གཉིས་པ་མཐའ་རགས་ཙམ་དཔྱད་པ།
གཉིས་པ་མཐའ་རགས་ཙམ་དཔྱད་པ་ལ།
སྐབས་འདིར་མདོ་ལུགས་མ་ལས། ཡེ་ཤེས་དང་ནི་ཞེས་པ་ནི་ནང་སྟོང་པ་ཉིད་ལ་སོགས་པའི་སྟོང་པ་ཉིད་རྣམས་ཡིན་ཏེ། མདོ་ལས། སྟོང་ཉིད་འདི་རྣམས་ཀྱི་ངོ་བོ་ཐེག་ཆེན་ཡིན་པར་གསུངས་ཤིང་བསྟན་ཆོས་འདིར་ཡེ་ཤེས་ཡིན་པར་གསུངས་པའི་ཕྱིར་སྟོང་པ་ཉིད་རྣམས་ཀྱི་ངོ་བོ་རང་སྟོང་དུ་འདོད་ན་སྟོང་པའི་གཞི་གང་ཡིན་དེ་ངོས་མ་ཟིན་པའི་ཕྱིར་རྒྱལ་བ་སྲས་བཅས་ཀྱི་དགོངས་པ་དང་འགལ་ལོ། །ཞེས་དོན་དམ་ཆོས་ཀྱི་དབྱིངས་ལ་སྦྱར་ནས་བཤད་པས། རྩ་བར། ཡེ་ཤེས་དང༌། ཞེས་པས་ཚོགས་སྒྲུབ་བསྟན་ཚུལ་དང༌། ཉ་ཊཱིཀ་ལྟར་ན་ཚོགས་བསྟན་ཚུལ་ལ་བརྟག་པར་བྱའོ། །ཡང་ཚུལ་གཉིས་རྣམ་འབྱེད་ལས། གཞི་གྲུབ་ན་སྟོང་ཉིད་ཡིན་པས་ཁྱབ་པ་འཆའ་བ་ཡིན་ནོ། །ཞེས་དང༌། རྣམ་གྲངས་ལ་ཁྱབ་བ་མི་རྩི། ཞེས་གསུངས་པ་ལ། གཞི་ལམ་འབྲས་གསུམ་གྱི་དྲིས་ལན་ཡིད་ཀྱི་མུན་སེལ་ལས། ཞིབ་ཏུ་དཔྱད་ན་དེ་གཉིས་སྐད་དོད་ཀྱང་མི་གཅིག་སྟེ་ཤུ་ནྱཱ་ཞེས་པ་སྟོང་བའི་སྐད་དོད་དང༌། ཤུ་ནྱཱ་ཏཱ་ཞེས་པ་སྟོང་བ་ཉིད་ཀྱི་སྐད་དོད་ཏཱ་ཞེས་པ་ངོ་བོའི་རྐྱེན་ཡོད་མེད་ཀྱི་ཁྱད་ཡོད་ཅིང་དེའི་ཕྱིར་དོན་ལའང་ཁྱད་ཡོད་དོ། །ཞེས་པ་ནས། ཀུན་རྫོབ་རྣམས་བརྟགས་ན་བདེན་པའི་སྟོང་བའི་སྟོང་བ་ཉིད་མ་ཡིན་ཏེ། དེ་བཞིན་ཉིད་མ་ཡིན་པའི་ཕྱིར་ཏེ། སྟོང་བ་ཉིད་ནི་མདོར་བསྡུས་ན། །ཞེས་སོགས་དང༌། སྟོང་བ་དང་སྟོང་ཉིད་ཅེས་པ་སྐད་དོད་དང་དོན་གཉིས་ཀ་མི་གཅིག་པས་ཁྱད་ཕྱེ་ན་ལེགས་ཏེ། ཞེས་དང༌། རྒྱན་གྱི་ས་འགྲེལ་ལས། སྟོང་བ་ཉིད་ལ་སོགས་པའི་དོན་གཅིག་ཉིད་མིང་ཐ་དད་པས་སྟོན་པ་སྟེ། ཞེས་སོགས་ཀྱིས་ཅུང་ཟད་དཔྱད་རྒྱུ་ཡོད་པར་སྣང་ངོ༌། །ཡང་ཡུམ་གསུམ་གནོད་འཇོམས་༡༨༦ལས། ཡུལ་ཅན་དང་ཡུལ་གྱི་དངོས་པོ་སྟོང་བ་ཉིད་གང་ཡིན་པ་དེ་ནི་ཕྱི་ནང་སྟོང་བ་ཉིད་དེ་གསུམ་པའོ། །ཞེས་སོགས་ཕྱི་ནང་དང༌། ཆེན་པོ་དང༌། འདུས་བྱས་དང༌། འདུས་མ་བྱས་དང༌། ཐོག་མ་དང་ཐ་མ་མེད་པ་སོགས་འཇོག་ཚུལ་སྔར་བཤད་དང་ཅུང་མི་འདྲ་བར་གསུངས་པ་དང༌། ཁྱད་པར་དངོས་པོ་མེད་པའི་ངོ་བོ་ཉིད་སྟོང་བ་ཉིད་ཅེས་བྱ་བ་རྣམ་པ་གཉིས་བཤད་ཡོད་པས་དེར་ཤེས་པར་བྱའོ། །ཕྱི་སྟོང་བ་ཉིད་ལྟ་བུ་ལ་ཕྱིའི་སྐྱེ་མཆེད་དང༌། དེའི་སྟོང་ཉིད་གཉིས་ཀ་འཇོག་གམ་གང་འཇོག་ཞིབ་པར་དཔྱད་པར་བྱའོ། །