གཉིས་པ་བྱེ་བྲག་ཏུ་བསླབ་པ་འབུལ་བའི་དོན་བཤད་པ།
གཉིས་པ་བྱེ་བྲག་ཏུ་བསླབ་པ་འབུལ་བའི་དོན་བཤད་པ་ལ།
གཞི་དང༌། བསམ་པ་དང༌།སྦྱོར་བ་དང༌། མཐར་ཐུག་དང༌། ཕུལ་ཉམས་ཀྱི་ཁྱད་པར་དང༌། དགག་སྒྲུབ་གཉིས་ཀྱི་བསླབ་པ་གང་ཡིན་བསྟན་པ་དང་དྲུག དང་པོ་གཞི་ལ། གང་ལ་འབུལ་བའི་ཡུལ་དང༌། གང་གིས་འབུལ་བའི་རྟེན་དང༌། གང་འབུལ་བའི་དངོས་པོ་དང་གསུམ། དང་པོ་ལ་གསུམ་སྟེ། ཐ་སྙད་ལྔ་དང་ལྡན་པ་དང༌། ལུས་ཐ་མལ་པར་གནས་པ་དང༌། བདག་ལས་ཐ་དད་པའོ། །ཐ་སྙད་ལྔ་ནི་མི་ཡིན། སྨྲ་ཤེས། དོན་གོ། །ཤེས་པ་རང་བཞིན་དུ་གནས། མ་ནིང་དང་མཚན་གཉིས་པ་ཅན་མ་ཡིན་ཏེ། རྩ་བར། དེ་ལ་མ་ཡིན་ནོ། །ལྐུགས་པ་ལ་མ་ཡིན་ནོ། །མི་མ་ཡིན་པའི་འགྲོ་བ་པ་ལ་མ་ཡིན་ནོ། ། མ་གོ་བ་ཉིད་མ་ཡིན་ནོ། །ཞེས་དང༌། སྤྱིར་བསྟན་པ་ལས། མ་ནིང་དང་མཚན་གཉིས་པ་དག་ནི་དེ་དང་ལྡན་པ་ཞེས་པ་རང་བཞིན་ཉམས་པ་དང་འདྲ་བར་བཤད་པ་སྟེ་གོ་རིམ་བཞིན་ནོ། །ལུས་ཐ་མལ་པར་གནས་པ་ནི། ཊཱི་ཀ་ལས། རེག་པ་ལ་སོགས་པ་ནི་ཐ་སྙད་ཀྱི་ཕྱིར་རྣམ་པར་བཞག་གོ། །ཞེས་པའི་གནད་ཀྱིས་སོ། །བདག་ལས་ཐ་དད་པ་ནི། རྩ་བར། དབེན་པར་མ་ཡིན་ཞེས་པས་གྲུབ་བོ། །གང་གིས་འབུལ་བའི་རྟེན་ནི། ཤེས་པ་རང་བཞིན་དུ་གནས་པ་དང༌།ལུས་ཐ་མལ་པར་གནས་པ་སྟེ། རང་བཞིན་ཉམས་པས་བྱས་པ་ཉིད་ནི་ཕུལ་བ་ཉིད་མ་ཡིན་ནོ། །ཞེས་དང༌། ལྟུང་བ་བསྐྱེད་པའི་རྟེན་ལུས་ཐ་མལ་པར་གནས་པ་དགོས་པར་བཤད་པའི་གནད་ཀྱིས་སྦྱར་རོ། །གང་འབུལ་བའི་དངོས་པོ་ནི། བདག་ཉིད་ཀྱི་བསླབ་པའཽ། །གཉིས་པ་བསམ་པ་ལ་གཉིས་ལས། འདུ་ཤེས་ནི་གཞི་ལ་མ་འཁྲུལ་པ་སྟེ་དབེན་པར་འདུ་ཤེས་པ་མ་ཡིན་པས་སོ། །ཀུན་སློང་ནི་བསམ་པ་ཐག་པ་ནས་འབུལ་བར་འདོད་པ་རྒྱུན་མ་ཆད་པ་སྟེ། མཛོད་འགྲེལ་ལས། བསམ་པ་ཐག་པ་ནས་སླར་ཕུལ་བ་དང༌། ཞེས་དང༌། བཞད་གད་ཀྱི་དངོས་པོས་ནི་གང་གིར་ཡང་མི་འགྱུར། ཞེས་དང༌། འོད་ལྡན་ལས། གཏོང་བའི་བློ་ཡིས་བཏང་བ་ནི། ཞེས་དང༌། རྣམ་འབྱེད་ལས། གཏོང་བའི་སེམས་མེད་པར་བསླབ་པ་འབུལ་བར་བྱེད་ན་བསླབ་པ་མ་ཕུལ་བར་བརྗོད་པར་བྱའོ། །ཞེས་དང༌། འདུན་པ་ལྡོག་པ་འོག་ཏུ་ན་ཞེས་པའི་གནད་ཀྱིས་སྦྱར་བ་སྟེ་གོ་རིམ་བཞིན་ནོ། །