དྲུག་པ་ཕན་ཡོན་གསུམ་འབྱུང་བ་ལ་ཡོན་ཏན་མཚན་ཉིད་དང་ལྡན་པ་དགོས་སམ་ཆ་ཙམ་གྱིས་འགྲུབ་པ་གང་ཡིན།

དྲུག་པ་ཕན་ཡོན་གསུམ་འབྱུང་བ་ལ་ཡོན་ཏན་མཚན་ཉིད་དང་ལྡན་པ་དགོས་སམ་ཆ་ཙམ་གྱིས་འགྲུབ་པ་གང་ཡིན་ཞེ་ན།

ཡོན་ཏན་ཆ་ཙམ་གྱིས་མི་འགྲུབ་སྟེ། ལུང་གཞི་ལས། བསྙེན་པར་རྫོགས་ནས་ལོ་དགུ་ལོན་པས་ཀྱང་རབ་ཏུ་དབྱུང་བར་མི་བྱ། བསྙེན་པར་རྫོགས་པར་མི་བྱ་ཞེས་མཁན་པོ་མི་བྱ་བ་ཉིད་དུ་གསུངས་པ་དང༌། མེ་ཏོག་ཕྲེང་རྒྱུད་ལས། ལོ་བཅུ་ཡང་དག་རྫོགས་པ་ཡི། །དགེ་སློང་ཀུན་སྡོམ་བདག་ཉིད་ཅན། །གསལ་ཞིང་ཀུན་སྤྱོད་རིག་པ་ཡིས། །རབ་བྱུང་དང་ནི་བསྙེན་རྫོགས་བྱ། །ཞེས་ལོ་བཅུ་རྫོགས་དགོས་པར་གསུངས་པས་སོ། །ཡོན་ཏན་ཆ་ཙམ་གྱིས་འགྲུབ་ན། བསྙེན་པར་རྫོགས་ནས་ཞག་གཅིག་ལོན་ཞིང་སོ་ཤིང་དབེན་པར་དོར་ཞེས་པ་དེ་ཙམ་ཤེས་པས་ཀྱང་མཁན་པོ་བྱར་རུང་བར་ཐལ། བསྙེན་པར་རྫོགས་ནས་ལོ་བཅུ་ལོན་པའི་ཆ་ཙམ་དང༌། འདུལ་བ་ཤེས་པའི་ཆ་ཙམ་ཞིག་ཡོད་པའི་ཕྱིར་རོ། །འདོད་ན། རྩ་བར། ལྷན་ཅིག་སྦྱར་བ་གང་དང་ཡང་མི་ལྡན་པས་ནི་མ་ཡིན་ནོ། །ཞེས་གསུངས་པ་དང་འགལ་བས་སོ། ། བདུན་པ་ཕན་ཡོན་གསུམ་འབྱུང་བ་ལ་ལྔ་ཚན་ཉི་ཤུ་རྩ་གཅིག་པོ་ཐམས་ཅད་ལྡན་དགོས་སམ་གང་རུང་གཅིག་གིས་འགྲུབ་དགོས་པའི་དོན་ཟེར་ན་མཚོ་ཊིཀ་༡༡༦ལས། བསྙེན་པར་རྫོགས་ནས་བར་མ་ཆད་པར་ལོ་བཅུ་ལོན་ཞིང་དེའི་སྡོམ་པ་དག་པ་གཞི་མར་བྱས་ནས། ལྔ་ཚན་གང་རུང་གཅིག་དང་ལྡན་ན་དེས་ཕན་ཡོན་གསུམ་འཐོབ་སྟེ། ཊཱི་ཀ་ལས། ལྷན་ཅིག་སྦྱར་བ་གཅིག་དང་ལྡན་ཞིང་ལོ་བཅུ་ལོན་པ་ཡང་ཡིན་ན། དེས་ནི་མཁན་པོ་ཉིད་དང་གནས་ཉིད་དང་མི་གནས་པར་འདུག་པར་ཡང་བྱའོ། །ཞེས་པ་དང༌། མཁན་པོ་བྱེད་པ་ལ་ལྔ་ཚན་ཉི་ཤུ་རྩ་གཅིག་པོ་ཐམས་ཅད་ལྡན་དགོས་ན་མཁན་པོ་མཚན་ཉིད་དང་ལྡན་པ་མི་སྲིད་པར་ཐལ་བར་འགྱུར་ཏེ། གང་ཟག་གཅིག་ལ་དུས་གཅིག་ཏུ་ལྔ་ཚན་ཉི་ཤུ་རྩ་གཅིག་པོ་ཐམས་ཅད་ལྡན་པ་མི་སྲིད་པའི་ཕྱིར་ཏེ། འདུལ་བ་འབའ་ཞིག་ཤེས་པའི་ལྔ་ཚན་ཡིན་པ་དང་སྡེ་སྣོད་གསུམ་ཤེས་པའི་ལྔ་ཚན་ཡིན་པ་འགལ་བའི་ཕྱིར་དང༌། སློབ་པ་ཉིད་ཡིན་པ་དང་མི་སློབ་པ་ཉིད་ཡིན་པ་འགལ་བའི་ཕྱིར་རོ། །ཞེས་གསུངས་མོད་འདུལ་བ་ལས་སྡེ་སྣོད་གཞན་གཉིས་ཤེས་པ་ཡན་ལག་ཏུ་མི་དགོས་པའི་ལྔ་ཚན་ལ་འདུལ་བ་འབའ་ཞིག་ཤེས་པ་མི་དགོས་སམ་དཔྱད་པར་བྱའོ། །

