རྡོ་རྗེ་ཕག་མོའི་ཕོ་ཉ་མོ་འོད་ཟེར་ཅན་མས་སྒྲུབ་ཐབས།
ཨོཾ་སྭཱ་སྟི། མ་ལུས་བགེགས་རྣམས་ཉམས་པ་དང༌། །ཕྱི་ཡི་བར་ཆད་བསྲུང་བའི་མཆོག །རྡོ་རྗེ་ཕག་མོའི་ཕོ་ཉ་མོ། །འོད་ཟེར་ཅན་མས་བདག་སྲུངས་ཤིག །འདིར་སློབ་དཔོན་རྡོ་རྗེ་གདན་པའི་ཐུགས་དམ་ལྷ་དྲུག་ནི། དགྲ་སོགས་ཕྱི་ཡི་བར་ཆད་ཞི་བའི་ཕྱིར་འོད་ཟེར་ཅན་མ་དང༌། གདོན་བགེགས་སོགས་ནང་གི་བར་ཆད་ཞི་བའི་ཕྱིར་མི་གཡོ་བ་སྔོན་པོ་པུས་བཙུགས་དང༌། ནད་ཞི་བའི་ཕྱིར་ལྷ་མོ་སངས་རྒྱས་སྤྱན་མ་དང༌། རྨི་ལམ་ངན་པ་སོགས་བར་ཆད་བཟློག་པའི་ཕྱིར། སྤྱན་རས་གཟིགས་ཡི་གེ་ཕྱེད་དང་བཞི་པ་དང༌། ཚེ་བསྒྲུབ་པའི་ཕྱིར་ཐུབ་པ་མེ་རུ་ཤི་ཥ་དང༌། སྡིག་སྒྲིབ་སྦྱང་བའི་ཕྱིར་དེ་བཞིན་གཤེགས་པའི་ཡི་གེ་བརྒྱ་པའི་བསྒོམ་བཟླས་ཏེ་དྲུག་ལས། དང་པོ་འོད་ཟེར་ཅན་མའི་གཟུངས་འདོན་ཐབས་ནི། སྔ་དྲོ་ཤར་དང༌། དགོང་མོ་ནུབ་ཏུ་གདོང་ཕྱོགས་ཤིང༌། ཉིན་མོ་སྣང་བྱེད་ཉི་མའི་དཀྱིལ་འཁོར་དང༌། མཚན་མོ་སྣང་བྱེད་ཟླ་བའི་དཀྱིལ་འཁོར་གྱི་གདན་བསྒོམ་པ་བློ་ཡུལ་ཏུ་ངེས་པར་བྱས་ནས། སྐྱབས་སེམས་སྔོན་དུ་བཏང་བྱང་ཆུབ་མཆོག་གི་ཕྱག་རྒྱ་བཅས་ཏེ། རང་གི་སྙིང་གར་སྣང་བྱེད་ཀྱི་དཀྱིལ་འཁོར་ལ་ཨོཾ། དེ་ལས་འོད་འཕྲོས། རང་ཉིད་རྣམ་པར་སྣང་མཛད་དཀར་པོ་བྱང་ཆུབ་མཆོག་གི་ཕྱག་རྒྱ་མཛད་པ། སངས་རྒྱས་རབ་ཏུ་བྱུང་བའི་ཆ་ལུགས་ཅན། བ་སྤུའི་བུ་ག་ནས་འོད་འཕྲོས། འོད་ཟེར་དཀར་པོའི་རྭ་བ་ཟླུམ་པོ་རྩེ་མོ་མཆོད་རྟེན་གྱི་རྣམ་པ་ཅན་དུ་གྱུར། བྱང་ཆུབ་མཆོག་གི་
ཕྱག་རྒྱ་བཅས་ལ། སྙིང་གར་སྣང་བྱེད་ཀྱི་དཀྱིལ་འཁོར་ལ་མཾ་ལས་མྱ་ངན་མེད་ཀྱི་ཡལ་ག་མཾ་གྱིས་མཚན་པ་ཡོངས་སུ་གྱུར་པ་ལས་འོད་ཟེར་ཅན་མ་གསེར་མདོག་སྐེམ་པའི་ལུས་ཅན། གཡས་ཁབ་དང་གཡོན་སྐུད་པ་བསྣམས་པ། མཉམ་པར་བཞེངས་པར་གྱུར། སྣ་བུག་གཡས་པ་ནས་ཕྱིར་སྤྲོས་མདུན་དུ་བཞུགས། རང་འདྲའི་ཕོ་ཉ་མོ་དཔག་ཏུ་མེད་པ་སྤྲུལ། གནོད་བྱེད་རྣམས་དབང་མེད་དུ་བཀུག་སྟེ། ཁ་མིག་བཙེམས། ཡན་ལག་བཅིངས་ནས་རྭ་བའི་ཕྱི་རོལ་འོབས་ཀྱི་ནང་དུ་འཕངས་པར་བསམ། གཟུངས་ཀྱི་མདོ་ཆུང་ཚར་གཅིག་འདོན། ལྷ་མོ་འོད་ཟེར་ཅན་གྱི་སྙིང་པོ་བརྗོད་པར་བྱ་སྟེ་ཞེས་པ་ནས་སྭཱཧཱའི་བར་ལན་བདུན་བརྗོད། དེ་ནས་ཕྱག་རྒྱ་བཤིག་ལ་ཅི་བདེར་བྱས། རླུང་ནང་དུ་འཇུག་པ་དང་བསྟུན་ཏེ། འོད་ཟེར་ཅན་སྣ་བུག་གཡོན་ནས་ཞུགས་ཏེ་སྙིང་གར་ཐིམ་པ་ལས། རང་ཉིད་ལྷ་མོ་འོད་ཟེར་ཅན་གསེར་མདོག་སྒེག་ཅིང་མཛེས་པ། གཡས་མཆོག་སྦྱིན་དང༌། གཡོན་མྱང་ངན་མེད་པའི་ཤིང་གི་སྡོང་པོ་ལས་ཡལ་ག་གཅིག་འཛིན་པ། ཡིད་ཙམ་ཁྲོ་བ། དར་དང་རིན་པོ་ཆེས་བརྒྱན་པ། ཕག་སེར་པོ་བཞིས་དྲངས་པའི་ཤིང་རྟ་ལ་རོལ་པའི་བཞུགས་པ། རང་དང་ཕག་ལས་འོད་བྱུང༌། ཕག་འཇིགས་རུང་དཔག་ཏུ་མེད་པ་སྤྲུལ། འོབས་ཀྱི་ནང་གི་གནོད་བྱེད་རྣམས་ཟོས་ཤིང༌། ལྷག་མ་གསེར་གྱི་ས་གཞིར་གྱུར། ཕག་རྣམས་གདོང་ཕྱིར་བསྟན་པས་རྭ་བར་གྱུར། ཨོཾ་མཱ་རི་ཙྱཻ་མཾ་སྭཱཧཱ། གང་འགྲུབ་བཟླ། མཐར་བདག་བསྐྱེད་ཀྱི་ལྷ་ལ་མཆོད་བསྟོད་བྱ། མི་དམིགས་པར་བཞག་ལ་དགེ་བ་བསྔོ། གཏོར་
མ་ནི་དཀར་གཏོར་བསངས་སྦྱངས། བྷྲུཾ་ལས་བྱུང་བའི་རིན་པོ་ཆེའི་སྣོད་དུ། ཨོཾ་འོད་དུ་ཞུ་བ་ལས་གཏོར་མ་བདུད་རྩིའི་རྒྱ་མཚོར་གྱུར། ཨོཾ་ཨཱཿཧཱུཾ་ལན་གསུམ་གྱིས་བྱིན་གྱིས་བརླབས། རང་གི་སྙིང་ག་ནས་འོད་ཟེར་འཕྲོས། རྣམ་པར་སྣང་མཛད་ཀྱིས་དབུ་བརྒྱན་པའི་འོད་ཟེར་ཅན་མ་བཛྲ་ས་མཱ་ཛཿ པདྨ་ཀ་མ་ལ་ཡེ་སྟྭཾ། ཨོཾ་མཱ་རི་ཙྱཻ་དེ་ཝི་ས་པ་རི་ཝཱ་རེ་བྷྱཿ ཞེས་པ་ལ་ཨ་ཀཱ་རོ་བཏགས་པ་ལན་གསུམ་གྱིས་ཕུལ། ཨརྒྷཾ་ནས་ཤཔྟའི་བར་གྱིས་མཆོད། གང་གིས་མཚན་ཙམ་འཛིན་ཞིང་དྲན་པས་ཀྱང༌། །འཇིགས་པ་ཀུན་ལས་རབ་ཏུ་སྐྱོབ་བྱེད་ཅིང༌། །དྲི་མེད་བདེ་ཆེན་ཉེ་བར་སྩོལ་བ་ཡི། །ལྷ་མོ་འོད་ཟེར་ཅན་ལ་ཕྱག་འཚལ་ལོ། །མཆོད་སྦྱིན་གཏོར་མ་འདི་བཞེས་སོགས་འདོད་དོན་གསོལ་བ་བཏབ། ཡིག་བརྒྱ། བཟོད་གསོལ། གཤེགས་གསོལ་རྣམས་སྤྱི་དང་མཐུན། འདི་ལ་ངེས་པར་རྗེས་གནང་དགོས་ཤིང༌། འོན་ཀྱང་རྗེས་གནང་གི་བྱ་བ་ནི་སྒྲུབ་ཐབས་བརྒྱ་རྩ་བཞིན་ནོ། །གསུང་བཟླས་ལུང་གི་མཐར་གཟུངས་མདོ་ཀློག་དགོས་སོ། །རྒྱལ་བ་ཀུན༵་གྱི་ཕོ་ཉ་མོ། །དག༵འ་ཆེན་འོད་ཟེར་ཅན་སྒྲུབ་ཐབས། །གཟུངས་ལས་འབྱུང་བ་ངོ་མཚར་ཅན། སྙིང༵་པོ༵འི་ཡི་གེ་འདི་ཙམ་ལགས། །འདིའི་ལམ་བསྲུང་ལ་སོགས་པ་ཁྱད་པར་གྱི་ལས་ཚོགས་ནི། ཡིག་རྙིང་ལས་ཤེས་པར་བྱའོ། །རྡོ་རྗེ་གདན་པའི་ཐུགས་དམ་ལྷ་དྲུག་ལས། ཕྱིའི་བར་ཆད་སེལ་བ་གཟུངས་ལས་འབྱུང་འོད་ཟེར་ཅན་མའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །