གཉིས་པ་རང་ལུགས་བཞག་པ།

གཉིས་པ་རང་ལུགས་བཞག་པ་ན།

བཅས་རང་གི་ཁྱད་པར་གསུམ་ལས། རྒྱུའི་ཁྱད་པར་ནི། རྒྱུ་མི་དགེ་བས་ཀུན་ནས་བསླང་བའི་ལྟུང་བ་ནི་རང་བཞིན་གྱི་ཁ་ན་མ་ཐོ་བ་ཡིན་ལ། རྒྱུ་དགེ་བའམ་ལུང་མ་བསྟན་གྱིས་ཀུན་ནས་བསླང་བའི་ལྟུང་བ་ནི་བཅས་པའི་ཁ་ན་མ་ཐོ་བ་ཡིན་ཏེ། གཏམ་གྱི་གཞི་ལས། དགེ་སློང་དགེ་བའི་སེམས་དང་ལྡན་པས་ནོངས་པར་འགྱུར་རམ་མི་དགེ་བའི་སེམས་དང་ལུང་དུ་མི་སྟོན་པའི་སེམས་དང་ལྡན་པས་ནོངས་པར་འགྱུར། བཀའ་སྩལ་པ།དགེ་སློང་དགེ་བའི་སེམས་དང་མི་དགེ་བའི་སེམས་དང་ལུང་དུ་མི་སྟོན་པའི་སེམས་ཀྱིས་ཉེས་པར་འགྱུར་བ་ཡོད་དོ། །ཞེས་གསུངས་སོ། །ངོ་བོའི་ཁྱད་པར་ནི་རང་གི་ངོ་བོ་མི་དགེ་བ་དང་བདག་གཅིག་པའི་ལྟུང་བ་ནི་རང་བཞིན་གྱི་ཁ་ན་མ་ཐོ་བ་ཡིན་ལ། རང་གི་ངོ་བོ་ལུང་མ་བསྟན་དང་བདག་གཅིག་པའི་ལྟུང་བ་བཅས་པའི་ཁ་ན་མ་ཐོ་བ་སྟེ། གཏམ་གྱི་གཞི་ལས། ནོངས་པའི་དགེ་བ་ཞེས་བགྱིའམ། མི་དགེ་བ་ཞེས་བགྱིའམ། ལུང་དུ་མི་སྟོན་པ་ཞེས་བགྱི། ཉེས་པ་མི་དགེ་བ་ཞེས་བྱ། ལུང་དུ་མ་བསྟན་པ་ཞེས་ཀྱང་བྱའོ། །ཞེས་གསུངས་སོ། །འབྲས་བུའི་ཁྱད་པར་ནི། རྣམ་པར་སྨིན་པའི་འབྲས་བུ་ཡིད་དུ་མི་འོང་བ་འབྱིན་པའི་ནུས་པ་དང་ལྡན་པའི་ལྟུང་བ་ནི་རང་བཞིན་གྱི་ཁ་ན་མ་ཐོ་བ་ཡིན་ལ། རྣམ་པར་སྨིན་པའི་འབྲས་བུ་ཡིད་དུ་མི་འོང་བ་འབྱིན་པའི་ནུས་པ་དང་མི་ལྡན་པའི་ལྟུང་བ་ནི་བཅས་པའི་ཁ་ན་མ་ཐོ་བ་སྟེ། གཏམ་གྱི་གཞི་ལས། ནོངས་པ་རྣམ་པར་མི་སྨིན་པ་ཞེས་བགྱིའམ་རྣམ་པར་སྨིན་པ་ཞེས་ཀྱང་བྱ། རྣམ་པར་མི་སྨིན་པ་ཞེས་ཀྱང་བྱའོ་ཞེས་གསུངས་པས་ཤེས་སོ་ཞེས་གསུངས་སོ། །དེ་རྣམས་ལ་ཡང་རྣམ་པར་དཔྱད་པར་བྱ་སྟེ། རྒྱུའི་ཁྱད་པར་ལ་རྣམ་པར་དཔྱད་ན་གལ་ཏེ་བཅས་ལྡན་དགེ་སློང་གིས་དགེ་བའི་སེམས་ཀྱིས་ཀུན་ནས་བསླངས་ནས་མ་བསད་པ་ཆོས་ཅན། སྡིག་པ་མཚམས་མེད་ཅན་གྱི་ལྟུང་བ་འབྱུང་བ་ཁེགས་པར་ཐལ། དགེ་བའི་སེམས་ཀྱིས་ཀུན་ནས་བསླང་བ་ཡིན་པའི་ཕྱིར་རོ། །ཁྱབ་