གཉིས་པ་གནས་པ་ལ་གནས་པའི་ཚུལ་གྱིས་བསྲུང་བ་ལ།

གནས་སུ་གཟུང་བའི་ཚུལ་ནི། རྩ་བར། གང་ཡང་རུང་བ་ལ་མི་བྱའོ། །ཞེས་པ་ལ་སོགས་པའོ། །འདིའི་དོན་ལ་བརྒྱད་ལས།དང་པོ་དགོས་པའི་དོན་ནི་བཞི་སྟེ། གནས་པའི་བསླབ་པ་བརྟན་ཞིང་དགེ་བ་འཕེལ་བར་འགྱུར་བ་དང༌། གནས་མེད་ཀྱི་ཉེས་པ་མི་འབྱུང་བ་དང༌། ཁྲེལ་ཡོད་ཀྱི་བསམ་པ་སྐྱེ་བ་དང༌། བྱ་བ་ཡིན་མིན་ཤེས་པར་འགྱུར་བའོ། །

གཉིས་པ་ཡུལ་གང་ལ་གནས་སུ་གཟུང་བ་ནི།

གནས་ཀྱི་སློབ་དཔོན་དུ་འོས་ཤིང་རང་གི་གནས་ཀྱི་བླ་མར་གྱུར་ཟིན་པ་དང་འབྲེལ་བ་མ་ཡིན་པ་ལ་གནས་སུ་བཟུང་སྟེ། དེ་འོས་པའི་མཚན་ཉིད་སྔར་བཤད་ཟིན་ཏོ། །འོད་ལྡན་ལས། ཚུལ་དེ་ལྟ་བུའི་བླ་མ་ལ་བརྟེན་ན་མཚོ་ཆེན་པོའི་པདྨ་བཞིན་དུ་ཆོས་དགེ་བ་རྣམས་འཕེལ་བར་འགྱུར་རོ། །མཚན་ཉིད་དེ་དག་མ་ཚང་བ་ལ་གནས་པ་ནི་ཞིང་ཚྭ་སྒོ་ཅན་ལ་ས་བོན་བཏབ་པ་དང་འདྲ་སྟེ་གནོད་པ་ལ་བརྟེན་པར་འགྱུར་རོ། །ཞེས་སོ། །ལུང་གཅིག་ལ་འཕྲོས་པ་ལས། མཁན་པོ་རྣམ་པ་བཞི་སྟེ། ཆོས་ཀྱིས་སྡུད། ཟང་ཟིང་གིས་སྡུད། གཉིས་ཀས་སྡུད། གཉིས་ཀས་མི་སྡུད་པའོ། །དང་པོ་ལ་ནི་ཤེས་པར་བྱ་སྟེ་གནས་པར་བྱའོ། །གཉིས་པ་ལ་ནི་བལྟས་ཏེ་འགྲོ་བར་བྱ། གསུམ་པ་ལ་ནི་བརྒྱ་པའམ་ཞིག་ཟིན་ཀྱང༌། ནམ་འཚོའི་བར་དུ་གནས་པར་གྱིས་ཤིག །བཞི་པ་ལ་ནི་མ་འགྲོ་ཞེས་བསྒོ་ཡང་མི་བལྟ་བར་འགྲོ་བར་བྱའོ། །ཞེས་གསུངས་སོ། །

