གཉིས་པ། ཡོ་བྱད་ཀྱི་སྐོར།
༡ གཎྜི།
༡ གཎྜི་ཐོག་མར་བྱུང་བའི་ཁུངས་ནི། སྟོན་པ་ལ་རྒྱལ་བོ་གསལ་རྒྱལ་གྱིས་རྩོད་དུས་སུ་ཉོན་མོངས་པ་དང་ལས་ངན་སྣ་ཚོགས། འཐབ་རྩོད་རྣམས་ཞི་བ་ལ། ཕན་པ་འབྱུང་བའི་ཐབས་ཞིག་བསྟན་ཏུ་གསོལ་ཞེས་ཞུས་པས། སངས་རྒྱས་སྒྲ་སྒྲོགས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་བཞུགས་ནས། ངན་སོང་གསུམ་གྱི་སྡུག་བསྔལ་ཆད་པར་བྱས་ཤིང་། ཡུམ་ཆེན་མོ་གཎྜི་གཟུགས་ཀྱི་རྣམ་པའི་སེམས་ཅན་ཐམས་ཅད་ཀྱི་ཉོན་མོངས་དང་འཐབ་རྩོད་ཞི་བ་དང་། ཚེ་བསོད་ཡོན་ཏན་འཕེལ་བ། སྒྲ་ཐོས་པའི་སྤྲོ་བ་བསྐྱེད་པ། ཡུམ་ཤེས་རབ་གྱི་ཕ་རོལ་ཏུ་ཕྱིན་པ་གཎྜིའི་གཟུགས་ཀྱིས་བཞུགས་སོ། །ཞེས་གཎྜིའི་མདོའི་ལྒིང་གཞི་ལས་གསུངས་པ་ལྟར་རོ། །
གཎྜི་ནི་ཆོས་སྡེ་རྣམས་སུ། དགེ་འདུན་ལ་ཚོགས་བརྡ་གཏོང་བྱེད་དེ། རིང་ཐུང་འདོམ་གང་ལྷག་ཙམ། དབྱིབས་ཟུར་བརྒྱད་པ། རྡུང་བྱེད་མགོ་མཇུག་སྦོམ་ཞིང་། དཀྱིལ་ཕྲ་བ། ཤིང་རིགས་སྣ་བཅུ་དྲུག་ལས་བཟོས་པ་ཞིག་གོ།
༢ ཎྜིའི་རྒྱུ་ནི།
རྒྱུ་གནྜིའི་མདོ་ལས་གསུངས་པ་ལྟར། ༡ ཙན་དན་དཀར་བོ། ༢ བིལ་བ（འབྲས་སུ་ཚིག་རུས་ཅན་གྱི་ཤིང་ཏོག་ཀ་པེད）། ༣ པཱ་ལ་ཤ（ཀེང་ཤུ་ཀ་སྟེ་རྒྱ་སྐྱེགས་ཤིང་། ） ༤ ཨ་ཤད་ཐ། ༥ ཙན་དན་དམར་བོ། ༦ སྟར་ཁ། ༧ ཏཱ་ལ（རྩེ་མོ་བཅད་ན་སླར་མི་སྐྱེ་བའི་ཤིང་ཞིག）། ༨ ཀེང་ཤུ་ཀ ༩ ཤཱ་བ། ༡༠ ཏཱ་མ་ལ། ༡༡ ཨ་མྲ། ༡༢ སྟར་བུ། ༡༣ སྐྱུ་རུ་ར། ༡༤ རིན་ཏི་ས་ར། ༡༥ ཨ་ཤྭ་ཀ ༡༦ འོ་མ་སེ་ཤིང་ངོ་། །བོད་རང་ལ་མཚོན་ན་སྟར་བུ་དང་སྟར་ཁ་ནི་རྙེད་སླ་ཞིང་། རྒྱ་ཤུག་དང་སྟག་པ་ལས་ཀྱང་བྱ་རུང་བར་ཀུན་མཁྱེན་མཚོ་སྣ་བས་གསུངས་སོ། །ཡོངས་གྲགས་སུ་སེང་ལྡེང་དུ་འབོད་པ་དེས་བཟོས་ན་ལེགས་པར་གསུངས། རྟེན་འབྲེལ་གྱི་ཡན་ལག་བཞི་ཡང་དག་པར་མཚོན་པའི་གཎྜི་རྣམ་པ་བཞི་སྟེ། དྲོད་རྣམ་པར་དག་པའི་གཎྜི། རྩེ་མོ་མངོན་རྟོགས་རྣམ་པར་དག་པའི་གཎྜི། བཟོད་པའི་རྣམ་པར་དག་པའི་གཎྜི། ཆོས་མཆོག་གི་རྣམ་པར་དག་པའི་གཎྜིའོ། །
༣ ཚད་དབྱིབས་ནི། གཎྜིའི་མདོ་ལས། ཚད་ནི་མཆུ་རུ་སོར་ཚད་ཀྱི། །བརྒྱད་ཅུ་རྩ་བཞི་ཉིད་བྱ་ཞིང་། །ཞེང་ནི་སོར་ནི་དྲུག་པ་སྟེ། །དཔངས་སུ་ཡང་ནི་གཉིས་བྱའོ། །སོར་མོ་ཚིགས་ཀྱི་ཚད་དག་ནི། །ཟུར་བཞིའི་ཚད་ནི་གཉིས་པ་ཡིན། །ལེགས་མཉམ་ཉིད་དང་ཤིན་ཏུ་གསལ། །རྩེ་གཉིས་སྦལ་བའི་མགོ་བཞིན་ནོ། །ཞེས་དང་། ཀློང་རྡོལ་བླ་མས། གཎྜི་ཆེ་བ་སོར་བརྒྱ་དང་བརྒྱད། གཎྜི་ཆུང་བ་སོར་བརྒྱད་ཅུ་རྩ་བཞི། དེ་གཉིས་ཀྱི་བར་ནི་འབྲིང་ཚདཡིན། ཁ་ཞེང་སོར་དྲུག སྲབ་མཐུག་སོར་གཉིས། སྤོང་བ་པའི་གཎྜི་ཆུང་བ་སོར་ཉེར་བཞི། སྲབ་མཐུག་ཁ་ཞེང་དག་ཆེ་བ་དང་འདྲའོ། །ཞེས་སོ། །
༤ རྡུང་བྱེད་ནི། དེ་ཉིད་ལས། དེ་ནས་རྡུང་བར་བྱེད་པ་ཡང་། །ཤིང་དེ་ལ་ནི་གཅད་དེ་བྱ། །སོར་བཅུ་གཉིས་ཀྱི་ཚད་དག་དང་། །ཟླུམ་ཞིང་རྩེ་གཉིས་ནེའུ་ལེའི་མགོ ། ཞེས་དང་། གཞན་ངོས་ལ་བཀྲ་ཤིས་ཀྱི་ཚིགས་བཅད་དང་། སེར་སྔགས་འབྲི་བ། རབ་གནས་སོགས་བྱའོ། །
༥ རྡུང་ཚུལ་ནི། རྡུང་མཁན་དགེ་བསྙེན་ཡན་ཆད། གསོ་སྦྱོང་ལ་གནས་ཏེ། གཙུག་ལག་ཁང་གི་སྟེགས་བུར་དར་གོས་བཤམས་པའི་སྟེང་དུ། གཎྜི་བཞག་ལ་ཕྱག་གསུམ་འཚལ། ཤེར་ཕྱིན་གྱི་ཆོས་སྒྲ་སྒྲོགས་པར་མོས་ནས། གཎྜི་ཕྲག་པར་བླངས་ནས་བརྡུང་དགོས་ཏེ། མདོ་རྩ་ལས། བསྡུ་བའི་ཕྱིར་གཎྜི་བརྡུང་ངོ་། །དེའི་གནས་ནི་ཁང་སྟེང་ངོ་། །དགེ་འདུན་བསྡུ་བའི་ཕྱིར་རྒྱུད་གསུམ་དང་དེ་སྙེད་ཀྱི་ཏོག་དག་གོ། ལས﹙གསོ་དགག་སོགས་སུ་འདུལ་བའི་ལས་བརྒྱ་རྩ་བརྒྱད་གང་རུང﹚བྱ་བའི་དོན་དུ་ནི་རྒྱུད་གཅིག་དང་ཏོག་གསུམ་མོ། །ཁ་ཅིག་ལས་ནི་རྒྱུད་གསུམ་དང་ཏོག་གཉིས་ཤེའོ། །ཤི་བ་ལ་ཕྲག་པ་དབྱུང་བའི་དོན་དུ་ནི་བྱི་བོའོ། །ཁ་ཅིག་ལས་ནི་རྒྱུད་གཅིག་དང་ཏོག་གཅིག་གོ་ཞེའོ། །ཞེས་པ་སྟེ། རྒྱུད་ཅེས་པ་གཅིག་ནས་བཅོ་བརྒྱད་བར་སྒྲ་ཇེ་ཆེར་བརྡུང་བ་དང་། ཏོག་ཅེས་པ་མཇུག་ཏུ་ཤེད་ཀྱིས་ལན་གཅིག་སོགས། དེས་འགྲེས་ནས་ཤེས་པར་བྱའོ། །གཞན་ཡང་། གཎྜིའི་མདོ་ལས། དམ་ཆོས་བཤད་པའི་དུས་བསྟན་ཕྱིར། །རྔ་འམ་གཎྜི་རྡུང་བའི་སྒྲ། །ཐོས་པས་བྱང་ཆུབ་འཐོབ་འགྱུར་ན། །ཉན་ཕྱིར་ལྷགས་པ་སྨོས་ཅི་དགོས། །ཞེས་པ་ལྟར་ཆོས་ཉན་པའི་བརྡ་སྟོན་ཕྱིར་ཡང་བརྡུང་ལ། དེ་ལས་གཞན་སེར་གནོད་སོགས་བཟློག་ཆེད་ཅི་ཙམ་གྱིས་བཟློག་པ་དེ་ཙམ་དང་། ཡང་། སྒོམ་གྲོལ་བ་དང་ཟས་བཟའ་ཆེད་ཀྱང་བརྡུང་བར་བྱེད་དོ། །
༦ གཎྜིའི་མཚོན་དོན་ནི། བཟོ་གནས་སྐྲ་རྩེའི་ཆུ་ཐིགས་ལས་འདི་ལྟར་འབྱུང་སྟེ། གཎྜི་ལ་རྟེན་འབྲེལ་གྱི་ཡན་ལག་བཞི་ཡང་དག་པར་མཚོན་པའི་གཎྜི་རྣམ་པ་བཞི་སྟེ། དང་བོ། ཆུང་བའམ་དྲོད་རྣམ་པར་དག་པའི་གཎྜི་ནི། ཆོས་ཀྱི་ཕུང་བོ་བརྒྱད་ཅུ་རྩ་བཞི་མཚོན་པའི་སྲིད་དུ་ཆ་བརྒྱད་ཅུ་རྩ་བཞི་བ་གསུམ་དང་། ཁོར་ཡུག་ཟླུམ་པོར་རྟེན་ཅིང་འབྲེལ་བར་འབྱུང་བའི་ཡན་ལག་བཅུ་གཉིས་ཀྱི་རྣམ་པར་དག་པའི་ཆ་བཅུ་གཉིས་སོ། །གཉིས་པ། རྩེ་མོར་མངོན་པར་རྟོགས་པའི་རྣམ་པར་དག་པའི་གཎྜི་ནི། སྲིད་དུ་མངོན་པར་ཤེས་པ་ལྔ་དང་། དཔེ་བྱད་བཟང་བོ་བརྒྱད་ཅུ་མཚོན་པའི་ཆ་བརྒྱད་ཅུ་རྩ་ལྔ་དང་། མཐའ་བསྐོར་ཟླུམ་པོར་ས་བཅུ་གསུམ་གྱི་རྣམ་པར་དག་པའི་ཆ་བཅུ་གསུམ་དང་། རྣམ་པར་ཐར་བ་བརྒྱད་ཀྱིས་རྣམ་པར་དག་པ་བརྒྱད་ཀྱིས་རྣམ་པར་བརྒྱན་པའོ། །གསུམ་པ། བཟོད་པའི་རྣམ་པར་དག་པའི་གཎྜི་ནི། སྲིད་དུ། སྟོབས་བཅུ་དང་། དགེ་བ་བཅུ་དང་། དབང་བཅུ་དང་། ཕ་རོལ་ཏུ་ཕྱིན་པ་བཅུ་དང་། ཤེས་པ་བཅུ་དང་། བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་གྱི་རྣམ་པར་དག་པའི་ཆ་བརྒྱད་ཅུ་རྩ་བདུན་དང་། མཐའ་བསྐོར་དུ། སྒྲིབ་པ་མེད་པའི་རྣམ་པ་ལ་སོགས་པའི་དབྱངས་བཅོ་ལྔའི་རྣམ་པར་དག་པའི་ཆ་བཅོ་ལྔ། གསུང་རབ་ཡན་ལག་བཅུ་གཉིས་ཀྱི་དག་པས་བརྒྱད་ཅུ་རྩ་གཉིས་སོ། །བཞི་བ། ཆོས་མཆོག་གི་རྣམ་པར་དག་པའི་གཎྜི་ནི། སྲིད་དུ། ཉོན་མོངས་དགུ་བཅུ་རྩ་བརྒྱད་རྣམ་པར་དག་པས་ཆ་དགུ་བཅུ་རྩ་བརྒྱད་དང་། ཁོར་ཡུག་ཏུ་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་རྣམ་པར་དག་པས་ཆ་བཅོ་བརྒྱད། བདེན་པ་བཅུ་དྲུག་གི་རྣམ་པར་དག་པས་བརྒྱད་ཅུ་རྩ་དྲུག་གོ། ཞེས་གསུངས་སོ། །
༧ བརྡུངས་པའི་ཕན་ཡོན་ནི། བརྡུངས་པའི་སྒྲས་ཤེར་ཕྱིན་གྱི་སྒྲ་བརྗོད་པར་འགྱུར་རོ། །བཀྲ་ཤིས་ཀྱི་ཚིག་འབྱུང་ངོ་། །འཁོར་རྣམ་བཞིའི་ནད་ཞི་བར་བྱེད་དོ། །བྱང་ཆུབ་མངོན་དུ་བྱེད་དོ། །མཆོག་གསུམ་གྱི་བཀའ་དྲིན་ཡང་ཤིན་ཏུ་སྐྱེ་བར་འགྱུར་རོ། །དཀྱིལ་འཁོར་ལ་གུས་པར་འགྱུར་རོ། །རྒྱལ་བོ་ཆོས་དང་ལྡན་པར་འགྱུར་རོ་སོགས་ཡོན་ཏན་ཚད་མེད་པའོ། །
༢ མཁར་གསིལ།
དགེ་སློང་བསོད་སྙོམས་ལ་ཕེབས་སྐབས་ཀྱི་ཕྱག་མཚན་ཏེ། མིང་གཞན་ལ་གསིལ་བྱེད། གསེག་ཤིང་། གོ་བྱེད། ཁྱི་སྐྲོད། སིལ་བྱེད་ཡང་ཟེར། དབྱེ་ན། རྭ་གཅིག་པ། རྭ་གཉིས་པ། རྭ་བཞི་བ། རྭ་དྲུག་པ་རྣམས་སོ། །འདི་དགེ་སློང་གི་འཚོ་བའི་ཡོ་བྱད་བཅུ་གསུམ་གྱི་གྲས་ཡིན་ཞིང། འདིའི་རིང་ཚད་དགེ་སློང་རང་རང་གི་ལུས་ཚད་དང་མཉམ་པར་བཤད་དོ། །
དབྱིབས་ནི། ཞུས་ལན་ནོར་བུའི་ཕྲེང་བ་ལས། མདུད་པ་གཅིག་དང་དུམ་བུ་གསུམ། །བར་ཤིང་གསོམ་དང་སྨད་ཞོག་བདུན། །སྟོད་ཞོག་བརྒྱད་དང་རྭ་ཆེན་བཞི། །མཆོད་རྟེན་གཅིག་དང་འཁོར་ལོ་རྒྱུ། །སྦུབས་གཉིས་སྟོང་དང་ཟུང་དུ་འབྲེལ། །ཨ་ལོང་བཅུ་གཉིས་ཡོད་པ་ནི། །བདག་གི་ཐེ་ཚོམ་བཅད་པའི་ཕྱིར། །གང་ལྟར་ལགས། ཞེས་པ་ལྟར་རོ། །
མཁར་གསིལ་འཆང་ཚུལ། མཁར་གསིལ་ཇི་ལྟ་བར་འཆང་ཚུལ་གྱི་སྤྱོད་ལམ་སོགས་ཀྱང་ཇོ་བོ་རྗེའི་གསུང་ལས། འདི་ལ་འཆང་ལུགས་འདི་ལྟར་བགྱི། །མདུང་ཐོགས་བཞིན་དུ་མི་བསླངས་ཤིང་། །དུང་ཐོགས་བཞིན་དུ་མི་སྒྱེར་རོ། །མ་ནི་བུ་གཅེས་འཛིན་པ་བཞིན། །སེམས་ཀྱི་བླངས་པ་ཐུགས་ཀར་བཅིངས། །ཀུ་ཀུ་རཱ་ཙ་ལ་སོགས་པ། །གང་ན་འཇིགས་པ་ཡོད་པའི་སར། །གང་ལྟར་བྱས་ཀྱང་ཉེས་པ་མེད། །བསླབ་གསུམ་ཐབས་དང་ཤེས་རབ་ནི། །ནམ་ཡང་འབྲལ་བར་མི་བྱའོ། །མཆོད་རྟེན་ཡིན་པས་གུས་པར་བྱ། །བརྡ་ཆོས་ཡིན་པས་ཉམས་སུ་བླང་། །འདི་འཆང་ཡོན་ཏན་བསྟན་པ་འཛིན། །མི་ཁོམ་བརྒྱད་སྤངས་སྐམ་པར་གནས། །ཞེས་སོ། །
མཁར་གསིལ་གྱི་དགོས་པ་ནི། དགེ་སློང་བསོད་སྙོམས་ཀྱི་ཚེ་ཁྱི་སོགས་སྐྲོག་བྱེད་དང་། ཡོན་བདག་གི་སྒོ་དྲུང་དུ་བརྡ་གཏོང་བྱེད་ཡིན།
རྡུང་ཚུལ་ནི། དྲིས་ལན་ནོར་ཕྲེང་ལས། མ་ཐེམ་ལ་ནི་ལན་གསུམ་དུ། །དུས་གསུམ་ལན་གསུམ་རྡུང་བར་བྱ། །ཞེས་དང་། ཁྱིམ་བདག་རྣམས་ལ་སི་ལི་ལི། །སྒྲ་དང་ལྡན་པ་བསྒྲག་པར་བྱ། །ཞེས་པ་ལྟར་རོ། །མཁར་གསིལ་འདི་འདུལ་བ་མ་ཟད་སྔགས་ལས་ཀྱང་འཆང་བར་བྱེད་དེ། རྒྱུ་མ་བདེ་མཆོག་ལས། དེ་བཞིན་དུ་ནི་མཁར་གསིལ་དང་། །དམ་པའི་ཆོས་ཀྱི་ལྒིགས་བམ་དག། མཚན་མའི་ཕྱག་རྒྱ་ཚོགས་ཡིན་ནོ། །ཞེས་སོ། །
མཁར་གསིལ་གྱི་མཚོན་དོན་ནི། མདུད་པ་གཅིག་ཡོད་པས་ངན་སོང་གི་སྒོ་གཅོད་པ། དུམ་བུ་གསུམ་གྱིས་བསླབ་པ་གསུམ། བར་གསོམ་ཤིང་བྱས་པས། སེམས་རྒྱུད་དྲང་ཞིང་འཇམ་དགོས་པའི་རྟགས། རྟིང་བའི་རྒྱ་མདུད་ཀྱིས་ངན་སོང་གི་སྒོ་འགེགས་པ། སྨད་ལ་བདུན་ཟུར་ཡོད་པས། བྱང་ཆུབ་ཡན་ལག་བདུན། སྟོད་ལ་བརྒྱད་ཟུར་ཡོད་པས། འཕགས་ལམ་ཡན་ལག་བརྒྱད། རྭ་བཞིས་བདེན་པ་བཞི། རྭ་རེར་ཨ་ལོང་གསུམ་གསུམ་སྟེ་བཅུ་གཉིས་ཡོད་པས། གསུང་རབ་ཡན་ལག་བཅུ་གཉིས། མཆོད་རྟེན་གཉིས་ཀྱིས་སྐུ་གཉིས། འཁོར་ལོ་གསུམ་གྱིས་སྡེ་སྣོད་གསུམ། སྟོད་སྦུབས་སྟོང་བས་ཆོས་ཀྱི་བདག་མེད། སྨད་སྦུབས་སྟོང་བས་གང་ཟག་གི་བདག་མེད། སྟོད་སྨད་ཟུང་དུ་སྦྲེལ་བས་ཐབས་ཤེས་གཉིས། བར་གྱི་ལྕགས་ཀྱུས་གདུལ་བྱ་ཐར་བར་འདྲེན་པའི་འཕྲིན་ལས་མཚོན་ནོ། །ཞིབ་པར་རྒྱལ་དབང་བཅུ་གསུམ་པའི་བསྟན་པའི་ནང་མཛོད་དང་། འདུལ་བ་ལུང་སྡེ་བཞི་སོགས་ན། དཔེ་རིས་དང་བཅས་པ་བཞུགས་པས་དེར་གསལ་ལོ། །
བོན་གྱི་མཁར་གསིལ་ནི། ཡུ་བ་རིང་ཞིང་འཁར་རྒྱུག་གི་རྣམ་པ་ཅན་ཞིག་ཡོད་པ་དེ། གྲྭ་བ་རྣམས་འདུལ་ཁྲིམས་ཞུ་སྐབས། འདུལ་ཁྲིམས་གནང་མཁན་གྱི་བླ་མའི་ཕྱག་ཏུ་བསྣམས་པར་བཤད་ལ། འོན་ཀྱང་ད་ལྟ་རང་ཅག་གི་ཞལ་ངོ་རྣམས་ཀྱིས་ཁྲིམས་དབྱུག་﹙ཨ་མདོའི་སྐད་དུ་བཀྱིག་པ་ཟེར། ﹚འཛིན་པའི་ཕྱག་ལེན་དེ་ཡང་འདི་ལས་མཆེད་པར་སེམས།
༣ ལྷུང་བཟེད།
ལྷུང་བཟེད་ནི་ཤཱཀྱའི་རབ་བྱུང་རྣམས་གྱིས་བསོད་སྙོམས་སློང་བའི་སྣོད་ཅིག་ཡིན་ལ། དེ་ཡང་སྦྱིན་བདག་རྣམས་ཀྱིས་ཟས་འདིའི་ནང་ལྷུང་བ་བཟེད་པས་ན་ལྷུང་བཟེད་དམ་སློང་ཕོར་ཡང་ཟེར། མཚོན་དོན་ནི། འདི་ཟས་ཀྱིས་འགེངས་པ་བཞིན་དུ་རང་གི་ཤེས་རྒྱུད་ཡོན་ཏན་གྱིས་བཀང་བ། ནང་དུ་ཟས་ལ་ལོངས་སྤྱོད་པ་བཞིན་དུ་ཆོས་ལ་ལོངས་སྤྱོད་པ། མཐའ་གཉིས་སྤོང་བའི་བསོད་སྙོམས་སྤྱོད་པའི་སྣོད་དུ་སྟོན་པས་གནང་བ་ཡིན་པས། དུས་རྒྱུན་དུ་ལྷུང་བཟེད་འདི་སྤྱོད་དོ། །
འདི་ལ་རུང་བ་ལྔ་དང་ཆུང་འབྲིང་ཆེ་གསུམ་གྱི་ཚད་དང་ལྡན་པ་ཞིག་དགོས། རུང་བ་ལྔ་ནི། རྒྱུའི་རུང་བ་ས་རྡོ་ལྕགས་གསུམ་ལས་བྱས་པ། ཁ་དོག་གི་རུང་བ་བྱ་རོག་གི་མིག་ལྟར་ནག་པ། དབྱིབས་ཀྱི་རུང་བ་སྒོ་ང་ཕྱེད་བཅད་ལྟར་ཟླུམ་པ། ངོ་བོའི་རུང་བ་ལྷན་པ་ལྔ་ཡན་ཆད་མ་ཕོག་ཅིང་ལོངས་སྤྱད་རུང་བའོ། །
ལྷུང་བཟེད་ཀྱི་ཚད་ནི། ཆེ་ཚད་རྒྱ་གར་མ་ག་དྷའི་བྲེ་གང་གི་ཚད་ཀྱི་འབྲས་རླངས་བཙོས་བྱས་པ་འཕེལ་བའི་ཕུལ་བཅུ་གསུམ། དེའི་སྟེང་སྔོ་ཚོད་ཕུལ་བཞི། སྟོང་བ་ཕུལ་གང་བཅས་ཕུལ་བཅོ་བརྒྱད་ཤོང་བ་ཞིག་དང་། ཆུང་ཚད་ནི་འབྲས་བྲེ་གང་བཙོས་ནས་འཕེལ་བའི་ཕུལ་དྲུག དེའི་སྟེང་དུ་སྔོ་ཚོད་ཕུལ་དོ། སྟོང་བ་ཕུལ་གང་སྟེ་ཕུལ་དགུ་ཤོང་བ་ཞིག་ཡོད་ཅིང་། དེ་གཉིས་ཀྱི་བར་ནི་འབྲིང་ཚད་ཡིན་ལ། དགེ་སློང་ཕའི་ལྷུང་བཟེད་ཆུང་ཚད་དེ། དགེ་སློང་མའི་ལྷུང་བཟེད་ཆེ་ཚད་དོ། །ཞིབ་ཏུ་ཞང་ཞུང་ཆོས་དབང་གྲགས་པའི་ལྷུང་བཟེད་ཀྱི་ཚད་བརྗོད་པ་སོགས་སུ་གཟིགས་པར་ཞུ། གཞན་ཡང་། གྲུབ་ཆེན་ཐང་སྟོང་རྒྱལ་བོས། དབུས་སུ་མུ་གེ་འགོག་ཆེད། ལྷ་སའི་ཇོ་མདུན་དུ་གསེར་སྲང་བརྒྱ་དང་ཉེར་བདུན་གྱིས་ལྷུང་བཟེད་ཆེན་པོ་ཞིག་བཞེངས་ཚུལ་ཁོང་གི་རྣམ་ཐར་ལས་གསལ་བ་དང་། ཡང་བལ་བཟའ་ཁྲི་བཙུན་སྲོང་བཙན་གྱི་བཙུན་མོར་མངའ་གསོལ་སྐབས། བཙུན་མོའི་ནོར་སྐལ་དུ་བཻཌཱུ་རྱའི་ལྷུང་བཟེད་ཞིག་གནང་བ་གཙུག་ལག་ཁང་གི་སྒོ་འགྲམ་དུ་ཡོད་པའི་གནོད་སྦྱིན་ཁང་བར་གཏེར་དུ་སྦས་པར་ཡིག་ཚང་མང་བོར་གསལ་བ་དང་།