པ་མེད་ན། དགེ་བས་ཀུན་ནས་བསླང་བའི་ལྟུང་བ་དེ་བཅས་པའི་ཁ་ན་མ་ཐོ་བ་ཡིན་པར་འདོད་པ་ཉམས་སོ། །འདོད་ན། མཚོ་ཊཱིཀ་ལས། གཏམ་གྱི་གཞི་ལས། དགེ་སློང་གིས་དགེ་བའི་སེམས་ཀྱིས་མ་སྲོག་དང་ཕྲལ་ན་ཕམ་པའི་ཉེས་པར་ཡང་འགྱུར་ལ། མཚམས་མེད་པའི་ལས་སུ་ཡང་འགྱུར་བ་ཡོད་དེ། འདི་ལྟར་དགེ་སློང་གི་མ་ཞིག་ནད་བུ་ཅན་ཡུན་རིང་ཞིག་ནས་སྡུག་བསྔལ་གྱིས་དྲག་ཏུ་གཟིར་ཅིང༌། གནོད་པ་ཆེར་གྱུར་པ་མྱོང་བ་དེ་ལ་སྙིང་རྗེའི་བསམ་པ་དེ་ལྟ་བུའི་རྐྱེན་གྱིས་མ་སྲོག་དང་ཕྲལ་ན་ཕམ་པའི་ཉེས་པར་ཡང་འགྱུར་ལ། མཚམས་མེད་པའི་ལས་སུའང་འགྱུར་རོ། །ཞེས་གསུངས་ལ། དེ་ནི་དྲི་བ་རྒྱ་ཆེར་འགྲེལ་པ་ལས་ཀྱང་བཤད་དོ། །དེ་ལྟར་མ་བསད་པའི་སྡིག་པ་མཚམས་མེད་འབྱུང་བ་ནི་མཛོད་ལས་ཀུན་སློང་ལ་རབ་ཏུ་འཇུག་བྱེད་དང་རྗེས་སུ་འཇུག་བྱེད་གཉིས་སུ་གསུངས་པས་འདིར་རབ་ཏུ་འཇུག་བྱེད་སྙིང་རྗེའི་བསམ་པས་ཀུན་ནས་བསླང་ཡང༌། རྗེས་སུ་འཇུག་བྱེད་ནི་ཉན་ཐོས་ཀྱི་ལུགས་ཀྱིས་སྲོག་གཅོད་འདོད་དེ་མི་དགེ་བའི་བསམ་པ་ཡིན་པས། སྐབས་འདིར་དངོས་ཀྱི་ཀུན་སློང་མ་གསོད་པར་འདོད་པའི་བསམ་པས་ཀུན་ནས་བསླང་སྟེ་མ་བསད་པ་ཡིན་པས་སྡིག་པ་མཚམས་མེད་འབྱུང་བའོ། །ཞེས་གསུངས་སོ། །དེ་ལ་ཀུན་སློང་དང་ལས་གཉིས་སྤང་བྱ་རིས་གཅིག་ན་དུས་ཀྱི་ཀུན་སློང་གཙོ་བོ་མ་ཡིན་པར་ཐལ། དེ་ལ་མཐོང་སྒོམ་གྱི་སྤང་བྱ་རིས་ཐ་དད་ན་དུས་ཀྱི་ཀུན་སློང་གཙོ་བོ་དང༌། ཐ་མི་དད་ཡིན་ན་རྒྱུའི་ཀུན་སློང་གཙོ་བོ་ཡིན་པའི་ཕྱིར་ཏེ། མཆིམས་མཛོད་༣༥༢ལས། འོ་ན་ནི་དུས་ཀྱི་ཀུན་སློང་གཙོ་བོ་ཡིན་པའི་ཕྱིར་རྒྱུའི་ཀུན་སློང་དགེ་བའི་བྱས་ནས་དུས་ཀྱི་ཀུན་སློང་མི་དགེ་བའམ་ལུང་མ་བསྟན་གྱིས་བྱས་པའི་སྡོམ་པ་དགེ་བ་མིན་པར་འགྱུར་རོ་ཞེ་ན། ཀུན་སློང་གི་བསམ་པ་དེ་དག་མཐོང་སྤང་དང་སྒོམ་སྤང་རིགས་ཐ་དད་ན་དུས་ཀྱི་ཀུན་སློང་གཙོ་བོར་གྱུར་གྱི་རིས་གཅིག་པ་ལ་ནི་རྒྱུའི་ཀུན་སློང་ཉིད་གཙོ་བོ་ཡིན་པའི་ཕྱིར། དེ་ལྟར་ཐལ་བ་མེད་