གསུམ་པ་ཚོགས་སྒྲུབ་བཤད་པ།
གསུམ་པ་ཚོགས་སྒྲུབ་བཤད་པ་ལ།
མདོ་ལུགས་མ་ལས། ཚོགས་སྒྲུབ་ཀྱི་ངོ་བོ་དང་ཚོགས་སྒྲུབ་ལ་ཞུགས་པ་དང༌། ཚོགས་སྒྲུབ་ཀྱི་བྱེད་ལས་དེ་གསུམ་མོ། །བརྩེ་དང་སྦྱིན་ལ་སོགས་པ་དྲུག །ཞི་གནས་ལྷག་མཐོང་བཅས་པ་དང༌། །ཟུང་དུ་འབྲེལ་པའི་ལམ་གང་དང༌། །ཐབས་ལ་མཁས་པ་གང་ཡིན་དང༌། །ཡེ་ཤེས་དང་ནི་བསོད་ནམས་དང༌། །ལམ་དང་གཟུངས་དང་ཞེས་པས་ཚོགས་སྒྲུབ་ཀྱི་ངོ་བོ་བསྟན་ཏོ། །ས་བཅུ་དང་ཞེས་པས་ཚོགས་སྒྲུབ་ལ་ཞུགས་པ་བསྟན་ཏོ། །གཉེན་པོ་ཞེས་པས་ཚོགས་སྒྲུབ་ཀྱི་བྱེད་ལས་སྟོན་ནོ། །ཚོགས་ཀྱི་སྒྲུབ་པའི། རིམ་པ་ཡིན་པར་ཤེས་པར་བྱ། །ཞེས་པས་ཚོགས་སྒྲུབ་སྟོན་པའི་ཆོས་དེ་དག་མདོ་ལས་འབྱུང་བའི་རིམ་པ་ཡིན་པར་སྟོན་ནོ། །ཞེས་གསུངས་སོ། །དེའི་དོན་ལ་ཚོགས་སྒྲུབ་སྤྱི་དང༌། ཞི་གནས་ལྷག་མཐོང་གི་ཚོགས་སོགས་བྱེ་བྲག་ཏུ་བཤད་པ་དང་གཉིས། དང་པོ་ལ། སྤྱི་དོན་དང༌། མཐའ་རགས་ཙམ་དཔྱད་པ་གཉིས།དང་པོ་ལ། མཚན་ཉིད། དབྱེ་བ། ས་མཚམས་གསུམ། དང་པོ་ཚོགས་སྒྲུབ་གྱི་མཚན་ཉིད།རང་འབྲས་བྱང་ཆེན་དངོས་སུ་ཐོབ་བྱེད་དང་ཐེག་ཆེན་སྦྱོར་ལམ་ཆོས་མཆོག་ཆེན་པོའི་རྟོགས་པ་ཐོབ་ཟིན་པའི་སྒྲུབ་པའི་གཞི་མཐུན་པ་དེ་ཡིན་ཏེ། ཉ་ཊཱིཀ་ལས། ཞུགས་ཏེ་དཔུང་གི་ཚོགས་གསོག་པའི་སྒྲུབ་པའི་མཚན་ཉིད། བྱང་སེའི་སྒྲུབ་པ་གང་ཞིག རང་འབྲས་སློབ་ལམ་མམ་མི་སློབ་པའི་བྱང་ཆེན་གྱི་རྒྱུའི་མཐར་ཐུག་པའི་ཚོགས་སྒྲུབ་པའམ་ཐོབ་པར་བྱེད་པ་སྟེ། ཞེས་གསུངས་པས་སོ། །
གཉིས་པ་དབྱེ་བ་ནི།
ཉ་ཊཱིཀ་ལས། དབྱེ་ན་བཅུ་བདུན་ནོ། །དག་ལྡན་དུ། གང་གིས་རྒྱུའི་མཐར་ཐུག་པ་ཐོབ་པར་བྱེད་པ་དེ་ནི་ཚོགས་ཀྱི་སྒྲུབ་པ་བཅུ་བདུན་ནོ། །ཞེས་པ་ལྟར་ན། བརྩེ་བའི་ཚོགས་སྒྲུབ་དང༌། སྦྱིན་ལ་སོགས་པའི་ཕར་ཕྱིན་དྲུག་གི་ཚོགས་སྒྲུབ་དྲུག་དང༌། ཞི་གནས་དང༌། ལྷག་མཐོང་དང༌། ཟུང་འབྲེལ་གྱི་ལམ་དང༌། ཐབས་མཁས་དང༌། ཡེ་ཤེས་དང༌། བསོད་ནམས་དང༌། ལམ་དང༌། གཟུངས་དང༌། ས་བཅུ་དང༌། གཉེན་པོའི་ཚོགས་སྒྲུབ་དང་བཅུ་བདུན་ནོ། །སྤྱིར་ཚོགས་སྒྲུབ་བཅུ་བདུན་ཡོད་ཀྱང་མདོ་ལུགས་མ་ལྟར་ན་རྩ་བས་ཚོགས་སྒྲུབ་བཅུ་བདུན་ལ་སྦྱར་ནས་བསྟན་པར་མ་གསུངས་སོ། །
གསུམ་པ་ས་མཚམས་ནི། སྦྱོར་ལམ་ཆོས་མཆོག་ཆེན་པོ་ནས་རྒྱུན་མཐའི་བར་དུ་ཡོད་དེ། ཐོགས་མེད་ཀྱི་གསུང་འགྲེལ་ཆེན་དང་ཐུབ་དགོངས་སུ་དྲངས་པ་ལས། ཚོགས་ཀྱི་སྒྲུབ་པ་ནི་བརྩེ་བ་ནས་བརྩམས་ཏེ་གཟུངས་ཀྱི་བར་ནི་མངོན་སུམ་དུ་སྦྱོར་བའི་རང་བཞིན་ཆོས་མཆོག་ཆེན་པོས་བསྡུས་པ་ཡིན་ནོ། །ས་དང་པོ་རབ་ཏུ་དགའ་བའི་རང་བཞིན་དུ་གྱུར་པའི་སྒྲུབ་པ་ནི་མཐོང་བའི་ལམ་གྱི་བདག་ཉིད་ཡིན་ལ། གཉིས་པ་ལ་སོགས་པའི་རང་བཞིན་ནི་སྒོམ་པའི་ལམ་གྱི་ངོ་བོ་ཉིད་ཡིན་ཞིང་གཉེན་པོའི་ཕྱོགས་ཀྱི་བདག་ཉིད་ཅན་གྱི་ཚོགས་ཀྱི་སྒྲུབ་པ་ནི་ལམ་གཉིས་ཀའི་སྤྱོད་ཡུལ་ཅན་ཡིན་ནོ། །ཞེས་གསུངས་པས་སོ། །