(༢) ཟབ་པ་སྒྲུབ་སྡེའི་བརྒྱུད་ཚུལ,
༡༽ སྒྲུབ་སྡེ་བཀའ་མའི་བརྒྱུད་པ།
གཉིས་པ་མ་ཧཱ་ཡོ་ག་ཟབ་པ་སྒྲུབ་སྡེའི་ཕྱོགས་ལ་བཀའ་གཏེར་གྱི་བརྒྱུད་ཚུལ་གཉིས་སུ་བཞུགས་པ་ལས། དང་པོ་སྒྲུབ་སྡེ་བཀའ་མའི་བརྒྱུད་པ་ནི། དེ་ལ་སློབ་དཔོན་ཤཱནྟིཾ་གརྦྷས་གནུབས་ཆེན་སངས་རྒྱས་ཡེ་ཤེས་ལ་བརྒྱུད་པའི་གཤེད་སྐོར། སློབ་དཔོན་ཧཱུྃ་ཀ་རས་དགེ་སློང་ནམ་མཁའི་སྙིང་པོ་ལ་བསྩལ་བའི་ཡང་དག སློབ་དཔོན་བཱི་མ་ལས་གཉགས་ཛྙཱ་ན་ཀུ་མ་ར་ལ་བསྟན་པའི་བདུད་རྩི། ཨོ་རྒྱན་ཆེན་པོས་ལས་ཅན་སོ་སོ་ལ་བསྩལ་བའི་རྟ་མགྲིན་དང་ཕུར་པ་སོགས་རྒྱུད་དང་མན་ངག་གི་བཀའ་སྲོལ་མཐའ་ཡས་པ་བཞུགས་ཀྱང་། བརྒྱུད་པ་ཀུན་ལས་ཁྱད་དུ་འཕགས་པ་རྒྱ་བོད་པཎ་གྲུབ་བརྒྱད་ཀྱི་བརྒྱུད་པའི་ཆུ་བོ་གཅིག་ཏུ་འདུས་པ་གཉགས་ཛྙཱ་ན་ཀུ་མ་ར་ལ་བཀའ་བབ་པ་སྟེ། དེ་ཡང་ཡི་དམ་ལྷས་དབང་བསྐུར་ཐོབ་པ་སློབ་དཔོན་དགའ་རབ་རྡོ་རྗེ། བཀའ་བརྒྱུད་རྟགས་ཀྱི་གླེགས་བམ་གྱི་དབང་བསྐུར་ཐོབ་པ་སྐལ་ལྡན་རྒྱལ་པོ་ཛཿ། རིག་པ་རྩལ་གྱི་དབང་བསྐུར་ཐོབ་པ་གུ་རུ་པདྨ་སཾ་བྷ་ཝ། དགེ་བའི་བཤེས་གཉེན་གྱི་དབང་བསྐུར་ཐོབ་པ་པཎ་ཆེན་བཱི་མ་མི་ཏྲ་བཅས་རྒྱ་གར་ཡུལ་གྱི་བཀའ་བབ་རིག་འཛིན་ཆེན་མོ་བཞི་དང་། བོད་དུ་བརྒྱུད་པའི་ཆུ་འགོ་བཞི་ཞེས་སློབ་དཔོན་པདྨ་འབྱུང་གནས། པཎ་ཆེན་བཱི་མ་མི་ཏྲ། དགེ་སློང་ནམ་མཁའི་སྙིང་པོ། ལོ་ཆེན་བཻ་རོ་ཙ་ན་བཅས་བཞི་བྱོན་པ་དེ་དག་གི་བཀའ་སྲོལ་ཐམས་ཅད་གཅིག་འདྲེས་སུ་བྱུང་ཚུལ་ནི། བཀའ་སྲོལ་དང་པོ་གསང་བདག་ཕྱག་ན་རྡོ་རྗེའི་སྤྲུལ་པ་གུ་རུ་པདྨ་འབྱུང་གནས་ལ་རྒྱ་གར་གྱི་བཀའ་བབ་གཞན་གསུམ་པོའི་དབང་གི་ཆུ་བོ་མ་ལུས་པ་འདུས་ཤིང་། བོད་དུ་བསམ་ཡས་མཆིམས་ཕུའི་བྲག་དམར་ཀེའུ་ཚང་དུ་རྗེ་འབངས་ཐུགས་སྲས་བུ་དགུ་ལ་སྒྲུབ་པ་བཀའ་བརྒྱད་ཀྱི་དཀྱིལ་འཁོར་དུ་དབང་བསྐུར་བའི་ཚེ་སོ་སོའི་རིགས་ཀྱི་མེ་ཏོག་ཡི་དམ་ལ་ཕོག་ཅིང་སྒྲུབ་པ་མཛད་པས་གྲུབ་པ་ཐོབ་ཅིང་དེ་དག་གི་བཀའ་སྲོལ་ཐམས་ཅད་ཀྱང་གཉགས་ཛྙཱ་ན་ཀུ་མ་ར་ལ་བབ། །བཀའ་སྲོལ་གཉིས་པ་འཕོ་ཆེན་རྡོ་རྗེའི་སྐུ་བརྙེས་སློབ་དཔོན་བཱི་མ་ལ་མི་ཏྲས་ཡར་ལུང་མཆོང་གི་ཡང་རྫོང་དུ་གསང་བ་མཆོག་གི་དཀྱིལ་འཁོར་བཞེངས་ནས་གཉགས་ལོ་ཆེན་པོ་ལ་དབང་བསྐུར་ནས་མཚན་དྲི་མེད་ཟླ་ཤར་དུ་བཏགས། བཀའ་སྲོལ་གསུམ་པ་ལོ་ཆེན་བཻ་རོ་ཙ་ནས་རྒྱ་གར་དུ་སློབ་དཔོན་དགའ་རབ་རྡོ་རྗེ་དངོས་དང་། དེའི་སློབ་མ་འཇམ་དཔལ་བཤེས་གཉེན་གཉིས་ལས་དབང་ཐོབ་ཅིང་བཻ་རོས་རྒྱལ་མོ་གཡུ་སྒྲ་སྙིང་པོ་ལ་བསྐུར། དེས་ཡར་ལུང་ཤེལ་གྱི་བྲག་ཕུག་ཏུ་གཉགས་ཛྙཱ་ན་ཀུ་མ་ར་ལ་དབང་བསྐུར་བའོ། བཀའ་སྲོལ་བཞི་པ་གནུབས་སྟོན་ནམ་མཁའི་སྙིང་པོས་རྒྱ་གར་གྱི་སློབ་དཔོན་བཛྲ་ཧཱུྃ་ཀ་ར་ལས་དབང་མནོས་ཏེ་གཉགས་ལ་གནང་བ་བཅས་ཆུ་བོ་བཞི་འདུས་སུ་བྱུང་། གཉགས་ཀྱིས་སོག་པོ་ལྷ་དཔལ་དང་གནུབས་ཆེན་སངས་རྒྱས་ཡེ་ཤེས་སོགས་ལ་སྨིན་ཁྲིད་ཀྱི་རྒྱུན་བསྩལ། སངས་རྒྱས་ཡེ་ཤེས་ཀྱིས་གནུབས་ཡོན་ཏན་རྒྱ་མཚོ་སོགས་གཙང་གི་མི་བཞི་ལ་བསྐུར་བ་ལས། ཐུགས་སྲས་ཐུ་བོ་ཡོན་ཏན་རྒྱ་མཚོ་ལ་བཀའ་སྲོལ་སྔ་མ་བཞིའི་སྟེང་དུ་ཕྱིས་དྷ་ན་དྷ་ལའི་དབང་བཀའ་དང་ལྔ་འདུས་ཤིང་། དེ་ལས་རིམ་པར་སྲས་ཡེ་ཤེས་རྒྱ་མཚོ་སོགས་དཔལ་ལྡན་ཟུར་པའི་མཁས་ཤིང་གྲུབ་པ་བརྙེས་པའི་རྡོ་རྗེ་འཛིན་པ་ཟམ་མ་ཆད་པར་བརྒྱུད་པའི་མཐར་སྨིན་གླིང་གཏེར་ཆེན་འགྱུར་མེད་རྡོ་རྗེ་ལ་སྨིན་གྲོལ་རྒྱུད་བཤད་ཀྱི་དབང་ལུང་ཡོངས་སུ་རྫོགས་པའི་བཀའ་བབ། དེ་ལས་གཏེར་ཆེན་བླ་མའི་སྐུ་གསུང་ཐུགས་ཀྱི་སྲས་མཆོག་ཨོ་རྒྱན་སྨིན་གྲོལ་