གཉིས་པ་གསུམ་དུ་དབྱེ་བ།

གཉིས་པ་གསུམ་དུ་དབྱེ་བ་ནི།

མེད་པའི་སྟོང་བ་ཉིད་དང༌། ཡོད་པའི་སྟོང་བ་ཉིད་དང༌། རང་བཞིན་སྟོང་བ་ཉིད་དང་གསུམ། དང་པོ་ནི། ཀུན་བཏགས་རྣམས་ཞེན་ཡུལ་ལ་ཤར་བ་ཙམ་མ་གཏོགས། གནས་ལུགས་ལ་ལྟ་ཅི་སྨོས། ཀུན་རྫོབ་ཀྱི་ཤེས་པ་རླང་པོས་གཞིགས་ན་ཤེས་པ་ཀུན་རྫོབ་པ་དེའི་ངོར་ཡང་མ་གྲུབ་པའི་ཕྱིར་མེད་པའི་སྟོང་བ་ཉིད་དང༌།གཉིས་པ་ནི། གཞན་དབང་རྣམས་ཏེ། ཀུན་རྫོབ་ཀྱི་ཤེས་པ་ལ་གསལ་བར་སྣང་བ་དང༌།ཡང་དག་ཀུན་རྫོབ་བདེན་པའི་ངོ་བོར་ཡོད་པས་ཡོད་པའི་སྟོང་བ་ཉིད་དང༌། གསུམ་པ་ནི། ཡོངས་གྲུབ་སྟེ། དྲི་མ་སྦྱང་བའི་གཞི་གདོད་ནས་ཆོས་ཀུན་གྱི་རང་བཞིན་དུ་ཡོད་ཀྱང་དེ་ལྟར་མ་རྟོགས་པའི་དྲི་མ་སྦྱོང་དགོས་ཤིང༌། མངོན་སུམ་དུ་རྟོགས་པར་བྱ་ཞིང་ཐོབ་པར་བྱ་དགོས་པས་ན། སྦྱང་གཞི་དང་ཐོབ་བྱ་དང༌། རེག་པར་བྱ་བ་ཡིན་ཅིང༌། རང་གི་ངོ་བོ་དོན་དམ་ཡང་ཡིན་སྤྲོས་བྲལ་གྱི་སྟོང་ཉིད་ཀྱང་ཡིན། ཆོས་ཐམས་ཅད་ཀྱི་རང་བཞིན་དུ་གནས་པ་ཡང་ཡིན། གློ་བུར་གྱི་དྲི་མའམ་འཁྲུལ་སྣང་གི་གདོད་ནས་སྟོང་བ་ཡང་ཡིན་པས་དེ་ལ་རང་བཞིན་སྟོང་བ་ཉིད་ཅེས་བྱ་སྟེ། མདོ་སྡེ་རྒྱན་ལས། མེད་པའི་སྟོང་བ་ཉིད་ཤེས་ཤིང༌། །དེ་བཞིན་ཡོད་པའི་ སྟོང་ཉིད་དང༌། །རང་བཞིན་སྟོང་བ་ཉིད་ཤེས་ན། །སྟོང་ཉིད་ཤེས་པ་ཞེས་བརྗོད་དོ། །ཞེས་གསུངས་པའི་ཕྱིར། དེ་ཡང་ཀུན་བཏགས་ནི། གཞི་ནས་མ་གྲུབ་ཀྱང་ཀུན་རྫོབ་ཏུ་དངོས་པོར་ཞེན་པའི་ཡུལ་ཡིན་པའི་ཕྱིར་ཤེས་པར་བྱ་བ་དང༌། གཞན་དབང་ནི་དོན་ལ་མེད་བཞིན་དུ།དངོས་པོ་འཁྲུལ་བའི་བློའམ། དེ་འདྲའི་བློ་ལ་དངོས་པོར་གསལ་བར་སྣང་བ་ཡིན་པས།འཁྲུལ་སྣང་རྒྱུ་དང་བཅས་པ་སྤང་དགོས་པས་དེ་ནི་སྤང་བྱ་དང༌། ཡོངས་གྲུབ་ནི། དྲི་མ་སྦྱང་བར་བྱ་བའི་གཞི་ཡིན་པའི་ཕྱིར་ན། ཡོངས་སུ་གྲུབ་པའི་ངོ་བོ་རང་བཞིན་སྟོང་བ་ཉིད་ཡིན་པར་གསུངས་ཏེ། མདོ་སྡེ་རྒྱན་ལས། རྟག་ཏུ་གཉིས་བྲལ་འཁྲུལ་པའི་རྟེན་གང་ཡིན་དང་གང་ཞིག་རྣམ་ཀུན་ཏུ། །བརྗོད་པར་ནུས་མ་ཡིན་ཅིང་སྤྲོས་པ་མེད་པའི་བདག་ཉིད་དེ་ཁོ་ན། །ཤེས་བྱ་སྤང་བྱ་རང་བཞིན་དྲི་མེད་འདོད་གང་རྣམ་པར་སྦྱང་བྱ་སྟེ། །ཞེས་གསུངས་པའི་ཕྱིར། ཡོངས་སུ་གྲུབ་པའི་རང་བཞིན་སྟོང་བ་ཉིད་ནི། དེ་བཞིན་ཉིད་དང༌། ཡང་དག་པའི་མཐའ་དང༌། མཚན་མ་མེད་པ་དང་དོན་དམ་པ་དང༌། ཆོས་ཀྱི་དབྱིངས་དང༌། བྱང་ཆུབ་ཀྱི་སེམས་ལ་སོགས་པའི་རྣམ་གྲངས་སུ་བསྟན་ཏེ། དབུས་མཐའ་ལས། སྟོང་པ་ཉིད་ནི་མདོར་བསྡུས་ན། །དེ་བཞིན་ཉིད་དང་ཡང་དག་མཐའ། །མཚན་མ་མེད་དང་དོན་དམ་དང༌། །ཆོས་ཀྱི་དབྱིངས་ནི་རྣམ་གྲངས་སོ། །ཞེས་དང༌། འཕགས་པ་ཀླུ་སྒྲུབ་ཀྱི་ཞལ་སྔ་ནས། དེ་བཞིན་ཉིད་དང་ཡང་དག་མཐའ། །མཚན་མ་མེད་དང་དོན་དམ་ཉིད། །བྱང་ཆུབ་སེམས་མཆོག་དེ་ཉིད་དང༌། །སྟོང་བ་ཉིད་དུའང་བཤད་པ་ཡིན། །ཞེས་གསུངས་སོ། །དེ་ལྟར་སྟོང་ཉིད་གསུམ་གྱི་རྣམ་དབྱེ་ལེགས་པར་ཤེས་ན་གསུང་རབ་རྣམས་ལས་སྟོང་ཉིད་ཀྱི་རབ་དབྱེ་བསྟན་པ་རྣམས་རྟོགས་པར་འགྱུར་བ་ཡིན་ཏེ། ཤེར་འགྲེལ་སྔོན་མེད་ལེགས་བཤད་ལས། དེ་ལྟར་ན་སྟོང་ཉིད་རྣམ་པ་གསུམ་གྱི་དབྱེ་བ་འདི་མ་ཤེས་ན། འཁོར་ལོ་གསུམ་གྱི་མདོ་སྡེ་རྣམས་ལས་སྟོང་ཉིད་ཀྱི་རྣམ་བཞག་མང་པོ་གསུངས་པའི་དངོས་བསྟན་ཡང་རྟོགས་པར་མི་འགྱུར་ན། དགོངས་དོན་ལྟ་སྨོས་ཀྱང་ཅི་དགོས་ལ། །འདི་ཤེས་པས་ན་དངོས་བསྟན་དང་དགོངས་དོན་མཐའ་དག་ལ་མཁས་པར་འགྱུར་རོ། །ཞེས་གསུངས་པའི་ཕྱིར་རོ། །དེ་ལྟ་ན་གཞི་གྲུབ་ན་སྟོང་ཉིད་དེ་གསུམ་པོ་གང་རུང་ཡིན་དགོས་པས། གཞི་གྲུབ་ན་སྟོང་ཉིད་ཡིན་པས་ཁྱབ་སྟེ། ཚུལ་གཉིས་རྣམ་འབྱེད་ལས། གཞི་གྲུབ་ན་སྟོང་ཉིད་ཡིན་པས་ཁྱབ་པ་འཆའ་བ་ཡིན་ནོ། །ཞེས་སོགས་ལུང་རིགས་དུ་མས་གྲུབ་བོ། །