ངེས་ལེགས་བླ་མ་ནམ་མཁའ་ཆོས་དབྱིངས་ནི།
ཆོས་བདག་ལུང་བསྟན་ནོར་བུའི་བང་མཛོད་ལས། དཔལ་གྱི་དབང་ཕྱུག་སྔགས་བཙུན་ནམ་མཁའ་གྲགས༔ ཞེས་ལུང་གིས་བསྔགས་པ་ལྟར་རབ་བྱུང་བཅུ་བཞི་པའི་ནང་གཡུ་ཁོག་ཏུ་སྐུ་འཁྲུངས། རྫོགས་ཆེན་སོགས་སུ་གྲྭ་སར་ཕེབས། མི་འགྱུར་ནམ་མཁའི་རྡོ་རྗེ་ལས་ཐུན་མིན་གྱི་གདམས་པ་དུ་མ་གསན། རྫོགས་སྤྲུལ་བཞི་པས། ནམ་མཁའ་ཆོས་དབྱིངས་རྣལ་འབྱོར་དམ་པ་དང་། །ས་ཕྱོགས་དེ་རུ་དགེ་བཅུ་གོང་དུ་འཕེལ། །རྣལ་འབྱོར་བསྐྱེད་རྫོགས་བཟླས་བརྗོད་ཕུལ་དུ་ཕྱིན། །སྨིན་གྲོལ་ཆོས་ཀྱིས་འགྲོ་བ་འདྲེན་པ་དང་། །སྐུ་གསུམ་བདེ་ཆེན་སྣང་སྲིད་འཆར་བར་ངེས། ཞེས་སོགས་ཆེད་དུ་བསྔགས་པ་མཛད། བླ་མ་འདི་སྨིན་མ་རིང་པོས་སྤྱན་བཀབ་པ་དང་། སྨ་ར་རིང་པོས་ཞལ་བཀབ་ཡོད་པ་ཞིག་ཡིན་པས། རྫོགས་ཆེན་པས་ངེས་ལེགས་བླ་མ་འབྲུག་མགོ་མ་ཟེར། ཤེས་རྒྱ་ཡངས་ཤིང་མཁྱེན་དཔྱོད་ཆེ་བའི་ཚད་དུ་གྲགས། བསྲུང་མ་འགོ་ཞིང་གྲུབ་པའི་རྟགས་མཚན་དང་ལྡན་པ་ཞིག་ཡིན་པར་བཤད་དོ།།