གཉིས་པ་ཡེ་ཤེས་ཀྱི་ཚོགས་བཤད་པ།

གཉིས་པ་ཡེ་ཤེས་ཀྱི་ཚོགས་བཤད་པ་ལ།

སྤྱི་དོན་དང༌། མཐའ་རགས་ཙམ་དཔྱད་པ་གཉིས། དང་པོ་ལ། རྩ་བར། ཡེ་ཤེས་དང༌། ཞེས་གསུངས་ལ། དེའི་སྐབས་ནས་སྟོང་ཉིད་རྟོགས་པའི་ཡེ་ཤེས་ཀྱི་ཚོགས་ཉི་ཤུ་བསྟན་ལ། ཡེ་ཤེས་དེ་དག་གི་ཡུལ་སྟོང་ཉིད་ཉི་ཤུ་སོགས་ཡོད་པས་དེ་འདིར་ཅུང་ཟད་བཤད་ན། སྟོང་ཉིད་གཉིས་སུ་དབྱེ་བ་དང༌། གསུམ་དུ་དབྱེ་བ་དང༌། བདུན་དུ་དབྱེ་བ་དང༌། བཅུ་དྲུག་སོགས་དབྱེ་བ་དང་བཞི། དང་པོ་ནི། རང་སྟོང་དང་གཞན་སྟོང་གཉིས་སྔར་ལྟར་ཀུན་རྫོབ་ཀྱི་ཆོས་རྣམས་རང་སྟོང་དང༌། དོན་དམ་བདེན་པ་ནི་གཞན་སྟོང་ཡིན་ཏེ། ཆོས་རྗེ་ཀུན་མཁྱེན་གྱིས་མཛད་པའི་སྟོང་ཉིད་ཀྱི་རབ་དབྱེ་ལས། སྟོང་ཉིད་གསུངས་པ་ཐམས་ཅད་རང་སྟོང་ཁོ་ན་མ་ཡིན་གྱི་གཞན་སྟོང་ཟབ་མོ་ཡིན་པའི་སྟོང་ཉིད་དང༌། རང་སྟོང་མི་ཟབ་པ་ཡིན་པའི་སྟོང་ཉིད་དུ་དབྱེར་ཡོད་དོ། །ཡང་རྣམ་པ་གཉིས་ཏེ། དོན་དམ་ཡིན་པའི་སྟོང་ཉིད་དང༌། ཀུན་རྫོབ་ཡིན་པའི་སྟོང་ཉིད་དོ། །ཞེས་དང༌། སྟོང་ཉིད་ཆེན་པོའི་མདོ་སོགས་ལས། །གང་ཞིག་གང་ན་མེད་པ་དེས་སྟོང་ངོ༌། །དེ་ལ་ལྷག་མ་གང་ཡིན་པ་དེ་འདིར་རྟག་ཏུ་ཡོད་དོ། །དེ་ནི་སྟོང་བ་ཉིད་ལ་ཡང་དག་པར་འཇུག་པ་ཡང་དག་པ་ཇི་ལྟ་བ་སྟེ་ཕྱིན་ཅི་མ་ལོག་པའོ། །ཞེས་དང༌། རྗེ་བཙུན་བྱམས་མགོན་གྱི་ཞལ་སྔ་ནས།ཡང་དག་མཐའ་ནི་འདུས་བྱས་ཀྱི། །རྣམ་པ་ཐམས་ཅད་དབེན་པ་སྟེ། །ཞེས་དང༌། རྣམ་དབྱེར་བཅས་པའི་མཚན་ཉིད་ཅན། །གློ་བུར་དག་གིས་དབྱིངས་སྟོང་གི །རྣམ་དབྱེར་མེད་པའི་མཚན་ཉིད་ཅན། །བླ་མེད་ཆོས་ཀྱིས་སྟོང་མ་ཡིན། །ཞེས་གསུངས་པའི་ཕྱིར་རོ། །ཡང་དེ་ལྟར་ཤེར་འགྲེལ་སྔོན་མེད་ལེགས་བཤད་ལས། འཁོར་ལོ་ཐ་མའི་མདོ་རྣམས་ལས་ནི་ལྷག་པར་ཡང་རྒྱས་ཤིང་གསལ་བར་གསུངས་ཏེ། བཀའ་འཁོར་ལོ་གསུམ་ཆར་གྱི་དངོས་བསྟན་དང་ཤུགས་བསྟན་དང༌། དགོངས་དོན་གྱི་གཙོ་བོའི་སྟོང་བ་ཉིད་ནི། གཞན་སྟོང་དབུ་མ་ཆེན་པོ་ཁོ་ན་ཡིན་གྱི་སྲིད་ཚད་ཐམས་ཅད་རང་སྟོང་དུ་འདོད་པའི་ལུགས་ལྟར་གསུངས་པ་ནི་མེད་དོ། །དེ་བས་ན་ཀུན་རྫོབ་ཀྱི་ཆོས་ཐམས་ཅད་གདོད་མ་ནས་རང་གི་ངོ་བོས་སྟོང་པར་འཇོག་པའི་གྲུབ་མཐའ་ནི། རང་སྟོང་རྣམ་དག་རྒྱལ་བའི་དགོངས་པ་ཡིན་ཡང་མཐར་ཐུག་དོན་དམ་དབྱིངས་ཀྱང་རང་གི་ངོ་བོས་སྟོངས་པར་འདོད་པ་ནི་ཤིན་ཏུ་ཆེས་ལོག་པར་ལྟ་བ་ཡིན་པས། དེ་གཉིས་བསྡོམས་པའི་གྲུབ་མཐའ་འདི་དག་ནི་ཁ་ཟས་བཟང་པོ་དུག་ཅན་དང་འདྲ་ལ།ཀུན་རྫོབ་ཐམས་ཅད་རང་སྟོང་དང༌། དོན་དམ་དབྱིངས་གཞན་སྟོང་དུ་འཁྱེར་ཤེས་པ་ཟུང་འཇུག་གི་ལྟ་བ་ཡོན་ཏན་ཀུན་དང་ལྡན་པ་འདི་ནི། ཆོས་ཉིད་ཀྱི་གནས་ལུགས་དང༌། སངས་རྒྱས་ཐམས་ཅད་ཀྱི་དགོངས་པའོ། །ཞེས་གསུངས་པའི་ཕྱིར་རོ། །སྐབས་འདིར་དོན་དམ་ཆོས་ཀྱི་དབྱིངས་དེ་ནི་རང་གི་ངོ་བོས་མི་སྟོང་བ་དང་བདེན་པར་གྲུབ་ཀྱང་དགག་བྱ་བདག་གཉིས་ཀྱིས་སྟོང་བ་དང༌། སྤྲོས་པའི་བདེན་གྲུབ་བམ་དགག་བྱ་བདེན་པར་མ་གྲུབ་སྟེ། རི་ཆོས་ལས། བདག་གཉིས་ཀྱིས་སྟོང་བའི་ཕྱིར། ཞེས་དང༌། གཞན་སྟོང་དབུ་མའི་རྒྱན་ལས།མཚན་མ་སྤྲོས་པའི་བདེན་གྲུབ་ང་མི་འདོད། །སྤྲོས་པས་དབེན་པའི་བདེན་ཚུལ་འདི་ལྟ་བུ། །ཞེས་དང༌། བདེན་གྲུབ་འགོག་ཚད་སྤྲོས་པའི་བདེན་འགོག་སྟེ། །ཞེས་དང༌། ཡོངས་གྲུབ་དེ་ལ་སྤྲོས་པའི་བདེན་པ་མེད། །སྤྲོས་པའི་བདེན་པ་ཡོད་ན་ཀུན་རྫོབ་སྟེ། །ཞེས་གསུངས་པའི་ཕྱིར་རོ། །