བཞི་བ་སྟོང་ཉིད་བཅུ་དྲུག་སོགས་དབྱེ་བ།

བཞི་བ་སྟོང་ཉིད་བཅུ་དྲུག་སོགས་དབྱེ་བ་ནི།

ཤེར་ཕྱིན་གྱི་མདོ་ལས། རབ་འབྱོར་གཞན་ཡང་བྱང་ཆུབ་སེམས་དཔའི་ཐེག་པ་ཆེན་པོ་ནི་ནང་སྟོང་བ་ཉིད་དང༌། ཕྱི་སྟོང་པ་ཉིད་དང༌། ཕྱི་ནང་སྟོང་པ་ཉིད་དང༌། སྟོང་པ་ཉིད་སྟོང་པ་ཉིད་དང༌། ཆེན་པོ་སྟོང་པ་ཉིད་དང༌། དོན་དམ་པ་སྟོང་པ་ཉིད་དང༌། འདུས་བྱས་སྟོང་པ་ཉིད་དང༌། འདུས་མ་བྱས་སྟོང་བ་ཉིད་དང༌། མཐའ་ལས་འདས་པ་སྟོང་པ་ཉིད་དང༌། ཐོག་མ་དང་ཐ་མ་མེད་པ་སྟོང་པ་ཉིད་དང༌། དོར་བ་མེད་པ་སྟོང་པ་ཉིད་དང༌། རང་བཞིན་སྟོང་པ་ཉིད་དང༌། རང་གི་མཚན་ཉིད་སྟོང་བ་ཉིད་དང༌། ཆོས་ཐམས་ཅད་སྟོང་པ་ཉིད་དང༌། མི་དམིགས་པ་སྟོང་པ་ཉིད་དང༌།དངོས་པོ་མེད་པ་སྟོང་པ་ཉིད་དང༌། ངོ་བོ་ཉིད་སྟོང་པ་ཉིད་དང༌། དངོས་པོ་མེད་པའི་ངོ་བོ་ཉིད་སྟོང་པ་ཉིད་ཡིན་ནོ། །ཞེས་གསུངས་ལ། འདི་རྣམས་ཀྱི་དོན་ནི་རྗེ་བཙུན་བྱམས་མགོན་གྱི་དབུས་མཐའ་ལས། ཟ་བ་བཟའ་དང་དེ་ཡི་ལུས། །གནས་ཀྱི་གཞི་ཡི་སྟོང་པ་ཉིད། །དེ་ཡང་གང་གིས་ཇི་ལྟར་མཐོང༌། །གང་ཕྱིར་དེ་ཡང་སྟོང་བ་ཉིད། །དགེ་གཉིས་ཐོབ་པར་བྱ་བའི་ཕྱིར། །རྟག་ཏུ་སེམས་ཅན་ཕན་བྱའི་ཕྱིར། །འཁོར་བ་བཏང་བར་མི་བྱའི་ཕྱིར། །དགེ་བ་མི་ཟད་བྱ་བའི་ཕྱིར། །རིགས་ཀྱང་རྣམ་པར་དག་བྱའི་ཕྱིར། །མཚན་དང་དཔེ་བྱད་ཐོབ་བྱའི་ཕྱིར། །སངས་རྒྱས་ཆོས་རྣམས་དག་བྱའི་ཕྱིར། །བྱང་ཆུབ་སེམས་དཔའ་སྒྲུབ་པར་བྱེད། །ཅེས་སྟོང་ཉིད་བཅུ་བཞི་གསུངས་པ་ལས། །ཟ༵་བ༵་པོ་མིག་ལ་སོགས་པ་ནང་གི་སྐྱེ་མཆེད་རྣམས་སྟོང་པ་ནི། ནང་སྟོང་པ་ཉིད་དང༌། བཟ༵འ་བར་བྱ་བ་གཟུགས་སྒྲ་ལ་སོགས་པ་ཕྱིའི་སྐྱེ་མཆེད་སྟོང་པ་ནི་ཕྱི་སྟོང་པ་ཉིད་དང༵༌། ཕྱི་ནང་གི་སྐྱེ་མཆེད་དེ༵་གཉིས་ཀྱི་རྟེན་ལུ༵ས་སམ་ཁོག་པ་སྟོང་བ་ནི་ཕྱི་ནང་སྟོང་བ་ཉིད་དང༌། དབང་རྟེན་ཁཽག་པ་རྣམས་ནི་སེམས་ཀྱིས་ཟིན་པས་ནང་དང༌། དབང་པོས་མ་བསྡུས་