཊཱི་ཀ་ལས་བཤད་པ་གོང་དུ་དྲངས་པ་ལྟར་བཟུང་ངོ༌། །ལོ་ལྔ་ལོན་ཞིང་སྡེ་སྣོད་གསུམ་ཤེས་པའི་བྱེ་བྲག་འདུལ་བ་ལུང་རིལ་པོ་ཚིག་ཁ་ཏོན་དུ་བློ་ལ་ཐོན་པ་ཉིད་ཡིན་ན་ནི། འདི་གནང་ལ་ལོ་ལྔ་ལོན་ཞིང་འདུལ་བ་འབའ་ཞིག་ཤེས་པ་ལུང་རིལ་པོ་ཚིག་ཁ་ཏོན་དུ་བློ་ལ་ཐོན་པ་ལ་ཡང་འདི་གནང་ངོ༌། །ཞེས་པ་ནི་བསྡུས་པའི་དོན་ཡིན་ནོ། །རྩ་བར། གཞན་དུ་ན་ཞེས་སོགས་ཀྱི་དོན་ནི་འགྲེལ་ཆུང་ལས། ལོ་བཅུ་ལོན་ཞིང་ལྔ་ཕྲུགས་དང་ལྡན་པ་ལས་གཞ༷ན་དུ༷་ན༷་གསུ༷མ་རི༷ག་པ༷་དགྲ་བཅོམ་པ་ཡི༷ན་ཡ༷ང་མཁན་པོ་ཉིད་དང་གནས་ཉིད་དང༌། མི་གནས་པར་འདུག་པར་མི༷་བྱ༷འོ༷། །ཞེས་གསུངས་སོ། །འོན་ཀྱང་གཞུང་འདིའི་དོན་ལུང་དང་ཊཱི་ཀ་ལས་འདི་ལྟར་གསུངས་ཏེ། ལོ་ལྔ་ལོན་ཞིང་ལྷན་ཅིག་སྦྱར་བ་ཐ་མ་དང་ལྡན་པ་ལས་གཞན་དུ་སྟེ་ལོ་ལྔ་མ་ལོན་ནམ་ལོན་ཡང་ལྷན་ཅིག་སྦྱར་བ་ཐ་མ་དང་མི་ལྡན་ན་གསུམ་རིག་པ་དགྲ་བཅོམ་པ་ཡིན་ཡང་གནས་མ་བཅས་པར་ལྗོངས་རྒྱུ་འགྲོ་བར་མི་བྱ་སྟེ།འགྲོ་ན་དགྲ་བཅོམ་པ་ལ་ཡང་གནས་མེད་ཀྱི་ཉེས་པ་བསྐྱེད་ཅེས་བསྟན་པས་གཞན་ལ་ལྟ་ཅི་སྨོས་སོ། །འདི་ནི་ལུང་གཞི་ལས། བཙུན་པ་གསུམ་རིག་པ་དྲི་མ་གསུམ་སྤངས་ལ། དེ་ལོ་ལྔ་མ་ལགས་ཤིང་ཆོས་ལྔ་དང་མི་ལྡན་ན། དེས་ཀྱང་མི་གནས་པར་ལྗོངས་རྒྱུ་ཞིང་མཆི་བར་མི་བགྱིའམ།ཉེ་བར་འཁོར་མི་བྱའོ། །ཞེས་གསུངས་སོ། །ཊཱི་ཀ་ལས། གསུམ་རིག་པ་ཡིན་ཡང་མ་གནང་བ་བཞིན་དུ་གཞན་ལ་ཡང་དེ་ཁོ་ན་བཞིན་ནོ། །ཞེས་སོ། །གསུམ་རིག་པ་ནི། ཊཱི་ཀ་ལས། རིག་པ་གསུམ་པོ་སྔོན་གྱི་གནས་དང༌། འཆི་འཕོ་དང་སྐྱེ་བ་དང༌། ཟག་པ་ཟད་པ། ཞེས་སོ། །གཞི་འགྲེལ་ལས། དྲི་མ་གསུམ་སྤངས་ལ་ཞེས་བྱ་བ་ནི་འདོད་ཆགས་དང་ཞེ་སྡང་དང་གཏི་མུག་གསུམ་སྤངས་པ་ལའོ། །ཞེས་སོ། །འོ་ན་འདིར་༡དགྲ་བཅོམ་པ་ལ་གནས་མེད་ཀྱི་ཉེས་པ་བསྐྱེད་པར་བཤད་པ་དང༌། ༢ མི་ཆོས་བླ་མ་བདེན་སྨྲའི་སྐབས་སུ་རང་གི་དགྲ་བཅོམ་ཐོབ་པ་བདེན་པར་སྨྲས་ན་དགྲ་བཅོམ་པ་ཉིད་ལ་ལྟུང་བྱེད་བསྐྱེད་པར་བཤད་པ་དང༌། ༣ གཏམ་གྱི་གཞི་ལས། བཙུན་པ་དགྲ་བཅོམ་པ་དགེ་བའི་སེམས་ཀྱིས་ནོངས་པར་འགྱུར་རམ། ལུང་དུ་མི་སྟོན་པའི་སེམས་ཀྱིས་ནོངས་པར་འགྱུར། ཨུ་པ་ལི་དགྲ་བཅོམ་པ་ཉེས་པ་བྱེད་ན་ཐམས་ཅད་ཀྱང་ལུང་དུ་མི་སྟོན་པའི་སེམས་ཀྱིས་ཉེས་པར་འགྱུར་བ་ཞེས་བྱའོ་ཞེས་གསུངས་པ་དེ་རྣམས་ལྟུང་བ་མཚན་ཉིད་པ་ཡིན་ནམ་བཏགས་པ་བ་ཡིན་ཞེ་ན། ཁ་ཅིག་གིས་དགྲ་བཅོམ་པ་ལ་ལྟུང་བ་བསྐྱེད་པར་བཤད་པ་ཐམས་ཅད་ལྟུང་བ་བཏགས་པ་བ་ཡིན་གྱི་ལྟུང་བ་མཚན་ཉིད་པ་མ་ཡིན་ཏེ། ལྟུང་བ་ནི་ངན་སོང་དུ་ལྟུང་བའི་བྱེད་ལས་དང་ལྡན་པ་ཡིན་ལ། དགྲ་བཅོམ་པ་ངན་སོང་དུ་ལྟུང་མི་སྲིད་པའི་ཕྱིར་ཞེས་སྨྲའོ། །འོན་ཀྱང་དགྲ་བཅོམ་པ་ལ་ལྟུང་བའི་བྱེད་ལས་ངན་སོང་དུ་ལྟུང་བ་མེད་ཀྱང་ལྟུང་བའི་བྱེད་ལས་གཞན་ཡོད་པས་ན། དགྲ་བཅོམ་པ་ཆོས་ཅན། བཅས་འགལ་གྱི་ལྟུང་བ་བསྐྱེད་པ་ཡོད་དེ། བཅས་འགལ་གྱི་ལྟུང་བའི་བྱེད་ལས་ཡོད་པའི་ཕྱིར་ཏེ། བཅས་འགལ་ལ་བརྟེན་ནས་གཞན་མ་དད་པ་སྐྱེ་བ་དང་ལས་ལ་སྒྲིབ་པ་དེ་ཡོད་པའི་ཕྱིར་རོ། །འོ་ན་དགྲ་བཅོམ་པ་ལ་རང་བཞིན་གྱི་ཁ་ན་མ་ཐོ་བའང་འབྱུང་ངམ་ཞེ་ན་རྣམ་པར་གཏན་ལ་དབབ་པ་བསྡུ་བ་ལས། མི་སློབ་པ་ལ་ནི་ལྟུང་བ་མེད་དོ། །དེ་ནི་ཉོན་མོངས་པ་ཅན་གྱི་ལྟུང་བ་འབྱིན་མི་སྲིད་པའི་ཕྱིར་རོ། །ཞེས་གསུངས་སོ། །དེ་ལྟར་ན་དབང་པོ་རྣོན་པོ་ཤཱ་རིའི་བུ་ལྟ་བུའི་དགྲ་བཅོམ་པ་ཆོས་ཅན།རང་བཞིན་གྱི་ཁ་ན་མ་ཐོ་བ་མི་བསྐྱེད་དེ། རང་རྒྱུད་ཀྱི་ཉོན་མོངས་པ་མཐའ་དག་སྤངས་པའི་ཕྱིར་རོ། །དགྲ་བཅོམ་པ་ཤཱ་རིའི་བུ་ལྟ་བུ་ལས་གཞན་དགྲ་བཅོམ་པ་གནག་ཚོགས་ཅན་ལྟ་བུ་དགྲ་བཅོམ་པ་དབང་རྟུལ་ལ་ནི་རྐྱེན་གྱི་སྟོབས་ཀྱིས་ཉོན་མོངས་པ་བསྐྱེད་