ཡང་ལྷུང་བཟེད་ཀྱི་དབྱེ་བ་ལ་ཚད་ཀྱི་སྒོ་ནས་གསུམ། རྟེན་གྱི་སྒོ་ནས་ཕ་མའི་གསུམ་གསུམ་སྟེ་དྲུག རྒྱུའི་སྒོ་ནས་དྲུག་པོ་རེ་རེ་ལ་ས་དང་ལྕགས་ལས་བྱས་པ་གཉིས་གཉིས་ཏེ་བཅུ་གཉིས་ཡོད་དོ། །
ལྷུང་བཟེད་འདི་གསང་སྔགས་རིག་པ་འཛིན་པའི་དགེ་སློང་གི་རྟེན་ཅན་གྱིས་ཀྱང་འཆང་བར་བཤད་དེ། དཔུང་བཟང་ལས། ཀུ་བའམ་ལྕགས་སམ་འཇིམ་པ་ལས་བྱས་པའི། །དབྱིབས་ནི་ལེགས་ཤིང་མི་རྩུབ་འཇམ་པ་དང་། །མ་ཆག་ཟླུམ་ཞིང་མ་གས་རྨ་མེད་པ། །ཡིད་དུ་འོང་བའི་ལྷུང་བཟེད་བཅང་བར་བྱ། །ཞེས་གསུངས་སོ། །
འདུལ་བ་ལས། ལྷུང་བཟེད་དུ་སྤྱད་པའི་སྡེ་ཚན་ལ། གཞན་གྱི་ལྷུང་བཟེད་ལ་དཔྱས་གདགས་པའི་ཕྱིར་བལྟ་བ། ལག་ཟས་ཀྱི་སྦགས་བཞིན་ཆུ་སྣོད་བཟུང་བ། གཞན་ལ་ཟས་དང་སྦགས་པའི་ཆུས་གཏོར་བ། ཁྱིམ་དུ་མ་དྲིས་པར་ཟས་དང་སྦགས་པའི་ཆུ་དབོ་བ། ལྷུང་བཟེད་དུ་ཟས་ཟོས་པའི་སྙིགས་མ་དོར་བ། འོག་གཞི་མེད་པ་དང་། ངམ་གྲོག་གི་ཁ་དང་། གཡང་ས་དང་། དཀན་གཟར་བོར་ལྷུང་བཟེད་བཞག་པ། འགྲེང་བཞིན་ལྷུང་བཟེད་བཀྲུ་བ། གད་ཁ་དང་། གཡང་ས་དང་། དཀན་གཟར་བོར་ལྷུང་བཟེད་བཀྲུ་བ། འབབ་ཆུའི་རྒྱུན་ལས་བཟློག་སྟེ་ལྷུང་བཟེད་ཀྱིས་ཆུས་བཅུ་བ་སྟེ་བཅུ་བཞི་གསུངས་སོ། །
ལྷུང་བཟེད་བཅངས་པའི་ཕན་ཡོན་ནི། སྟོན་པའི་བཅས་པ་དང་མི་འགལ་བ། སྣོད་དམན་པ་ལས་ཁྱད་དུ་འཕགས་པ། དགེ་སློང་གི་དྲན་པ་གསོ་བ། མཐར་མངོན་མཐོ་དང་ངེས་ལེགས་འཐོབ་པའོ། །
༤ རྔ་ཡབ།
རྔ་ཡབ་ནི་མདོ་སྔགས་གཉིས་ཀ་ལས་འབྱུང་ལ། བདེན་བཞི་སྔགས་ཀྱི་ཆ་ལས། གྲོག་མ་ལ་སོགས་བསལ་བའི་ཕྱིར། །རྔ་མའི་ཆུན་པོ་བསྔགས་པ་ཡིན། །ཞེས་དང་། ཟླ་གསང་ཐིག་ལེ་ལས། རིག་མ་སྟོང་གིས་མངོན་པར་མཆོད་བྱེད་ཅིང་། །རིག་འཛིན་མོ་སྙན་བུད་མེད་རྣམས་ཀྱིས་ནི། །གཡག་རྔ་དཀར་བོའི་ཚོགས་ཀྱིས་གཡོབ་བྱེད་པའི། །འཇིག་རྟེན་དབང་བོ་བདེ་མཆོག་འབྲེལ་བ་འཐོབ། །ཅེས་དང་། གཤེད་དམར་ལས། སྣ་ཚོགས་རིན་ཆེན་རང་བཞིན་བརྒྱན། །རྔ་ཡབ་དཀར་བོས་བརྒྱན་པ་ཡི། །ལག་པ་དག་ནི་རྡོ་དྲིལ་ཡང་། །ཞེས་པ་སྟེ། རྔ་ཡབ་འདི་དཀྱིལ་འཁོར་དང་ཕོ་བྲང་གི་རྒྱན་མཆོག་ཏུ་མཛེས་པར་མ་ཟད། རྡོ་རྗེ་སློབ་དཔོན་ལ་ཁྲི་འབུལ་དང་། དབང་བསྐུར་སོགས་ལའང་དགོས་ལ། རྣལ་འབྱོར་བའི་གྲོག་མ་སོགས་བསལ་ཆེད་དུ་འང་འཆང་བའོ། །ཡང་། གནས་བཅུའི་ཕྱག་མཆོད་ལས། གནས་བརྟན་ཡན་ལག་འབྱུང་། ནགས་ན་གནས། རྡོ་རྗེ་མོའི་བུ། དགེ་བསྙེན་དྷ་རྨ་ཏ་ལ་སོགས་ཀྱི་ཕྱག་ཏུ་འང་རྔ་ཡབ་འཆང་བར་བཤད་དོ། །
