ངེས་ལེགས་བླ་མ་བསྟན་འཛིན་ཆོས་ལྡན་ནི།
རྒྱ་སྤྲུལ་ལུང་རིག་གླིང་པས། གནས་དེའི་བྱང་ཤར་ཕྱོགས་སུ་རྟ་སྦྲུལ་ལོའི༔ བྱིས་པ་ཆོས་དབྱིངས་ཡེ་ཤེས་ཁ་ཏོག་ཅན༔ སྙིང་གའམ་ནི་ལྟེ་བར་རྩ་རིས་སམ༔ སྨེ་བའི་རྟགས་ལྡན་གཙང་མའི་རྒྱུད་ལྡན་པ༔ ཐབས་ཤེས་དབང་དང་དཱི་པཾ་མིང་ཅན་ནམ༔ ལེགས་པའི་དཔལ་ལྡན་དེ་འདྲའི་རིགས་ལས་འབྱུང་༔ བསྟ༵ན་འཛི༵ན་སྐྱེས་བུ་བྱང་ཆུབ་སེམས་དཔའི་མཆོག༔ ཆོ༵ས་ཀྱི་མཚན་ལྡ༵ན་དེ་ཉིད་སོམ་ཉི་བྲལ༔ ཅེས་སོགས་འཁྲུལ་མེད་རྡོ་རྗེའི་ལུང་བྱང་ལྟར། སྐྱ་ཤུལ་ཀརྨ་དགེ་ལེགས་ཀྱི་སྲས་སུ་རབ་བྱུང་བཅོ་ལྔ་པའི་ས་སྦྲུལ་༼༡༨༦༨༽ལོར་གཡུ་ཁོག་ཏུ་འཁྲུངས། བླ་མ་ནམ་མཁའ་ཆོས་དབྱིངས་ནས་ཁྲི་འདོན་སྐུ་བདག་མཛད། རྒྱ་སྤྲུལ་དང་། རྒྱ་ལྷ། ནམ་མཁའ་ཆོས་དབྱིངས་སོགས་ལས་སྨིན་གྲོལ་གྱི་གདམས་པ་དུ་མ་མནོས། རྫོགས་ཆེན་སོགས་སུ་ཕེབས་ནས་རྫོགས་སྤྲུལ་ལྔ་པ་ལས་ཟབ་ཆོས་གསན་ནས་རྟོགས་པ་མཆོག་ལྡན་དུ་གྱུར། རྟེན་སྔགས་འཆང་དུ་བཞུགས། རྩ་གསུམ་སྤྱི་དང་བྱེ་བྲག་གི་ཆོག་གཞུང་ལས་བྱང་རྣམས་ལ་བསྙེན་ཚད་གྲངས་འཁྱོལ་མ་བསྐྱལ་བ་ཆེར་མེད་པར་མཛད། སྐུ་གསུང་ཐུགས་རྟེན་གྲངས་མང་བཞེངས། འདའ་ཁར་ད་མི་རིང་བར་དུས་ཀྱི་འཕོ་འགྱུར་དང་བསྟན་སྲིད་ལ་ཉམས་གུད་འོང་། ང་འགྲོ་རན་པ་ཡིན། ཡང་སྲིད་འཁྲུང་རྒྱུ་མེད། ནུབ་བདེ་བ་ཅན་ལ་འགྲོ་རྒྱུ་ཡིན་སོགས་གསུངས་ནས་ཉི་མ་ནུབ་པ་དང་ལྷན་དུ་སྐུ་གཤེགས། སྐུ་གདུང་ཞུགས་འབུལ་བྱས་སྐབས་ཐུགས་ལྗགས་སྤྱན་གསུམ་མེས་མ་ཚིག་པར་ལྗགས་ཀྱི་སྟེང་སྐུ་རྟེན་དང་། མཐའ་སྐོར་དུ་སེང་གདོང་མའི་བསྙེན་པ་རང་བྱོན་དུ་ཡོད་པར་བཤད་དོ།།