གསུམ་པ་རྟེན་གང་གིས་གནས་སུ་གཟུང་བ་ནི།

གནས་པ་སློབ་མར་འོས་པས་གནས་སུ་གཟུང་སྟེ། དེའི་མཚན་ཉིད་སྔར་བཤད་ཟིན་ཏོ། །

བཞི་པ་ཚུལ་ཇི་ལྟར་གནས་སུ་གཟུང་བ་ནི།

སྦྱོར་དངོས་མཇུག་གསུམ་ལས། སྦྱོར་བའི་དུས་སུ་གཉིས་ཀས་ཕན་ཚུན་མཚན་ཉིད་དང་ལྡན་ནམ་མི་ལྡན་བརྟག་པར་བྱ་སྟེ། དྲི་བ་ལ་སོགས་པས་ཚུལ་ཁྲིམས་དང༌། ཞེས་པ་དང༌། ཡོངས་སུ་བརྟགས་ནས་སྦྱིན་ནོ་ཞེས་པའོ། །དེ་ནས་ཞུ་བ་པོས་ཕྱག་འཚལ་ཞིང་སྤྱོད་ལམ་བསྟེན་པའོ། །དངོས་གཞི་ནི་སྔགས་ལན་གསུམ་གྱིས་སོ། །མཇུག་གི་ཆོ་ག་ཐབས་ཡིན་ནོ་ལེགས་སོ་ཞེས་པའོ། །ལྔ་པ་ཕན་ཚུན་བསམ་པ་ཇི་ལྟར་བསྐྱེད་པ་ནི། རྩ་བར། བུ་དང་ཕའི་འདུ་ཤེས་དག་བསྐྱེད་པར་བྱའོ། །ཞེས་སོ། །ལུང་མ་མོ་ལས་ནི། མཁན་པོ་དང་སློབ་དཔོན་ལ་སྟོན་པའོ་སྙམ་དུ་འདུ་ཤེས་མངོན་དུ་བཞག་པར་བྱ། ཞེས་གསུངས་སོ། །དྲུག་པ་གནས་ལ་བསྙེན་བཀུར་ཇི་ལྟར་བྱ་བ་ནི་ལྷུང་བཟེད་དང་ཆོས་གོས་ཀྱི་ལས་དང་ནད་གཡོག་དང་ཞེས་སྔར་བསྟན་པ་དང་མཐོང་མ་ཐག་ཏུ་སྟན་ལས་ལྡང་བར་བྱའོ་ཞེས་པ་ལ་སོགས་པའོ། །

བདུན་པ་འཇིག་པའི་རྒྱུ་ནི་གཉིས་ཏེ། བྱ་བ་བྱེད་པའི་འཇིག་རྒྱུ་དང༌། གསོལ་བ་བཏབ་པའི་འཇིག་རྒྱུའོ། །

