གསུམ་པ་སྦྱོར་བ།

གསུམ་པ་སྦྱོར་བ་ནི།

བསམས་པའི་དོན་ལ་ལུས་ངག་གང་ཡང་རུང་བས་འབུལ་བར་ཞུགས་པ་སྟེ། འོད་ལྡན་ལས། གོ་བར་བྱེད་པ་ཐམས་ཅད་ཀྱིས། །བརྡ་ཕྲད་མི་ལ་གོ་བྱེད་ནའོ། །ཞེས་སོ། །བཞི་པ་མཐར་ཐུག་ནི་ཕ་རོལ་པོས་དོན་གོ་བ་སྟེ་རང་གི་རྣམ་བཤད་ལས་གཞན་གྱིས་རྟོགས་པར་གྱུར་ན་ཕུལ་བ་ཉིད་དུ་འགྱུར་རོ། །ཞེས་སོ། །ལྔ་པ་ཕུལ་ཉམས་གཉིས་ཀྱི་ཁྱད་པར་ལ། བདག་ཁྱིམ་པར་གཟུང་དུ་གསོལ་ཞེས་པ་ནི་རབ་བྱུང་གི་སྡོམ་པ་གཏོང་བ་སྟེ་དགེ་བསྙེན་གྱི་སྡོམ་པ་གཏོང་བར་མ་ངེས་པ་སྟེ་བསམ་པའི་དབང་གིས་སོ། །དགེ་ཚུལ་དུ་གཟུང་དུ་གསོལ་ཞེས་པ་ནི་དགེ་སློང་གི་སྡོམ་པ་གཏོང་བ་སྟེ་དགེ་བསྙེན་དང་དགེ་ཚུལ་གྱི་སྡོམ་པ་གཏོང་བར་མ་ངེས་པའོ། །རང་གི་རྣམ་བཤད་ལས། ཟ་མའམ་མ་ནིང་ཉིད་དུ་དམ་བཅས་པ་སྡོམ་པ་ཐམས་ཅད་འབུལ་བའོ། །ཞེས་གསུངས་སོ། །ཟ་མ་ནི་གློ་བུར་དུ་ཟ་མར་གྱུར་པ་དང༌། དང་པོ་ནས་ཟ་མ་ཡིན་པ་གཉིས་ཏེ། གཞི་འགྲེལ་ལས། ཟ་མ་ནི་རླིག་པ་ཕྱུང་བའི་ཉེས་པས་མཐུ་ཉམས་པའམ། ས་བོན་མེད་པའོ། །ཞེས་དང༌། མེ་ཏོག་ཕྲེང་རྒྱུད་ལས། གང་ཞིག་གྲོང་བའི་ཆོས་དག་གི །ནུས་མེད་དེ་ནི་ཟ་མ་སྟེ། །ཞེས་སོ། །ཐ་དད་དུ་གནས་པ་ནི་གཉིས་ཏེ། ལྟ་བའི་སྒོ་ནས་དང་ལོངས་སྤྱོད་ཀྱི་སྒོ་ནས་ཐ་དད་དུ་གནས་པའོ། །དེ་ཡང་ལུང་གཞི་ལས་དགེ་སློང་དག་གཉིས་པོ་འདི་ནི་ཐ་དད་དུ་གནས་པ་ཡིན་ཏེ། ཆོས་མ་ཡིན་པའི་ཕྱོགས་སུ་སོང་བ་དང༌། དགེ་འདུན་གྱི་གནས་ནས་ཕྱུང་བའོ། །ཞེས་གསུངས་ཏེ། དེ་ལྟར་ལུང་མ་མོ་དང་གཞི་འགྲེལ་ལས་ཀྱང་བཤད་དོ། །གནས་པར་མི་བྱ་བ་ནི། ཕམ་པ་འཆབ་བཅས་ཀྱིས་ཉམས་པའོ། །འབུལ་བའི་ཚིག་དག་ཡིན་ཞེས་སྨོས་ན་༡སྡོམ་པའི་ངོ་བོ་འབུལ་བ་ནི། བསླབ་པ་འབུལ་ཞེས་པ་ལྟ་བུའོ། །༢ རྟེན་འབུལ་བ་ནི། དཀོན་མཆོག་གསུམ་འབུལ་ཞེས་པ་ལྟ་བུའོ། །བདག་རྐྱེན་འབུལ་བ་ནི། མཁན་པོ་དང་སློབ་དཔོན་འབུལ་ཞེས་པ་ལྟ་བུའོ། །མི་མཐུན་ཕྱོགས་ཁས་བླངས་པའི་འབུལ་བ་ནི། དགེ་སློང་གིས་བདག་དགེ་ཚུལ་དུ་བཟུང་དུ་གསོལ། །ཞེས་པ་ལྟ་བུའོ། །རབ་བྱུང་གིས་བདག་ཁྱིམ་པ་དང༌། སོ་ཐར་སྡོམ་ལྡན་གྱིས་ཟ་མའམ་མ་ནིང་སོགས་སུ་བཟུང་དུ་གསོལ་ཞེས་པ་ལྟ་བུ་ཡིན་ནོ། །སྤྲིངས་ཡིག་དང་ལག་བརྡ་ལ་སོགས་པ་ལུས་ཀྱི་རིག་བྱེད་ཀྱིས་ཕུལ་བར་འགྱུར་རམ་མི་འགྱུར་ཞེ་ན། རང་གི་རྣམ་བཤད་དང་ཊཱི་ཀ་ལས། ལུས་ཀྱི་རྣམ་པར་རིག་བྱེད་ལས་ཀྱང་བསླབ་པ་ཕུལ་བར་འགྱུར། ཞེས་གསུངས་སོ། །འོད་ལྡན་ལས་ཀྱང༌། གོ་བར་བྱེད་པ་ཐམས་ཅད་ཀྱིས། །བརྡ་ཕྲད་མི་ལ་གོ་བྱེད་ནའོ། །ཞེས་གསུངས་སོ། །འོ་ན་ལུང་མ་མོ་ལས། སྤྲིངས་ཡིག་དང་ལག་བརྡས་བསླབ་པ་འབུལ་ན་ཡང་བསླབ་པ་མ་ཕུལ་བ་ཞེས་བྱའོ། །ཞེས་གསུངས་པ་དང་འགལ་ཞེ་ན། དེ་ནི་ཕ་རོལ་པོས་དོན་མ་གོ་བ་ལ་དགོངས་སོ་ཞེས་རིགས་སོ། །ཞེས་མཚོ་ཊཱིཀ་ལས་གསུངས་སོ། །འོན་ཀྱང་དུལ་བ་ལྷས། ཚིག་གིས་རྣམ་པར་རིག་པར་མི་བྱེད་ན་དེའི་ཚེ་ཡང་བསླབ་པ་མ་ཕུལ་བར་རིགས་པར་བརྗོད་པར་བྱའོ། །ཞེས་དང༌། ལུང་ལས། གཏོང་འདོད་པའི་ངག་དང་ཚིག་དང་ཐ་སྙད་དང་སྐད་དང་བརྗོད་པ་དང་ངེས་པའི་ཚིག་དང༌། ཚིག་གི་ལམ་དང་ཚིག་གི་སྒྲ་དང༌།ངག་གི་ལས་དང་ངག་གི་རྣམ་པར་རིག་བྱེད་གང་ཡིན་པ་དག་ནི་རྗོད་པར་བྱེད་པ་ལ། ཞེས་གསུངས་པས་འདུལ་བའི་ལག་ལེན་དོག་མཐའ་ནས་བཟུང་བར་བྱའོ། །ཉམས་པར་བྱས་པ་ནི་རྣམ་འབྱེད་ལས། བསླབ་པ་ཉམས་པར་བྱེད་པ་ནི། དགེ་སྦྱོང་གི་ཚུལ་གཏོང་འདོད་པ་ན་དགེ་སློང་གི་དྲུང་དུ་སོང་སྟེ། ཚངས་པར་སྤྱོད་པ་སྤྱད་དཀའ་འོ། །རབ་ཏུ་དབེན་པར་བྱ་དཀའ་འོ། །ཕ་མ་དང་ཕུ་ནུ་དང་བུ་སྲིང་དྲན་ནོ། །བདག་ཁྱིམ་བཟང་པོ་དག་ཏུ་གཏོད་ཅིག་ཅེས་བྱ་བ་ལ་སོགས་པ་དགེ་སྦྱོང་གི་ཚུལ་གཏོང་འདོད་པའི་ཚིག་བརྗོད་པར་བྱེད་པའོ། །ཞེས་གསུངས་སོ། །འོ་ན་ཕུལ་ཉམས་གཉིས་ཀྱི་ཁྱད་པར་ཅི་ཞེ་ན། རིག་བྱེད་གང་སྡོམ་པ་གཏོང་བར་དངོས་སུ་གོ་བར་བྱེད་པ་ནི་ཕུལ་བ་ཡིན་ལ། བརྒྱུད་ནས་གོ་བར་བྱེད་པ་ནི་ཉམས་པར་བྱས་པ་སྟེ། འོད་ལྡན་ལས། བཏང་བ་ཞེས་བྱ་བ་ཡང་གཏོང་བ་གསལ་བར་བྱེད་པ་གང་ཡང་རུང་བས་འགྱུར་རོ། །བསླབ་པ་ཉམས་པར་མ་བྱས་པར་ཞེས་སྨོས་པ་ནི། གཏོང་བའི་རྒྱུ་ཡིན་པར་བསྟན་པའི་ཕྱིར་རོ། །ཞེས་སོ། །མཚོ་ཊཱིཀ་ལས། དྲི་བ་རྒྱ་ཆེར་འགྲེལ་པ་ལས། བསམ་པ་ཐག་པས་དཀོན་ཅོག་གསུམ། །ཕྱིར་སྤོང་བ་ནི་བྱེད་པ་ལ། །སྡོམ་པ་མེད་པར་མི་འགྱུར་བ། །ཅི་ཕྱིར་འདི་ལ་ལན་བརྗོད་ཅིག །དེ་ལ་ལན་ནི་འདི་ཡིན་ཏེ། །དགེ་སློང་མ་ནག་མོས་དཀོན་མཆོག་གསུམ་སྤོང་ངོ་ཞེས་སྨྲས་པ་ལས་དཀོན་མཆོག་གཏོང་བའི་ལྷག་མར་གསུངས་སོ་ཞེས་སོ། །སྐྱབས་འགྲོ་བཏང་བའི་གང་ཟག་ཆོས་ཅན། སྡོམ་པ་ལས་དངོས་སུ་འདས་པའི་ལྟུང་བ་བསྐྱེད་པ་ཁེགས་པར་ཐལ། སྡོམ་པ་མེད་པའི་ཕྱིར་ཏེ། རྟགས་ཁས་བླངས་སོ། །འདོད་ན། མའི་རྣམ་འབྱེད་ལས། དགེ་སློང་མ་གང་དཀོན་མཆོག་གཏོང་ངོ་ཞེས་ཟེར་ན་ཉེས་བྱས་སུ་འགྱུར་རོ། །བརྗོད་པ་གསུམ་པའི་མཐར་ནི་དགེ་འདུན་ལྷག་མར་འགྱུར་རོ་ཞེས་གསུངས་སོ། །སྒྲུབ་བྱེད་གཞིག་པ་ནི་འདིར་སངས་རྒྱས་འབུལ་ལོ་ཞེས་པ་དེ་བསླབ་པ་འབུལ་བ་གོ་བར་བྱེད་པའི་མཚོན་བྱེད་དུ་བསྟན་པ་སྟེ། མཁན་པོ་འབུལ་ལོ་ཞེས་བསྟན་པ་བཞིན་ནོ། །མཛོད་ལས་བཤད་པ་དེ་ནི་ཤེས་བཞིན་དུ་སྐྱབས་འགྲོ་མ་བྱས་པར་བསྙེན་གནས་ལེན་ན། དེ་ལ་སྡོམ་པ་སྐྱེ་བ་མིན་ཞེས་བསྟན་པ་ཡིན་གྱི། སྐྱབས་འགྲོ་ཤོར་བས་སྡོམ་པ་འཆོར་བར་བསྟན་པ་ནི་མ་ཡིན་ནོ། །ཞེས་གསུངས་པ་ལ་ཅུང་ཟད་དཔྱད་རྒྱུ་སྣང་ངོ། ། དྲུག་པ་དགག་སྒྲུབ་ཀྱི་བསླབ་པ་གང་ཡིན་བསྟན་པ་ནི། བསླབ་པ་འབུལ་བ་འདི་ནི་སྤྱིར་བཏང་ལ་དགག་པའི་བསླབ་པ་ཡིན་ལ། དམིགས་བསལ་ནི་ཕམ་པའི་རྒྱུ་ལ་ངེས་པར་འཇུག་པར་འགྱུར་ན། གང་ཟག་དེ་ལ་ནི་བསླབ་པ་འབུལ་བ་ནི་སྒྲུབ་པའི་བསླབ་པ་ཡིན་ཏེ། སྡོམ་པ་སྲུང་མི་ནུས་ན་ཕུལ་བ་ལ་འདས་མ་འོངས་ད་ལྟ་གསུམ་ལ་ལྟོས་ཏེ་དགོས་པ་གསུམ་ཡོད་པའི་ཕྱིར་ཏེ། སྔར་བསྲུང་བའི་ཕན་ཡོན་དང༌། ད་ལྟ་ལྟུང་བ་མི་འབྱུང་བ་དང༌། ཕྱིས་སྡོམ་པ་བླང་ན་སྐྱེ་བའི་དགོས་པ་གསུམ་གྲུབ་པའི་ཕྱིར་ཏེ། མདོ་ལས། གང་ཞིག་བསླབ་ལ་མི་གནས་པ། །བདེ་གཤེགས་རྒྱལ་མཚན་འཛིན་པ་པས། །བསླབ་ལ་མི་གནས་སྐད་ཅིག་ལ། །གཟུགས་པོར་ཁྱིམ་པར་གནས་པ་བཟང༌། ཞེས་དང༌། བསྡུས་པ་ལས། ཇི་ལྟར་བྱས་ཀྱང་བསླབ་པ་བསྲུང་བར་མི་ནུས་པ་མཐོང་ན་བསླབ་པ་འབུལ་བར་བྱའོ། །ཞེས་སྒྲུབ་ཚིག་ཏུ་གསུངས་པ་ནི། དེའི་ཚེ་བསླབ་པ་མ་ཕུལ་བར་ཉེས་སྤྱོད་ལ་ཞུགས་ན་ཕམ་པའི་ཉེས་པ་ཆེན་པོ་འབྱུང་ལ། ཕུལ་ན་ཕམ་པར་མི་འགྱུར་བའི་ཕྱིར་རོ། །བསླབ་པ་འབུལ་བ་བཤད་ཟིན་ཏོ། །