པས་ཕྱི་སྟེ་སྐབས་འདིའི་ཕྱི་ནང་གཉིས་ཀའོ། །གན༵ས་ཀྱི༵་གཞི༵་སྣོད་ཀྱི་འཇིག་རྟེན་རྒྱ་ཆེན་པོ་སྟོང་བ་ནི༵་ཆེན་པོ་སྟོ༵ང་བ༵་ཉིད༵་དང་དེ༵་ཡ༵ང་སྟོང་ཉིད་ཤེས་པ་ག༵ང་གི༵ས་སྟོང་བར་མཐོང་པ་དེའི་སྟོང་ཉིད་ནི། སྟོང་བ་ཉིད་སྟོང་བ་ཉིད་དང༌། ཇི༵་ལྟ༵ར་དོན་དམ་པའི་རྣམ་པར་མཐོ༵ང་བ་དེའི་སྟོང་བ་ཉིད་ནི། དོན་དམ་སྟོང་བ་ཉིད་དང༌། བྱང་ཆུབ་སེམས་དཔའ་རྣམས་ཀྱིས་དགོས་པ་གང་གི་ཕྱིར་དུ་སྟོང་པ་ཉིད་བསྒོམས་ནས་ལམ་སྒྲུབ་པར་བྱེད་ཅེ་ན།དགེ༵་གཉི༵ས་ཐོ༵བ་པ༵ར་བྱ༵་བ༵འི་ཕྱི༵ར་ཡིན་པས་ལམ་གྱི་དགེ་བ་འདུས་བྱས་ཀྱི་སྟོང་ཉིད་ནི། འདུས་བྱས་སྟོང་བ་ཉིད་དང༌། མྱ་ངན་ལས་འདས་པའི་དགེ་བ་འདུས་མ་བྱས་ཀྱི་སྟོང་པ་ནི། འདུས་མ་བྱས་སྟོང་བ་ཉིད་དང༌། རྟ༵ག་ཏུ༵་སེམ༵ས་ཅ༵ན་ཕ༵ན་འདགས་པར་བྱ༵་བའི་ཕྱི༵ར་བྱང་ཆུབ་སེམས་དཔས་སྒྲུབ་པར་བྱེད་པའི་གཞན་ཕན་མཐའ་ཡས་པའི་སྟོང་བ་ནི། མཐའ་ལས་འདས་པ་སྟོང་བ་ཉིད་དང༌། འཁོ༵ར་བ༵་བློས་བཏ༵ང་བ༵ར་མི༵་བྱ༵་བའི་ཕྱི༵ར་བྱང་ཆུབ་སེམས་དཔས་སྒྲུབ་པར་བྱེད་ལ། བློ་མི་བཏང་བར་བྱ་བའི་འཁོར་བ་ལ་ཐོག་མཐའ་མེད་པའི་སྟོང་བ་ནི། ཐོག་མ་ཐ་མ་མེད་པའི་སྟོང་བ་ཉིད་དང༌། ལྷག་མེད་མྱང་འདས་ཀྱི་དུས་སུ་དགེ༵་བ༵་མི༵་ཟ༵ད་པར་བྱ༵་བའི༵་ཕྱིར༵་བྱང་ཆུབ་སྒྲུབ་པར་བྱེད་ལ། དེའི་སྟོང་བ་ཉིད་ནི། དོར་བ་མེད་པའི་སྟོང་བ་ཉིད་དང༌། རིགས་རང་བཞིན་གྱི་དག་པ་གློ་བུར་གྱི་དྲི་མ་དག་པར་བྱ་བའི་ཕྱིར་བྱང་ཆུབ་སྒྲུབ་པར་བྱེད་ལ།དེའི་སྟོང་བ་ནི་རང་བཞིན་སྟོང་བ་ཉིད་དང༌། མཚ༵ན་ད༵ང་དཔེ༵་བྱ༵ད་ཐོ༵བ་པ༵ར་བྱ༵་བའི་ཕྱི༵ར་བྱང་སེམས་ཀྱིས་སྒྲུབ་པར་བྱེད་ལ། དེ་ནི་རང་གི་མཚན་ཉིད་ཡིན་ལ། དེའི་སྟོང་བ་ནི། རང་གི་མཚན་ཉིད་ཀྱི་སྟོང་བ་ཉིད་དང༌། སང༵ས་རྒྱས༵་ཆོ༵ས་རྣམ༵ས་ད༵ག་པར་བྱ༵་བའི་ཕྱི༵ར་བྱ༵ང་ཆུ༵བ་སེམ༵ས་དཔ༵འ་སྒྲུ༵བ་པ༵ར་བྱེ༵ད་པ་དེའི་སྟོང་ཉིད་ནི་ཆོས་ཐམས་ཅད་སྟོང་བ་