གཉིས་པ་བྱེད་ལས་ཀྱི་ཆ་ནས་བསྡུ་བ།
གཉིས་པ་བྱེད་ལས་ཀྱི་ཆ་ནས་བསྡུ་བ་ནི།
ལྟུང་བ་ཐམས་ཅད་གཉིས་སུ་འདུས་པ་སྟེ། གསོ་བའི་ལྷག་མ་དང་བཅས་པ་དང༌། ལྷག་མ་མེད་པའི་ལྟུང་བའོ། །དེ་ཡང་གཅིག་ལས་འཕྲོས་པ་ལས་ཉེས་པ་གཉིས་ཏེ་ལྷག་མ་དང་བཅས་པ་དང༌། ལྷག་མ་མ་ལུས་པའོ་ཞེས་གསུངས་སོ། །དེ་གཉིས་ནི་ཐུན་མོང་གི་ཕམ་པ་འཆབ་བཅས་དང་དེ་ལས་གཞན་པའི་ལྟུང་བ་རྣམས་ཏེ་མས་རིམ་བཞིན་ནོ། །གསུམ་པ་ངོ་བོའི་ཆ་ནས་བསྡུ་བ་ནི་ལྟུང་བ་ཐམས་ཅད་གཉིས་སུ་འདུས་ཏེ། རང་བཞིན་གྱི་ཁ་ན་མ་ཐོ་བ་དང༌། བཅས་པའི་ཁ་ན་མ་ཐོ་བའོ། །དེ་ཡང་ལུང་རྣམ་འབྱེད་ལས། རང་བཞིན་དང་བཅས་པའི་ཁ་ན་མ་ཐོ་བ་གང་ཁས་བླངས་པ་དེ་ཕྱིར་བཅོས་བྱེད་དུ་གཞུག ཅེས་དང༌། འདུལ་བ་བསྡུ་བ་ལས། རང་བཞིན་ཁ་ན་མ་ཐོ་དང༌། །བཅས་པའི་ཁ་ན་མ་ཐོ་དང༌། །ཞེས་དང༌། འོད་ལྡན་གྱི་རྩ་བ་ལས། རང་བཞིན་ཁ་ན་མ་ཐོ་མ་གཏོགས་བསྒྲིམ། །བཅས་པའི་ཁ་ན་མ་ཐོ་བས་ཀྱང་བསྐྱང༌། །ཞེས་གསུངས་སཽ། །