༩ སྐྱེས་བུ།
སྐྱེས་བུ་ནི་རབ་བྱུང་ངམ་བསྙེན་རྫོགས་ཀྱི་ཚེ་སྡོམ་པ་འཐོབ་པའི་དུས་སྟོན་པའམ། སྔ་ཕྱིའི་དུས་ཚོད་འབྱེད་པའི་ཤིང་བུ་སོར་བཞི་བ་ཞིག་སྟེ། མདོ་རྩ་ལས། དེ་མ་ཐག་ཏུ་གྲིབ་ཚོད་རིག་པར་བྱའོ། །དེ་ནི་ཐུར་མ་སོར་བཞི་བ་བཟང་ངོ་། །དེ་ནི་སྐྱེས་བུ་ཉིད་ཅེས་ཐ་སྙད་དུ་བྱའོ། །ཞེས་པ་ལྟར། དེ་ནི་ཤིང་སོར་བཞི་གྲུ་བཞིར་གཞོག་སྟེ་སོར་རེ་རེའི་མཚམས་ནས་བང་རིམ་དོད་པ་ཞིག་ཡིན་ཞིང་། ཤིང་བུ་དེའི་གྲིབ་མ་ཇི་ཙམ་ཡོད་པའི་ཚད་ལ། ཤིང་བུ་རང་གིས་གཞལ་ཏེ། སོར་བཞི་བ་རང་གི་ཚད་ལ་སྐྱེས་བུ་གཅིག་དང་། དེའི་སྟེང་དུ་གྲིབ་མ་ལ་སོར་གཅིག་གཉིས་སོགས་ལྷག་ཡོད་ན། སྐྱེས་བུ་གཅིག་དང་རྐང་བ་གཅིག་གཉིས་སོགས་གཞལ་ཏེ། སྔ་ཕྱིའི་དུས་ཚོད་ངོས་འཛིན་བྱེད་ཀྱི་ཤིང་ཐུར་ཞིག་གོ །