གཉིས་པ་སྒྲུབ་བྱེད་གཞིག་པ།
གཉིས་པ་སྒྲུབ་བྱེད་གཞིག་པ་ནི།
བཅས་པའི་ཁ་ན་མ་ཐོ་བ་སྡིག་པ་ཡིན་པར་བཤད་པ་ཐམས་ཅད་ཁྱད་གསོད་ལ་སོགས་པ་ཀུན་སློང་གློ་བུར་བ་དང་འབྲེལ་བ་ལ་དགོངས་པ་ཡིན་ཏེ། ལྕི་ཡང་བསྟན་པའི་མདོ་ལས། ཁྱད་དུ་གསོད་པའི་རྒྱུ་རྐྱེན་གྱིས། །ཚེ་ཡི་དུས་བྱས་ངན་འགྲོར་ལྟུང༌། །ཞེས་པ་དང༌། དེ་ཉིད་ལས།སངས་རྒྱས་ཀྱི་བཀའ་ཁྱད་དུ་བསད་ཅིང་ངོ་ཚ་བ་མེད་པ་དང་ཁྲེལ་མེད་པས་ཞུགས་ན། ཞེས་དང༌། མཛོད་ཀྱི་འགྲེལ་བཤད་རྒྱལ་སྲས་མ་ལས། བཅས་པའི་ཁ་ན་མ་ཐོ་བ་ནི་བཀག་པས་སྡིག་ཏུ་གྱུར་པ་སྟེ་ཞེས་པའི་རྒྱུ་མཚན་དུ། བཅོམ་ལྡན་འདས་ཀྱི་བསྟན་པ་ལ་མ་གུས་པའི་ཕྱིར་རོ། །ཞེས་གསུངས་པས་སོ། །དེའི་བསླབ་པ་ཁྱད་དུ་གསོད་ཅིང་བཅས་པ་ལས་འདས་ན་ཁྱད་དུ་གསོད་པའི་ཆ་ནས་ཉེས་བྱས་གཞན་ཞིག་བསྐྱེད་ལ། ཁྱད་དུ་བསད་པའི་ཉེས་བྱས་དེ་རང་བཞིན་གྱི་ཁ་ན་མ་ཐོ་བ་ཡིན་པ་ལ་དགོངས་ནས་བཅས་པའི་ཁ་ན་མ་ཐོ་བ་སྡིག་པ་ཡིན་པར་གསུངས་སོ། །ཞེ་སྡང་གིས་ས་རྐོ་བ་ལ་སོགས་པ་དེ་བཞིན་ནོ། །རིགས་པའི་སྒྲུབ་བྱེད་དེ་ཡང་མ་ངེས་ཏེ། བཅས་པ་མ་བསྲུངས་པ་ལ་སྡིག་པ་མི་འབྱུང་ཡང་བསྲུངས་པ་ལ་བསོད་ནམས་འབྱུང་ན་ཅི་འགལ་ཏེ། གཞན་དུ་ན་དུས་ཁྱད་པར་ཅན་ཚེས་བརྒྱད་དང་ཚེས་བཅོ་ལྔའི་ནུབ་མོ་ཆོས་བཤད་ཉན་བྱ་བར་བཅས་པ་ཆོས་ཅན། དེའི་ཚེ་ནད་པས་ཆོས་བཤད་ཉན་བྱས་པ་ལ་བསོད་ནམས་མི་འབྱུང་བར་ཐལ། དེའི་ཚེ་ནད་པས་ཆོས་བཤད་ཉན་མ་བྱས་པ་ལ་སྡིག་པ་མི་འབྱུང་བའི་ཕྱིར་ཏེ། ནད་པས་དེ་མ་བྱས་པ་ལ་ནི་ཉེས་པ་མེད་དེ། །ཞེས་སོ། །གཞན་ཡང་དགེ་སློང་གིས་ཉིན་རེ་བཞིན་དུ་རྟག་པར་དགྲ་བཅོམ་པ་ལྔ་བརྒྱ་ལ་མཆོད་སྟོན་བྱས་ཀྱང་བསོད་ནམས་མི་འབྱུང་བར་ཐལ། ཉིན་རེ་བཞིན་དུ་དེ་ལྟར་མི་བྱེད་པའི་སྡིག་པ་མི་འབྱུང་བའི་ཕྱིར་རོ། །ཁྱབ་པ་མེད་ན་མ་བྱས་པ་ལ་སྡིག་པ་མི་འབྱུང་ན། བྱས་པ་ལ་ཡང་བསོད་ནམས་མི་འབྱུང་བར་མཚུངས་སོ། །ཞེས་དམ་བཅས་པ་ཉམས་སོ། །