རིམ་གཉིས་སྨོན་ལམ་གྱིས་བསྟན་དོན་ལ་བཀའ་འདྲིའི་ལན།བཀའ་འདྲི་དང་པོའི་ལན།
རིམ་གཉིས་སྨོན་ལམ་གྱིས་བསྟན་དོན་ལ་བཀའ་འདྲིའི་ལན།བཀའ་འདྲི་དང་པོའི་ལན།
ཞི་སོགས་འཕྲིན་ལས་བཅུ་གཉིས་པོ། །ཞེས་པའི་སྐབས་ཀྱི་འཕྲིན་ལས་བཅུ་གཉིས་ནི། བསྐྱེད་རིམ་བདུད་རྩིའི་བུམ་བཟང་ལས། ཞི་རྒྱས་གཞི་ལ་གསུམ། དབང་དགུག་པ་བསྐྱོད་གསུམ་སྟེ་འཇམ་པོ་དྲུག བསད་བསྐྲད་དབྱེ་གསུམ། རྨོངས་རེངས་གདབ་གདབ་གསུམ་སྟེ་རྩུབ་པོ་དྲུག་དང་བཅུ་གཉིས་སོ། །ཞེས་དང༌། དཔལ་བདེ་མཆོག་གི་རྒྱུད་ལས། དབང་དང་དགུག་པ་དབྱེ་བ་དང༌། །བསད་དང་བསྐྲད་པ་ལ་སོགས་དང༌། །རྨུགས་དང་རེངས་པར་བྱ་བ་དང༌། །རྨོངས་དང་དེ་བཞིན་ཕུར་བུས་གདབ། །ཚིག་འཕྲོག་ལྐུགས་པར་གྱུར་པ་དང༌། །འོན་དང་དེ་བཞིན་ལོང་བ་དང༌། །མ་ནིང་ཉིད་དུ་བྱ་བ་དང༌། །གཟུགས་ནི་ཡོངས་སུ་བརྗེ་བ་འོ། །ཞེས་གསུངས་པ་ལྟར་ཡིན་ལ། འདིར་ཞི་བའི་ལས་ཀྱི་གསལ་ཁ་མ་བྱུང་ཡང་སྔ་ཕྱིར་མང་དུ་གསུངས་ཏེ་དེ་བསྣན་པས་བཅུ་གཉིས་སོ། །ཞེས་རྗེ་བཙུན་རིན་པོ་ཆེའི་བདེ་མཆོག་བསྟོད་པའི་རང་འགྲེལ་དུ་གསུངས་ཤིང༌། འདི་དག་མཚོན་ཙམ་ལས་རྒྱུད་གཞན་དུ་ལས་རིམ་བརྒྱ་སོགས་ལས་རབ་འབྱམས་གསུངས་པར་གཞུང་དེར་གསུངས་སོ། །འབའ་འདའི་དུས་འཁོར་ཡོངས་རྫོགས་མཇུག་ན་ལས་ཆེན་བཅུ་གཉིས་ཡོད་ལགས།བཀའ་འདྲི་གཉིས་པའི་ལན། གྲུབ་ཆེན་བརྒྱད་གཞུང་གང་ནས་གསུངས་ཤེ་ན། གུར་དང་བདེ་མཆོག་ལས་བགྲང་ཚུལ་མི་འདྲ་བ་སོགས་གསུངས་ཏེ། བདེ་མཆོག་བསྟོད་པའི་རང་འགྲེལ་ལས། ཐུན་མོང་གི་དངོས་གྲུབ་འབྲིང་པོ་གྲུབ་པ་ཆེན་པོ་བརྒྱད་ནི། ལྷ་མོ་བཞིས་ཞུས་པ་ལས། རྫས་བརྒྱད་ཡན་ལག་སྒྲུབ་པ་བཤད། །རིལ་ལུ་མིག་སྨན་དངོས་གྲུབ་དང༌། །ས་འོག་རལ་གྲིའི་དངོས་གྲུབ་དང༌། །མཁའ་ལ་འཕུར་དང་མི་སྣང་དང༌། །ཤི་བ་མེད་དང་ནད་འཇོམས་སོ། །ཞེས་དང༌། གུར་ལས། མིག་སྨན་དང་ནི་རྐང་མགྱོགས་དང༌། །རལ་གྲི་དང་ནི་ས་འོག་འགྲུབ། །རིལ་ལུ་དང་ནི་མཁའ་སྤྱོད་ཉིད། །མི་སྣང་བ་དང་བཅུད་ཀྱིས་ལེན། །ཞེས་སོགས་རྒྱུད་སོ་སོ་ནས་འདྲེན་ཚུལ་མི་གཅིག་པ་མང་པོ་བྱུང་ཡང༌། རྒྱུད་འདི་ཉིད་ལས། ས་འོག་སྟེང་འགྲོ་རལ་གྲི་དང༌། །ཚར་གཅོད་ཕན་འདོགས་ཉིད་དང་ནི། །རིལ་ལུ་མིག་སྨན་རྟེན་རྣམས་སམ། །རྐང་མགྱོགས་དག་གམ་བཅུད་ཀྱིས་ལེན། །ཞེས་པ་ལྟར་བརྒྱད་དང༌། ཞེས་གསུངས་སོ། །འབའ་མདའ་བླ་མའི་བསྐྱེད་རིམ་གྱི་མཇུག་ཏུའང་གསུངས་ཡོད། བཀའ་འདྲི་གསུམ་པའི་ལན། སྟོང་བ་མཚན་མ་རྣམ་བཅུར་འགྱུར། །ཞེས་པའི་དོན། སྟོང་པ་དུ་བ་སྨིག་རྒྱུ་མེ་ཁྱེར་མར་མེ། ནག་མོ་སེར་མོ་དམར་མོ་དཀར་མོ། མཆོག་གི་ཆ་དང་ཐིག་ལེའི་ཆ་སྟེ་རྟགས་སམ་མཚན་མ་བཅུ་རུ་འགྱུར་ཞེས་པའི་དོན་ཡིན་ལ། མཚན་མ་བཅུ་ཞེས་པ་རྟགས་བཅུའི་རྣམ་གྲངས་ཡིན་ཞིང༌། གྲངས་བགྲང་ཚུལ་ཡང་འདྲའོ། །བཀའ་འདྲི་བཞི་བའི་ལན། རྣལ་འབྱོར་གསུམ་གྱི་ལམ་ལ་བསླབས། །ལུས་ངག་ཡིད་གསུམ་སྒྲིབ་པ་སྦྱངས། །སྤྱོད་པ་གསུམ་གྱི་མཐར་ཕྱིན་ཏེ། །རྡོ་རྗེ་གསུམ་པོ་མངོན་གྱུར་ཤོག །ཅེས་པའི་སྐབས་ཀྱི་རྣལ་འབྱོར་གསུམ་ནི། སྐུ་རྡོ་རྗེའི་རྣལ་འབྱོར་སོར་སྡུད་དང་བསམ་གཏན་གཉིས། གསུང་རྡོ་རྗེའི་རྣལ་འབྱོར་སྲོག་རྩོལ་དང་འཛིན་པ་གཉིས། ཐུགས་རྡོ་རྗེའི་རྣལ་འབྱོར་རྗེས་དྲན་དང་ཏིང་ངེ་འཛིན་གཉིས་ཏེ་གསུམ་ཡིན་ནོ། །