དང་པོ་ལ་གཉིས་ཏེ། གནས་གཞན་འདོད་པ་མངོན་དུ་གྱུར་པ་དང༌། གནས་དང་གནས་པ་མཚམས་ཐ་དད་ན་གནས་པའོ། །དེ་ཡང་རྩ་བར། མཁན་པོ་མ་ཡིན་པ་དག་འཚོགས་ན་འདོད་པས་འཇུག་པར་བྱའོ། །ཞེས་དང༌། མཚམས་གཞན་ན་གནས་པ། ཞེས་པས་གྲུབ་སྟེ་གོ་རིམ་བཞིན་ནོ། །གཉིས་པ་ལ་གཉིས་ཏེ། གཉིས་ཀ་ལ་མི་ལྟོས་པའི་བསམ་པ་བྱུང་བ་དང༌། གནས་དང་གནས་པ་ཞིང་མ་ཡིན་པར་གྱུར་པའོ། །དེ་ཡང་གཉིས་ཀ་ལ་མི་ལྟོས་པ་ཉིད་བྱུང་བ་ན། ཞེས་པ་དང༌། འདི་ལ་ཆོ་ག་རྣམས་གྱུར་ཏོ་ཞེས་པས་གྲུབ་སྟེ་གོ་རིམ་བཞིན་ནོ། །བརྒྱད་པ་དམིགས་ཀྱིས་བསལ་བ་ནི། བཅུ་ཡོད་དེ། ལོ་ལྔ་ལོན་ཞིང་ལྷན་ཅིག་སྦྱར་བ་ཐ་མ་དང་ལྡན་པ་ལྗོངས་རྒྱུ་བའི་དུས་དང༌། དབྱར་ཕྱི་མ་ཁས་བླངས་པ་ཟླ་བ་དང་པོ་གཉིས་ཀྱི་དུས་དང༌། གནས་ཀྱི་བླ་མ་ས་གཞན་གནས་པའི་དུས་དང་གནས་ཡོངས་སུ་འཚོལ་བ་ལ་ཞུགས་པ་མ་རྙེད་པ་ཞག་ལྔའི་དུས་དང༌། གློ་བུར་དུ་འོངས་པ་ཉི་མ་དང་པོའམ་གཉིས་པ་ལ་ངལ་གསོ་བའི་དུས་དང༌། ཞག་གཅིག་གནས་གཞན་དུ་ཕྱིན་པ་དང་དྲུག་དངོས་སུ་གསུངས་ལ། དབྱར་སྔ་མ་ཁས་བླངས་ནས་ཟླ་བ་དབུས་མ་བསྲུང་བ་དང༌། དགེ་འདུན་གྱི་གནས་ནས་ཕྱུང་བ་ན་གནས་མེད་ཀྱི་ཉེས་པ་མི་འབྱུང་བ་ཡིན་ཏེ། དེ་ལ་གནས་སྦྱིན་པར་བྱེད་ན་སྤངས་པ་རྗེས་ཕྱོགས་ཀྱི་ལྟུང་བར་འགྱུར་བས་དེ་ལ་གནས་པར་བྱ་བའི་ཡུལ་མེད་པའི་ཕྱིར་རོ། །ཡུལ་མེད་ཀྱང་གནས་བརྟེན་དགོས་ན་སྒྲུབ་པར་མི་ནུས་པ་ལ་བཅས་པ་མཛད་པར་ཐལ་བར་འགྱུར་རོ། །བླ་མས་གནས་བཀག་པ་དང༌། དེ་དག་དང་རྒྱུ་མཚན་མཚུངས་པའི་མདོར་བསྡུས་གཅིག་དང་བཅུའོ། །རྣམ་འགྲེལ་ལས་ཀྱང༌། འཇིག་པ་ལ་ནི་རྒྱུ་མེད་ཕྱིར། །འཇིག་པ་རྒྱུ་ལྡན་སྨྲ་རྣམས་ཀྱི། །འཇིག་པའི་རྒྱུ་ནི་ཐམས་ཅད་དག །འཁྲུལ་བ་ཉིད་དུ་བཤད་པ་ཡིན། །ཞེས་གསུངས་སོ་ཞེ་ན། གཞུང་དེ་དག་ནི་དངོས་པོའི་རང་རྒྱུ་མ་གཏོགས་པ་འཇིག་པའི་རྒྱུ་གཞན་མེད་པ་ལ་དགོངས་སོ་ཞེས་རིགས་པའི་ཚུལ་ཡིན་ནོ། ། སྐབས་འདི་ཉིད་ཀྱི་ལུང་ཕྲན་ཚེགས་ལས། སློབ་དཔོན་གྱིས་ཀྱང་བསམ་པས་བཏང་ལ་ཉེ་གནས་ཀྱིས་ཀྱང་བསམ་པས་བཏང་ན་གནས་བཅས་པ་ཞིག་པ་ཞེས་བརྗོད་པར་བྱའོ། །ཞེས་གསུངས་ལ། ཊཱི་ཀ་ལས། གནས་དང་གནས་པ་གཉིས་ཀ་མི་ལྟོས་པ་ཉིད་དུ་གྱུར་ན་དེའི་ཚེ་ན་གནས་ཞིག་པར་རིག་པར་བྱའོ། །ཞེས་དང༌། འགྲེལ་ཆུང་ལས་ཀྱང༌། གནས་བརྟན་དང་སློབ་མས་ཀྱང་ཡོངས་སུ་བཏང་བར་བསམས་ན་གནས་ཞིག་སྟེ་མེད་པར་གྱུར་ཅེས་བཤད་དོ། །མི་ལྟོས་པ་ཉིད་དེ་ནི་ཇི་ལྟ་བུ་ཞེ་ན། བྱུང་སྟེ་མི་ལྟོས་པ། ཕྲན་ཚེགས་འགྲེལ་བ་ལས། ཉེ་གནས་ལྟོས་པ་མེད་ན། ཞེས་བྱ་བ་ནི། ཉེ་གནས་དེ་འདི་སྙམ་དུ་བདག་ནི་ལྗོངས་རྒྱུར་འགྲོ་བར་བྱ་ཞིང་དེར་སོང་ནས་ཁོ་བོ་གདོན་མི་ཟ་བར་སློབ་དཔོན་གཞན་ལ་གནས་དགོས་པ་ཡིན་ནོ། །ཞེས་བྱ་བའི་བསམ་པ་འདིས་དེ་ལྟར་ན་དེ་ལ་ལྟོས་པ་མེད་པ་ཡིན་ནོ་ཞེས་པ་དང༌། ཡང་དེ་ཉིད་ལས། སློབ་དཔོན་ལྟོས་པ་མེད་པར་གྱུར་ཏེ། ཁོ་བོ་གཙུག་ལག་ཁང་གཞན་དུ་གནས་པའི་ཕྱིར་འགྲོ་བར་བྱའོ་སྙམ་པ་ལ། ཉེ་གནས་ཀྱིས་ཀྱང་ཤེས་ཏེ་ཁོ་བོའི་སློབ་དཔོན་ངེས་པར་གཙུག་ལག་ཁང་གཞན་དུ་འགྲོ་འདོད་པས། བདག་ཀྱང་གཞན་ལ་གནས་པར་བྱའོ་སྙམ་པ་དེའི་ཚེ་གཉིས་ཀ་ལྟོས་པ་མེད་པར་གྱུར་པ་ཡིན་པས། ཞེས་གསུངས་སོ། །དཔོན་སློབ་གཉིས་ཀ་ལ་མི་ལྟོས་པ་ཉིད་བྱུང་སྟེ་གནས་བཅས་པ་ཞིག་པར་གྱུར་པ་ན། ཕྲན་ཚེགས་འགྲེལ་བ་ལས། གནས་མ་བཟུང་བ་དེ་སྲིད་དུ་དེ་ལ་སློབ་དཔོན་ཞེས་བྱ་བའི་སྒྲས་བརྗོད་པར་མི་བྱའོ་ཞེ་ན། མ་ཡིན་ཏེ་གཉིས་ཀ་ལ་ལྟོས་པ་མེད་པར་གྱུར་པ་ལས་གནས་འཇིག་པར་གྱུར་པ་བཞིན་དུ་སློབ་དཔོན་ཉིད་ཀྱང་ལྡོག་པར་ནི་བཅོམ་ལྡན་འདས་ཀྱིས་མ་གསུངས་ལ། འདི་ལ་རིགས་པ་ཅུང་ཟད་ཀྱང་མེད་པ་དེ་བས་ན་འདི་ལ་ཉེས་པ་ཡོད་པ་མ་ཡིན་ནོ། །ཞེས་གསུངས་སོ། །