ཉིད་དོ། །དེ་དག་ལས་སྟོང་ཉིད་དང་པོ་བཞི་ནི་ཤེས་བྱའི་དངོས་པོ་ལས་བརྩམ་པ་དང༌། དེ་ནས་གཉིས་ནི་ཡུལ་ཅན་ལས་བརྩམས་ཏེ། ལྔ་པ་དང་དྲུག་པའོ། །དེ་ནས་བརྒྱད་ནི་གང་གི་ཕྱིར་བྱང་ཆུབ་སེམས་དཔས་སྒྲུབ་པར་བྱེད་པ་སོགས་ལས་བརྩམས་ཏེ་བདུན་པ་ནས་བཅུ་བཞིའི་བར་རོ། །དེ་ནས་དངོས་པོ་མེད་པ་སྟོང་བ་ཉིད་དང༌། དངོས་པོ་མེད་པའི་ངོ་བོ་ཉིད་སྟོང་བ་ཉིད་གཉིས་ནི། དབུས་མཐའ་ལས། གང་ཟག་དང་ནི་ཆོས་རྣམས་ཀྱི། །དངོས་པོ་མེད་འདིར་སྟོང་བ་ཉིད། །དེ་དངོས་མེད་པའི་དངོས་ཡོད་པ། །དེ་ནི་དེ་ལས་སྟོང་ཉིད་གཞན། །ཞེས་དང༌། དེའི་འགྲེལ་བར་དབུ་མ་པ་ཆེན་པོ་དབྱིག་གཉེན་གྱི་ཞལ་སྔ་ནས། གང་ཟག་དང་ཆོས་ཀྱི་དངོས་པོ་མེད་པ་ནི་སྟོང་པ་ཉིད་དོ། །དངོས་པོ་མེད་པ་དེའི་དངོས་པོ་མེད་པ་མ་ཡིན་ནོ། །ཟ་བ་ལ་སོགས་པ་སྟོང་པ་ཉིད་ཅེས་ཇི་སྐད་སྨོས་པ་དེར་སྟོང་བ་ཉིད་ཀྱི་མཚན་ཉིད་བསྟན་པའི་ཕྱིར་དངོས་པོ་མེད་པ་དང༌། དངོས་པོ་མེད་པའི་ངོ་བོ་ཉིད་སྟོང་བ་ཉིད་རྣམ་པ་གཉིས་ཐ་མར་རྣམ་པར་འཇོག་སྟེ། གང་ཟག་དང་ཆོས་སུུ་སྒྲོ་འདོགས་པ་དང༌། དེའི་སྟོང་པ་ཉིད་ལ་སྐུར་བ་འདེབས་པ་བསལ་བའི་ཕྱིར་གོ་རིམ་བཞིན་ནོ། །དེ་ལྟར་སྟོང་བ་ཉིད་ཀྱི་རབ་ཏུ་དབྱེ་བ་ཤེས་པར་བྱའོ། །ཞེས་གསུངས་པ་ལྟར། ག༵ང་ཟ༵ག་ད༵ང་ཆོས༵་སུ༵་གཏོགས་པའི་དངོས་པོ་རྣམ༵ས་གཤིས་ཀྱི༵་གནས་ལུགས་ལ་གདོད་ནས་མེད་ཅིང་མ་གྲུབ་པའི་ཕྱིར། རང་རང་གི་ངོ་བོས་སྟོང་ཞིང་དངོ༵ས་པོ༵་མེ༵ད་པ་ནི་འདི༵ར་དངོས་པོ་མེད་པ་སྟོ༵ང་བ༵་ཉིད༵་དང༌། གང་ཟག་དང་ཆོས་དེ༵་རྣམས་ཀྱི་དངོ༵ས་པོ་མེ༵ད་པའི༵་གཞི་ཆོས་ཉིད་དེ་བཞིན་ཉིད་ཀྱི་དངོ༵ས་པོའམ་ངོ་བོར་ཡོ༵ད་པ༵་ནི། དངོས་པོ་མེད་པའི་ངོ་བོ་ཉིད་སྟོང་བ་ཉིད་ཡིན་པས། དེ༵་ནི༵་སྔ༵་མ༵་དེ་ལས༵་སྟོ༵ང་པ༵་ཉི༵ད་གཞ༵ན་དུ་གསུངས་ལ། གཞན་ཡིན་པའི་རྒྱུ་མཚན་ནི་སྔ་མ་རང་སྟོང་དང་ཕྱི་མ་གཞན་སྟོང་ཡིན་པས་སོ། །སྟོང་ཉིད་བཅོ་བརྒྱད་དུ་ཕྱེ་ན་སྔ་མ་བཅུ་དྲུག་གི་སྟེང་དུ། མི་དམིགས་པ་སྟོང་བ་ཉིད་དང༌། ངོ་བོ་ཉིད་སྟོང་བ་ཉིད་དང་བཅོ་བརྒྱད་དོ། །དེ་གཉིས་ཀྱི་ངོས་འཛིན་ནི། ཤེར་འགྲེལ་སྔོན་མེད་ལེགས་བཤད་ལས། མི་དམིགས་པ་སྟོང་བ་ཉིད་ནི། དངོས་མེད་སྟོང་བ་ཉིད་དང་དོན་གཅིག་ལ། ངོ་བོ་ཉིད་སྟོང་བ་ཉིད་ནི་དངོས་མེད་ངོ་བོ་ཉིད་དང་དོན་གཅིག་གོ །ལྡོག་ཆའི་ཁྱད་པར་ནི། དངོས་མེད་སྟོང་ཉིད་ནི། ངོ་བོའི་སྒོ་ནས་མ་གྲུབ་པ་དང༌། མི་དམིགས་པ་ནི་ཡེ་ཤེས་ཀྱི་ངོ་བོར་དམིགས་སུ་མེད་ཅིང་མཐོང་རྒྱུ་མེད་པའི་དོན་ནོ། །ངོ་བོ་ཉིད་ནི་ཕྱིན་ཅི་མ་ལོག་པའི་རང་བཞིན་དེ་ལམ་གྱིས་གསར་དུ་མ་བཅོས་པའི་དོན་དང་དངོས་མེད་ངོ་བོ་ཉིད་ཀྱི་དོན་ནི་དངོས་པོ་རྣམས་གདོད་ནས་མ་གྲུབ་པའི་ཤུལ་ན། ཆོས་ཉིད་མི་གཡོ་ཞིང་བརྟན་པར་གནས་པའི་དོན་ནོ། །ཞེས་གསུངས་པའི་ཕྱིར་རོ། །ཡང་སྟོང་ཉིད་ཉི་ཤུ་དབྱེ་ན།སྔར་བཤད་ཟིན་པའི་བཅོ་བརྒྱད་ཀྱི་སྟེང་དུུ་རང་གི་ངོ་བོ་སྟོང་བ་ཉིད་དང༌། གཞན་གྱི་ངོ་བོ་སྟོང་བ་ཉིད་གཉིས་དང་ཉི་ཤུའོ། །དེ་གཉིས་ཀྱི་ཁྱད་པར་ནི། ཤེར་འགྲེལ་སྔོན་མེད་ལེགས་བཤད་ལས། དེ་བཞིན་དུ་སྟོང་ཉིད་ཉི་ཤུའི་དབང་དུ་བྱས་ན་རང་གི་ངོ་བོ་སྟོང་བ་ཉིད་ནི་དངོས་མེད་སྟོང་ཉིད་དང་གཅིག་ལ། གཞན་གྱི་ངོ་བོ་སྟོང་བ་ཉིད་ནི་དངོས་མེད་ངོ་བོ་ཉིད་དང་གཅིག་གོ །རྣམ་བཞག་འདི་ནི་ཤིན་ཏུ་གསལ་བར་སྔགས་ཀྱི་ཐེག་པ་བླ་ན་མེད་པའི་རྒྱུད་གཉིས་ལས་བྱུང་བ་དང༌། མདོ་ལུགས་ཀྱི་དབུས་མཐའ་རྣམ་འབྱེད་རྩ་འགྲེལ་དང༌། ཡུམ་གསུམ་གནོད་འཇོམས་དང༌། བརྒྱད་སྟོང་དོན་བསྡུས་སོགས་ལས་ཤེས་པར་བྱའོ། །ཞེས་གསུངས་པའི་ཕྱིར་རོ། །དེ་ལྟར་སྟོང་ཉིད་ཉི་ཤུ་ལས་དངོས་པོ་མེད་པའི་ངོ་བོ་ཉིད་སྟོང་བ་ཉིད་དང༌།ངོ་བོ་ཉིད་སྟོང་བ་ཉིད་དང༌། གཞན་གྱི་ངོ་བོ་སྟོང་བ་ཉིད་དང་གསུམ་གཞན་སྟོང་ཟབ་མོ་དོན་དམ་པའི་ཡོན་ཏན་ཐམས་ཅད་དབྱེར་མེད་པའི་བདག