གཤིན་རྗེ་མཐར་བྱེད་དམར་པོའི་བྱིན་གྱིས་བརླབ་པའི་རིམ་པ།
དཔལ་འཛིན།
རྒྱ་གར་སྐད་དུ། རཀྟ་ཡ་མ་ཨ་རི་དེ་ཤ་པ་ཨ་དྷི་ཥྛ་ན། བོད་སྐད་དུ། གཤིན་རྗེ་མཐར་བྱེད་དམར་པོའི་བྱིན་གྱིས་བརླབ་པའི་རིམ་པ། ཁམས་གསུམ་པོ་ནི་མ་ལུས་པ། །སྙིང་རྗེས་ཆགས་པའི་ངོ་བོ་ཉིད། །བདེ་ཆེན་གཤིན་རྗེ་གཤེད་པོ་ལ། བཏུད་དེ་འདྲི་ནི་བྱིན་བརླབ་བཤད། །དེ་ལ་འདིར་ནི་རིམ་པ་འདིས། །རྣལ་འབྱོར་བྱང་ཆུབ་འདོད་པ་ཡིས། །དད་པ་ཆེན་པོ་བརྟན་པར་བྱས། །བླ་མའི་ཁ་ལས་ཤེས་པར་བྱ། །རྡོ་རྗེ་འཛིན་རྒྱལ་གསང་སྔགས་དང༌། །བླ་མ་བཀུར་དང་མཁའ་འགྲོ་བསྙེན། །ཇི་ལྟར་གསུངས་པའི་རྡོ་རྗེ་ལ། །མཆོད་སོགས་ལས་སུ་རུང་བར་བྱ། །མཎྜལ་ལ་སོགས་ཡོ་བྱད་དང༌། །བུམ་པ་དཀྱིལ་འཁོར་གསང་སྔགས་བྲི། །ལྷ་ཡི་གཟུགས་བརྙན་གསལ་བ་དང༌། །བཟླས་དང་མཆོད་སོགས་སྔོན་འགྲོ་བས། །བགེགས་སྤྱང་གསོལ་བ་གདབ་པ་དང༌། །དམ་ཚིག་གཟུང་དང་སེམས་བསྐྱེད་བྱ། །ཨོཾ་བཛྲ་ཡོ་ག་ཅི་ཏྟ་ཨུཏྤཱ་ད་ཡཱ་མི་སུ་ར་ཏ་ས་མ་ཡ་སྟྭཾ་ཧཾ། སིདྡྷི་བཛྲ་ཡ་ཐཱ་སུ་ཁཾ། དེ་ཉིད་གསུམ་གྱི་སྐད་ཅིག་ལ། །ལུས་སོགས་ཡེ་ཤེས་གསུམ་དུ་བྱ། །ཇི་སྐད་གསུངས་པའི་མན་ངག་གིས། །རང་ཉིད་ཡེ་ཤེས་དྲན་པ་དང༌། །རྡོ་རྗེ་སྒྲ་ནི་བརྗོད་པར་བྱ། །ཆོ་ག་ལས་བྱུང་ཆུ་སོགས་ལྔའི། །ཇི་བཞིན་དབང་ནི་སྤྱིན་བྱས་ལ། །འདོད་ན་རང་སྙིང་པད་འདབ་ལ། །ཡི་གེ་ལྔ་ནི་དགོད་པར་བྱ། །ཧཱུཾ་ཧཱུཾ་ཨཱཾ་ཛྲཱིཾ་ཁཾ། ཁ་དོག་ལྔ་ཡི་འོད་ཟེར་གྱིས། །མ་ལུས་ལུས་པ་མེད་པ་ཡི། །སངས་རྒྱས་ལ་སོགས་ཡོན་ཏན་ཚོགས། །འོད་ན་གསལ་བས་ཡང་དང་ཡང༌། །བཀུག་ནས་སྤྲོ་དང་བརྟན་པར་བྱ། །རྡོ་རྗེ་རྣམས་དང་དབྱེར་མེད་པ། །སྐད་ཅིག་ཉིད་ལ་ཐོབ་པར་འགྱུར།། ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། གསང་སྔགས་རྒྱལ་པོ་བྲིས་པ་ཡི། །མཎྜལ་བྱིན་ལ་འདི་སྐད་དོ། །གདོད་ནས་རང་བཞིན་རྣམ་དག་མཆོག །འོད་གསལ་སྲིད་གསུམ་ཀུན་གྱི་གཞི། །ཤིན་ཏུ་བདེ་བའི་བདེ་བ་སྟེ། །སེམས་ཀྱིས་ཡིད་ནི་དེ་ལྟར་བལྟ། །བསྡུས་ཏེ་དམར་པོས་ཐིག་ལོ་བྱ། །བླ་མའི་མན་ངག་གི་རྗེས་འགྲོ། །རིག་པའི་རྒྱལ་པོའི་བཟླས་པའང་སྤྱིན། །བུ་གའི་སྦྱོར་བ་དམ་པ་ཡིས། །ཡིད་ནི་བདེ་བ་ཅན་དུ་འཕང༌། །དེ་ལྟར་རྟེན་དང་བརྟེན་མེད་པར། །གང་ལ་གང་གིས་བདག་འཛིན་མེད། །གདོད་ནས་སྐྱེ་བ་མེད་པ་ཡི། །སྐྱེ་སོགས་སྤྲོས་
ལས་འདས་པས་ན། །སྤྲོས་པ་ཉིད་ནི་སྤྲོས་མེད་པས། །ཟུང་འཇུག་འོད་གསལ་བདེ་ཆེན་ཉིད། །བདེ་བས་བདེ་བ་རྟོགས་པའོ། །རྡོ་རྗེ་འཛིན་རྒྱལ་ཡེ་ཤེས་ཆེ། །གང་ན་བཙལ་ཡང་མི་རྙེད་དེ། །བླ་མ་མཉེས་ཐབས་ཁ་ལས་སོ། །དེ་ནི་རྟོགས་པ་ཙམ་གྱིས་ནི། །སྲིད་དང་མྱ་ངན་འདས་པ་ཡི། །འཆིང་བ་ཀུན་སྤངས་རྣམ་གྲོལ་གྱི། །ཡེ་ཤེས་མཆོག་ནི་ཐོབ་པའོ། །འཇིག་རྟེན་གསུམ་ན་མཉམ་པ་སྤངས། །འདི་ནི་བླ་མ་གཤིན་རྗེའི་དགྲར་གྱུར་པས། །བདག་ལ་རྗེས་སུ་བཟུང་བས་དངོས་གྲུབ་ཐོབ། །དེ་དོན་གཞན་ལའང་སྤྱིན་ཕྱིར་ཡི་གེ་རུ། །བྲིས་ལ་བླ་མ་མཁའ་འགྲོ་བཟོད་པར་མཛོད། །ཕོད་ལ་མ་ཡིན་མན་ངག་མེད་ལ་མིན། །ཤིན་ཏུ་གཅེས་པས་ཕངས་པས་ཕངས་པར་བྱ། །དེ་ལྟར་བླ་མའི་དྲིན་ལས་ཟབ་མོ་གསལ་ཕྱེ་བས། །འགྲོ་ཀུན་ལྷན་ཅིག་སྐྱེས་དགའ་བདེ་བའི་གཙོ། །ཀུན་ཁྱབ་བདེ་གསལ་མི་རྟོག་ཡེ་ཤེས་ཟུང་འཇུག་སྐུ། །ཐོབ་ནས་བདེ་བས་བདེ་ལ་རྣམ་རོལ་དགྱེས་པར་ཤོག །གཤིན་རྗེ་མཐར་བྱེད་དམར་པོའི་བྱིན་གྱིས་བརླབ་པའི་རིམ་པ་གྲུབ་ཐོབ་ཀྱི་འཁོར་ལོས་སྒྱུར་བ་བྲམ་བདེ་པ་ལ་འཛིན་གྱི་ཞལ་སྔ་ནས་མཛད་པ་རྫོགས་སོ།། །།རྒྱ་གར་གྱི་མཁན་པོ་དརྦཎ་ཨཱ་ཙཱཪྻ་དང༌། གློ་བོ་ལོ་ཙཱ་བ་དགེ་སློང་ཤེས་རབ་རིན་ཆེན་གྱིས་བསྒྱུར་བའོ།།