དབང་བསྐུར་བའི་རབ་ཏུ་བྱེད་པ།
འོད་སྲུང་གཞོན་ནུ།
བཅོམ་ལྡན་འདས་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །བུམ་པའི་དབང་བསྐུར་དང་པོ་སྟེ། །གཉིས་པ་གསང་བའི་དབང་བསྐུར་བ། །ཤེས་རབ་ཡེ་ཤེས་གསུམ་པ་སྟེ། །བཞི་པ་ཡང་ནི་དེ་བཞིན་ནོ། །ཞེས་བྱ་བ་ལ། འདིར་བཞི་པ་ཡང་ནི་དེ་བཞིན་ནོ་ཞེས་བྱ་བ་དབང་བསྐུར་བཞི་པོ་ཡང་ལོག་པར་བསྒྲུབ་པ་མང་པོ་ཡོད་པས་གཞུང་རྣམས་མང་པོར་འདོད་པའི་གཞུང་སྟེ། དང་པོར་བསྟན་ནས་རང་གི་འདོད་གཞུང་ཕྱིས་བསྟན་པར་བྱའོ། །ལ་ལ་ནི་ཤེས་རབ་དང་ཡེ་ཤེས་ཀྱི་རྗེས་ཐོགས་ལ། བྱང་ཆུབ་ཀྱི་སེམས་མྱང་བ་ནི་བཞི་པ་ཡིན་ནོ་ཞེས་ཟེར་རོ། །གཞན་དག་ནི་ཤེས་རབ་ཡེ་ཤེས་ཀྱི་རྫས་ཐོགས་ལ་ཡང་ཤེས་པ་མྱང་བར་བྱ་བ་ནི་བཞི་པ་ཡིན་པར་འདོད་དོ། །ཡང་གཞན་དག་ནི་ཤེས་རབ་དང་ཡེ་ཤེས་ཀྱི་རྗེས་ཐོགས་ལ་སློབ་དཔོན་གྱི་སློབ་མ་ལ་རྡོ་རྗེ་ཉི་མ་ནུས་པ་དང་ཞེས་བྱ་བ་ལ་སོགས་པའི་ཚིགས་སུ་བཅད་པའི་དོན་གོ་བར་བྱ་བ་བཞི་པ་ཡིན་ནོ་ཞེས་ཟེར་རོ། །ཁ་ཅིག་ནི་ཤེས་རབ་དང་ཡེ་ཤེས་ཀྱི་རྗེས་ལ་ནོར་བུའི་བུག་དང༌། ཡང་དག་པར་རེག་པས་བྱང་ཆུབ་ཀྱི་སེམས་བཅས་པས་ཉེ་བར་དམིགས་པ་ཐམས་ཅད་ལས་ལྡོག་པ་ནི་བཞི་པ་ཡིན་ནོ་ཟེར་རོ། །ལ་ལ་དག་ནི་ཤེས་རབ་དང་ཡེ་ཤེས་ལ་ནོར་བུའི་མཐར་བྱང་ཆུབ་ཀྱི་སེམས་བབས་པ་ན་དམིགས་པའི་རྟོགས་པ་ཐམས་ཅད་དང་བྲལ་བ་ནི་བཞི་པ་ཡིན་ནོ་ཞེས་ཟེར་རོ། །ལ་ལ་ནི་ཤེས་རབ་དང་ཡེ་ཤེས་ཀྱི་རྗེས་ལ་དང་པོ་བྱང་ཆུབ་ཀྱི་སེམས་བབས་པ་ན་ཉེ་བར་དམིགས་པ་ཐམས་ཅད་དང་བྲལ་བ་ནི་བཞི་པ་ཡིན་ནོ་ཞེས་ཟེར་རོ། །གཞན་དག་ནི་ཤེས་
རབ་ཡེ་ཤེས་ཀྱི་རྗེས་ལ་ནམ་མཁའ་དབྱིངས་སུ་བྱང་ཆུབ་ཀྱི་སེམས་མ་ལུས་པར་བབས་པ་ན་བཏང་སྙོམས་ཀྱི་སྐབས་ནི་བཞི་པ་ཡིན་པར་འདོད་དོ། །འདི་དག་ཐམས་ཅད་ནི་དོར་བར་བྱའོ། །ལ་ལ་དག་ཤེས་རབ་དང་ཡེ་ཤེས་ཀྱི་དབང་བསྐུར་བྱིན་པའི་རྗེས་ལ་སློབ་མ་ཚིག་གིས་དེའི་དོན་བསྟན་ཞིང་རྗེས་སུ་གནང་བའི་དབང་བསྐུར་བ་ནི་བཞི་པ་ཡིན་པར་འདོད་དོ། །རྗེས་སུ་གནང་བའི་དབང་བསྐུར་བའི་དོན་དུ་རྗེས་དེ་ཕྱི་ནས་ཡེ་ཤེས་ཀྱི་རྗེས་སུ་གནང་བའི་དབང་བསྐུར་བ་ཡིན་ནོ། །བསྒྲུབ་བྱ་སྒྲུབ་པར་ཡང་དག་སྦྱོར། །གང་ཡིན་དེ་ནི་བསྙེན་པར་བཤད། །རྡོ་རྗེ་པདྨ་མཉམ་སྦྱོར་བ། །ཉེ་བར་བསྒྲུབ་པ་ཞེས་བཤད་དོ། །ཡི་གེ་ཧཱུཾ་དང་ཕཊ་ལྡན་པར། །བསྐྱེད་པ་བསྒྲུབ་པ་ཞེས་བཤད་ལ། །ངོ་བོ་ཉིད་ཞི་བདེ་བ་ནི། །སྒྲུབ་པ་ཆེན་པོ་ཞེས་བཤད་དོ། །ཞེས་བྱ་བ་རྫོགས་པའི་རིམ་པ་ལ་ཚིགས་སུ་བཅད་པ་འདིས་ཡན་ལག་བཞི་ཇི་ལྟ་བ་བཞིན་དུ་བྱ་བ་ནི་ཤེས་རབ་དང་ཡེ་ཤེས་ཀྱི་དབང་བསྐུར་བ་བཞི་པ་ཡིན་ནོ་ཞེས་བླ་མ་ཁ་ཅིག་ཁོ་ན་འཆད་དོ། །སངས་རྒྱས་ཡེ་ཤེས་ལ་སོགས་པའི་བླ་མ་ཆན་པོ་དག་ནི། དབང་བསྐུར་བ་གསུམ་པ་ནི་འདིར་དེ་ཡང་དེ་བཞིན་ནོ་ཞེས་གསུངས་པའི་དབང་བསྐུར་བ་བཞི་པ་གང་མ་ཡིན་ཏེ། ཡང་བསྒྲུབ་པར་བྱ་བའི་འབྲས་བུའི་ངོ་བོ་དེ་ཁོ་ན་ཉིད་བཤད་པ་ཡིན་པར་བཞེད་དོ། །སངས་རྒྱས་ཡེ་ཤེས་ཀྱི་ཞལ་སྔ་ནས་ཀྱི་གཞུང་འདི་ཉིད་ནི་གཟུང་བར་བྱ་སྟེ། ནམ་མཁའ་དབྱིངས་སུ་བྱང་ཆུབ་ཀྱི་སེམས་བབས་པ་དང༌། མཆོག་ཏུ་དགའ་བའི་བར་མཚམས་སུ་ཉེ་བར་དམིགས་པ་ཐམས་ཅད་དང་བྲལ་བ་གང་ཡིན་པ་དེ་ནི་དབང་བསྐུར་བ་བཞི་པ་སྟེ། རྡོ་རྗེ་འཆང་འདུས་པའི་ངོ་བོ་ཉིད་ཡིན་ཞིང་རྫོགས་པའི་རིམ་པའི་ཕྱོགས་ཀྱི་སྒྲུབ་པ་དང་བསྒྲུབ་པར་བྱ་བའི་ཡང་དག་པར་སྦྱོར་བའི་དུས་སུ་བཅད་པའི་དོན་བརྡ་སྤྲོད་པར་གྱུར་པས་དབང་བསྐུར་བའི་བཞི་པ་རྡོ་རྗེ་འཆང་འདུས་པའི་ཚུལ་ཉིད་ཀྱིས་མན་ངག་སྟོན་པ་ཡིན་པར་བལྟ་བར་བྱའོ། །དབང་བསྐུར་བའི་རབ་ཏུ་བྱེད་པ་ནི་དེ་ལྟར་བསྟན་པ་ཡིན་ནོ། །སློབ་དཔོན་མཁས་པ་ཆེན་པོ་བསོད་སྙོམས་པ་དགེ་སློང་འོད་སྲུངས་གཞོན་ནུའི་ཞལ་སྔ་ནས་མཛད་པ་རྫོགས་སོ།། །།རྒྱ་གར་གྱི་
མཁན་པོ་ཏ་ཐཱ་ག་ཏ་རཀྵི་ཏ་དང༌། ཞུ་ཆེན་གྱི་ལོ་ཙཱ་བ་བནྡྷྭེ་རིན་ཆེན་བཟང་པོས་བསྒྱུར་བའོ།།