༤ རྔ་ཡབ།
རྔ་ཡབ་ནི་མདོ་སྔགས་གཉིས་ཀ་ལས་འབྱུང་ལ། བདེན་བཞི་སྔགས་ཀྱི་ཆ་ལས། གྲོག་མ་ལ་སོགས་བསལ་བའི་ཕྱིར། །རྔ་མའི་ཆུན་པོ་བསྔགས་པ་ཡིན། །ཞེས་དང་། ཟླ་གསང་ཐིག་ལེ་ལས། རིག་མ་སྟོང་གིས་མངོན་པར་མཆོད་བྱེད་ཅིང་། །རིག་འཛིན་མོ་སྙན་བུད་མེད་རྣམས་ཀྱིས་ནི། །གཡག་རྔ་དཀར་བོའི་ཚོགས་ཀྱིས་གཡོབ་བྱེད་པའི། །འཇིག་རྟེན་དབང་བོ་བདེ་མཆོག་འབྲེལ་བ་འཐོབ། །ཅེས་དང་། གཤེད་དམར་ལས། སྣ་ཚོགས་རིན་ཆེན་རང་བཞིན་བརྒྱན། །རྔ་ཡབ་དཀར་བོས་བརྒྱན་པ་ཡི། །ལག་པ་དག་ནི་རྡོ་དྲིལ་ཡང་། །ཞེས་པ་སྟེ། རྔ་ཡབ་འདི་དཀྱིལ་འཁོར་དང་ཕོ་བྲང་གི་རྒྱན་མཆོག་ཏུ་མཛེས་པར་མ་ཟད། རྡོ་རྗེ་སློབ་དཔོན་ལ་ཁྲི་འབུལ་དང་། དབང་བསྐུར་སོགས་ལའང་དགོས་ལ། རྣལ་འབྱོར་བའི་གྲོག་མ་སོགས་བསལ་ཆེད་དུ་འང་འཆང་བའོ། །ཡང་། གནས་བཅུའི་ཕྱག་མཆོད་ལས། གནས་བརྟན་ཡན་ལག་འབྱུང་། ནགས་ན་གནས། རྡོ་རྗེ་མོའི་བུ། དགེ་བསྙེན་དྷ་རྨ་ཏ་ལ་སོགས་ཀྱི་ཕྱག་ཏུ་འང་རྔ་ཡབ་འཆང་བར་བཤད་དོ། །