གླིང་གི་ཁྲི་རབས་གཉིས་པ་རྒྱལ་སྲས་འགྱུར་མེད་རྒྱ་མཚོ་དང་། ཁྲི་རབས་གསུམ་པ་རྒྱལ་སྲས་རིན་ཆེན་རྣམ་རྒྱལ། དེ་ཉིད་ཀྱི་རིགས་སྲས་ཨོ་རྒྱན་སྨིན་གྲོལ་གླིང་གི་མཁན་རབས་བཞི་པ་གཅུང་ཨོ་རྒྱན་བསྟན་འཛིན་རྡོ་རྗེ། ཁྲི་རབས་ལྔ་པ་འགྱུར་མེད་ཕྲིན་ལས་རྣམ་རྒྱལ་ལམ་ཕན་བདེའི་རྒྱ་མཚོ། མཁན་རབས་བདུན་པ་རིག་འཛིན་བཟང་པོ་བཅས་ཨོ་རྒྱན་སྨིན་གླིང་གི་ཁྲི་འཛིན་མཁན་རབས་རྣམས་དང་། དེ་ལས་གྲུབ་དབང་རྫོགས་ཆེན་པའི་མཁན་རབས་དང་པོ་སེང་ཕྲུག་པདྨ་བཀྲ་ཤིས་སམ་རྡོ་རྗེ་མྱུ་གུ་རྩལ། མཁན་རབས་གཉིས་པ་རྒྱལ་སྲས་གཞན་ཕན་མཐའ་ཡས་སམ་རང་བྱུང་རིག་པའི་རྡོ་རྗེ། དེ་ཉིད་ལས་མཁན་ཆེན་པདྨ་བཛྲ་དང་། འཇམ་དབྱངས་མཁྱེན་བརྩེའི་དབང་པོ་རྣམ་གཉིས་ལ། རྗེ་འདི་གཉིས་ཀྱི་ཞལ་སྔ་ནས་གྲུབ་དབང་ལྔ་པ་ཐུབ་བསྟན་ཆོས་ཀྱི་རྡོ་རྗེས་སྨིན་གྲོལ་དབང་གི་ཆུ་བོ་མཐའ་དག་ཐུགས་རྒྱུད་བུམ་པ་གང་བྱོའི་ཚུལ་དུ་གསན་ཏེ་རྫོགས་ཆེན་གླིང་སྤྲུལ་བཞི་པ་ཐུབ་བསྟན་ཕྲིན་ལས་རྒྱ་མཚོ་དང་རྫོང་སར་མཁྱེན་བརྩེ་གཉིས་པ་འཇམ་དབྱངས་ཆོས་ཀྱི་བློ་གྲོས་རྣམ་གཉིས་ལ་གནང་ཞིང་། སྔ་མ་ལས་སྨིན་གྲོལ་འཁོར་ལོའི་མགོན་པོ་འབྲུག་སྤྲུལ་བཞི་པ་ཐུབ་བསྟན་མདོ་སྔགས་བཤད་སྒྲུབ་ཆོས་ཀྱི་ཉི་མས་དང་། ཕྱི་མ་ལས་སྐྱབས་རྗེ་པདྨ་སྐལ་བཟང་ངམ་ཐུབ་བསྟན་ལུང་རྟོགས་བསྟན་པའི་རྒྱལ་མཚན་གྱིས་གྲུབ་དབང་དྲུག་པ་འཇིགས་བྲལ་བྱང་ཆུབ་རྡོ་རྗེ་དང་ལྷན་ཅིག་ཏུ་གསན་ཞིང་། རིགས་བདག་བླ་མ་དེ་རྣམ་གཉིས་ཀྱིས་ཐུགས་བརྩེ་བ་ཆེན་པོས་སྔ་འགྱུར་བཀའ་མའི་ཆོས་ཚན་གྱི་དབང་ལུང་ཆ་ཚང་བ་བསྟན་པ་ཡང་དར་གྱི་སྐབས་འདིར་གདན་ས་འདི་ནས་ལན་གྲངས་དུ་མའི་བར་བསྩལ་བ་བདག་ཅག་གི་ཆོས་སྐལ་དུ་ཐོབ་པའི་རྟེན་འབྲེལ་ལེགས་ཚོགས་དུས་ལས་མ་ཡོལ་བ་བྱུང་ཞིང་། དེ་མཚུངས་གཏེར་ཆེན་འགྱུར་མེད་རྡོ་རྗེ་ལས་རྫོགས་ཆེན་གཉིས་པ་འགྱུར་མེད་ཐེག་མཆོག་བསྟན་འཛིན་གྱིས་སྔ་འགྱུར་བཀའ་མའི་ཆོས་ཚུལ་གྱི་སྨིན་ཁྲིད་མ་ལུས་པ་གསན་ཞིང་འཆད་སྤེལ་མཛད་པའི་བརྒྱུད་པའང་གྲུབ་དབང་ལྔ་པ་ནས་ཆུ་བོ་གཅིག་འདྲེས་སུ་བཞུགས་པ་རིང་ལུགས་འཛིན་པ་ཀུན་ཀྱིས་མཁྱེན་པར་འཚལ་ཞིང་། དེ་ལས་ཞིབ་པར་བཀའ་མ་རྩ་བའི་མཆོད་ཁག་སོ་སོའི་སྨིན་བྱེད་དབང་གི་བརྒྱུད་པ་ཅུང་ཟད་མི་འདྲ་བའི་ཁྱད་པར་དང་བཅས་རྒྱལ་སྲས་གཞན་ཕན་མཐའ་ཡས་ཀྱི་ཞལ་སྔ་ནས་མཛད་པའི་བརྒྱུད་འདེབས་རྣམས་སུ་གསལ་བས་འདིར་ཡི་གེ་མང་དུ་དོགས་ཏེ་མ་བྲིས། གཞན་ཡང་རྒྱལ་སྲས་གཞན་ཕན་མཐའ་ཡས་ནས་འཇམ་དབྱངས་མཁྱེན་བརྩེའི་དབང་པོ་དང་། བདག་ཉིད་ཆེན་པོ་དེ་ལས་འཇམ་མགོན་བློ་གྲོས་མཐའ་ཡས་དང་། ཀཿཐོག་སི་ཏུ་ཆོས་ཀྱི་རྒྱ་མཚོ། ཞེ་ཆེན་རྒྱལ་ཚབ་འགྱུར་མེད་པདྨ་རྣམ་རྒྱལ་བཅས་དང་། དེ་རྣམས་ལས་མཁྱེན་བརྩེ་ཆོས་ཀྱི་བློ་གྲོས་ལ། རྗེ་དེ་ཉིད་ལས་སྐྱབས་རྗེ་དིལ་མགོ་མཁྱེན་བརྩེ་རབ་གསལ་ཟླ་བས་གསན་ཏེ་འཆད་སྤེལ་གྱི་ཕྲིན་ལས་ཕྱོགས་བརྒྱར་འཕེལ་ཚུལ་སོ་སོའི་བརྒྱུད་འདེབས་ཀྱི་ཡིག་ཆ་དག་ཏུ་གསལ་བ་ལྟར་ལ། གདན་ས་ཆེན་མོ་འདི་ཉིད་དུ་གྲུབ་དབང་སྐུ་ཕྲེང་གསུམ་པ་ངེས་དོན་བསྟན་འཛིན་བཟང་པོ་མཆོག་གིས་སྔ་འགྱུར་བཀའ་མའི་མཆོད་ཁག་བཅུ་གསུམ་གྱི་སྒྲུབ་འཕྲིན་དབྱངས་རོལ་གར་འཆམ་དང་བཅས་པའི་ཕྱག་བཞེས་རང་རྐང་ཐུབ་པ་གསར་དུ་བཙུགས་པ་དང་། དེ་རྗེས་ཁྱབ་བདག་བཀའ་འགྱུར་པ་རྒྱལ་སྲས་གཞན་ཕན་མཐའ་ཡས་ནས་སྔ་འགྱུར་བཀའ་མའི་ཆོག་ཕྲིན་གླེགས་བམ་དགུ་བཀའ་བསྡུ་མཛད་ཅིང་འཆད་སྤེལ་མཛད་པའི་ཕྲིན་ལས་མཐའ་ཡས་པ་དང་། གྲུབ་དབང་ལྔ་པ་ཐུབ་བསྟན་ཆོས་ཀྱི་རྡོ་རྗེས་སྔ་འགྱུར་བཀའ་གཏེར་གྱི་མཆོད་ཁག་བརྒྱད་ཅུ་ལྷག་ཏུ་ཁ་སྣོན་མཛད་པ་བཅས་སྔ་འགྱུར་བསྟན་པའི་ཆུ་འགོ་གྲུབ་དབང་རྫོགས་ཆེན་པ་ཞེས་མཚན་སྙན་དོན་ལ་གནས་པའི་ཕྲིན་ལས་ནམ་མཁའི་མཐའ་དང་མཉམ་པ་བྱུང་ངོ་། །
