གཉིས་པ་དགེ་སློང་ཕ་མའི་རྣམ་འབྱེད་སོ་སོར་བསྟན་པ་འདི་ལ་གཉིས།
གཉིས་པ་དགེ་སློང་ཕ་མའི་རྣམ་འབྱེད་སོ་སོར་བསྟན་པ་འདི་ལ་གཉིས་ཏེ།
སྤྱིའི་དོན་དང་སོ་སོའི་དོན་ཏོ། །དང་པོ་ལ། ལྟུང་བ་སྡེ་ལྔ་པོ་རྣམས་ཀྱི་དབྱེ་བ་དང༌། བསྡུ་བ་དང༌། མཚན་ཉིད་དང༌། གྲངས་ངེས་པ་དང༌། གོ་རིམ་ངེས་པ་དང༌། སྒྲ་བཤད་པ་དང༌། འདས་ན་ཅིར་འགྱུར་དང༌། བསྲུང་བའི་ཕན་ཡོན་དང༌། མ་བསྲུངས་པའི་ཉེས་དམིགས་དང་དགུ། །དང་པོ་ལ་གཉིས་ལས་དབྱེ་བའི་གཞི་ནི་རབ་བྱུང་གི་སོ་སོར་ཐར་པའི་སྡོམ་པ་ལས་འདས་པའི་ལྟུང་བ་ཙམ་མོ། །དབྱེ་བའི་སྒོ་ནི་ངོ་བོ་ཐ་དད་ཀྱི་སྒོ་ནས་མི་འབྱེད་དེ། དངོས་དང་མདོར་བསྡུས་ལ་ལྟོས་ནས། དཔག་ཏུ་མེད་པས་དབྱེ་བར་མི་ནུས་པའི་ཕྱིར་རོ། །འོ་ན་གང་ཞེ་ན། སྡེ་ཚན་ཐ་དད་ཀྱི་སྒོ་ནས་ཕྱེ་ན། ལྟུང་བའི་སྡེ་ཚན་ལྔ་སྟེ། ལུང་ལྔ་ཚན་པ་ལས་ཉེས་པ་ལྔ་སྟེ། ཕམ་པ་དང༌། དགེ་འདུན་ལྷག་མ་དང༌། ལྟུང་བྱེད་དང༌། སོ་སོར་བཤགས་པར་བྱ་བ་དང༌། ཉེས་བྱས་སོ། །ཞེས་དང༌། རྣམ་འབྱེད་ལས། རྫུན་རྣམ་པ་ལྔ་སྟེ། གཞི་མེད་པར་ལྟུང་བ་སྡེ་ལྔས་གླེང་བའོ། །ཞེས་དང༌། འདུལ་བ་བསྡུ་བ་ལས། ལྟུང་བའི་སྡེ་ཚན་ལྔ་སྟེ། ཞེས་དང༌། འོད་ལྡན་ལས། ལྟུང་བ་རིགས་ལྔ་དག་ཏུ་འཇུག་པར་བྱེད་པ་ཡིན་པའི་ཕྱིར། ཞེས་གསུངས་སོ། །སྡེ་ཚན་ལྔ་པོ་དེར་སྦོམ་པོ་མི་འདུས་སོ་ཞེ་ན། ཕམ་ལྷག་གི་ན་སྨད་ཡིན་པས་ཕམ་ལྷག་གི་སྡེར་འདུས་ཏེ། འོད་ལྡན་ལས། ཉེས་པ་སྦོམ་པོ་ནི་གཉིས་ཏེ། ཕམ་པ་ལས་བྱུང་བ་དང༌། ལྷག་མ་ལས་བྱུང་བའོ། །ཞེས་གསུངས་སཽ། །བཙུན་པ་ངོ་བོ་ཉིད་མེད་པས། །ལྟུང་བ་རིགས་ལྔ་ནི་ཕམ་པ་དང༌། ལྷག་མ་དང་སྦོམ་པོ་དང་ལྟུང་བྱེད་དང༌། སོ་སོར་བཤགས་པར་བྱའོ་ཞེས་སྦོམ་པོའི་སྡེ་བཤད་པ་ནི། བཤད་པ་ཙམ་དུ་ཟད་དེ་མི་འཐད་དོ། །སོ་སོ་ཐར་པ་ལས་བཤད་པའི་མ་ངེས་པའི་ཆོས་གཉིས་ནི་སྡེ་ལྔ་པོ་དེར་མ་འདུས་སམ་སྙམ་ན། འདུལ་བ་བསྡུ་བ་ལས། མ་ངེས་པ་གང་ཡིན་པ་དེ་ནི་ཕམ་པ་ལ་སོགས་པ་དེ་དག་ཉིད་དུ་ཅི་རིགས་པར་འདུས་པར་རིག་པར་བྱའོ། །ཞེས་གསུངས་ཏེ། གསུམ་དུ་མ་ངེས་པའི་ཆོས་ནི་དགེ་སློང་དང་བུད་མེད་འདོམ་གང་གིས་བར་དུ་མ་བཅད་པར་འདོད་པར་བྱར་རུང་བར་སྟན་ལ་འདུག་ན། ཕམ་ལྷག་ལྟུང་བྱེད་དང་གསུམ་གང་འབྱུང་མ་ངེས་པ་དེ་ནི། ཕམ་ལྷག་དང་ལྟུང་བྱེད་དུ་འདུས་ཏེ། གཉིས་སུ་མ་ངེས་པའི་ཆོས་ནི་དགེ་སློང་དང་བུད་མེད་འདོམ་གང་གིས་བར་དུ་བཅད་དེ་འདོད་པ་བྱར་མི་རུང་བར་སྟན་ལ་འདུག་ན་རེག་པའི་ལྷག་མ་དང་འདུག་པའི་ལྟུང་བྱེད་གཉིས་གང་འབྱུང་མ་ངེས་པ་དེ་ནི། ལྷག་མ་དང་ལྟུང་བྱེད་དུ་འདུས་པའོ། །
གཉིས་པ་བསྡུ་བ་ལ་གཉིས་ཏེ། བསྡུ་བ་དངོས་དང༌། ཞར་ལ་བྱུང་བའོ། །
དང་པོ་ལ་གསུམ་ལས། དང་པོ་བསམ་པ་དང་དངོས་པོའི་ཆ་ནས་བསྡུ་བ་ནི། ལྟུང་བ་ཐམས་ཅད་གཉིས་སུ་འདུས་ཏེ། འདུ་ཤེས་གཙོ་བོ་དང༌། དངོས་པོ་གཙོ་བོའོ། །དེའང་འོད་ལྡན་ལས། བསླབ་པའི་གཞི་ནི་རྣམ་པ་གཉིས་ཏེ། འདུ་ཤེས་གཙོ་བོར་བྱ་བ་དང༌། དངོས་པོ་གཙོ་བོར་བྱ་བའོ། །ཞེས་གསུངས་སོ། །དངོས་པོ་གཙོ་བོ་ནི་མི་ཚངས་སྤྱོད་དང་འབྱིན་པ་གཉིས་ཀྱི་ལྟུང་བ་ཡིན་ལ། འདུ་ཤེས་གཙོ་བོ་ནི་དེ་དག་ལས་གཞན་པའི་ལྟུང་བ་རྣམས་ཡིན་ཏེ། རྩ་བར། མི་ཚངས་པར་སྤྱོད་པ་དང་ཁུ་བ་འབྱིན་པ་གཉིས་ལ་ནི་དེར་མ་ཟད་དོ། །ཞེས་གསུངས་སོ། ། མི་ཚངས་སྤྱོད་ཀྱི་ཕམ་པ་དང་དེའི་སྦོམ་པོ་ལ་སོགས་པ་དེ་དག་དང་མི་ཚངས་པར་སྤྱོད་པའི་ཕམ་པ་དང་འདྲ་བའི་ཉེས་བྱས་རྣམས་དངོས་པོ་གཙོ་བོའོ། །འབྱིན་པའི་ལྷག་མ་དང་དེའི་སྦོམ་པོ་ལ་སོགས་པ་དག་དང༌། དགེ་སློང་མས་འབྱིན་པའི་ལྟུང་བྱེད་དང༌། དགེ་ཚུལ་གྱིས་འབྱིན་པའི་བསྡོམ་བྱའི་ཉེས་པ་དངོས་པོ་གཙོ་བོ་སྟེ་སྤྱིར་བསྟན་གྱི་གཞུང་དེས་ཤེས་སོ། །