གཉིས་པ་བསམ་གཟུགས་དངོས་བཤད་པ་ལ་གཉིས་ལས།

གཉིས་པ་བསམ་གཟུགས་དངོས་བཤད་པ་ལ་གཉིས་ལས།

བསམ་གཏན་གྱི་དངོས་གཞི་ལ། མཚན་ཉིད། དབྱེ་བ་གཉིས་ལས། དང་པོ་མཚན་ཉིད། གཉེན་པོའི་ཡན་ལག་དང༌། ཕན་ཡོན་དང༌། ཏིང་ངེ་འཛིན་གནས་ཀྱི་ཡན་ལག་དང་ལྡན་པའི་གཟུགས་ཀྱི་སྙོམས་འཇུག་གོ །གཉིས་པ་དབྱེ་བ་ལ་བཞི་ལས། དང་པོའི་དངོས་གཞི་སྙོམས་འཇུག་གི་མཚན་ཉིད། རྟོག་དཔྱོད་གང་རུང་གི་ས་བའི་བསམ་གཏན་གྱི་དངོས་གཞིའི་སྙོམས་འཇུག་དེ་ཡིན་ཏེ། ཉ་ཊཱིཀ་ལས། མཚན་ཉིད་ནི། སྙོམས་འཇུག་གི་བསམ་གཏན་གང་ཞིག རྟོག་པའམ་དཔྱོད་པའི་ས་བ་ཡིན་པའོ། །དེ་ཡང་ཉོན་མོངས་ཅན་རྣམས་ཀྱང་བསམ་གཏན་ཡིན་པའི་དབང་དུ་བྱས་པའོ། ། ཡང་ན། གང་ཞིག རྟོག་དཔྱོད་གང་རུང་ཅན་ནོ། །ཞེས་གསུངས་པའི་ཕྱིར་རོ། །དབྱེ་ན་ཙམ་ཁྱད་གཉིས། བསམ་གཏན་དང་པོའི་དངོས་གཞི་ཙམ་པོ་བའི་མཚན་ཉིད། རྟོག་པ་དང་བཅས་པའི་བསམ་གཏན་གྱི་དངོས་གཞི། བསམ་གཏན་དང་པོའི་དངོས་གཞི་ཁྱད་པར་ཅན་གྱི་མཚན་ཉིད། རྟོག་པ་དང་བྲལ་ཞིང་དཔྱོད་པ་དང་བཅས་པའི་བསམ་གཏན་གྱི་དངོས་གཞིའོ། །གཉིས་པའི་དངོས་གཞི་སྙོམས་འཇུག་གི་མཚན་ཉིད། རྟོག་དཔྱོད་དང་བྲལ་ཞིང་ནང་རབ་ཏུ་དང་བ་དང་ལྡན་པའི་དགའ་བའི་ཡན་ལག་ཅན་གྱི་བསམ་གཏན་གྱི་དངོས་གཞི་དེ་ཡིན་ཏེ། ཉ་ཊཱིཀ་ལས། མཚན་ཉིད་ནི། སྙོམས་འཇུག་གི་བསམ་གཏན་གང་ཞིག་ནང་ཡོངས་སུ་དང་བ་དང་དགའ་པའི་ས་བའམ་དེ་གཉིས་ཀྱི་ཡན་ལག་ཅན་ཞེས་པའོ། །ཞེས་གསུངས་སོ། །གསུམ་པའི་དངོས་གཞི་སྙོམས་འཇུག་གི་མཚན་ཉིད། དགའ་བ་ཡན་ལག་ཏུ་བྲལ་ཞིང་བདེ་བ་ཡན་ལག་ཏུ་ལྡན་པའི་བསམ་གཏན་གྱི་དངོས་གཞི་དེ་ཡིན་ཏེ། ཉ་ཊཱིཀ་ལས། གསུམ་པའི་མཚན་ཉིད། རྒྱུ་སྙོམས་འཇུག་གི་བསམ་གཏན་གང་ཞིག