དེ་ནས་སྟོབས་བཅུ།
དེ་ནས་སྟོབས་བཅུ་ནི།
མཚན་བརྗོད་འགྲེལ་པ་དྲི་མ་མེད་པའི་འོད་ལས། ཐུབ་དབང་སྟོབས་བཅུ་ཁྱབ་པའི་བདག །ཅེས་པ་སྟོབས་བཅུ་ནི། བསམ་པའི་སྟོབས་དང༌། ལྟ་བའི་སྟོབས་དང༌། སྦྱོར་བའི་སྟོབས་དང༌། ཤེས་རབ་ཀྱི་སྟོབས་དང༌། སྨོན་ལམ་གྱི་སྟོབས་དང༌། ཐེག་པའི་སྟོབས་དང༌། སྤྱོད་པའི་སྟོབས་དང༌། རྣམ་པར་འཕྲུལ་པའི་སྟོབས་དང༌། བྱང་ཆུབ་པའི་སྟོབས་དང༌། ཆོས་ཀྱི་འཁོར་ལོ་བསྐོར་བའི་སྟོབས་སོ། །ཞེས་སོ། །དེ་ནས་ཕྱི་ནང་རྣམ་བཅུ་ནི། ཕྱི་མ་དག་པ་འཁོར་བའི་གནས་ཀྱི་ས་དཀྱིལ་དང་ཆུ་དཀྱིལ་སོགས་བཅུ། ནང་གི་མ་དག་པ་འཁོར་བའི་སྐབས་ཀྱི་དཔྲལ་བ་རླུང་ཁམས། མགྲིན་པ་མེ་ཁམས་སོགས་བཅུ་ཡིན་ནོ། །བཀའ་འདྲི་བརྒྱད་པའི་ལན། འཕོ་བ་བཅུ་གཉིས་རྒྱུ་བ་འགགས། །ཞེས་པའི་སྐབས་ནས་བསྟན་པའི་འཕོ་བ་བཅུ་གཉིས་ནི། དབང་མདོར་བསྟན་གྱི་འགྲེལ་བ་ལས།དུས་སྦྱོར་དང་ཁྱིམ་དང། འཕོ་བ་ཡང་དོན་གཅིག་གོ ། དེ་ལྟ་བུའི་འཕོ་བ་བཅུ་གཉིས་ནི་ཉིན་ཞག་གཅིག་སྟེ་དེ་ལ་དབུགས་ཉི་ཁྲི་ཆིག་སྟོང་དྲུག་བརྒྱའོ། །དབུགས་ཐམས་ཅད་ལ་རང་རང་གི་ཆ་ལ་སུམ་ཅུ་རྩ་གཉིས་སུ་བགོས་པའི་ཆ་གཅིག་ཙམ་ཞིག་དབུ་མ་ནས་འབབ་པ་མཉམ་པར་རྒྱུ་བའི་རླུང་ཡིན་ནོ། ། འཕོ་བ་བཅུ་གཉིས་པོ་དེ་ཡང་ལྟེ་བའི་རྩ་འདབ་བཅུ་གཉིས་དང་སྦྱོར་བས། དང་པོ་ལུག། གསུམ་པ་འཁྲིག་པ། ལྔ་པ་སེང་གེ། བདུན་པ་སྲང༌།དགུ་པ་གཞུ། བཅུ་གཅིག་པ་བུམ་པ་རྣམས་ནི་ཁ་ཡར་བ་ཡིན་པའི་ཕྱིར་མི་མཉམ་པ་ཞེས་བྱ་ལ། དེ་རྣམས་གཡོན་གྱི་རྩ་འདབ་དྲུག་ལ་རིམ་བཞིན་འབྱུང་ངོ། །གཉིས་པ་གླང། བཞི་པ་ཀརྐ་ཊ། དྲུག་པ་བུ་མོ། བརྒྱད་པ་སྡིག་པ། བཅུ་པ་ཆུ་སྲིན། བཅུ་གཉིས་པ་ཉ་རྣམས་ཁ་འཆམ་པ་ཡིན་པའི་ཕྱིར་མཉམ་པ་ཞེས་བྱ་སྟེ། གཡས་ཀྱི་རྩ་འདབ་དྲུག་ལ་རིམ་བཞིན་འབྱུང་ངོ། །ཞེས་སོ། །བཀའ་འདྲི་དགུ་བའི་ལན། བདེན་དོན་རྣམ་པ་བཅུ་གཉིས་ལྡན། །དེ་ཉིད་རྣམ་པ་བཅུ་དྲུག་རིག །ཅེས་པའི་སྐབས་ནས་བསྟན་པའི་བདེན་དོན་བཅུ་གཉིས་ནི། དོན་དམ་པའི་རྟེན་འབྲེལ་བཅུ་གཉིས་དང༌། དོན་དམ་པའི་ཁྱིམ་བཅུ་གཉིས་དང༌། དོན་དམ་པའི་ཟླ་བ་བཅུ་གཉིས། དོན་དམ་པའི་ལྷ་ཆེན་བཅུ་གཉིས། དོན་དམ་པའི་ཚིགས་ཆེན་བཅུ་གཉིས་རྣམས་འཇོག་སྟེ། སྨན་ཆུ་ཁ་བའི་མཚན་བརྗོད་འགྲེལ་བ་ལས། དོན་དམ་པའི་ཉི་མའི་ཁྱིམ་བཅུ་གཉིས་ཀྱི་བདེན་པའི་དོན་གྱི་ཡན་ལག་གི་རྣམ་པ་ས་བཅུ་གཉིས། ཞེས་དང༌།དོན་དམ་པའི་རྟེན་འབྲེལ་བཅུ་གཉིས་དང༌། ཁྱིམ་བཅུ་གཉིས་དང༌། ཟླ་བ་བཅུ་གཉིས། ལྷ་ཆེན་བཅུ་གཉིས། ཚིགས་ཆེན་བཅུ་གཉིས་ཀྱང་ས་བཅུ་གཉིས་པོ་འདི་ཉིད་ཡིན་ནོ། །ཞེས་པ་ལྟར་ཡིན་པ་ལས་མཛོད་རང་འགྲེལ་སོགས་སུ་བདེན་བཞི་རང་གི་ངོ་བོ་ལ་དམིགས་རྣམ་བཞི་སོགས་ཕྱེས་ཏེ་བདེན་དོན་བཅུ་གཉིས་ཕྱེ་ཚུལ་ཡོད་པ་སྐབས་འདི་དང་མི་འདྲའོ། །