གཉིས་པ་མཐའ་རགས་ཙམ་དཔྱད་པ།
གཉིས་པ་མཐའ་རགས་ཙམ་དཔྱད་པ་ལ།
ཉ་ཊཱིཀ་ལས། བྱང་སེའི་སྒྲུབ་པ་གང་ཞིག རང་འབྲས་སློབ་ལམ་མམ་མི་སློབ་པའི་བྱང་ཆེན་གྱི་རྒྱུའི་མཐར་ཐུག་པའི་ཚོགས་སྒྲུབ་པའམ་ཐོབ་པར་བྱེད་པ་སྟེ། ཞེས་གསུངས་པ་ལ། ཐེག་ཆེན་སྦྱོར་ལམ་ཆོས་མཆོག་ཆེན་པོ་ཆོས་ཅན། མཚན་ཉིད་དེ་ཡིན་པར་ཐལ། མཚོན་བྱ་དེ་ཡིན་པའི་ཕྱིར། འདོད་ན། ཐེག་ཆེན་སྦྱོར་ལམ་ཆོས་མཆོག་ཆེན་པོ་ཡིན་ན་དེ་ཡིན་པས་ཁྱབ་པར་ཐལ། འདོད་པའི་ཕྱིར་ཟེར་ན་དཔྱད། ཡང་ཉ་ཊཱིཀ་ལས། སྒྲུབ་རྒྱུའི་ཚོགས་བཅུ་བདུན། དེ་སྒྲུབ་པའི་ཚོགས་སྒྲུབ་བཅུ་བདུན་ཡོད་པས་ན་སྔ་རབས་རྣམས་ཀྱིས་དེ་མ་ཕྱེད་པར་ཚོགས་བཅུ་བདུན་ཉིད་ཚོགས་སྒྲུབ་བཅུ་བདུན་དུ་འཆད་པ་ནི་དོན་སྤྱི་མ་ཤར་རོ། །ཞེས་དང༌། སྒྲུབ་རྒྱུའི་ཚོགས་བཅུ་བདུན་ཡོད་པས་དེ་སྒྲུབ་པའི་ཚོགས་ཀྱི་སྒྲུབ་པའང་རྣམ་པ་བཅུ་བདུན་ནོ། །དེ་ལྟར་འཆད་མ་ཤེས་ན་ལམ་གྱི་ཚོགས་ནི་དྲན་པ་ཉེར་བཞག་ནས་སངས་རྒྱས་ཀྱི་བར་བཤད་པ་ཆོས་མཆོག་ཆེན་པོ་ན་ཡོད་དམ་སོམས་ཤིག ཚོགས་ཞེས་པ་ཆོས་དུ་མའི་དོན་ནོ། །ཞེས་གསུངས་པ་ལ་ཚོགས་སྒྲུབ་ཀྱི་བསྒྲུབ་རྒྱུའི་ཚོགས་ཡིན་པ་ལ་ཚོགས་སྒྲུབ་ཐོབ་རྗེས་སུ་བྱུང་བ་དགོས་ལ། ཚོགས་སྒྲུབ་སྦྱོར་ལམ་ཆོས་མཆོག་ཡན་ཆོད་ན་འཇོག་དགོས་ལ། དེ་ལྟར་ན་བསྒྲུབ་རྒྱུའི་ཚོགས་བཅུ་བདུན་གང་ཡང་ཚོགས་ལམ་ལ་མེད་དགོས་པ་ལས་དེ་མི་འཐད་པར་ཐལ། ལམ་གྱི་ཚོགས་སོགས་ཚོགས་ལམ་ན་ཡོད་པའི་ཕྱིར། དེར་ཐལ། ལམ་གྱི་ཚོགས་ཀྱི་སྐབས་ཉ་ཊཱིཀ་ལས། ཚོགས་སྦྱོར་མཐོང་དང་སྒོམ་པའི་ལམ་སོགས་ཏེ། ཐེག་ཆེན་པ་ནི། དྲན་པ་ཉེ་བར་བཞག་པ་བཞི་དང༌། ཞེས་སོགས་ནས། བཅོ་བརྒྱད་ཀྱི་བར་རྒྱ་ཆེར་ངོས་འཛིན་དང་བཅས་པ་གསུངས་སོ། །ཞེས་གསུངས་པས་ཕྱིར་ཟེར་ན་དཔྱད་དོ། །ཚོགས་སྒྲུབ་ཀྱི་ས་མཚམས་ཐེག་ཆེན་སྦྱོར་ལམ་ཆོས་མཆོག་ཆེན་པོ་ནས་བཞག་མི་རིགས་པར་ཐལ། མདོ་ལུགས་མ་ལས། ཚོགས་ཀྱི་བསྒྲུབ་པ་ནི་ས་བཅུ་ལ་ཞུགས་པ་ཉིད་ཡིན་པར་མདོ་ལས་བྱུང་ངོ༌། །ཞེས་དང༌། ས་བཅུ་དང་ཞེས་པས་ཚོགས་བསྒྲུབ་ལ་ཞུགས་པ་བསྟན་ཏོ། །ཞེས་གསུངས་པའི་ཕྱིར་ཟེར་ན་དཔྱད་པར་བྱའོ། །