མཁས་གྲུབ་མདོ་སྔགས་བསྟན་འཛིན།
༈ མཁས་གྲུབ་མདོ་སྔགས་བསྟན་འཛིན་ནི། གཡོ་རུ་དོལ་དུ་ཡབ་སྨྱོས་རྡོ་རྗེ་ཚེ་དབང་དང་ཡུམ་བསོད་ནམས་བུ་ཁྲིད་ཀྱི་སྲས་སུ་མེ་བྱི་ལ་འཁྲུངས། རྗེ་སྣ་ཚོགས་རང་གྲོལ་གྱི་སྔོན་རབས་གསལ་བར་གསུངས་པས་མཚོན་དམ་པའི་བག་ཆགས་བཟང་པོ་སད། དགུང་ལོ་དྲུག་པ་ལ་གོང་མའི་གདན་སར་སྤྱན་དྲངས། བྲི་ཀློག་དང་ཕྲིན་སྒྲུབ་སོགས་ཀྱི་ཐུགས་སྦྱོང་ཚེགས་མེད་དུ་ཆུབ། བརྒྱད་པ་ལ་ཞྭ་དམར་དཀོན་མཆོག་འབངས་ལས་དགེ་བསྙེན་གྱི་སྡོམ་པ་ནོད། དཀོན་མཆོག་འོད་ཟེར་དུ་བཏགས། བཅུ་གསུམ་པ་ལ་རྒྱལ་དབང་བསྟན་འཛིན་
གྲགས་པ་ལས་རབ་ཏུ་བྱུང་། མདོ་སྔགས་བསྟན་འཛིན་བཟང་པོར་གསོལ། ཆོས་རྗེ་ཀུན་མཁྱེན་ཆེན་པོ་དང་། གཏེར་ཆེན་པདྨ་གླིང་པའི་ཆོས་སྐོར་ཡོངས་སུ་རྫོགས་པའི་དབང་ལུང་ཁྲིད་མན་ངག་ཕྱག་བཞེས་དང་བཅས་པ་མཐའ་རྒྱས་དང་། གཞན་ཡང་ཐུགས་སྲས་ཀུན་དགའ་གྲགས་པ། གྲུབ་ཆེན་ཀུན་དགའ་རྡོ་རྗེ། སྔགས་འཆང་ཀུན་བཟང་དཔལ་འབྱོར། རྒྱལ་སྲས་ནོར་བུ་དབང་རྒྱལ། བྱང་བདག་དབང་པོའི་སྡེ་སོགས་ལས་རྙིང་མ་དང་། ས་སྐྱ་པ་ཁྲི་ཆེན། ཞྭ་དམར་ནག་སོགས་བཤེས་གཉེན་མང་པོར་གསར་རྙིང་གི་ཆོས་བཀའ་ཇི་སྙེད་པ་སྔ་ཕྱིར་གསན། བཅོ་བརྒྱད་པ་ལ་འབྲས་ཡུལ་སྐྱེད་ཚལ་དུ་འབུམ་རམ་པ་ཐར་པ་རྒྱལ་མཚན་ལ་བསྟེན་ནས་བསྡུས་ཚད་དབུ་ཕར་འདུལ་མངོན་སྡོམ་རིག་དང་བཅས་པའི་གཞུང་ལུགས་རྣམས་ལ་ནན་ཏན་ཆེན་པོས་སྦྱངས་ཤིང་། ཆོས་གྲྭ་དེར་ལུང་རིགས་སྨྲ་བའི་འགྲན་ཟླ་མེད་པའི་མཐུན་སྣང་དུ་གྲུབ། སྒྲ་དང་སྙན་ངག་སྡེབ་སྦྱོར་གསོ་རིག་བཟོ་གནས་སོགས་ཀྱང་ལས་དེ་དང་དེ་ལ་མཁས་པའི་སློབ་དཔོན་འགའ་ཞིག་ལས་ཐུགས་སུ་ཆུད་པར་སྦྱངས་པས་མཁས་པའི་གནས་ཐོབ། དགུང་ལོ་ཉེར་ལྔ་པ་ལ་ཀརྨ་པ་དགུ་པ་མཁྱེན་པས་ཐུགས་ཕྲོགས་ཏེ། སྒར་ཆེན་གྱི་འབེལ་གཏམ་གླེང་བར་བཀས་བསྐུལ་བ་ལས་ལོ་གསུམ་དུ་མདོ་སྔགས་རིག་གནས་ལོ་རྒྱུས་དང་བཅས་པའི་གསུང་རབ་འབེལ་མཆིད་ཀྱིས་འཆད་པ་དང་། རྩོད་ངག་གིས་རྒོལ་ཞིང་ལན་འདོན་པ་སོགས་གང་ལ་ཡང་ཐོགས་པ་མེད་པའི་རྣམ་དཔྱོད་ཀྱིས་བློ་ལྡན་ཐམས་ཅད་ཀྱིས་བསྔགས་པའི་གནས་སུ་གྱུར། སྐབས་གཞན་དུ་གདན་ས་ཕན་ཚུན་དང་། མཆིམས་ཕུ། གཡའ་མ་ལུང། ལྷོ་བྲག་མཁར་ཆུ་སོགས་དབེན་གནས་དུ་མར་ཡི་དམ་ལྷའི་བསྙེན་སྒྲུབ་དང་། རང་བཞིན་རྫོགས་པ་ཆེན་པོའི་རྣལ་འབྱོར་ལ་རྩེ་གཅིག་པའི་སྒྲུབ་པ་ལོ་དང་ཟླ་བ་མང་པོར་སྦྲེལ་བ་སོགས་སྔ་ཕྱིར་མཛད་པས་བསྐྱེད་རྫོགས་ཟབ་མོའི་ཉམས་རྟོགས་མཐར་ཕྱིན། གུ་རུ་རིན་པོ་ཆེ་དང་། རྗེ་བཙུན་སྒྲོལ་མ་སོགས་ཡི་དམ་དུ་མས་ཞལ་གཟིགས་ཤིང་དབུགས་དབྱུང་བ་ཐོབ། ལྷོ་དབུས་ཀྱི་གདན་ས་རྣམས་དང། དད་པའི་ཞིང་དུ་མར་བླ་མ་དང་ཐུགས་རྗེ་ཆེན་པོ་ཞི་ཁྲོ། བཀའ་བརྒྱད་རྣམས་ཀྱི་སྒྲུབ་ཆེན་ལ་བརྟེན་ནས་
དམ་རྫས་ཀྱི་འགྲོ་ཕན་དང་། དབང་ཁྲིད་ལུང་མན་ངག་མང་པོ་དུས་དང་དུས་མེད་དུ་གསུངས་པ་ལས། རིགས་སྲས་གསང་བདག་ཆེན་པོ་དང་། རྫོགས་ཆེན་པ་ནམ་མཁའ་འབྲུག་སྒྲ། མངའ་བདག་བསྟན་འཛིན་ཆོས་བཟང་། སྤ་གྲོ་བ་ཆོས་དབང་ལྷུན་གྲུབ། སྤོ་བོ་རྦ་ཁ་སྐུ་སྐྱེ་རིག་འཛིན་རྒྱ་མཚོ། མང་ཐོས་དམ་ཆོས་བཟང་པོ་སོགས་བཀའ་སྲོལ་སྐྱོང་བ་དུ་མ་དང་། ལུང་རིགས་སྨྲ་བའི་སྟོན་ཆེན། ཐ་སྙད་འཛིན་པའི་མཁས་པ། སྒོམ་ཉམས་ཅན་གྱི་རྣལ་འབྱོར་ཕོ་མོ་སོགས་དམ་པའི་ཆོས་ཀྱིས་བསྡུས་པའི་བུ་སློབ་དབུས་གཙང་ལྷོ་མོན་གྱི་ཕྱོགས་ཐམས་ཅད་ཁྱབ་པ་དང་། ས་སྐྱོང་སྐུ་རབ་པ་དང་། བྱ་ས་ཁྲི་དཔོན་འཕྱོངས་རྒྱས་སྟག་རྩེ་བ། ཡར་ཀླུང་ཕོ་བྲང་པ་སོགས་རིགས་དང་ལོངས་སྤྱོད་ཀྱིས་མཐོ་བས་མཚོན་ཡོན་བདག་དུ་མས་དད་པས་བསྙེན་བཀུར། དབང་ཆོས་དང་ཕྲིན་ལས་བཞིའི་ཡུལ་གང་ལ་གང་འཇུག་པ་དེས་ལས་འབྲས་དོན་ལྡན་གྱིས་རེ་བ་བསྐངས། ལྐོག་གྱུར་གྱི་གནས་ལུང་དུ་བསྟན་པ་རྣམས་ཀྱང་ཇི་ལྟ་བ་བཞིན་མངོན་དུ་གྱུར་པས་བླང་དོར་གྱི་དམིགས་ཕྱེ། ལྷོ་བྲག་བཀྲ་ཤིས་སྒང་གི་རི་བོར་དང་ཚུགས་ཅན་གྱི་འདུས་སྡེ་བཏབ་པ་ཡང་རེ་ཞིག་གནས། བྱང་ཆུབ་གླིང་དུ་རྫོགས་ཆེན་བླ་བརྒྱུད་ཀྱི་སྣང་བརྙན་ངོ་མཚར་བའི་འབུར་སྐུ་དང་། ཐུབ་པ་གནས་བཅུ་དང་། སྒྲུབ་སྡེ་དགུ། མཚན་བརྒྱད་སོགས་བྲིས་ཐང་མང་པོ་དང་། འདུལ་བ་ལུང་སོགས་བཀའ་བསྟན་གྱི་གླེགས་བམ་ཇི་སྙེད་པ་བཞེངས་ཤིང་། ཆོས་འཁོར་བསམ་ཡས་དང་། ལྷ་ས་ལ་སོགས་པར་སྔ་ཕྱིར་མར་མེ་སོགས་མཆོད་འབུལ་སྨོན་ལམ་དང་བཤད་སྒྲུབ་ཀྱི་འདུས་སྡེ་མང་པོར་ཚོགས་གསོག་གི་ཡོ་བྱད་དུ་མས་བསྙེན་བཀུར་བས་མཚོན་སྐུ་གསུང་ཐུགས་ཀྱི་ཕྲིན་ལས་འཁོར་ལོ་གསུམ་གྱི་འཇུག་པ་ཅི་རིགས་པ་ལས་ནམ་ཡང་མི་གཡེལ་བས་བསྟན་པ་དང་འགྲོ་བའི་དོན་རྒྱ་ཆེན་པོ་མཛད་ནས། དགུང་ལོ་ང་གསུམ་པ་ས་ཕོ་འབྲུག་གི་ལོའི་བར་གྱི་རྣམ་ཐར་ཞལ་གསུང་མའི་མཐར། ཁྱད་པར་བརྒྱུད་འཛིན་བུ་ལ་དབང་ལུང་དང་། །མན་ངག་ཁྲིད་ལུང་མང་པོ་བར་མེད་བཤད། །གསང་ཆེན་བསྟན་པ་འཛིན་པའི་རྟེན་འབྲེལ་བསྒྲིགས། །ད་ནི་བྱ་བ་ཟིན་གྱིས་འགྱོད་པ་མེད། །འཆི་བར་དགའ་བའི་མདོ་སྔགས་བསྟན་
འཛིན་ང་། །གདོད་མའི་ས་ལ་གཏན་སྲིད་འཛིན་དུ་འགྲོ། །ཞེས་སོགས་ཀྱིས་དོན་བསྡུས་ཞལ་གདམས་སུ་མཛད་ནས་ཟླ་བ་གསུམ་འདས་པ་ཆུ་ཟླའི་ཚེས་བཞི་ལ་དར་རྒྱས་ཆོས་སྡིངས་སུ་སྤྲུལ་པའི་དཀྱིལ་འཁོར་ངོ་མཚར་བའི་ལྟས་དང་བཅས་པ་བསྡུས་ཤིང་དགོངས་པ་སྐོང་བའི་མཆོད་འབུལ་ཕྱི་ནང་གི་རྟེན་བཞེངས་ཕྲིན་ལས་མི་ཉམས་པའི་རྒྱུན་སྐྱོང་བ་རྣམས་རིགས་སྲས་གསང་བདག་ཆེན་པོས་མཛད་དོ། །