གསུམ་པ་བསྡུ་བ།

གསུམ་པ་བསྡུ་བ་ནི།

ལྔ་པ་ཁྱད་པར་ཅན་དང༌། ལྔ་པ་ཁྱད་པར་ཅན་མ་ཡིན་པ་གཉིས་སུ་འདུས་སོ།། འདིར་ཁ་ཅིག་ལྔ་པ་ཁྱད་པར་ཅན་ལྔ་ཚན་དང་པོ་བཅུ་བདུན་ནོ། །ཁྱད་པར་ཅན་མ་ཡིན་པ་ནི་ལྔ་ཚན་ཕྱི་མ་བཞིའོ་ཞེས་འཆད་དོ། །དེ་ནི་མ་ཡིན་ཏེ། བྱུང་བ་ཤེས་པའི་ཊཱི་ཀ་ལས་ལྔ་པ་འདི་དང༌། འོག་ནས་ལྟུང་བ་དང་ཞེས་བྱ་བ་ལ་སོགས་པའི་ལྔ་པས་ནི། འདུལ་བ་འབའ་ཞིག་ཤེས་པ་ཉིད་བསྟན་ཏོ། །ཞེས་འདུལ་བ་འབའ་ཞིག་ཤེས་པའི་ལྔ་ཚན་གཉིས་སུ་གསུངས་པ་དང་འགལ་ལ་གནས་འཆའ་དང་འཆར་འཇུག་གི་ལྔ་ཚན་གཉིས་ནི་ལྔ་པ་ཁྱད་པར་ཅན་ཡིན་ཏེ། འདུལ་བ་ཤེས་པའི་སྟེང་དུ་གནས་འཆའ་འཆར་འཇུག་གི་ཡོན་ཏན་ཡར་ལྡན་དུ་ཡོད་པའི་ཕྱིར་རོ། །འོ་ན་གང་ཞེ་ན། དེའང་བྱུང་བ་ཤེས་པའི་ལྔ་ཚན་དང་ལྔ་ཚན་ཐ་མ་ནི་ལྔ་པ་ཁྱད་པར་ཅན་མ་ཡིན་པ་སྟེ། འདུལ་བ་འབའ་ཞིག་ཤེས་པའི་ལྔ་ཚན་ཡིན་པའི་ཕྱིར་ཏེ། བྱུང་བ་ཤེས་པའི་ཊཱི་ཀ་ལས། ལྔ་པ་འདི་དང་འོག་ནས་ལྟུང་བ་དང་ཞེས་བྱ་བ་ལ་སོགས་པའི་འདུལ་བ་འབའ་ཞིག་ཤེས་པ་ཉིད་བསྟན་ཏོ། །ཞེས་སོ། །ལྔ་ཚན་དེ་གཉིས་མ་གཏོགས་པར་ལྔ་ཚན་བཅུ་དགུ་ནི། ལྔ་པ་ཁྱད་པར་ཅན་ཡིན་ཏེ། འདུལ་བ་ཤེས་པའི་སྟེང་དུ་སྡེ་སྣོད་གཞན་གཉིས་ཤེས་པའམ་འཕགས་ཆོས་ཐོབ་པ་ལ་སོགས་པ་ཁྱད་པར་གྱི་ཡོན་ཏན་ཡར་ལྡན་དུ་ཡོད་པའི་ཕྱིར་རོ། །ཞེས་མཚོ་ཊཱིཀ་ལས་གསུངས་སོ། །དེ་ལ་འདུལ་བ་ཤེས་པ་ལ་བྱུང་བ་དང་ལྟུང་བ་ཤེས་པ་དགོས་པའི་རྒྱུ་མཚན་ཅི། འདུལ་བ་ཤེས་པ་ལ་དེ་གཉིས་ཤེས་མི་དགོས་ན་ལྔ་བ་དེ་གཉིས་ལྔ་བ་ཁྱད་པར་ཅན་དུ་འགྱུར་བ་དང༌། སྤྱིར་འདུལ་བ་ཤེས་པའི་ཚད་སོགས་ལ་དཔྱད་པར་བྱའོ། །པཎ་ཆེན་བསོད་ནམས་གྲགས་ཀྱི་འདུལ་བའི་མཐའ་དཔྱོད་ལས། ལྔ་བ་ཁྱད་པར་ཅན་ཡིན་མིན་གྱི་དོན་ཡོད་དེ། །སྡེ་སྣོད་གསུམ་ཤེས་ཀྱི་ཡོན་ཏན་ཡན་ལག་ཏུ་ལྡན་པའི་ལྔ་བ་དེ་དང་པོ་དང༌། འདུལ་བ་རྐྱང་བ་ཤེས་པའི་ཡོན་ཏན་ཡན་ལག་ཏུ་ལྡན་པ་དེ་གཉིས་པ་ཡིན། ཞེས་གསུངས་ཡོད་དོ། ། བཞི་བ་རང་དབང་ཅན་ཡིན་མིན་གྱི་དོན་ལ་གསུམ་ལས། དང་པོ་ལྔ་པ་རང་དབང་ཅན་ཡིན་མིན་གྱི་དོན་ནི། ལྔ་ཚན་གཅིག་ཚང་བར་བྱེད་པ་ལ་ལྔ་ཚན་གཞན་གྱི་ཡན་ལག་ཟླ་བོར་ངེས་གཟུང་དུ་དགོས་ན་ལྔ་པ་རང་དབང་ཅན་མ་ཡིན་པ་ཞེས་བྱ། མི་དགོས་ན་ལྔ་པ་རང་དབང་ཅན་ཞེས་བྱའོ། །དེ་ལྟར་ན་སྡེ་སྣོད་གསུམ་གསལ་བའི་ལྔ་ཕྲུགས་ལ་སྡེ་སྣོད་གསུམ་འཛིན་པའི་དེ་དགོས་པ་དང༌། འཛིན་དུ་འཇུག་ནུས་པ་ལ་འཛིན་པ་དེ་དགོས་པ་དང༌། ལྷག་པའི་ཚུལ་ཁྲིམས་ལ་སོགས་པ་སློབ་ཏུ་འཇུག་ཀྱང་ནུས་པ་ལ་སློབ་པའི་ལྔ་ཕྲུགས་ཀྱི་ཡན་ལག་ཟླ་བོར་དགོས་པ་དང༌། ལྷག་པའི་སྤྱོད་པ་ལ་སོགས་པ་སློབ་ཏུ་འཇུག་ཀྱང་ནུས་པ་ལ་སློབ་པའི་ལྔ་ཕྲུགས་ཡན་ལག་དགོས་པས། གསལ་བའི་ལྔ་ཕྲུགས་སོགས་ལྔ་ཚན་བཞི་ནི་རང་དབང་ཅན་མ་ཡིན་པ་སྟེ། ལྔ་ཚན་གཞན་གྱི་ཡན་ལག་ཟླ་བོར་ངེས་གཟུང་དུ་དགོས་པའི་ཕྱིར་རོ། །ལྔ་ཚན་བཞི་པོ་དེ་དག་ལས་གཞན་རྣམས་ནི་ལྔ་པ་རང་དབང་ཅན་ཡིན་པར་མཚོ་ཊཱིཀ་ལས་གསུངས་སོ། །འོན་ཀྱང་ཕུན་ཚོགས་འོག་མའི་ལྔ་བ་ལྡན་པ་ལ་མི་སློབ་པའི་ལྔ་བ་ལྡན་དགོས་སམ་ཅི། དགོས་ན་ཕུན་ཚོགས་འོག་མའི་ལྔ་བ་དེ་ལྔ་བ་རང་དབང་ཅན་མ་ཡིན་པར་འགྱུར་ཞེས་ཟེར་བ་དང༌། སྡེ་སྣོད་གསུམ་རིག་གི་ལྔ་བ་ཆོས་ཅན། ལྔ་བ་རང་དབང་ཅན་མ་ཡིན་པར་ཐལ། ཁྱོད་རྒྱུད་ལ་ལྡན་པར་བྱེད་པ་ལ་སྡེ་སྣོད་གསུམ་མཁས་རྒྱུད་ལ་ལྡན་དགོས་པའི་ཕྱིར་ཞེ་ན་དཔྱད་པར་བྱའོ། །གཞན་ཡང་གནས་འཆར་གཞུག་ནུས་ཀྱི་ལྔ་བ་དེ། ལྔ་བ་རང་དབང་ཅན་མ་ཡིན་པར་ཐལ། ལྔ་བ་རང་ཉིད་ལྡན་པ་ལ་རེ་ཞིག་གནས་ཆར་གཞུག་ནུས་ཀྱི་ལྔ་བ་རྒྱུད་ལ་ལྡན་དགོས་པའི་ཕྱིར་ཏེ། དེ་གཉིས་ཀྱི་ཡན་ལག་བཞི་འདྲ་ཞིང་གནས་ཆར་གཞུག་ནུས་ན་རེ་ཞིག་གནས་ཆར་གཞུག་ནུས་དགོས་པའི་ཕྱིར་ཟེར་ན། གོང་དུ་འདོད་ན་མཚོ་ཊཱིཀ་དང་འགལ་བས་དཔྱད། ཡང་མཚོ་ཊཱིཀ་ལས་ལྔ་བ་རང་དབང་ཅན་ཡིན་མིན་གྱི་དོན་བཞག་པ་ལ། ལོ་བཅུ་ལོན་པའི་ལྔ་བ་ལས་གཞན་པའི་ལྔ་བ་ཉི་ཤུ་པོ་ཐམས་ཅད་ལྔ་བ་རང་དབང་ཅན་མ་ཡིན་པར་ཐལ། ལྔ་ཚན་ཚང་བར་བྱེད་པ་ལ་ལྔ་ཚན་གཞན་གྱི་ཡན་ལག་ལོ་བཅུ་ལོན་པ་ཚང་དགོས་པའི་ཕྱིར་ཟེར་ན་དཔྱད་པར་བྱའོ། །