༢༽ སྒྲུབ་སྡེ་གཏེར་མའི་བརྒྱུད་པ།
གཉིས་པ་སྒྲུབ་སྡེ་གཏེར་མའི་བརྒྱུད་པ་ནི། དེ་ཡང་དཔལ་ཨོ་རྒྱན་གྱི་སློབ་དཔོན་ཆེན་པོ་པདྨ་འབྱུང་གནས་ལ་བཀའ་བབ་རིག་འཛིན་ཆེན་པོ་བརྒྱད་ཀྱི་ནང་ནས་ཁྱད་པར་དུ་འཕགས་པའི་སྒྲུབ་ཆེན་བརྒྱད་ཀྱི་བཀའ་ཡོངས་སུ་རྫོགས་པ་བབ་ཚུལ་གོང་དུ་རྒྱས་པར་སོང་བ་ལྟར་ལ། སློབ་དཔོན་ཆེན་པོ་ཉིད་མངའ་བདག་ཆོས་ཀྱི་རྒྱལ་པོ་ཁྲི་སྲོང་ལྡེའུ་བཙན་གྱི་བཀས་བོད་ཡུལ་དུ་སྤྱན་དྲངས་པའི་ཚེ། བསམ་ཡས་མཆིམས་ཕུའི་བྲག་དམར་ཀེའུ་ཚང་དུ་རྗེ་འབངས་ཐུགས་ཀྱི་སྲས་དགུ་ལ་སྒྲུབ་པ་བཀའ་བརྒྱད་ཀྱི་དཀྱིལ་འཁོར་དུ་དབང་བསྐུར་བ་ན་སོ་སོའི་རིགས་ཀྱི་མེ་ཏོག་ཡི་དམ་ལ་ཕོག་ཅིང་གྲུབ་པ་ཐོབ་པ་སྟེ། མངའ་བདག་བཙད་པོས་ཆེ་མཆོག་སྒྲུབ་པས་ཏིང་འཛིན་ཁྱད་པར་ཅན་སྐྱེས་ཤིང་སྒོམ་བྱུང་གི་ཤེས་རབ་ཀློང་དུ་བརྡོལ་བས་བཀའ་ཡང་དག་པའི་ཚད་མའི་བསྟན་བཅོས་མཛད། ནམ་མཁའི་སྙིང་པོས་ཡང་དག་གྲུབ་པས་ཉི་མའི་ཟེར་ལ་བཅིབས། སངས་རྒྱས་ཡེ་ཤེས་ཀྱིས་འཇམ་དཔལ་གྲུབ་པས་བྲག་ལ་ཕུར་པ་ཐེབས། རྒྱལ་བ་མཆོག་དབྱངས་ཀྱིས་དབང་ཆེན་གྲུབ་པས་དབུ་གཙུག་ནས་རྟ་མགོ་འབྱིན་ཅིང་རྟ་སྐད་སྒྲོགས། མཁར་ཆེན་བཟས་ཕུར་པ་གྲུབ་པས་བསད་པ་གསོས། དཔལ་གྱི་སེང་གེས་མཆོད་བསྟོད་གྲུབ་པས་སྡེ་བརྒྱད་མངག་གཞུག་ཏུ་ཁོལ། བཻ་རོ་ཙཱ་ནས་དྲག་སྔགས་གྲུབ་པས་ཡེ་ཤེས་ཀྱི་སྤྱན་དང་ལྡན་ཞིང་རྫུ་འཕྲུལ་ལ་མངའ་བརྙེས་པ་བྱུང་བ་དང་། སླར་ཡང་ཕྱི་རབས་གདུལ་བྱའི་དོན་དུ་དགོངས་ཏེ་བཀའ་རྟགས་ཕྱག་རྒྱའི་རྒྱ་ཡིས་ཡོངས་སུ་བཏབ་ནས་ཟབ་གཏེར་དུ་སྦས་པར་མཛད་ཅིང་། ཕྱིས་སུ་མངའ་བདག་ཆོས་ཀྱི་རྒྱལ་པོའི་སྐྱེ་ཕྲེང་བཅུ་དྲུག་པ་གཏེར་སྟོན་རྒྱལ་པོ་ལྔ་དང་མཆོག་གི་སྤྲུལ་སྐུ་རྣམ་གསུམ་ཞེས་གྲགས་པའི་དང་པོ་ཉང་ཉི་མ་འོད་ཟེར་གྱིས་མཁོ་མཐིང་རྣམ་སྣང་གི་སྐུ་རྒྱབ་ནས་གཏེར་སྒྲོམ་སྨུག་པོ་དང་སྐྱ་བོ་གཉིས་སྤྱན་དྲངས་པའི་སྨུག་པོའི་ནང་ནས་བཀའ་བརྒྱད་བདེ་གཤེགས་འདུས་པའི་རྒྱུད་ལུང་མན་ངག་དང་བཅས་པའི་ཆོས་ཚན་བརྒྱ་དང་སུམ་ཅུ་བཀོད་པ་ལོ་ཆེན་བཻ་རོ་ཙ་ན་དང་། ཡིག་མཁན་ལྡན་མ་རྩེ་མང་གི་ཕྱག་བྲིས་ཆོས་ཀྱི་རྒྱལ་པོ་ཉིད་ཀྱི་ཕྱག་དཔེ་འཁྲུལ་མེད་བྱུང་ཞིང་། རྗེ་འདི་ཉིད་ལ་བདེ་གཤེགས་འདུས་པ་བཀའ་གཏེར་ཉེ་རིང་གི་ཆོས་ཚུལ་ཐམས་ཅད་ཀྱི་བཀའ་བབ་པས་དེ་ནས་བཟུང་བཀའ་གཏེར་ཆུ་བོ་གཅིག་འདྲེས་ཀྱི་བརྒྱུད་པ་བྱུང་། དེ་ལས་སྲས་འགྲོ་མགོན་ནམ་མཁའ་ནས་གུ་རུ་ཆོས་ཀྱི་དབང་ཕྱུག་ལ་བཀའ་ལུང་གཏད་རྒྱ་དང་བཅས་པའི་ཚུལ་གྱིས་བསྩལ་ཅིང་། གཏེར་སྟོན་རྒྱལ་པོ་ལྔ་དང་མཆོག་གི་སྤྲུལ་སྐུ་གསུམ་དུ་གྲགས་པའི་གཉིས་པ་གུ་རུ་ཆོས་དབང་འདི་ནི་མངའ་བདག་ཉང་གི་སྐུ་སྐྱེ་དེ་མ་ཐག་པར་གྲགས་ཤིང་། ལྷོ་གཏེར་སྨིན་པ་འབྲས་བུ་ལྟ་བུའི་ཆོས་སྐོར་དུ་མ་གཏེར་གནས་ལས་སྤྱན་དྲངས་པ་དང་། ཁྱད་པར་མཁའ་འགྲོ་ཡེ་ཤེས་མཚོ་རྒྱལ་གྱི་རྣལ་རོལ་སྤྲུལ་པའི་གཏེར་སྟོན་ཇོ་མོ་སྨན་མོ་གསང་བའི་ལས་རྒྱར་བཞེས་པའི་རྟེན་འབྲེལ་ལས་སྔར་མ་བྱུང་བའི་ཟབ་ཆོས་བཀའ་བརྒྱད་རྣམ་གསུམ་དུ་གྲགས་པའི་ཡ་གྱལ་བཀའ་བརྒྱད་གསང་བ་ཡོངས་རྫོགས་ཀྱི་ཆོས་སྐོར་གཏན་ལ་ཕབ་ཅིང་ཐུགས་སྲས་སྨན་ལུང་པ་མི་བསྐྱོད་རྡོ་རྗེ་སོགས་ལ་གཏེར་ཁ་གོང་འོག་གི་ཆོས་བཀའ་བསྩལ། དེ་ནས་རིམ་པར་མངའ་རིས་པཎ་ཆེན་པདྨ་དབང་རྒྱལ་སོགས་མཁས་ཤིང་གྲུབ་པ་བརྙེས་