་ཉིད་ཡིན་ལ། ཐམས་ཅད་གཞན་སྟོང་མ་ཡིན་པར་ཕལ་ཆེར་ནི། རང་སྟོང་དངོས་པོ་མེད་པའི་སྟོང་བ་ཉིད་ཡིན་ཏེ། རི་ཆོས་ངེས་དོན་རྒྱ་མཚོ་ལས། དཔལ་རྡོ་རྗེ་འཆང་ཆེན་པོས་རྒྱུད་སྡེ་རིན་པོ་ཆེ་རྣམས་སུ་གསང་བ་ཞེས་པ་དང༌།གསང་ཆེན་ཞཻས་པ་ལ་སོགས་པས་སྟོང་ཉིད་མཐར་ཐུག་གི་རྣམ་གྲངས་གསུངས་པ་རྣམས་ཀྱང་དངོས་པོ་མེད་པའི་ངོ་བོ་ཉིད་སྟོང་བ་ཉིད་གང་ཡིན་པ་སྟོང་གཞི་དོན་དམ་གཞན་སྟོང་ལ་དགོངས་པ་ཡིན་གྱི། དངོས་པོ་མེད་པ་སྟོང་ཉིད་ཙམ་གང་ཡིན་པ་རང་སྟོང་ལ་ནི་དགོངས་པ་མ་ཡིན་ཏེ། དེ་དང་དེ་རྣམ་གྲངས་སུ་མི་རུང་བའི་ཕྱིར་རོ། །ཞེས་དང༌། འདིར་གཞི་འབྲས་ངོ་བོ་དབྱེར་མེད་ཀྱི་ཤེར་ཕྱིན་སྟོང་ཉིད་དུ་གསུངས་པ་འདི་ཡང་རང་སྟོང་ནི་མ་ཡིན་གྱི་སྟོང་གཞི་དོན་དམ་གཞན་སྟོང་དངོས་པོ་མེད་པའི་ངོ་བོ་ཉིད་སྟོང་བ་ཉིད་ཡིན་ཏེ། ཤེར་ཕྱིན་ཡིན་ལ་ཆོས་ཉིད་ཀྱང་ཡིན་པའི་ཕྱིར། ཞེས་དང༌། འཁོར་ལོ་སྡོམ་པ་ཉུང་ངུའི་རྒྱུད་དུ་ཡང༌། །གསང་ཆེན་མཆོག་ཏུ་དགྱེས་པ་དང༌། །ཀུན་གྱི་བདག་ཉིད་ན་རྟག་བཞུགས། །ཞེས་པ་ལ་སོགས་པས་དངོས་པོ་མེད་པའི་ངོ་བོ་ཉིད་སྟོང་བ་ཉིད་དང༌། གཞན་གྱི་དངོས་པོ་སྟོང་བ་ཉིད་གང་ཡིན་པ་སྟོང་གཞི་དོན་དམ་གཞན་སྟོང་གི་རྣམ་གྲངས་མང་དུ་གསུངས་སོ། །ཞེས་གསུངས་པའི་ཕྱིར་རོ། །འོ་ན་མདོ་སྡེ་དང་བསྟན་བཅོས་དུ་མ་ལས་དོན་དམ་བདེན་པ་ཞེས་བྱ་བ་ནི་སྟོང་བ་ཉིད་བཅོ་བརྒྱད་གསུངས་པ་ཚུལ་ཇི་ལྟར་ཡིན་ཞེ་ན། དེ་ལྟར་གསུངས་པ་ནི་སྟོང་གཞི་བཅོ་བརྒྱད་ལ་དགོངས་པ་ཡིན་ཏེ། རི་ཆོས་ངེས་དོན་རྒྱ་མཚོ་ལས། དབུ་མ་རིན་ཆེན་སྒྲོན་མར་དོན་དམ་པའི་བདེན་པ་ཞེས་བྱ་ནི་སྟོང་པ་ཉིད་བཅོ་བརྒྱད་ཅེས་བཅོམ་ལྡན་འདས་ཀྱི་ལུང་དྲངས་ཏེ། དེ་དག་ནི་སྟོང་གཞི་བཅོ་བརྒྱད་ལ་དགོངས་པ་ཡིན་ནོ། །ཞེས་གསུངས་པའི་ཕྱིར། བཤད་ཚུལ་འདི་དག་ནི་རང་ལུགས་ཀྱི་དམ་པ་གོང་མ་རྣམས་ཀྱི་གསུང་ཟིན་ཇི་ལྟ་བ་བཞིན་བཀོད་པའོ། །