དགའ་བ་ལ་འདོད་ཆགས་དང་བྲལ་ཞིང་བདེ་བའི་ས་བའམ་བདེ་བའི་ཡན་ལག་ཅན་ནོ། །ཞེས་གསུངས་སོ། །བཞི་བའི་དངོས་གཞི་སྙོམས་འཇུག་གི་མཚན་ཉིད། སྐྱོན་བརྒྱད་ལས་གྲོལ་ཞིང་ཚོར་བ་བཏང་སྙོམས་ཡན་ལག་ཏུ་ལྡན་པའི་བསམ་གཏན་གྱི་དངོས་གཞི་དེ་ཡིན་ཏེ། ཉ་ཊཱིཀ་ལས། བཞི་བའི་མཚན་ཉིད། རྒྱུ་སྙོམས་འཇུག་གི་བསམ་གཏན་གང་ཞིག སྐྱོན་བརྒྱད་ལས་གྲོལ་ཞིང་ཚོར་བ་བཏང་སྙོམས་ཅན་ནོ། །བདེ་སྡུག་ཡིད་བདེ་མི་བདེ་དང་བྲལ་ནས་ཚོར་བ་བཏང་སྙོམས་དང་ལྡན་པ། སྐྱོན་བདེ་སྡུག་ཡིད་བདེ་མི་བདེ་དབུགས་འབྱུང་རྔུབ་རྟོག་དཔྱོད་བརྒྱད་དོ། །བརྒྱད་ལས་གྲོལ་བས་དྲན་པ་དང་བཏང་སྙོམས་ཡོངས་སུ་དག་པ་ཅན་གྱི་རྩེ་གཅིག་པའོ། །ཞེས་གསུངས་པས་སོ། །གཟུགས་མེད་ཀྱི་དངོས་གཞི་ལ། མཚན་ཉིད། དབྱེ་བ་གཉིས། དང་པོ་ཡན་ལག་གི་སྒོ་ནས་བཞག་པ་མ་ཡིན་པར་དམིགས་རྣམ་ཀྱི་སྒོ་ནས་བཞག་པའི་དངོས་གཞིའི་རིགས་སུ་གནས་པའི་སྙོམས་འཇུག་གོ ། གཉིས་པ་དབྱེ་བ་ལ་བཞི་ལས། དང་པོ་ནམ་མཁའ་མཐའ་ཡས་ཀྱི་དངོས་གཞིའི་སྙོམས་འཇུག་གི་མཚན་ཉིད། གཟུགས་ཀྱི་འདུ་ཤེས་བཤིག་ནས་ནམ་མཁའ་མཐའ་ཡས་ཀྱི་ཆ་ལ་མཉམ་པར་བཞག་པའི་རིགས་གནས་ཀྱི་གཟུགས་མེད་ཀྱི་སྙོམས་འཇུག་དེ་ཡིན་ཏེ། ཉ་ཊཱིཀ་ལས། རྒྱུ་ནམ་མཁའ་མཐའ་ཡས་ཀྱི་སྙོམས་འཇུག་གི་མཚན་ཉིད། རྒྱུ་གཟུགས་མེད་ཀྱི་སྙོམས་འཇུག་གང་ཞིག གཟུགས་ཀྱི་འདུ་ཤེས་བཤིག་སྟེ་ནམ་མཁའ་མཐའ་ཡས་སོ་ཞེས་དམིགས་ཤིང་མོས་པ། དེ་ཡང་ཐམས་ཅད་ལ་ནམ་མཁའི་འདུ་ཤེས་ཤིན་ཏུ་བསྒོམས་པས་སྔོ་སེར་སོགས་ཁ་དོག གྱང་དང་ར་བ་རྩིག་པ་སོགས་སྒྲིབ་པ། ཁང་བཟང་དང་སྐྱེད་མོས་ཚལ་ཉི་ཟླ་སོགས་སྣ་ཚོགས་ཀྱི་འདུ་ཤེས་དང་བྲལ་ཏེ་དེ་རྣམས་སྣང་བ་མེད་པར་ནམ་མཁའ་མཐའ་ཡས་པ་ཉིད་དམིགས་པར་བྱེད་པའོ། །དེ་ཡང་ཉེར་བསྡོགས་ཀྱི་ཚེ། འོག་ས་དང་ནམ་མཁའ་ལ་དམིགས་པའམ་དངོས་གཞི་མ་ཐོབ་ཀྱི་བར་ནམ་མཁའ་ཁོ་ན་ལ་དམིགས། ཐོབ་ནས་རང་སའི་ཕུང་བོ་དང་ནམ་མཁའ་ལ་དམིགས་པར་མངོན་ནོ། །ཞེས་གསུངས་པས་སོ། །གཉིས་པ་རྣམ་ཤེས་མཐའ་ཡས་ཀྱི་དངོས་གཞིའི་སྙོམས་འཇུག་གི་མཚན་ཉིད། ནམ་མཁའ་མཐའ་ཡས་ཀྱི་འདུ་ཤེས་བཤིག་ནས་རྣམ་ཤེས་མཐའ་ཡས་ཀྱི་ཆ་ལ་མཉམ་པར་བཞག་པའི་རིགས་གནས་ཀྱི་གཟུགས་མེད་ཀྱི་སྙོམས་འཇུག་དེ་ཡིན་ཏེ། ཉ་ཊཱིཀ་ལས། རྒྱུ་རྣམ་ཤེས་ཀྱི་མཚན་ཉིད། གང་ཞིག ནམ་མཁའི་འདུ་ཤེས་ལྡོག་སྟེ་རྣམ་ཤེས་མཐའ་ཡས་སོ་ཞེས་དམིགས་ཤིང་མོས་པ། ཞེས་གསུངས་པས་སོ། །གསུམ་པ་ཅི་ཡང་མེད་ཀྱི་དངོས་གཞིའི་སྙོམས་འཇུག་གི་མཚན་ཉིད། རྣམ་ཤེས་ཀྱི་འདུ་ཤིས་བཤིག་ནས་ཅི་ཡང་མེད་པའི་ཆ་ལ་མཉམ་པར་བཞག་པའི་རིགས་གནས་ཀྱི་གཟུགས་མེད་ཀྱི་སྙོམས་འཇུག་དེ་ཡིན་ཏེ། ཉ་ཊཱིཀ་ལས། རྒྱུ་ཅི་ཡང་གི་མཚན་ཉིད། གང་ཞིག རྣམ་ཤེས་མཐའ་ཡས་སྙོམས་འཇུག་ལས་གོང་དུ་བསྐྱོད་པས་གཟུགས་གཟུགས་མེད་ཀྱི་དམིགས་པ་ཅི་ཡང་མེད་དོ་ཞེས་དམིགས་ཤིང་མོས་པ། ཞེས་གསུངས་པས་སོ། །བཞི་བ་སྲིད་རྩེའི་དངོས་གཞིའི་སྙོམས་འཇུག་གི་མཚན་ཉིད། ཅི་ཡང་མེད་པའི་འདུ་ཤེས་བཤིག་ནས་འདུ་ཤེས་ཡོད་མིན་མེད་མིན་གྱི་ཆ་ལ་མཉམ་པར་བཞག་པའི་རིགས་གནས་ཀྱི་གཟུགས་མེད་ཀྱི་སྙོམས་འཇུག་དེ་ཡིན་ཏེ། ཉ་ཊཱིཀ་ལས། རྒྱུ་འདུ་ཤེས་མེད་འདུ་ཤེས་མེད་མིན་གྱི་མཚན་ཉིད། གང་ཞིག ཅི་ཡང་ཡོད་མེད་ཀྱི་འདུ་ཤེས་བཟློག་ཅིང་འདུ་ཤེས་ཕྲ་མོ་མ་སྤངས་པ་ཅན་ནོ། །ཞེས་གསུངས་པས་སོ། །ཚད་རྣམ་པར་གཞག་པས་ཇི་ལྟ་བུ་ཞེ་ན། རྒྱུ་སྙོམས་འཇུག་གི་ཚད་ནི། བསམ་གཏན་དང་པོ་ལ་གུས་སྦྱོར་རྒྱུན་སྦྱོར་གཉིས་ཀ་དང་མི་ལྡན་པ་ཆུང་ངུར་ཡོངས་སུ་བསྒོམ་པ་དང༌། གང་རུང་དང་ལྡན་པ་འབྲིང་དུ་ཡོངས་སུ་བསྒོམ་པ་དང༌། གཉི་ག་དང་ལྡན་པ་ཆེན་པོར་ཡོངས་སུ་བསྒོམ་པའོ། ། ཡང་ན་ཤེས་རབ་དང་བརྩོན་འགྲུས་ཆུང་ངུ་འབྲིང་ཆེན་པོ་གསུམ་གྱི་ཕྱེ་བའོ། །བསམ་གཏན་དང་པོ་ལ་ཇི་ལྟ་བར་བསམ་གཏན་ལྷག་མ་གསུམ་པོ་རྣམས་དང༌། གཟུགས་མེད་པའི་སྐྱེ་མཆེད་བཞི་བོ་རྣམས་ཀྱང་དེ་བཞིན་དུ་བསྒོམ་ཚུལ་རྣམ་པ་གསུམ་གསུམ་གྱིས་ཕྱེ་བ་ཡིན་ནོ། །འབྲས་བུ་སྐྱེ་བའི་ཚད་ནི། བསམ་གཏན་དང་པོ་ཆུང་ངུ་འབྲིང་དང་ཆེན་པོ་ཡོངས་སུ་བསྒོམས་པའི་འབྲས་བུ་ནི། རིམ་པ་བཞིན་དུ་བསམ་གཏན་དང་པོའི་སྐྱེ་བ་ཚངས་རིས་དང་ཚངས་པ་འདུན་ན་འདོན་དང་ཚངས་ཆེན་ཏེ་གསུམ་མོ། །བསམ་གཏན་དང་པོ་ལ་ཇི་ལྟ་བར་བསམ་གཏན་ལྷག་མ་རྣམས་ཀྱི་འབྲས་བུ་ཡང་དེ་བཞིན་ཏེ། གཉིས་པ་ལ་འོད་ཆུང་ཚད་མེད་འོད་འོད་གསལ་གསུམ་དང༌། གསུམ་པ་ལ་དགེ་ཆུང་ཚད་མེད་དགེ་དགེ་རྒྱས་གསུམ་དང༌། བཞི་པ་ལ་སྤྲིན་མེད་བསོད་ནམས་སྐྱེས་འབྲས་བུ་ཆེ་བ་གསུམ་སྟེ་བསམ་གཏན་གྱི་སྐྱེ་བ་རྣམ་པ་གསུམ་མོ། །གནས་གཙང་མ་ནི་སྤེལ་སྒོམ་ལས་སོ། །གཟུགས་མེད་པའི་སྐྱེ་མཆེད་བཞི་བོ་རྣམས་ན་ནི་གཞལ་མེད་ཁང་གི་གནས་གཞན་ཐ་དད་པ་མེད་པའི་ཕྱིར་གནས་ཀྱིས་ཕྱེ་བའི་སྐྱེ་བ་ཐ་དད་པ་ཡང་མེད་དོ། །འོན་ཀྱང་དེ་དག་ན་ཆུང་ངུ་དང་འབྲིང་དང་ཆེན་པོར་ཡོངས་སུ་བསྒོམས་པས་རིམ་པ་ལྟར། གཟུགས་མེད་པ་རྣམས་སུ་སྐྱེ་བ་དམན་ཞིང་ངན་པ་དང༌། མཐོ་ཞིང་ངན་པའམ་དམའ་ཞིང་བཟང་བ་དང༌། མཐོ་ཞིང་བཟང་བ་རྣམས་སུ་འགྱུར་ཏེ། དེའང་ཚེ་རིང་བ་ལ་སོགས་པས་མཐོན་པོ་དང༌། ཚེ་ཐུང་བ་ལ་སོགས་པས་དམའ་བ་དང༌། ཉོན་མོངས་པ་ཤས་ཆེ་བས་ངན་པ་དང༌། ཉོན་མོངས་པ་ཤས་ཆུང་བས་བཟང་བོར་མངོན་ནོ། །རོ་མྱོང་ཅན་ནམ་སྙོམས་འཇུག་ཉོན་མོངས་ཅན་ནི། རང་སའི་སྲེད་པ་ལྟ་བ་ང་རྒྱལ་མ་རིག་པ་བཞིས་ཉོན་མོངས་པ་ཅན་དུ་གྱུར་པས་བསྒྲིབས་ལ་ལུང་དུ་མ་བསྟན་པར་འགྱུར་བའོ། །ཞེས་ཀུན་བཏུས་ས་འགྲེལ་ལས་གསུངས་སོ། །