པ་སྲིད་པར་མཛོད་འགྲེལ་ལས་གསུངས་ཏེ། དེ་ནི་བྱེ་བྲག་སྨྲ་བའི་ལུགས་ཡིན་ནོ། །དགྲ་བཅོམ་པ་ལ་བཅས་འགལ་གྱི་ལྟུང་བ་བསྐྱེད་ན། དགྲ་བཅོམ་ཐོབ་པ་ལྟུང་བ་དག་པའི་རྒྱུར་བཤད་པ་དང་འགལ་ལོ་ཞེ་ན་བླ་མ་རྣམས་ཀྱིས་འགལ་སྤོང་མང་དུ་མཛད་ཀྱང་འགལ་སྤོང་མི་དགོས་ཏེ་འོག་མ་ནི་དགྲ་བཅོམ་པ་ཉིད་ཀྱིས་སོ་ཞེས་དགྲ་བཅོམ་པ་ཐོབ་ན་ཕམ་པ་དག་པ་ཉིད་ཡིན་པར་གསུངས་པ་ལ་བརྟེན་ནས། ཕམ་པ་དག་པའི་རྒྱུ་ཞེས་འཁྲུལ་པར་ཟད་དེ། གསར་དུ་དགྲ་བཅོམ་ཐོབ་པ་དེ་ནི་ལྟུང་བ་དག་པ་དངོས་ཉིད་ཡིན་གྱི། དགྲ་བཅོམ་ཐོབ་པས་ལྟུང་བ་དག་པའི་རྒྱུ་ཞེས་ནི་འདུལ་བའི་ལུང་དང་བསྟན་བཅོས་གང་ནའང་མི་སྣང་ངོ༌། །ཞེས་མཚོ་ཊཱིཀ་ལས་གསུངས་སོ། །མཚོ་ཊཱིཀ་མཆན་ལས། ལྔ་ཕྲུགས་ཉི་ཤུ་རྩ་གཅིག་པོ་འདི་རྣམས་ནི། དོན་ལ་ལྔ་ཕྲུགས་གཅིགདྲུག་ཕྲུགས་བཅོ་བརྒྱད། བདུན་ཕྲུགས་གཉིས་ཡིན་ཞེས་རྒྱ་འདུལ་འཛིན་གསུངས་ཀྱང་དགུ་ཕྲུགས་གཉིས་ཡོད་དེ། སློབ་ཏུ་འཇུག་ཀྱང་ནུས་པ་གཉིས་སོ། །གཞན་སློབ་འཇུག་ནུས་པ་གསུམ་གྱི་སྟེང་དུ་ཀྱང་ཞེས་པས་རང་གི་བསླབ་པའི་ཡོན་ཏན་གསུམ་བསྡུས་ཏེ་དྲུག་ཕྲུགས་བཅུ་དྲུག་ཞེས་རིགས་སོ། །ཞེས་ལྔ་ཕྲུགས་བསྟན་པའི་སྐབས་སུ་འདུལ་གཞུང་ངམ་མདོ་རྩས་ལྔ་ཕྲུགས་དེ་དང་དེའི་ཡན་ལག་ཏུ་བཅས་ནས་བསྟན་མ་བསྟན་ལ་བྱེད་དགོས་སྙམ་སྟེ། མདོ་རྩ་བར། སློབ་ཏུ་འཇུག་ཀྱང་ནུས་པ་ཉིད་དོ། །ཞེས་པའི་ཀྱང་སྒྲས་རང་གི་བསླབ་པའི་ཡན་ལག་གསུམ་དངོས་སུ་སྡུད་པ་དང༌། སྤྱོད་སོགས་གསུམ་ལ་སློབ་ཏུ་འཇུག་ནུས་སྟོན་སྐབས་སུ། མདོ་རྩར། དེ་བཞིན་ནོ། །ཞེས་པས་སྤྱོད་སོགས་གསུམ་རང་གི་བསླབ་པའི་ཡན་ལག་ཏུ་སྡུད་པ་ལྟར་ཡིན་དགོས་པ་ལས་གཞན་དུ་ན་ཡན་ལག་མཐའ་ཡས་པར་འགྱུར་རོ། །སློབ་པའི་ལྔ་བ་དང་མི་སློབ་པའི་ལྔ་བ་གཉིས་བདུན་ཕྲུག་ལ་འཇོག་དགོས་ཏེ། རང་གི་ཡན་ལག་ལྔའི་སྟེང་དུ་ལོ་བཅུ་ལོན་པ་དང་འདུལ་བ་ཤེས་པ་གཉིས་བསྣན་ནས་བདུན་ཡིན་ཞེས་ཟེར་ན་དཔྱད་དོ། །ཡང་ཁ་ཅིག་སྡེ་སྣོད་གསུམ་འཛིན་དུ་འཇུག་པའི་ལྔ་བ་དང་སྡེ་སྣོད་གསུམ་གསལ་གྱི་ལྔ་བ་གཉིས་ཀྱང་དོན་གྱི་དགུ་ཕྲུག་གི་ལྔ་བ་ཡིན་པར་འགྱུར་ཏེ། ལྔ་བ་དེ་གཉིས་གང་གི་རྒྱུད་ལ་ལྡན་ན་རང་རང་གི་ཡན་ལག་ལྔ་དང་འཛིན་པའི་གསུམ་དང་ལོ་བཅུ་ལོན་པ་དང་དགུ་ཚང་དགོས་པའི་ཕྱིར་ཏེ། ལྔ་ཕྲུག་དེ་གཉིས་ལྔ་བ་རང་དབང་ཅན་མ་ཡིན་པར་བཞག་དགོས་པའི་ཕྱིར་ཏེ། མཚོ་ཊཱིཀ་༡༡༤ལས། གསལ་བའི་ལྔ་ཕྲུགས་ལ་འཛིན་པའི་དེ་དགོས་པ་དང༌། འཛིན་དུ་འཇུག་ནུས་ལ་འཛིན་པའི་དེ་དགོས་པ་དང༌། ཞེས་གསུངས་པའི་ཕྱིར་ཟེར་ན་དཔྱད་པར་བྱའོ། །ཡང་དོགས་པ་རེ་བཀོད་ན། ལྔ་ཕྲུགས་ཉི་ཤུ་རྩ་གཅིག་པོ་གང་རུང་དང་ལྡན་ན་ཕན་འདོག་གི་ཡན་ལག་དང་ལྡན་པའི་ཁྱབ་པར་ཐལ། ལྔ་ཕྲུགས་ཉེར་གཅིག་གང་རུང་དང་ལྡན་ན་གཞན་གྱི་མཁན་པོ་དང་གནས་ཀྱི་སློབ་དཔོན་བྱ་རུང་བ་དང་རང་གནས་མེད་དུ་འདུག་རུང་བ་གསུམ་ག་དང་འབྱུང་བའི་ཁྱབ་པའི་ཕྱིར་ཏེ། ལུང་གཞི་ལས། ལོ་བཅུ་ལོན་པ་ཆོས་ལྔ་དང་ལྡན་པས་རབ་དུ་དབྱུང་བར་བྱ། བསྙེན་པར་རྫོགས་པར་བྱ། གནས་སྦྱིན་པར་བྱ། དགེ་ཚུལ་ཉེ་བར་བཞག་པར་བྱ་ཞིང་བདག་ཉིད་ཀྱང་མི་གནས་པར་འདུག་པར་བྱའོ། །ཞེས་གསུངས་པའི་ཕྱིར། གོང་དུ་འདོད་ན། བྱུང་ཤེས་ཀྱི་ལྔ་བ་རྒྱུད་ལ་ལྡན་ན་ཕན་འདོག་གི་ཡན་ལག་དང་ལྡན་པའི་ཁྱབ་པར་ཐལ། ལྔ་ཚན་རྒྱུད་ལ་ལྡན་ན་ཕན་ཡོན་གསུམ་འབྱུང་བས་ཁྱབ་པ་གང་ཞིག མཁན་པོ་དང་གནས་ཀྱི་སློབ་དཔོན་བྱ་བ་ལ་ཕན་འདོག་གི་ཡན་ལག་ཀྱང་ངེས་པར་ཚང་དགོས་པའི་ཕྱིར། འདོད་ན། བྱུང་ཤེས་ཀྱི་ལྔ་བ་ཆོས་ཅན། ལྔ་བ་ཁྱད་པར་ཅན་ཡིན་པར་ཐལ། འདུལ་བ་ཤེས་པའི་སྟེང་དུ་ཡོན་ཏན་གཞན་ཕན་འདོག་གི་ཡོན་ཏན་ཡར་ལྡན་དུ་ཡོད་པའི་ཕྱིར་ཟེར་ན་དཔྱད་པར་འཚལ་ལོ། །