དོ་ཞེས་ལན་འདེབས་པར་མཛད་དོ། །ཞེས་གསུངས་པ་ལ་འདོད་ཉོན་སྤངས་ནས་དངོས་གཞིའི་ངོ་བོར་ལས་བསགས་ན་ལས་དེའི་ཀུན་སློང་ལ་སྒོམ་སྤང་གི་མ་རིག་པ་ཡོད་དགོས། དེ་ཡོད་ན་ཀུན་སློང་དེ་དང་དེ་འདྲའི་ལས་གཉིས་སྒོམ་སྤང་ཡིན་པར་འདྲ་བས་རྒྱུས་ཀུན་སློང་གཙོ་བས་ལུང་མ་བསྟན་དུ་མི་འགྱུར་རམ་དཔྱད། ཡང་དཔེར་ན་དགེ་སློང་ཞིག་གིས་རང་གི་མ་ནད་ཚབས་ཆེན་པོས་བཏབ་པ་ལ་སྙིང་རྗེའི་བསམ་པས་ཀུན་ནས་བསླངས་ཏེ་རང་གི་མའི་སྲོག་གཅོད་པའི་ལས་དེ་ཆོས་ཅན།དགེ་བའི་ལས་ཡིན་པར་ཐལ། དེའི་ཚེ་ལས་དེའི་རྒྱུའི་ཀུན་སློང་སྙིང་རྗེ་དང་དུས་ཀྱི་ཀུན་སློང་གསོད་སེམས་གཉིས་ཀ་རྩ་བར། བཅུ་ནི་སྒོམ་པའི་སྤང་བྱ་ཡིན། །ཞེས་པ་ལྟར་ཡིན་པས་སྒོམ་སྤང་དུ་རིགས་གཅིག་པས་རྒྱུའི་ཀུན་སློང་སྙིང་རྗེ་གཙོ་ཆེ་བའི་ཕྱིར། འདོད་མི་ནུས་ཏེ། སྲོག་གཅོད་ཀྱི་ལས་ཡིན་པའི་ཕྱིར། ཁྱབ་སྟེ། མཚོ་ཊཱིཀ་༢༤༣ལས། གཏམ་གྱི་གཞི་ལས་དགེ་སློང་གིས་དགེ་བའི་སེམས་ཀྱིས། ཞེས་སོགས་གོང་དུ་བཀོད་མ་ཐག་པ་དེའི་ཕྱིར་ཟེར་ན་དཔྱད་པར་བྱའོ། ། མཚོ་ཊཱིཀ་ལས། རྒྱུའི་ཁྱད་པར་ནི། རྒྱུ་མི་དགེ་བས་ཀུན་ནས་བསླང་བའི་ལྟུང་བ་ནི་རང་བཞིན་གྱི་ཁ་ན་མ་ཐོ་བ་ཡིན་ལ། རྒྱུ་དགེ་བའམ་ལུང་མ་བསྟན་གྱིས་ཀུན་ནས་བསླང་བའི་ལྟུང་བ་ནི་བཅས་པའི་ཁ་ན་མ་ཐོ་བ། ཞེས་བཅས་པའི་ཁ་ན་མ་ཐོ་བའི་ཀུན་སློང་ལ་དགེ་བ་དང་ལུང་མ་བསྟན་གཉིས་ཡོད་པར་གསུངས་ལ། ཀུན་མཁྱེན་འཇམ་བཞད་ཀྱིས་དེ་ལ་ལུང་མ་བསྟན་ལས་གཞན་ཡོད་པར་མ་གསུངས་སོ། །བཅས་པའི་ཁ་ན་མ་ཐོ་བའི་ཀུན་སློང་ལ་དགེ་བ་ཡོད་ན་དགེ་བའི་ཀུན་ནས་སློང་བའི་བཅས་པའི་ཁ་ན་མ་ཐོ་བ་དེ་དགེ་བ་ཡིན་པར་ཐལ། ཀུན་སློང་དགེ་བ་ཡིན་པའི་ཕྱིར། ཁྱབ་སྟེ། མཛོད་ལས་ངོ་བོ་ཉིད་ཀྱི་དགེ་བ་སོགས་བཞི་གསུངས་པའི་ཕྱིར། འདོད་མི་ནུས་ཏེ། མཚོ་ཊཱིཀ་ལྟར་གོང་དུ་བཀོད་པ་བཞིན་བཅས་པའི་ཁ་ན་མ་ཐོ་བའི་ལྟུང་བ་ཡིན་ན་ལུང་མ་བསྟན་དང་ངོ་བོ་གཅིག་ཡིན་དགོས་པའི་ཕྱིར་ཟེར་ན་དཔྱད་པར་བྱའོ། །