པའི་རྡོ་རྗེ་འཛིན་པ་ཟམ་མ་ཆད་པ་ལ་བརྒྱུད་དེ་མཐར་ཆོས་རྗེ་སྨིན་གླིང་ཡབ་སྲས་ལ་བཀའ་བབ་ཅིང་། བདག་ཉིད་ཆེན་པོ་མེས་དབོན་དེ་རྣམས་ཀྱིས་ལས་བྱང་བསྙེན་ཡིག་དབང་ཆོག་སོགས་ཆོས་སྐོར་འདིའི་ཡིག་ཆ་དུ་མ་མཛད་ཅིང་དབང་ཁྲིད་སྒྲུབ་འཕྲིན་གྱི་སྒོ་ནས་ཕྱོགས་བརྒྱར་སྤེལ་བའི་མཛད་པ་ཤིན་ཏུ་རྒྱ་ཆེ། དེ་བཞིན་ངོ་མཚར་བཀའ་བབ་བདུན་ལྡན་མཁྱེན་བརྩེའི་དབང་པོ་པདྨ་འོད་གསལ་མདོ་སྔགས་གླིང་པ་ལ་རིང་བརྒྱུད་དང་ཉེ་བརྒྱུད་ཡང་གཏེར་རྗེས་དྲན་སོགས་ཀྱི་སྒོ་ནས་བཀའ་བབ་ཅིང་འཇམ་མགོན་ཀོང་སྤྲུལ་ཡོན་ཏན་རྒྱ་མཚོ་ལ་གནང་། བདག་ཉིད་ཆེན་པོ་དེས་གྲུབ་དབང་རྫོགས་ཆེན་ལྔ་པ་ཐུབ་བསྟན་ཆོས་ཀྱི་རྡོ་རྗེ་ལ་དབང་ལུང་ཆིག་རྫོགས་སུ་བསྩལ་ཏེ་དོན་བརྒྱུད་གྱི་བསྟན་པ་གཏད། གྲུབ་དབང་རིན་པོ་ཆེ་ལས་རྫོགས་ཆེན་གླིང་སྤྲུལ་བཞི་པ་ཐུབ་བསྟན་ཕྲིན་ལས་རྒྱ་མཚོས་གསན་པ་དང་། དམ་པ་དེ་ལས་འབྲུག་སྤྲུལ་བཞི་པ་ཐུབ་བསྟན་མདོ་སྔགས་བཤད་སྒྲུབ་ཆོས་ཀྱི་ཉི་མས་དབང་ལུང་གྲོལ་ཁྲིད་དང་བཅས་པ་ཡོངས་སུ་ཚང་བ་གསན་ཞིང་། སྨིན་གྲོལ་འཁོར་ལོའི་མགོན་པོ་དེ་ཉིད་ཀྱི་ཞལ་སྔ་ནས་ལེགས་སྦྱར་གྱི་སྐད་དུ་ཙི་ཏྲ་ཞེས་པ་སྟོད་འགྲེལ་ལྟར་ན་སྣ་ཚོགས། འབྱུང་རྩིས་པའི་དབང་ཐང་དང་བསྟུན་ན་རབ་བྱུང་བཅུ་བདུན་པའི་ཆུ་ཕོ་རྟ་ཡི་ལོའི་དབྱར་འབྲིང་པོའི་ཚེས་བཅོ་ལྔ་ནས་སྟོན་ར་བའི་བཅོ་ལྔའི་བར་དུ། མཁས་དང་གྲུབ་པའི་འབྱུང་གནས་དཔལ་སེང་གེ་རིའི་ཆོས་སྡེ་ཆེན་མོར་བདག་ཅག་འདུས་པ་ཆིག་སྟོང་ལྷག་ལ་རིན་ཆེན་གཏེར་གྱི་མཛོད་ཆེན་མོའི་སྨིན་དབང་མ་ལུས་པ་བསྩལ་ཞིང་། ལོ་དེའི་ཕྱི་ལོར་རྒྱབ་རྟེན་ལུང་གི་རྒྱུན་ཡོངས་སུ་སྤེལ་བའི་བཀའ་དྲིན་བསྐྱངས་པ་ཡང་སྐལ་བ་བཟང་པོའི་བགོ་སྐལ་དུ་ཐོབ་པ་བྱུང་ངོ་། །