བྱང་ཆུབ་སྤྱོད་པའི་སྨོན་ལམ་ཕན་བདེའི་གྲིབ་བསིལ།

ན་མོ་ཤཀྱཱ་མུ་ནེ་ཡེ། ཚོགས་གཉིས་རྒྱ་མཚོའི་སྙིང་པོ་ལས། །ཡོན་ཏན་རིན་ཆེན་གཏེར་བརྙེས་ཏེ། །རང་གཞན་དོན་གཉིས་རྫོགས་མཛད་པ། །ཤཱཀྱའི་སྲས་ལ་མགོས་ཕྱག་འཚལ། །གང་གི་རླབས་ཆེན་ཐུགས་བསྐྱེད་མཐུས། །བདག་སོགས་གདུལ་དཀའི་འགྲོ་བ་རྣམས། །ཕན་བདེའི་ས་ལ་འགོད་པའི་དྲིན། །བསམ་བཞིན་དད་གུས་མཆི་མས་བརྣངས། །རྒྱལ་བ་དུས་གསུམ་གཤེགས་ཀུན་གྱི། །མཁྱེན་བརྩེའི་ཕུང་པོ་སྡོམ་པའི་དཔྱིད། །ཞིང་འདིའི་སྟོན་པ་ཟླ་བྲལ་བ། །ཤཱཀྱ་སེདྒེར་དད་བརྒྱས་འདུད། །ཀྱེ་མ་ཧོ་འཇིག་རྟེན་རྣམ་འདྲེན་ཁྱོད། །བདག་ཅག་སྙིགས་ལྔའི་གདུལ་བྱའི་འགྲོ། །སྡུག་བསྔལ་མི་བཟད་དུག་གི་མཚོར། །གཡེངས་པ་ཡལ་བར་འདོར་ཕོད་དམ། །དབང་བཅུའི་ཕ་རོལ་ཕྱིན་པ་ཁྱོད། །རྩྭ་མཆོག་གྲོང་གི་གནས་དེ་རུ། །ཞི་བར་གཟིམས་པ་ཅུང་བདེན་ནམ། །ད་ནི་བདག་ཅག་སུ་ལ་རེ། །སྡུག་བསྔལ་བཟོད་དཀའི་མེ་དོང་དུ། །རྣམ་པར་འཚིག་པའི་འགྲོ་མང་འདི། །མགོན་པོ་ཁྱོད་ཀྱིས་མི་སྐྱོབ་ན། །སྐྱོབ་པ་གཞན་ཞིག་གང་དུ་འཚོལ། །ཀྱེ་ཧུད་རྒྱལ་བ་སྙིང་རྗེའི་གཏེར། །སྙིང་རྗེའི་ཡུལ་དུ་རབ་གདུང་བའི། །སྡུག་བསྔལ་མང་ལྡན་ལྔ་བདོའི་འགྲོ། །གཟིགས་ནས་མི་སྐྱོབ་འདི་ཅི་ཞིག །ཨེ་མ་ཐབས་མཁས་ཕ་རོལ་གཤེགས། །ཁྱོད་འདྲས་བདག་ཅག་མ་བསྒྲལ་ན། །ལྔ་ཕྲག་ཐ་མའི་གདུལ་དཀའི་འགྲོ། །སྐྱོབ་ནུས་གཞན་ཞིག་གང་དུ་འཚོལ། །དེས་ན་བདག་ཅག་མགོན་ཁྱོད་ཀྱི། །བཀའ་དྲིན་རྗེས་སུ་དྲན་པའི་བློས། །ཁྱེད་ཀྱི་རྣམ་ཐར་རྒྱ་མཚོ་ལ། །རྗེས་སུ་སློབ་པའི་འདུན་པ་བསྐྱེད། །ལུས་པ་མེད་པའི་འགྲོ་མང་ཁམས། །མཐའ་ཡས་རབ་ཏུ་སྒྲོལ་བའི་ཕྱིར། །བྱང་ཆུབ་སྤྱོད་པ་རྒྱ་མཚོ་ལ། །བྱང་ཆུབ་བར་དུ་བདག་གིས་སྤྱོད། །དམྱལ་མེ་བཟོད་དཀས་ཆེས་མནར་བའི། །ལུས་ཅན་ཇི་སྙེད་དེ་ཀུན་ལ། །དབུགས་འབྱིན་ཆེན་པོ་བདག་གིས་བསྒྲུབ། །གཞན་ཡང་འགྲོ་གང་སྲིད་ལམ་འདིར། །སྡུག་བསྔལ་གང་དང་གང་ཐོབ་པ། །དེ་ཀུན་བདག་གིས་རྒྱུན་བཅད་དེ། །ཕན་བདེ་མཆོག་ལ་དགོད་པར་བགྱི། །འགྲོ་གང་མཚམས་མེད་ལྔ་བྱེད་དང་། །ཆོས་སྤོང་བྱང་སེམས་འཕགས་པ་ལ། །སྨོད་དང་གནོད་པའི་ལས་བྱེད་པ། །དེ་ཀུན་བདག་གིས་འདྲེན་པར་བགྱི། །གང་དག་ལོག་པར་ལྟ་བ་དང་། །རྩ་བ་ཡན་ལག་དམ་ཚིག་ལས། །ཉམས་པ་ཕྱིར་མི་འཆོས་པ་དག །མྱུར་དུ་བདག་གིས་བསྐྱབ་པར་བགྱི། །སྐལ་བ་ངན་པའི་འགྲོ་རྒྱུད་ལ། །རྒྱལ་བའི་ཕྲིན་ལས་འཇུག་པའི་སྐབས། །རང་གི་ནོངས་པས་བཅད་དེ་ཀུན། །མ་ལུས་བདག་གིས་བསྐྱབ་པར་བགྱི། །འགྲོ་གང་ཤིན་ཏུ་མི་བཟད་པའི། །ལས་ངན་གྱིས་མནར་སུ་ཡང་རུང་། །བདག་གི་མིང་ཙམ་ཐོས་པས་ཀྱང་། །ལས་ཟད་གོ་འཕང་མཆོག་ཐོབ་ཤོག །རྨོངས་པར་གོམས་པའི་རྒྱུ་མཐུན་གྱིས། །ཤིན་ཏུ་བླུན་ཞིང་རྨོངས་པ་རྣམས། །བདག་མིང་ཐོས་པ་ཙམ་ཉིད་ནས། །བློ་མཆོག་ཕ་རོལ་ཕྱིན་པར་ཤོག །འཇིགས་དང་དབུལ་ཕོངས་ནད་གདོན་དང་། །ཡིད་མི་བདེ་གྱུར་སུ་ཡང་རུང་། །བདག་མཐོང་ཐོས་དང་དྲན་པ་ཡིས། །བདེ་ཐོབ་ཐར་ལམ་མཆོག་རྙེད་ཤོག །ཚུལ་ཁྲིམས་འཆལ་དང་དམ་ཚིག་ཉམས། །བཅོས་སུ་མི་རུང་གྱུར་ཀུན་ཀྱང་། །བདག་མཐོང་ཐོས་དང་དྲན་ཙམ་གྱིས། །རྣམ་དག་ཡོན་ཏན་རྫོགས་པར་ཤོག །སུ་ཞིག་བཅས་དང་རང་བཞིན་གྱི། །ཉེས་པར་འཇུག་འདོད་དེའི་དྲུང་དུ། །བདག་ཉིད་མངོན་སུམ་འདུག་ནས་ནི། །ཉེས་པ་བྱེད་ལས་བཟློག་པར་ཤོག །བདག་གི་འཁོར་བ་ཐོག་མེད་ནས། །ཕྱི་མཐའི་བར་གྱི་དགེ་ཚོགས་ཀུན། །སེམས་ཅན་ཀུན་གྱི་རྗེས་འགྲོ་ཞིང་། །འགྲོ་ཀུན་རྟག་ཏུ་བདེ་གྱུར་ཅིག །སྡུག་བསྔལ་ཀུན་གྱི་ཁུར་ཆེན་པོ། །མ་ལུས་བདག་གིས་ཡོངས་བཟུང་སྟེ། །སྲིད་ན་སེམས་ཅན་སུ་ཡང་རུང་། །རྟག་ཏུ་བདེ་དང་ལྡན་གྱུར་ཅིག །བདག་མཐོང་ཐོས་དང་དྲན་པ་དང་། །རླུང་ཕྱོགས་ཙམ་དུ་རེག་པས་ཀྱང་། །སྡིག་དང་ཉོན་མོངས་རབ་ཟད་དེ། །ངན་སོང་སྐྱེ་བ་རྒྱུན་གཅད་ཤོག །བདག་ལ་ཁྲོ་དང་སྨོད་པ་དང་། །བརྙས་དང་ཡོངས་སུ་རྡེག་པ་དང་། །ཅོ་འདྲི་ཕྲག་དོག་བྱེད་ཀུན་ཀྱང་། །གཏན་དུ་ངན་འགྲོའི་རྒྱུན་ཆད་ཤོག །དེ་ལྟར་བདག་གིས་གང་སྨོན་པ། །ཇི་བཞིན་ཡོངས་སུ་མ་རྫོགས་བར། །དེ་སྲིད་བདག་ནི་བླ་མེད་པའི། །གོ་འཕང་འཐོབ་པར་ཡོངས་མི་བགྱིད། །ནམ་ཞིག་བདག་འཚང་རྒྱ་བའི་དུས། །ཞིང་དང་གདུལ་བྱར་མ་གྱུར་པའི། །སེམས་ཅན་འགའ་ཡང་མ་མཆིས་ཤིང་། །དེ་ཀུན་དངོས་ཀྱིས་གདུལ་བར་ཤོག །དེར་ཡང་བླ་མེད་ཚུལ་གཅིག་པས། །སྟོང་ཉིད་ཟབ་མོའི་སེདྒེའི་སྒྲ། །ཀུན་ལ་གཅིག་ཆར་སྟོན་པ་ཡིས། །ཐམས་ཅད་ཐེག་མཆོག་ལ་འགོད་ཤོག །དེ་དག་ས་དང་ལམ་རྣམས་དང་། །སྤྱོད་དང་སྨོན་ལམ་རྒྱ་མཚོ་ཀུན། །སྐད་ཅིག་ཉིད་ལ་རབ་རྫོགས་ཏེ། །འཁོར་བ་དོང་ནས་སྤྲུག་པར་ཤོག །དེ་ལྟར་བདག་གིས་བྱང་ཆུབ་སྤྱོད་པ་ལ། །མངོན་དགའི་སྨོན་པའི་དམ་བཅའ་ལྷུར་བླངས་པ། །དེས་ནི་མཁའ་མཉམ་འགྲོ་བ་མ་ལུས་པ། །ཀུན་མཁྱེན་ཡེ་ཤེས་མཆོག་ལ་རེག་པར་ཤོག །ཅེས་པའི་དམ་བཅའ་ཉུང་ངུའི་སྨོན་ཚིག་འདི་ཡང་བྱང་ཆུབ་སྤྱོད་པ་རྒྱ་མཚོའི་ཚུལ་ལ་སྙིང་ནས་མོས་པའི་བྷུ་སུ་ཀུ་པ་འཇིགས་མེད་ཡོན་ཏན་མགོན་པོའམ་མིང་གཞན་རྒྱལ་སྲས་གཞན་ཕན་ཟླ་བའི་འོད་ཟེར་དྲི་མ་མེད་པའི་དཔལ་ཞེས་འབོད་པ་དེས་རྒྱལ་བ་ལྷ་ལས་བབ་པའི་དུས་ཆེན་གྱི་ཉིན། སྟོན་པ་མཆོག་དེའི་བཀའ་དྲིན་རྗེས་སུ་དྲན་པའི་མོས་གུས་ཀྱིས་མཚམས་སྦྱར་ཏེ་ལེགས་པར་བཀོད་པ་འདིས་ཀྱང་ལུས་ཅན་ཐམས་ཅད་བླ་ན་མེད་པའི་བྱང་ཆུབ་ཆེན་པོར་མྱུར་དུ་མངོན་པར་འཚང་རྒྱ་བའི་རྒྱུར་གྱུར་ཅིགསརྦ་མདྒ་ལཾ་བྷུ་བྷཻ་སིདྡྷི་ནུནྟེ། །