༥ ཆུ་ཚགས།
ཆུ་ཚགས་ནི། རབ་བྱུང་བས་ཆུ་ལ་ལོངས་སྤྱོད་ཚེ། སྲོག་ཆགས་ཕྲ་མོ་དང་། ཆུ་སྙིགས་འཚག་བྱེད་ཀྱི་ཡོ་བྱད་ཅིག་ཡིན། དེ་ཡང་སངས་རྒྱས་ཀྱི་བསྟན་པ་སྙིང་རྗེ་རབ་ཏུ་ཕྱེས་པ་ཡིན་པས། སོ་སོར་ཐར་བའི་སྡོམ་པ་གཞན་གནོད་གཞི་དང་བཅས་པ་ལས་ལྡོག་པ་ཡིན་པས། ཆུ་འདི་འབྲལ་མེད་དུ་བསྟེན་དགོས་པར་དགོངས་ནས་སེམས་ཅན་ལ་གནོད་འགོག་ཆེད། སྟོན་པས་ཆུ་ཚགས་འདི་གནང་བ་ཡིན། དེ་ལ་མི་འདྲ་བ་ལྔ་ཡོད་དེ། མེ་ཏོག་ཕྲེང་རྒྱུད་ལས། རིལ་ཚགས་ཞེས་བྱའི་རྣམ་པ་དང་། །དེ་བཞིན་གྲོལ་བར་བྱེད་པའི་རས། །གྲུ་གསུམ་པ་དང་ཞབས་ཚགས་ཏེ། །བུམ་ཚགས་གཅེའུ་ཅན་དང་ལྔ། །ཞེས་པ་ལྟར། མདོ་རྩ་ལས། བུམ་ཚགས་གཅེའུ་ཅན་ནི། ཚེགས་ཆུང་ངོ་། །དེ་བཅིངས་པར་བྱའོ། །ས་དང་ཟངས་མ་ལས་བྱས་པའོ། །དེ་ནི་བུམ་པའི་དབྱིབས་ཅན་ནང་པདྨའི་བུ་གུ་ལྟ་བུ་དང་ལྡན་པའི་སྦུབས་ཅན་ཡིན་ནོ། །ཞེས་སོ། །ཆུ་ཚགས་གྲུ་གསུམ་ནི། མདོ་རྩ་ལས། ཆུ་ཚགས་ཉེ་བར་བཞག་པར་བྱའོ། །ཆུ་ཚགས་གྲུ་གསུམ་མམ། ཞེས་པ་ཙམ་ལས་མི་གསལ་མོད། ཤིང་བུ་གསུམ། གྲུ་གསུམ་དུ་བཟོས་པའི་ནང་ངོས་སུ་རས་སྲབ་མོ་སྦྱར་བ་ཞིག་གོ །
དཔྱང་ཚགས་ནི། མདོ་རྩ་ལས། དཔྱང་ཚགས་བཅིངས་པར་བྱའོ་ཙམ་འབྱུང་ལ། དོན་དུ་ལྕགས་སྒོར་སོགས་ཀྱི་ནང་ངོས་སུ་རས་སྲབ་མོའི་ཁུག་མ་སྦྱར་བ་ཐུར་དུ་འཕྱང་བ་ལ། ཁ་ཟུར་དུ་ཡུ་བ་ཡོད་པ་ཞིག་གོ། རིལ་བ་ཞབས་ཚགས་ཅན་ནི། འོད་ལྡན་ལས། རིལ་བ་ཞབས་ཚགས་ཅན་ནི། རིལ་བའི་ཞབས་སུ་ཚགས་བྱས་པ་ཞིག་གོ ། བསལ་ཚགས་ནི། ཆུ་སྣོད་ཀྱི་ཁར་འགེབ་བྱེད་རས་དུམ་བུ་གྲུ་བཞི་བ་ཞིག་སྟེ། སློབ་ཕན་ལས། གྲོལ་བར་བྱེད་པའི་རས་ཞེས་བྱ་བ་ནི། རས་ཀྱི་དུམ་བུ་ཟུར་བཞི་བ་དེའི་ལྷག་པའི་ཚིག་གོ་གསུངས་སོ། །ཆུ་ཚགས་འདི་དགེ་ཚུལ་སློང་ལ་མེད་མི་རུང་གི་ཡོ་བྱད་ཞིག་དང་། སྔགས་ལས་ཀྱང་ཆུ་ཚགས་འཆང་དགོས་པར་གསུངས་ཏེ། གདན་བཞི་ལས། ལྷུང་བཟེད་མཆན་ཁུང་ཆུ་ཚགས་བཅས། །གསུངས་སོ། །
༦ རིལ་བ་སྤྱི་བླུགས།
