གསུམ་པ་བདུན་དུ་དབྱེ་བ།
གསུམ་པ་བདུན་དུ་དབྱེ་བ་ནི།
ལང་ཀར་གཤེགས་པ་ལས། བློ་གྲོས་ཆེན་པོ་དེ་ལ་མདོར་ན་སྟོང་ཉིད་ནི་རྣམ་པ་བདུན་ཏེ། འདི་ལྟར་མཚན་ཉིད་སྟོང་བ་ཉིད་དང༌། དངོས་པོའི་རང་བཞིན་སྟོང་བ་ཉིད་དང༌། སྲིད་པ་སྟོང་བ་ཉིད་དང༌། མི་སྲིད་པ་སྟོང་བ་ཉིད་དང༌། ཆོས་ཐམས་ཅད་བརྗོད་དུ་མེད་པ་སྟོང་བ་ཉིད་དང༌། དོན་དམ་པ་འཕགས་པའི་ཡེ་ཤེས་སྟོང་བ་ཆེན་པོ་ཉིད་དང༌། གཅིག་གིས་གཅིག་སྟོང་བ་ཉིད་དང་བདུན་ནོ། །ཞེས་སྟོང་ཉིད་བདུན་གསུངས་ལ། དང་པོ་ནི། དངོས་པོ་རྣམས་རང་དང་སྤྱིའི་མཚན་ཉིད་ཀྱིས་སྟོང་བ་ཉིད་དང༌། གཉིས་པ་ནི། དངོས་པོ་རང་བཞིན་གྱི་སྐྱེ་བས་སྟོང་བ་དང༌། གསུམ་པ་ནི། ཕུང་པོ་རྣམས་བདག་དང་བདག་གིས་སྟོང་བ་དང༌། བཞི་བ་ནི་ཕུང་པོ་རྣམས་མྱང་འདས་ཀྱིས་སྟོང་བ་དང༌།ལྔ་བ་ནི་ཀུན་བཏགས་པའི་རང་བཞིན་གྱིས་སྟོང་བ་དང༌། དྲུག་པ་ནི་ལྟ་བ་དང་ཉེས་པའི་བག་ཆགས་ཐམས་ཅད་ཀྱིས་སྟོང་བ་དང༌། བདུན་པ་ནི། ཁང་བ་བ་ལང་གིས་སྟོང་བ་ལ་གསུངས་སོ། །དེ་ལྟར་དགག་གཞི་བདུན་གྱི་སྟེང་དུ་དགག་བྱ་བདུན་མེད་པ་ནི་སྟོང་ཉིད་བདུན་ནོ། །དོན་དམ་གཞན་སྟོང་ནི་དྲུག་པ་དོན་དམ་པ་འཕགས་པའི་ཡེ་ཤེས་སྟོང་བ་ཆེན་པོ་ཉིད་ཡིན་ནོ། །ཁ་ཅིག་གིས། བདུན་པ། གཅིག་གྀས་གཅིག་སྟོང་བ་དང༌། གཞན་སྟོང་གི་སྟོང་ཚུལ་དང་ཁྱད་པར་མེད་དོ་ཞེ་ན། དེ་ནི་མི་འཐད་དེ་སྟོང་ཚུལ་ཐ་མ་ནི་བུམ་པ་ཀ་བས་སྟོང་བ་ལྟར་ཀུན་རྫོབ་ཀྱི་ཆོས་གཅིག་གིས་གཅིག་སྟོང་བ་དེ་ཡིན་པས་དེ་ནི་ཉི་ཚེ་བ་དང་ཐ་ཤལ་བ་དང་སྤང་བྱ་ཡིན་པར་གསུངས་པས་དེ་དང༌། དོན་དམ་རང་བཞིན་པ་དེ་ཀུན་རྫོབ་གློ་བུར་བའི་ཆོས་རྣམས་ཀྱིས་སྟོང་བ་ནི་ཁྱད་པར་ཆེ་བ་ལས་ཀྱང་ཆེས་ཤིན་ཏུ་ཆེ་བའི་ཕྱིར་ཏེ།སྟོང་ཉིད་དྲུག་པ་དང་བདུན་པའི་རྒྱས་བཤད་ཀྱི་སྐབས་སུ། མདོ་དེ་ཉིད་ལས། བློ་གྲོས་ཆེན་པོ་དོན་དམ་པ་འཕགས་པའི་ཡེ་ཤེས་སྟོང་བ་ཉིད་ཆེན་པོ་གང་ཞེ་ན། འདི་ལྟ་སྟེ། བདག་གི་སོ་སོ་རང་གི་འཕགས་པའི་ཡེ་ཤེས་ཁོང་དུ་ཆུད་པ་ནི་ལྟ་བ་དང་ཉེས་པའི་བག་ཆགས་ཐམས་ཅད་ཀྱིས་སྟོང་སྟེ་དེའི་ཕྱིར་དོན་དམ་པ་འཕགས་པའི་ཡེ་ཤེས་སྟོང་བ་ཆེན་པོ་ཉིད་ཅེས་བྱའོ། །བློ་གྲོས་ཆེན་པོ་གཅིག་གིས་གཅིག་སྟོང་བ་ཉིད་གང་ཞེ་ན་འདི་ལྟ་སྟེ། གང་ལ་ཅི་མེད་པ་དེ་ནི་དེས་སྟོང་ཞེས་བྱའོ། །ཞེས་པ་ནས་ཆོས་ཐམས་ཅད་ཀྱི་རང་དང་སྤྱིའི་མཚན་ཉིད་ནི་གཅིག་ལ་གཅིག་མེད་དོ། །དེའི་ཕྱིར་གཅིག་གིས་གཅིག་སྟོང་བ་ཉིད་ཅེས་བྱའོ། །བློ་གྲོས་ཆེན་པོ་གཅིག་གིས་གཅིག་སྟོང་བ་ཉིད་འདི་ནི་ཀུན་གྱི་ཐ་ཤལ་དེ་དེ་ནི་ཁྱོད་ཀྱིས་སྤང་བར་བྱའོ། །ཞེས་གསུངས་པ་དང༌། དངོས་པོ་གཅིག་གིས་གཅིག་ཕན་ཚུན་སྟོང་པ་འདི་ནི་མྱང་འདས་ཆེན་པོ་ལ་སོགས་པར་དོན་དམ་གཞན་སྟོང་གི་དཔེར་གསུངས་ཀྱི་གཞན་སྟོང་ཡིན་པར་མ་གསུངས་པའི་ཕྱིར། དེ་ནི་གཞན་སྟོང་ཟབ་མོ་ཡིན་པ་མདོ་འདིར་བཀག་ལ། ཁོ་བོ་ཅག་ཀྱང་དེ་ཁོ་ན་ལྟར་འདོད་པའི་ཕྱིར་ཉེས་སྐྱོན་གང་ཡང་མེད་དོ། །