གཉིས་པ་གང་ཟག་རང་དབང་ཅན་ཡིན་མིན་གྱི་དོན།

གཉིས་པ་གང་ཟག་རང་དབང་ཅན་ཡིན་མིན་གྱི་དོན་ནི།

བསྙེན་པར་རྫོགས་ནས་བར་མ་ཆད་པར་ལོ་བཅུ་ལོན་པ་དེ། བརྟན་པའི་ཡན་ལག་དང་ལྡན་ཞིང་འདུལ་བ་ཤེས་ན། གང་ཟག་རང་དབང་ཅན་ཞེས་མིང་བཏགས་ཏེ་གནས་ཀྱི་བླ་མ་ལ་བརྟེན་མི་དགོས་པར་འདུག་ཏུ་རུང་བའི་གང་ཟག་ཡིན་པའི་ཕྱིར་ཏེ། ཊཱི་ཀ་ལས། ལོ་བཅུ་ལོན་པ་ཉིད་ཅེས་གསུངས་པ་ནི་རང་དབང་ཡོད་པར་བསྟན་པ་ཡིན། ཞེས་སོ། །རབ་ཏུ་བྱུང་བ་གང་ཞིག་བསྙེན་པར་རྫོགས་ནས་ལོ་བཅུ་ལོན་པ་མ་ཡིན་ནམ་འདུལ་བ་མི་ཤེས་ན་ནི་གང་ཟག་རང་དབང་ཅན་མ་ཡིན་པ་སྟེ། གནས་ཀྱི་བླ་མ་མ་བརྟེན་པར་འདུག་མི་རུང་བའི་གང་ཟག་ཡིན་པའི་ཕྱིར་རོ། །སངས་རྒྱས་མ་ཐག་དང་བསེ་རུ་རང་རྒྱལ་དགྲ་བཅོམ་ཐོབ་མ་ཐག་པ་གཉིས་སྤྱིར་གང་ཟག་རང་དབང་ཅན་ཡིན་ཀྱང་འདིར་བསྟན་བརྟན་པའི་ཡོན་ཏན་དང་ལྡན་པའི་གང་ཟག་རང་དབང་ཅན་མ་ཡིན་པར་སྣང་ངོ། །འདིར་བསྟན་པའི་གང་ཟག་རང་དབང་ཅན་ལ་བརྟན་པའི་ཡོན་ཏན་བསྙེན་པར་རྫོགས་ནས་སྡོམ་རྒྱུན་བར་མ་ཆད་པར་ལོ་བཅུའམ་བཅུ་གཉིས་ལོན་པ་དང་མཁས་པའི་ཡོན་ཏན་ལྔ་ཕྲུག་ཉེར་གཅིག་གང་རུང་ལྡན་པ་དགོས་ཟེར་ན། སྐབས་འདིའི་མཁས་པའི་ཡོན་ཏན་ལྡན་པ་ལ་ལྔ་ཕྲུག་ཉེར་གཅིག་པོ་གང་རུང་ལྡན་མི་དགོས་ཏེ། འདུལ་བ་ཤེས་པ་ཡོད་ན་ཡོན་ཏན་ཁ་བསྡུས་ཀྱི་ལྔ་ཚན་གྱིས་ལྔ་ཕྲུགས་ཀྱི་གོ་ཆོད་པའི་ཕྱིར་ཏེ། མཚོ་ཊཱིཀ་ལས། ལྔ་ཚན་གྱི་ཡན་ལག་ཏུ་འདུལ་བ་ཤེས་པ་བགྲང་ན་ཡོན་ཏན་ཁ་བསྡུས་ཀྱི་ལྔ་ཚན་གྱིས་ཀྱང་ལྔ་ཕྲུགས་ཀྱི་གོ་ཆོད་དེ། ཞེས་གསུངས་པའི་ཕྱིར་ཟེར་ན་དཔྱད་རྒྱུ་ཅུང་ཟད་སྣང་ངོ། །ཡོན་ཏན་ཁ་སྡུད་ཀྱི་ལྔ་བ་ནི་ལྔ་ཚན་ཉེར་གཅིག་གང་ཡང་མ་ཡིན་པའི་ལྔ་ཚན་ཡིན་ཡང་དེ་ལྡན་ན་ལྔ་ཚན་ཉེར་གཅིག་གང་རུང་ལྡན་དགོས་ཏེ། དེ་ལྡན་ན་འདིར་བསྟན་བརྟན་མཁས་ཀྱི་ཡོན་ཏན་ལྡན་དགོས་ལ།དེ་ལྡན་ན་ལྔ་ཕྲུགས་ཉེར་གཅིག་གང་རུང་དང་ལྡན་དགོས། དེ་མི་ལྡན་ན་ཕན་ཡོན་གསུམ་མི་ཐོབ་པའི་ཕྱིར་ཏེ། མདོ་རྩ་ལས། འོག་ནས་འབྱུང་བ་དག་ལས་ལྷན་ཅིག་སྦྱར་བ་གང་དང་ཡང་མི་ལྡན་པས་ནི་མ་ཡིན་ནོ། །ཞེས་གསུངས་པའི་ཕྱིར་ཟེར་ན་དཔྱད་པར་བྱའོ། །