གཉིས་པ་སྤང་བྱ་མི་མཐུན་པའི་ཕྱོགས་ངོ་ཤེས་པའི་སྒོ་ནས་བསྲུང་བ།

གཉིས་པ་སྤང་བྱ་མི་མཐུན་པའི་ཕྱོགས་ངོ་ཤེས་པའི་སྒོ་ནས་བསྲུང་བ་ལ།

སྤང་བར་བྱ་བ་ལྡོག་པའི་ཚུལ་ཁྲིམས་དང༌། བསླབ་པར་བྱ་བ་འཇུག་པའི་ཚུལ་ཁྲིམས་དང་གཉིས་ལས།དང་པོ་ལ་རྣམ་འབྱེད་རྣམ་གཉིས་ཀྱི་སྐབས་བྱེ་བྲག་ཏུ་བསྟན་པ་དང༌། ཞུ་བ་ཕལ་ཆེ་བའི་སྐབས་སྤྱིར་བསྟན་པ་དང་གཉིས། དང་པོ་ལ། རྣམ་འབྱེད་རྣམ་གཉིས་ཀྱི་ཐུན་མོང་བ་བསླབ་པ་ཕུལ་བའི་ལེའུ་དང༌། དགེ་སློང་ཕ་མའི་རྣམ་འབྱེད་སོ་སོར་བསྟན་པ་དང་གཉིས་ལས། དང་པོ་ལ་སྡོམ་པའི་གཏོང་རྒྱུ་རྣམས་སྤྱིར་གཏན་ལ་དབབ་པ་དང༌། བྱེ་བྲག་ཏུ་བསླབ་པ་འབུལ་བའི་དོན་བཤད་པ་དང་གཉིས་ལས། དང་པོ་ལ་སྡོམ་པའི་གཏོང་རྒྱུ་རྣམས་ཀྱི་དབྱེ་བ་དང་སྡོམ་པ་གཏོང་བའི་ཚུལ་ལུགས་དང་གཉིས་ལས། དང་པོ་ལ་དབྱེ་བ་དངོས་དང༌། དེ་དག་རྒྱུར་འཇོག་པའི་ཚུལ་དང༌། དབྱེ་བ་ལ་སྒྲོ་འདོགས་དགག་པ་དང་གསུམ། དང་པོ་ནི་གཞུང་རྣམས་ལས་བཅུ་གསུངས་ཏེ། དེ་ཡང་མཛོད་ལས། བསླབ་པ་ཕུལ་དང་ཤི་འཕོས་དང༌། ། མཚན་གཉིས་དག་ནི་བྱུང་བ་དང༌། །རྩ་བ་ཆད་དང་མཚན་འདས་ལས། །སོ་སོ་ཐར་པའི་སྡོམ་པ་གཏོང༌། །ཞེས་གཏོང་རྒྱུ་ལྔ་གསུངས་ལ། ལོ་ཉི་ཤུ་མ་ལོན་པ་ཉིད་ན་མ་ལོན་པར་ཤེས་པ་ལ་སོགས་དང༌། བསླབ་པ་ཉམས་པར་བྱས་པ་དང༌། མཚན་ལན་གསུམ་གྱུར་པ་དང༌། མཚན་ཉམས་པར་འགྱུར་བ་བརྟེན་པ་དང༌། ཟ་མར་གྱུར་པ་འགྱུར་བ་བརྟེན་པ་དང་བཅུའོ། །དེ་ཡང་དང་པོ་ལྔ་ནི་མཛོད་ལས་གསལ་ལ། དྲུག་པ་ནི། ཤེས་ན་ནི་དེ་ཞིག་གོ། །ཞེས་པས་སོ། །བསམ་པ་ཙམ་གྱིས་སྡོམ་པ་བཏང་སྟེ། ཊཱི་ཀ་ལས་བཤད་དོ། །འདི་ནི་དགེ་སློང་གི་སྡོམ་པ་བཏང་བ་སྟེ། དགེ་ཚུལ་ལ་སོགས་པ་ནི་མ་ཡིན་ནོ། །ཁྱིམ་སོ་བཟུང་བ་ལོ་བཅུ་གཉིས་མ་ལོན་པ་ལ་ལོན་པར་འདུ་ཤེས་ཏེ། བསྙེན་པར་རྫོགས་ནས་ལོ་བཅུ་གཉིས་མ་ལོན་པ་ཉིད་དུ་ཤེས་པ་དང༌། ལོ་བདུན་མ་ལོན་པ་ལ་ལོན་པར་འདུ་ཤེས་ཏེ། དགེ་ཚུལ་དུ་གྱུར་ན་ལོ་བདུན་མ་ལོན་པར་ཤེས་ན་ཡང་སྔ་མ་དང་རྒྱུ་མཚན་མཚུངས་པར་རིགས་སོ། །འོ་ན་མངོན་པ་ལས་འདི་མ་བགྲངས་པའི་རྒྱུ་མཚན་ཅི་ཞེ་ན། རྣམ་འབྱེད་འགྲེལ་བ་ལས། ཆོས་མངོན་པ་ལས་འདི་སྡོམ་པ་གཏོང་བའི་རྒྱུ་ཉིད་དུ་མ་བགྲངས་པ་ནི་མ་ངེས་པའི་ཕྱིར་རོ། །ཞེས་སོ། །འདིའི་དོན་ནི་སྐྱེས་ནས་ལོ་བཅུ་བཞི་ལོན་པ་ལྟ་བུ་ལ་དེར་ཤེས་ཀྱང་དགེ་སློང་གི་སྡོམ་པ་གཏོང་བར་མ་ངེས་པའི་ཕྱིར་ཞེས་པ་སྟེ། གཞུང་དེ་ཉིད་ལས། མངལ་ན་གནས་པའི་ཟླ་བ་དག་ཀྱང་ལས་ཀྱི་དབང་གིས་མང་ཉུང་མ་ངེས་པའི་ཕྱིར་རོ། །ཞེས་གསུངས་སོ། །སྒྲ་གཅན་ཟིན་མངལ་དུ་ལོ་དྲུག་བཞུགས་པར་ལུང་གཞི་ལས་གསུངས་པ་ལྟ་བུའོ། །བདུན་པ་ནི། མ་མོ་ལས། བསླབ་པ་ཕུལ་བ་དང་བསླབ་པ་ཉམས་པར་བརྗོད་པ་གཉིས་ནི། ངག་ཏུ་བརྗོད་པ་ཙམ་ལ་ཡང་ཁྱད་པར་མེད་ཅིང་སྡོམ་པ་སྤོང་བ་ལ་ཡང་ཁྱད་པར་མེད་དེ། གཅིག་གིས་ཀྱང་སྡོམ་པ་གཏོང་བར་འགྱུར་ཞིང༌། གཉིས་ཀྱིས་ཀྱང་དེ་བཞིན་ནོ། །ཞེས་གསུངས་ལ། རྣམ་འབྱེད་འགྲེལ་བ་ལས། བསླབ་པ་ཉམས་པར་བྱས་ན་མ་ཕུལ་དུ་ཟིན་ཀྱང་དེ་ལ་ཡང་དགེ་སློང་གི་དངོས་པོ་ཉིད་མེད་དོ། །ཞེས་སོ། །བརྒྱད་པ་ནི། རྩ་བར། མཚན་ལན་གསུམ་དུ་གྱུར་པ་ཡང་མ་ཡིན་ནོ། །ཞེས་སོ། །དགུ་པ་ནི། རྩ་བར། འདི་ལས་ཐ་མ་ནི་ཉེས་པ་བསྟེན་ན་བསྙིལ་བའོ། །ཞེས་དང༌། དེའི་ཊཱི་ཀ་ལས། ཉམས་པའི་མ་ནིང་ནི་ཉེས་པ་བསྟེན་ན་དེའི་ཚེ་དགེ་སློང་གི་དངོས་པོའི་སྣོད་མ་ཡིན་པར་གྱུར་པས། ཞེས་སོ། །བཅུ་པ་ནི། རང་གི་རྣམ་བཤད་དང་ཊཱི་ཀ་ལས་ཟ་མ་སྡོམ་པའི་ཞིང་མ་ཡིན། ཞེས་དང༌། མཛོད་འགྲེལ་ལས། ཟ་མ་ལ་སོགས་པ་ལ་སྡོམ་པ་མེད་དོ། །ཞེས་པས་གྲུབ་བོ། །གློ་བུར་དུ་ཟ་མར་གྱུར་པ་ནི། གཞི་འགྲེལ་ལས། ཟ་མ་ནི་རླིག་པ་ཕྱུང་བའི་ཉེས་པས་མཐུ་ཉམས་པའོ། ཞེས་གསུངས་སོ། །དགེ་སློང་ལས་གློ་བུར་དུ་ཟ་མར་གྱུར་ན། འགྱུར་བ་བསྟེན་ན་སྡོམ་པ་ཉམས་ལ་མི་བསྟེན་ན་ནི་མི་གཏོང་སྟེ། ཞུ་འགྲེལ་ལས།ཡན་ལག་སྐྱེས་པ་བཅད་པ་ལ་སོགས་པས་ཉམས་པ་ནི་ཇི་སྲིད་དུ་འགྱུར་བ་མི་བསྟེན་པ་དེ་སྲིད་དུ་དགེ་སློང་ཡིན་ལ་ཟ་མ་ལ་ཡང་དེ་དང་འདྲའོ། །ཞེས་གསུངས་སོ། །