གཉིས་པ་མཚན་མེད་ཀྱི་ལམ།
གཉིས་པ་མཚན་མེད་ཀྱི་ལམ་ནི།
སྟོང་པ་ཉིད་བསྒོམ་པ་སྟེ། མདོ་དང་ཐུན་མོང་བ་ཁོ་ནའོ། ། གསུམ་པ་སྤྱོད་པ་ནི། དྲག་པོའི་ལས་ཐོབ་པའི་སྐབས་འགའ་དང༌། ཁྲོ་བོ་འཆོལ་པ་སྟོབས་པོ་ཆེ་བསྒྲུབས་པ་ལ་སོགས་པ་དམིགས་བསལ་ཅན་རྣམས་མ་གཏོགས་ཁྲུས་དང་གཙང་སྦྲ་དང་སྙུང་གནས་ལ་སོགས་པའི་དཀའ་ཐུབ་དང༌། མཆོད་རྫས་ཀྱང་སྲོག་ཆགས་ཀྱི་ལུས་དང་མ་འདྲེས་པ་གཙང་མ་ཁོ་ན་དགོས་པར་བཞེད་ཅིང༌། བསྙེན་པ་དང་བསྒྲུབ་པའི་དུས་སུ་ཚངས་སྤྱོད་དགེ་བསྙེན་ཡན་ཆོད་ཀྱི་སྤྱོད་པ་ལ་བརྟེན་དགོས་པ་དང༌། རྒྱུད་ཀྱི་ནང་སེལ་རེ་རེ་ཙམ་ལས་མདུན་བསྐྱེད་ལྷ་ཕོ་མོ་ཕན་ཚུན་གཟིགས་པ་ལ་བསྒྲུབ་པ་རང་ཉིད་ཕར་ལྟ་བའི་ཆགས་ལམ་ཙམ་བཤད་དོ། །བཞི་པ་གྲུབ་པ་འབྲས་བུའི་དུས་ནི། རྒྱུད་སྡེ་འདིའི་ལམ་ལ་ཞུགས་ན་དབང་པོ་རྣོན་པོས་བསྐལ་པ་བརྒྱད་ནས་སངས་རྒྱས་ཐོབ་པར་བཞེད་དོ། །གཉིས་པ་སྤྱོད་པའི་རྒྱུད་ལ། སྒྲ་བཤད། དབྱེ་བ། ཉམས་ལེན་གྱི་རིམ་པ་བཤད་པ་དང་གསུམ་ལས། དང་པོ་ནི། སྤྱོད་རྒྱུད་ལ། ཕྱིའི་བྱ་བ་དང་ནང་གི་རྣལ་འབྱོར་ཆ་མཉམ་དུ་སྤྱཽད་པས་སྤྱོད་པའི་རྒྱུད་ཅེས་བྱ་ཞིང་རྒྱུ་མཚན་དེ་ཉིད་ཀྱི་ཕྱིར་གཉིས་ཀའི་རྒྱུད་ཅེས་ཀྱང་བརྗོད་དོ། །གཉིས་པ་དབྱེ་ནི། རིགས་རྣམ་པ་གསུམ་སྟེ། སྐུའི་རིགས་དང༌། གསུང་གི་རིགས་དང༌། ཐུགས་ཀྱི་རིགས་སོ། །དང་པོ་སྐུའི་རིགས་ནི། རིགས་གསུམ་གྱི་གཙོ་བོ་ཡིན་ལ། བོད་དུ་འགྱུར་བའི་དབང་དུ་བྱས་ནས་སྤྱོད་རྒྱུད་མཐའ་དག་གི་གཙོ་བོའམ་རྩ་བར་གྱུར་བ་རྣམ་པར་སྣང་མཛད་མངོན་པར་བྱང་ཆུབ་པའི་རྒྱུད་ཡིན་ཅིང༌། དེ་ལས་ལྷའི་རྣམ་གྲངས་མང་པོ་སྟོན་ཀྱང་གཙོ་བོ་སངས་རྒྱས་རྣམ་སྣང་འཁོར་ལོས་བསྒྱུར་བའི་ཆ་ལུགས་ཅན་སྐུ་མདོག་སེར་པོ་ཕྱག་མཉམ་གཞག་མཛད་པ་ཞིག་གསུངས། བྱ་རྒྱུད་དུ་སངས་རྒྱས་རྣམས་རབ་བྱུང་ཆགས་བྲལ་གྱི་རྣམ་པ་ཁོ་ནར་བཤད། འདི་ནས་བརྩམས་ཏེ་རྒྱུད་སྡེ་གོང་མ་རྣམས་སུ་སངས་རྒྱས་ཞི་བ་སྐུ་རྒྱན་དང་ལྡན་པ་དང༌། ཁྲོ་ཆགས་ཀྱི་སྐུ་ལ་སོགས་པ་མ་ངེས་པ་མང་དུ་གསུངས་སོ། །དེ་ལྟར་ན་རིགས་ཀྱི་གཙོ་བོ་རྣམ་པར་སྣང་མཛད་དང༌། རིགས་ཀྱི་ཁྲོ་བོ་མི་གཡོ་བ་བརྟུལ་ཕོད་པའི་རྒྱུད་དང༌། གཤིན་རྗེ་གཤེད་རྣམ་པར་རྒྱལ་བའི་རྒྱུད་གཉིས་སོ། །