གཉིས་པ་ཚད་མེད་བཞི་བཤད་པ།
གཉིས་པ་ཚད་མེད་བཞི་བཤད་པ་ལ།
སྤྱི་དོན་དང་མཐའ་རགས་ཙམ་དཔྱད་པ་དང་གཉིས། དང་པོ་ལ། རྐྱེན་དང༌། ངོ་བོ་དང༌། ཕན་ཡོན་དང་གསུམ། དང་པོ་རྐྱེན་ལས་འགྲུབ་ཚུལ་ནི། བདེ་དང་སྡུག་བསྔལ་དེ་རྒྱུ་ལས། །བྱང་ཆུབ་སེམས་དཔའི་སྙིང་རྗེ་སྟེ། །རྒྱུ་དང་བཤེས་གཉེན་རང་བཞིན་ལས། །བྱང་ཆུབ་སེམས་དཔའི་སྙིང་རྗེའོ། །ཞེས་དམིགས་པའི་རྐྱེན་ནི་བདེ༷་བའི་ཚོར་བ་སྐད་ཅིག་གིས་འགྱུར་བའི་སྡུག་བསྔལ་ད༷ང་སྡུག་བསྔལ་གྱི་ཚོར་བ་སྡུག་བསྔལ་གྱི་སྡུ༷ག་བསྔ༷ལ་དང༌། དེ༷་གཉིས་ཀྱི་རྒྱུ༷་བཏང་སྙོམས་ཀྱི་ཚོར་བ་ནི་བདེ་སྡུག་གི་གནས་ངན་ལེན་མ་སྤངས་པས་དེ་དག་འདྲེན་པར་བྱེད་པ་འདུ་བྱེད་ཀྱི་སྡུག་བསྔལ་ཏེ། སྡུག་བསྔལ་གསུམ་ལ་སྤྱོད་པའི་སེམས་ཅན་རྣམས་ལ་དམིགས་ནས་བྱ༷ང་ཆུ༷བ་སེ༷མས་དཔ༷འི་སྙི༷ང་རྗེ༷་སྐྱེ་བ་སྟེ༷། རྒྱུ༷འི་རྐྱེན་ནི་ཀུན་གཞིའི་རྣམ་ཤེས་ལ་སྙིང་རྗེའི་ས་བོན་བག་ཆགས་ཡོད་པ་ད༷ང༌། བདག་རྐྱེན་ནི་གྲོགས་ཐེག་པ་ཆེན་པོའི་དགེ་བའི་བཤེ༷ས་གཉེ༷ན་བསྟེན་པ་དང༌། དེ་མ་ཐག་རྐྱེན་ནི་སྙིང་རྗེའི་ར༷ང་བཞི༷ན་གྱི་སེམས་སྔ་མ་འགགས་མ་ཐག་པ་ཡིན་ལ། རྐྱེན་བཞི་པོ་དེ་རྣམས་ལ༷ས་བྱ༷ང་ཆུ༷བ་སེ༷མས་དཔ༷འི་སྙི༷ང་རྗེ༷་ཆེན་པོ་སྐྱེ་བའོ༷། །གཉིས་པ་ངོ་བོ་ལ་མཚན་ཉིད། མཚོན་བྱ། མཚན་གཞིའོ། །དང་པོ་ནི། ཉ་ཊཱིཀ་ལས། བརྟན་པའི་ཚངས་པའི་མི་མཐུན་སྤངས། །རྣམ་པར་མི་རྟོག་ཡེ་ཤེས་ལྡན། །དམིགས་པ་རྣམ་པ་གསུམ་ལ་འཇུག །སེམས་ཅན་རྣམས་ནི་ཡོངས་སྨིན་བྱེད། །ཅེས་གནོད་སེམས་སོགས་མི་མཐུན་ཕྱོགས་སྤངས་པ། གཉེན་པོ་མི་རྟོག་ཡེ་ཤེས་དང་ལྡན་པ། དམིགས་པ་སེམས་ཅན་དང་ཆོས་དང་དམིགས་པ་མེད་པ་ལ་འཇུག་པ། བྱེད་ལས་སེམས་ཅན་སྨིན་པར་བྱེད་པ་ནི་ཐེག་ཆེན་གྱི་ཚད་མེད་སྤྱིའི་མཚན་ཉིད་དོ། །བྱེ་བྲག་ཏུ་ཐེག་ཆེན་གྱི་བྱམས་པ་ཚད་མེད་པ་སོགས་བཞིའི་རིམ་བཞིན་དུ། རང་གི་བདག་རྐྱེན་བསམ་གཏན་ལ་བརྟེན་ནས་སེམས་ཅན་ཚད་མེད་པ་བདེ་བ་དང་ཕྲད་པར་འདོད་པའི་ཏིང་ངེ་འཛིན་དང་ཤེས་རབ་གང་རུང་དང་མཚུངས་ལྡན་གྱི་བློ། སེམས་ཅན་ཚད་མེད་པ་སྡུག་བསྔལ་དང་བྲལ་བར་འདོད་པའི་ཏིང་ངེ་འཛིན་དང་ཤེས་རབ་གང་རུང་དང་མཚུངས་ལྡན་གྱི་བློ། སེམས་ཅན་ཚད་མེད་པ་བདེ་བ་དང་མི་འབྲལ་བར་འདོད་པའི་ཏིང་ངེ་འཛིན་དང་ཤེས་རབ་གང་རུང་དང་མཚུངས་ལྡན་གྱི་བློ།སེམས་ཅན་ཚད་མེད་པ་ཆགས་སྡང་གི་ཉོན་མོངས་པ་མེད་པར་འདོད་པའི་ཏིང་ངེ་འཛིན་དང་ཤེས་རབ་གང་རུང་དང་མཚུངས་ལྡན་གྱི་བློའོ། །སེམས་ཅན་རྣམས་ལ་བརྩེ་བ་ཅན། །ཞེས་སོགས་ལྟར་རོ། །དག་ཟླ་ཐུབ་གསུམ་དང་མདོ་རྒྱན་བཤད་སྦྱར་དུ་བཏང་སྙོམས་ནི་སེམས་ཅན་རྣམས་རྗེས་ཆགས་ཁོང་ཁྲོ་མེད་པར་སྨོན་པ་ལ་བཤད་གཞན་དུ་རང་ཉིད་སེམས་ཅན་ལ་ཉེ་རིང་ཆགས་སྡང་མེད་པར་སྙོམས་པ་ལ་བཤད་དོ། །ཞེས་གསུངས་སོ། ། གཉིས་པ་ནི། ཉ་ཊཱིཀ་ལས། ལྷ་ཚངས་པར་སྐྱེ་བའི་རྒྱུ་ཡིན་པས་ཚངས་པའི་གནས་དང༌། གནོད་འཇོམས་གཉིས་སུ། སེམས་ཅན་ཚད་མེད་པ་ལ་དམིགས་ཚོགས་ཚད་མེད་པའི་རྒྱུར་གྱུར་སྟོབས་བཅུ་སོགས་སངས་རྒྱས་ཀྱི་ཆོས་ཚད་མེད་པ་ཐོབ་པའི་རྒྱུར་གྱུར་པ་དང༌། ཡེ་ཤེས་ཚད་མེད་པའི་སྤྱོད་ཡུལ་དུ་གྱུར་པའི་ཕྱིར་ཚད་མེད་ཅེས་བྱས་སོ། །ཞེས་དང༌། མདོ་ལུགས་མ་ལས། སེམས་ཅན་ཚད་མེད་པ་ལ་དམིགས་པ་དང༌། ཚོགས་ཚད་མེད་པའི་རྒྱུ་དང་ཆོས་ཚད་མེད་པ་འཐོབ་པའི་རྒྱུ་དང༌། ཡེ་ཤེས་ཚད་མེད་པའི་སྤྱོད་ཡུལ་ཡིན་པའི་ཕྱིར་ཚད་མེད་པའོ། །ཞེས་གསུངས་སོ། །