མདོ་རྩ་ལས། རིལ་བ་སྤྱི་བླུགས་བཞག་པར་བྱའོ། །ཞེས་པ་དེ་ཡིན་ལ། དེ་ནི་དགེ་ཚུལ་སློང་གི་ཁ་བཤལ་ལ། ཆུ་འཇོག་པའི་སྣོད་ཆུང་བུམ་པ་དང་འདྲ་བ། སྐེད་དང་མཆུ་ལ་འགག་ཡོད་ལ། མགོ་མཇུག་ལྡོག་ན་ཆུ་འོང་བའི་བུ་ག་ཡོད། དེང་སང་གི་ཆབ་རིལ་ཡང་དེ་འདྲའི་དོད་ཙམ་ཡིན། གྲྭ་ས་སོགས་ན་གུང་ཚིགས་སོགས་བཞེས་པའི་རྗེས་སོར་ཆབ་འགྲེམས་ཀྱི་ཕྱག་ཆ་དེའོ། །
༧ བསིལ་ཡབ།
བསིལ་ཡབ་འདི། རྒྱ་གར་གྱི་ཡུལ་ཆོས་ལྟར། ཚ་བ་ཧ་ཅང་ཆེ་དུས་སུ་དགེ་ཚུལ་སློང་ལ་བསིལ་སློང་བྱེད་ཀྱི་ཡོ་བྱད་དེ། མདོ་རྩ་ལས། ཚ་བར་ནི་བསིལ་ཡབ་སྦྱར་རོ། །བསིལ་ཡབ་བཅིང་བར་བྱའོ། །བསིལ་ཡབ་མཁན་གྱིས་བྱས་པའམ། ཏ་ལའི་ཆང་བུའོ། །ཞེས་དང་། མེ་ཏོག་ཕྲེང་རྒྱུད་ལས། འོད་མ་ཏ་ལའི་ལོ་མ་ཡི། །བསིལ་ཡབ་ཀྱང་ནི་རྣམ་པ་གཉིས། །ཞེས་གསུངས་སོ། །ཁ་དོག་ཁྲ་བོའི་བསིལ་ཡབ་དགེ་ཚུལ་སློང་གིས་འཆང་མི་རུང་བར་མདོ་རྩ་ལས་བཤད་དོ། །
༨ ཚུལ་ཤིང་།
ཚུལ་ཤིང་གི་ཁུངས་ནི། མདོ་རྩ་ལས། དྲི་དག་གིས་བསྐུས་པའི་ཚུལ་ཤིང་གཟེབ་ཀྱི་སྐྲོག་མར་རས་དཀར་བོ་བཏིང་བས་དཀྲིས་པ་དག་རྒན་རིམ་སུ་བཞག་ནས། ཞེས་དང་། ཆོས་ཀྱི་ཚུལ་ཤིང་དག་ནི་ཡ་ཡོ་མེད་པ་དང་། ཁྱར་འཁྱོར་མེད་པ་དང་། ཅས་ཅུས་མེད་པ་དང་། ཁ་དོག་བཟང་བ་དང་། དྲི་ཞིམ་པ་དང་། རེག་པ་འཇམ་པ་ཉིད་དག་ཡིན། ཞེས་གསུངས་ལ། རྒྱུ་ཙན་དན་དང་ཨ་ཀར་སོགས་དྲི་བཟང་ཅན་གྱི་ཤིང་ཐུར་ཕྲ་མོ་ཁྲུ་གང་བ་ཙམ་པ་དེའོ། །
དགོས་པ་ནི། དགེ་འདུན་པའི་གྲངས་འཇལ་བྱེད་དུ་འགྲེམས་པ་ཞིག་སྟེ། དབྱར་ཁས་ལེན་དང་། རྙེད་པ་བགོ་བ་སོགས་དར་སྐུད་ཀྱིས་དཀྲིས་ཏེ། གཟེབ་ཀྱི་སྐྲོག་མར་རས་དཀར་བཏིང་ཏེ་བཀྲམས་པ་དེའོ། །
༩ སྐྱེས་བུ།
སྐྱེས་བུ་ནི་རབ་བྱུང་ངམ་བསྙེན་རྫོགས་ཀྱི་ཚེ་སྡོམ་པ་འཐོབ་པའི་དུས་སྟོན་པའམ། སྔ་ཕྱིའི་དུས་ཚོད་འབྱེད་པའི་ཤིང་བུ་སོར་བཞི་བ་ཞིག་སྟེ། མདོ་རྩ་ལས། དེ་མ་ཐག་ཏུ་གྲིབ་ཚོད་རིག་པར་བྱའོ། །དེ་ནི་ཐུར་མ་སོར་བཞི་བ་བཟང་ངོ་། །དེ་ནི་སྐྱེས་བུ་ཉིད་ཅེས་ཐ་སྙད་དུ་བྱའོ། །ཞེས་པ་ལྟར། དེ་ནི་ཤིང་སོར་བཞི་གྲུ་བཞིར་གཞོག་སྟེ་སོར་རེ་རེའི་མཚམས་ནས་བང་རིམ་དོད་པ་ཞིག་ཡིན་ཞིང་། ཤིང་བུ་དེའི་གྲིབ་མ་ཇི་ཙམ་ཡོད་པའི་ཚད་ལ། ཤིང་བུ་རང་གིས་གཞལ་ཏེ། སོར་བཞི་བ་རང་གི་ཚད་ལ་སྐྱེས་བུ་གཅིག་དང་། དེའི་སྟེང་དུ་གྲིབ་མ་ལ་སོར་གཅིག་གཉིས་སོགས་ལྷག་ཡོད་ན། སྐྱེས་བུ་གཅིག་དང་རྐང་བ་གཅིག་གཉིས་སོགས་གཞལ་ཏེ། སྔ་ཕྱིའི་དུས་ཚོད་ངོས་འཛིན་བྱེད་ཀྱི་ཤིང་ཐུར་ཞིག་གོ །