བཞི་བ་གྲུབ་པ་འབྲས་བུའི་གནས་སྐབས།
བཞི་བ་གྲུབ་པ་འབྲས་བུའི་གནས་སྐབས་ནི།
དབང་པོ་རྣོན་པོས་ཚེ་གཅིག་ནས་རྟུལ་པོས་སྐྱེ་བ་བཅུ་དྲུག་ཚུན་ཆོད་ལ་ཕྱག་རྒྱ་ཆེན་པོའི་དངོས་གྲུབ་ཐོབ་པར་བཤད། དེ་ནས་ཀྱང་ལམ་ལ་འབད་པས་མི་རིང་པར་རྫོགས་པའི་སངས་རྒྱས་འགྲུབ་སྟེ་ཤིན་ཏུ་ཐོགས་ཀྱང་བསྐལ་པ་ཆུང་ངུ་གཅིག་ལ་མཐར་ཐུག་གི་སངས་རྒྱས་ཐོབ་པར་འགྱུར་རོ། །བཞི་པ་རྣལ་འབྱོར་བླ་མེད་བཤད་པ་ལ། སྒྲ་བཤད། དབྱེ་བ། ཉམས་ལེན་ལམ་གྱི་རིམ་པ། འབྲས་བུའི་དུས་དང་བཞི། དང་པོ་ནི། ཏིང་ངེ་འཛིན་ཁྱད་པར་ཅན་གོང་ན་མེད་པ་སྟོན་པར་བྱེད་པའི་རྒྱུད་ཡིན་པས་ན་རྣལ་འབྱོར་བླ་མེད་གྱི་རྒྱུད་ཅེས་བྱ་སྟེ། དུས་འཁོར་རྒྱུད་འགྲེལ་བཤད་པ་ལ་འཇུག་པ་ལས། དབང་པོ་རྣོ་བ་ཏིང་ངེ་འཛིན་ཁྱད་པར་གོང་ན་མེད་པ་ལ་སྤྱོད་པ་ལ་དེའི་དོན་དུ་རྣལ་འབྱོར་བླ་ན་མེད་པའི་རྒྱུད་གསུངས་སོ། །ཞེས་གསུངས་སོ། །