༢ ཎྜིའི་རྒྱུ་ནི།
རྒྱུ་གནྜིའི་མདོ་ལས་གསུངས་པ་ལྟར། ༡ ཙན་དན་དཀར་བོ། ༢ བིལ་བ(འབྲས་སུ་ཚིག་རུས་ཅན་གྱི་ཤིང་ཏོག་ཀ་པེད)། ༣ པཱ་ལ་ཤ(ཀེང་ཤུ་ཀ་སྟེ་རྒྱ་སྐྱེགས་ཤིང་། ) ༤ ཨ་ཤད་ཐ། ༥ ཙན་དན་དམར་བོ། ༦ སྟར་ཁ། ༧ ཏཱ་ལ(རྩེ་མོ་བཅད་ན་སླར་མི་སྐྱེ་བའི་ཤིང་ཞིག)། ༨ ཀེང་ཤུ་ཀ ༩ ཤཱ་བ། ༡༠ ཏཱ་མ་ལ། ༡༡ ཨ་མྲ། ༡༢ སྟར་བུ། ༡༣ སྐྱུ་རུ་ར། ༡༤ རིན་ཏི་ས་ར། ༡༥ ཨ་ཤྭ་ཀ ༡༦ འོ་མ་སེ་ཤིང་ངོ་། །བོད་རང་ལ་མཚོན་ན་སྟར་བུ་དང་སྟར་ཁ་ནི་རྙེད་སླ་ཞིང་། རྒྱ་ཤུག་དང་སྟག་པ་ལས་ཀྱང་བྱ་རུང་བར་ཀུན་མཁྱེན་མཚོ་སྣ་བས་གསུངས་སོ། །ཡོངས་གྲགས་སུ་སེང་ལྡེང་དུ་འབོད་པ་དེས་བཟོས་ན་ལེགས་པར་གསུངས། རྟེན་འབྲེལ་གྱི་ཡན་ལག་བཞི་ཡང་དག་པར་མཚོན་པའི་གཎྜི་རྣམ་པ་བཞི་སྟེ། དྲོད་རྣམ་པར་དག་པའི་གཎྜི། རྩེ་མོ་མངོན་རྟོགས་རྣམ་པར་དག་པའི་གཎྜི། བཟོད་པའི་རྣམ་པར་དག་པའི་གཎྜི། ཆོས་མཆོག་གི་རྣམ་པར་དག་པའི་གཎྜིའོ། །
༣ ཚད་དབྱིབས་ནི། གཎྜིའི་མདོ་ལས། ཚད་ནི་མཆུ་རུ་སོར་ཚད་ཀྱི། །བརྒྱད་ཅུ་རྩ་བཞི་ཉིད་བྱ་ཞིང་། །ཞེང་ནི་སོར་ནི་དྲུག་པ་སྟེ། །དཔངས་སུ་ཡང་ནི་གཉིས་བྱའོ། །སོར་མོ་ཚིགས་ཀྱི་ཚད་དག་ནི། །ཟུར་བཞིའི་ཚད་ནི་གཉིས་པ་ཡིན། །ལེགས་མཉམ་ཉིད་དང་ཤིན་ཏུ་གསལ། །རྩེ་གཉིས་སྦལ་བའི་མགོ་བཞིན་ནོ། །ཞེས་དང་། ཀློང་རྡོལ་བླ་མས། གཎྜི་ཆེ་བ་སོར་བརྒྱ་དང་བརྒྱད། གཎྜི་ཆུང་བ་སོར་བརྒྱད་ཅུ་རྩ་བཞི། དེ་གཉིས་ཀྱི་བར་ནི་འབྲིང་ཚདཡིན། ཁ་ཞེང་སོར་དྲུག སྲབ་མཐུག་སོར་གཉིས། སྤོང་བ་པའི་གཎྜི་ཆུང་བ་སོར་ཉེར་བཞི། སྲབ་མཐུག་ཁ་ཞེང་དག་ཆེ་བ་དང་འདྲའོ། །ཞེས་སོ། །
༤ རྡུང་བྱེད་ནི། དེ་ཉིད་ལས། དེ་ནས་རྡུང་བར་བྱེད་པ་ཡང་། །ཤིང་དེ་ལ་ནི་གཅད་དེ་བྱ། །སོར་བཅུ་གཉིས་ཀྱི་ཚད་དག་དང་། །ཟླུམ་ཞིང་རྩེ་གཉིས་ནེའུ་ལེའི་མགོ ། ཞེས་དང་། གཞན་ངོས་ལ་བཀྲ་ཤིས་ཀྱི་ཚིགས་བཅད་དང་། སེར་སྔགས་འབྲི་བ། རབ་གནས་སོགས་བྱའོ། །
༥ རྡུང་ཚུལ་ནི། རྡུང་མཁན་དགེ་བསྙེན་ཡན་ཆད། གསོ་སྦྱོང་ལ་གནས་ཏེ། གཙུག་ལག་ཁང་གི་སྟེགས་བུར་དར་གོས་བཤམས་པའི་སྟེང་དུ། གཎྜི་བཞག་ལ་ཕྱག་གསུམ་འཚལ། ཤེར་ཕྱིན་གྱི་ཆོས་སྒྲ་སྒྲོགས་པར་མོས་ནས། གཎྜི་ཕྲག་པར་བླངས་ནས་བརྡུང་དགོས་ཏེ། མདོ་རྩ་ལས། བསྡུ་བའི་ཕྱིར་གཎྜི་བརྡུང་ངོ་། །དེའི་གནས་ནི་ཁང་སྟེང་ངོ་། །དགེ་འདུན་བསྡུ་བའི་ཕྱིར་རྒྱུད་གསུམ་དང་དེ་སྙེད་ཀྱི་ཏོག་དག་གོ། ལས﹙གསོ་དགག་སོགས་སུ་འདུལ་བའི་ལས་བརྒྱ་རྩ་བརྒྱད་གང་རུང﹚བྱ་བའི་དོན་དུ་ནི་རྒྱུད་གཅིག་དང་ཏོག་གསུམ་མོ། །ཁ་ཅིག་ལས་ནི་རྒྱུད་གསུམ་དང་ཏོག་གཉིས་ཤེའོ། །ཤི་བ་ལ་ཕྲག་པ་དབྱུང་བའི་དོན་དུ་ནི་བྱི་བོའོ། །ཁ་ཅིག་ལས་ནི་རྒྱུད་གཅིག་དང་ཏོག་གཅིག་གོ་ཞེའོ། །ཞེས་པ་སྟེ། རྒྱུད་ཅེས་པ་གཅིག་ནས་བཅོ་བརྒྱད་བར་སྒྲ་ཇེ་ཆེར་བརྡུང་བ་དང་། ཏོག་ཅེས་པ་མཇུག་ཏུ་ཤེད་ཀྱིས་ལན་གཅིག་སོགས། དེས་འགྲེས་ནས་ཤེས་པར་བྱའོ། །གཞན་ཡང་། གཎྜིའི་མདོ་ལས། དམ་ཆོས་བཤད་པའི་དུས་བསྟན་ཕྱིར། །རྔ་འམ་གཎྜི་རྡུང་བའི་སྒྲ། །ཐོས་པས་བྱང་ཆུབ་འཐོབ་འགྱུར་ན། །ཉན་ཕྱིར་ལྷགས་པ་སྨོས་ཅི་དགོས། །ཞེས་པ་ལྟར་ཆོས་ཉན་པའི་བརྡ་སྟོན་ཕྱིར་ཡང་བརྡུང་ལ། དེ་ལས་གཞན་སེར་གནོད་སོགས་བཟློག་ཆེད་ཅི་ཙམ་གྱིས་བཟློག་པ་དེ་ཙམ་དང་། ཡང་། སྒོམ་གྲོལ་བ་དང་ཟས་བཟའ་ཆེད་ཀྱང་བརྡུང་བར་བྱེད་དོ། །
༦ གཎྜིའི་མཚོན་དོན་ནི། བཟོ་གནས་སྐྲ་རྩེའི་ཆུ་ཐིགས་ལས་འདི་ལྟར་འབྱུང་སྟེ། གཎྜི་ལ་རྟེན་འབྲེལ་གྱི་ཡན་ལག་བཞི་ཡང་དག་པར་མཚོན་པའི་གཎྜི་རྣམ་པ་བཞི་སྟེ། དང་བོ། ཆུང་བའམ་དྲོད་རྣམ་པར་དག་པའི་གཎྜི་ནི། ཆོས་ཀྱི་ཕུང་བོ་བརྒྱད་ཅུ་རྩ་བཞི་མཚོན་པའི་སྲིད་དུ་ཆ་བརྒྱད་ཅུ་རྩ་བཞི་བ་གསུམ་དང་། ཁོར་ཡུག་ཟླུམ་པོར་རྟེན་ཅིང་འབྲེལ་བར་འབྱུང་བའི་ཡན་ལག་བཅུ་གཉིས་ཀྱི་རྣམ་པར་དག་པའི་ཆ་བཅུ་གཉིས་སོ། །གཉིས་པ། རྩེ་མོར་མངོན་པར་རྟོགས་པའི་རྣམ་པར་དག་པའི་གཎྜི་ནི། སྲིད་དུ་མངོན་པར་ཤེས་པ་ལྔ་དང་། དཔེ་བྱད་བཟང་བོ་བརྒྱད་ཅུ་མཚོན་པའི་ཆ་བརྒྱད་ཅུ་རྩ་ལྔ་དང་། མཐའ་བསྐོར་ཟླུམ་པོར་ས་བཅུ་གསུམ་གྱི་རྣམ་པར་དག་པའི་ཆ་བཅུ་གསུམ་དང་། རྣམ་པར་ཐར་བ་བརྒྱད་ཀྱིས་རྣམ་པར་དག་པ་བརྒྱད་ཀྱིས་རྣམ་པར་བརྒྱན་པའོ། །གསུམ་པ། བཟོད་པའི་རྣམ་པར་དག་པའི་གཎྜི་ནི། སྲིད་དུ། སྟོབས་བཅུ་དང་། དགེ་བ་བཅུ་དང་། དབང་བཅུ་དང་། ཕ་རོལ་ཏུ་ཕྱིན་པ་བཅུ་དང་། ཤེས་པ་བཅུ་དང་། བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་གྱི་རྣམ་པར་དག་པའི་ཆ་བརྒྱད་ཅུ་རྩ་བདུན་དང་། མཐའ་བསྐོར་དུ། སྒྲིབ་པ་མེད་པའི་རྣམ་པ་ལ་སོགས་པའི་དབྱངས་བཅོ་ལྔའི་རྣམ་པར་དག་པའི་ཆ་བཅོ་ལྔ། གསུང་རབ་ཡན་ལག་བཅུ་གཉིས་ཀྱི་དག་པས་བརྒྱད་ཅུ་རྩ་གཉིས་སོ། །བཞི་བ། ཆོས་མཆོག་གི་རྣམ་པར་དག་པའི་གཎྜི་ནི། སྲིད་དུ། ཉོན་མོངས་དགུ་བཅུ་རྩ་བརྒྱད་རྣམ་པར་དག་པས་ཆ་དགུ་བཅུ་རྩ་བརྒྱད་དང་། ཁོར་ཡུག་ཏུ་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་རྣམ་པར་དག་པས་ཆ་བཅོ་བརྒྱད། བདེན་པ་བཅུ་དྲུག་གི་རྣམ་པར་དག་པས་བརྒྱད་ཅུ་རྩ་དྲུག་གོ། ཞེས་གསུངས་སོ། །
༧ བརྡུངས་པའི་ཕན་ཡོན་ནི། བརྡུངས་པའི་སྒྲས་ཤེར་ཕྱིན་གྱི་སྒྲ་བརྗོད་པར་འགྱུར་རོ། །བཀྲ་ཤིས་ཀྱི་ཚིག་འབྱུང་ངོ་། །འཁོར་རྣམ་བཞིའི་ནད་ཞི་བར་བྱེད་དོ། །བྱང་ཆུབ་མངོན་དུ་བྱེད་དོ། །མཆོག་གསུམ་གྱི་བཀའ་དྲིན་ཡང་ཤིན་ཏུ་སྐྱེ་བར་འགྱུར་རོ། །དཀྱིལ་འཁོར་ལ་གུས་པར་འགྱུར་རོ། །རྒྱལ་བོ་ཆོས་དང་ལྡན་པར་འགྱུར་རོ་སོགས་ཡོན་ཏན་ཚད་མེད་པའོ། །