གསུམ་པ་བསམ་གཏན་གྱི་ཡན་ལག་བཤད་པ།
གསུམ་པ་བསམ་གཏན་གྱི་ཡན་ལག་བཤད་པ་ལ།
མཛོད་ལས། དང་པོ་ལ་ལྔ་རྟོག་དཔྱོད་དང༌། །དགའ་དང་བདེ་དང་ཏིང་འཛིན་རྣམས། །ཞེས་གསུངས་པ་ལྟར་བསམ་གཏན་དང་པོ་ལ་ཡན་ལག་ལྔ་ལས་༡རྟོག་༢དཔྱོད་གཉིས་ཀྱིས་བསམ་གཏན་དང་པོའི་མི་མཐུན་ཕྱོགས་འདོད་པའི་འདོད་ཆགས་དང་གནོད་སེམས་དང་འཚེ་བའི་རྟོག་པ་དང་སྡུག་བསྔལ་དང་ཡིད་མི་བདེ་སོགས་སྤོང་བར་བྱེད་པས་ན་དེ་གཉིས་གཉེན་པོའི་ཡན་ལག་དང༌། ༣དགའ་༤བདེ་གཉིས་ཕན་ཡོན་གྱི་ཡན་ལག་དང༌། ༥རྩེ་གཅིག་པ་གནས་ཀྱི་ཡན་ལག་ཡིན་ཏེ། དེ་ལ་བརྟེན་ནས་རྟོག་དཔྱོད་སོགས་གཉེན་པོ་འཇུག་ཅིང་ཕན་ཡོན་དགའ་བདེ་འབྱུང་བས་སོ། །བསམ་གཏན་གཉིས་པ་ལ། མཛོད་ལས། གཉིས་པ་ལ་ནི་ཡན་ལག་བཞི། །རབ་དང་དང་ནི་དགའ་ལ་སོགས། །ཞེས་གསུངས་པ་ལྟར་ཡན་ལག་བཞི་ཡོད་དེ།༡ནང་ཡོངས་སུ་དང་བས་རྟོག་དཔྱོད་སྤོང་བར་བྱེད་པས་དེ་ནི་གཉེན་པོའི་ཡན་ལག ༢དགའ་༣བདེ་གཉིས་ཕན་ཡོན་གྱི་ཡན་ལག ༤རྩེ་གཅིག་པ་གནས་ཀྱི་ཡན་ལག་ཡིན་ནོ། །བསམ་གཏན་གསུམ་པ་ལ། མཛོད་ལས། གསུམ་པ་ལ་ལྔ་བཏང་སྙོམས་དང༌། །དྲན་དང་ཤེས་བཞིན་བདེ་དང་གནས། །ཞེས་གསུངས་པ་ལྟར་ཡན་ལག་ལྔ་ཡོད་དེ། དྲན་ཤེས་བཞིན་བཏང་སྙོམས་གསུམ་གྱིས་དགའ་བ་སྤོང་བར་བྱེད་པས་ན་དེ་གསུམ་གཉེན་པོའི་ཡན་ལག་དང༌། བདེ་བ་ཕན་ཡོན་གྱི་ཡན་ལག ཏིང་ངེ་འཛིན་ནམ་རྩེ་གཅིག་པ་གནས་ཀྱི་ཡན་ལག་ཡིན་ནོ། །བསམ་གཏན་བཞི་བ་ལ། མཛོད་ལས། མཐའ་ན་བཞི་དྲན་བཏང་སྙོམས་དང༌། །བདེ་མིན་སྡུག་མིན་ཏིང་འཛིན་རྣམས། །ཞེས་གསུངས་པ་ལྟར་ཡན་ལག་བཞི་ཡོད་དེ། དྲན་པ་དང་བཏང་སྙོམས་ཀྱིས་བདེ་བ་སྤོང་བར་བྱེད་པས་དེ་གཉིས་ནི་གཡོ་བའི་སྐྱོན་བརྒྱད་ཀྱི་ཡོངས་སུ་དག་པ་གཉེན་པོའི་ཡན་ལག་དང༌། ཚོར་བ་བཏང་སྙོམས་ཕན་ཡོན་གྱི་ཡན་ལག རྩེ་གཅིག་པ་གནས་ཀྱི་ཡན་ལག་ཡིན་ནོ། །འདིར་གསུམ་པ་དང་བཞི་བའི་གཉེན་པོའི་ཡན་ལག་བཏང་སྙོམས་ནི། སེམས་བྱུང་འདུ་བྱེད་ཀྱི་བཏང་སྙོམས་ཡིན་ལ། སྤྱིར་བཏང་སྙོམས་ལ། འདུ་བྱེད། ཚོར་བ། ཚད་མེད་ཀྱི་གསུམ་ཡོད་དོ། །བསྡུ་བར། བསམ་གཏན་དང་པོ་ལ་དྲན་ཤེས་བཞིན་བཏང་སྙོམས་གསུམ་ཡོད་ཀྱང་རྟོག་དཔྱོད་ཀྱིས་བསྒྲིབས་པས་མ་སྨོས་སོ། །གཉིས་པ་ལའང་ཡོད་ཀྱང་དགའ་བའི་ཉོན་མོངས་པས་ཀུན་ནས་དཀྲིས་པས་མ་སྨོས་པར་ནང་ཡོངས་སུ་དང་བའི་མིང་གིས་བསྟན། གསུམ་པར་རྟོག་དཔྱོད་དགའ་བ་དེ་དག་དང་བྲལ་བས་རང་མིང་གིས་སྨོས་སོ། །ཞེས་སོ། །གཟུགས་མེད་རྣམས་ཡན་ལག་མི་འདྲ་བས་འདའ་བ་མིན་ཏེ། ཐམས་ཅད་ཡན་ལག་བཏང་སྙོམས་དང་རྩེ་གཅིག་པར་འདྲ་བས་སོ། །འོན་ཀྱང་དམིགས་པ་ལས་ཡང་དག་པར་འདའ་བ་ཡིན་ལ་ཞི་རགས་ཀྱི་ཁྱད་ཡོད་དེ། རས་ཡུག་ཆུ་ཞེང་མཉམ་ཡང་སྦོམ་ཕྲའི་ཁྱད་ཡོད་པ་བཞིན་ནོ། །ཞེས་ཨཱརྱའོ། །ཞེས་ཉ་ཊཱིཀ་ལས་གསུངས་སོ། །ཡན་ལག་དེ་དག་གྲངས་ངེས་པའི་རྒྱུ་མཚན་ནི། ཀུན་བཏུས་ས་འགྲེལ་ལས། གྲངས་ངེས་པའི་རྒྱུ་མཚན་ནི། དེ་རྣམས་ལ་སེམས་སེམས་བྱུང་གཞན་ཡང་མང་བོ་ཡོད་བཞིན་དུ་དེ་དག་ཁོ་ན་ཡན་ལག་ཏུ་འཇོག་པ་ནི་རང་རང་གི་མི་མཐུན་ཕྱོགས་སྤོང་བ་གཉེན་པོའི་ཡན་ལག་དང༌། ལུས་སེམས་ལ་ཕན་འདོགས་པ་ཕན་ཡོན་གྱི་ཡན་ལག་དང༌། དེ་དག་གང་ལས་འབྱུང་བའི་གཞིའམ་རྟེན་དུ་གྱུར་པ་དེ་གཉིས་ཀའི་གནས་ཀྱི་རང་བཞིན་གྱི་ཡན་ལག་རྣམས་བཅོ་བརྒྱད་པོ་དེ་དག་གིས་ཡོངས་སུ་རྫོགས་པའི་ཕྱིར་རོ། །གཟུགས་མེད་ཀྱི་དམིགས་བསལ་ནི། མཛོད་དུ་རབ་ཏུ་དང་བ་དད་པ་ཡིན་པས་རྫས་སུ་བཅུ་གཅིག་ཅེས་ནང་དང་བ་དད་པ་བྱས་ནས་རྫས་བཅུ་གཅིག་ཏུ་འཆད་ཀྱང༌། འདིར་ནང་དང་བ་དྲན་ཤེས་བཞིན་བཏང་སྙོམས་ཡིན་ལ་དེ་དང་པོར་ཡོད་ཀྱང་རྟོག་དཔྱོད་ཀྱི་སྒོས་བསྒྲིབས་པས་མ་སྨོས། གཉིས་པར་དགའ་བའི་ཀུན་ནས་དཀྲིས་པས་རང་མིང་གིས་མ་སྨོས། གསུམ་པར་དེ་དང་བྲལ་བས་རང་མིང་གིས་སྨོས་པར་བཤད་པས་རྫས་བཅུ་གཅིག་མེད་དོ། །ཅིའི་ཕྱིར་བསམ་གཏན་གསུམ་པ་ན་ཡོད་པའི་བདེ་བ་རྫས་གཞན་དུ་བརྗོད་ཅེ་ན། འདི་ལྟར། དེའི་བདེ་བ་ནི་ཚོར་བ་ཡིན་ལ། བསམ་གཏན་དང་པོ་གཉིས་པ་ན་ནི་ཤིན་ཏུ་སྦྱངས་པ་ལ་བདེ་བ་ཞེས་བཤད་དོ། །སྙོམས་པར་འཇུག་པའི་བསམ་གཏན་གཉིས་ན་བདེ་བའི་དབང་བོ་མི་ལྡན་པའི་ཕྱིར་ཏེ། དེ་གཉིས་དེ་ལུས་ཀྱི་ཡིན་པར་ནི་མི་རུང་སྟེ། སྙོམས་པར་ཞུགས་པ་ལ་རྣམ་པར་ཤེས་པ་ཚོགས་ལྔ་མེད་པའི་ཕྱིར་རོ། །སེམས་ཀྱི་ཡང་མིན་ཏེ་དགའ་ཞེས་འབྱུང་བའི་ཕྱིར་རོ། །དགའ་བ་ནི་བདེ་བ་ཡིན་ན་དེ་གཉིས་གཅིག་ཅར་འབྱུང་བ་ནི་མེད་དོ། །ཞེས་རང་འགྲེལ་དུའོ། །ཆ་ཤས་སམ་རོ་དུ་མ་ཚོགས་པ་ལ་ཡན་ལག་རྣམ་པར་འཇོག་ནུས་པ་ཡིན་པ་ལ་གཟུགས་མེད་པ་བཞི་པོ་རྣམས་ན་ནི་ཐམས་ཅད་ཀྱང་ཞི་གནས་སུ་རོ་གཅིག་པ་ཉིད་ཀྱི་ཕྱིར་ཡན་ལག་མི་འདྲ་བ་རྣམ་པར་གཞག་པ་ནི་མེད་དོ། །འོན་ཀྱང་དེ་དག་དམིགས་པ་ཐ་དད་ལས་འཇོག་སྟེ། ནམ་མཁའ་མཐའ་ཡས་སོ་རྣམ་ཤེས་མཐའ་ཡས་སོ་ཅི་ཡང་མེད་དོ་འདུ་ཤེས་གསལ་བ་ནི་མེད་ཅིང་མི་གསལ་བ་ནི་མེད་པ་ཡང་མིན་ནོ་ཞེས་འཇུག་པས་སོ། །ཞེས་གསུངས་སོ། །