རྡོ་རྗེ་འཇིགས་བྱེད་ཞལ་གཅིག་ཕྱག་གཉིས་པའི་སྒྲུབ་པའི་ཐབས།
འཇམ་པའི་དབྱངས།
རྒྱ་གར་སྐད་དུ། བཛྲ་བྷཻ་ར་ཝ་ཨེ་ཀཱ་ན་ན་དྭི་བྷུ་ཛ་སཱ་དྷ་ནཱ་མ། བོད་སྐད་དུ། རྡོ་རྗེ་འཇིགས་བྱེད་ཞལ་གཅིག་ཕྱག་གཉིས་པའི་སྒྲུབ་པའི་ཐབས། །དཔལ་རྡོ་རྗེ་འཇིགས་བྱེད་ལ་ཕྱག་འཚལ་ལོ། །དཔལ་ཡེ་ཤེས་སེམས་དཔའ་ལ་ཕྱག་འཚལ་ལོ། །སྨ་ར་སྨིན་མ་བ་སྦུ་གཟི་མ་དུས་མཐའི་མེ་ལྟར་འབར་ཞིང་ལྗགས་འདྲིལ་བ། །སྤྱན་གསུམ་རྭ་རྣོན་རྣམ་པར་འགྱུར་བའི་འཇིགས་གཟུགས་ཀླུ་བདག་རྒྱན་ཅན་མ་ཧེའི་ཞལ། །གཡོན་བརྐྱང་རབ་ཏུ་ཁྲོས་པ་སྣ་ཚོགས་པདྨ་ཉི་མའི་སྟེང་ན་ཡོངས་གནས་པ། །ཤིན་ཏུ་རྣོ་བའི་གྲི་གུག་ཐོད་པ་འཛིན་པ་མཉམ་མེད་བདེ་བ་སྟེར་ལ་འདུད། །ཕྱག་དང་ཞལ་ནི་སྣ་ཚོགས་པ། །བསྒོམ་པ་རུ་ནི་མི་ནུས་པ། །བསྡུས་པའི་རྡོ་རྗེ་འཇིགས་བྱེད་པ། །སྐྱེ་བོ་ནུས་པ་མི་ལྡན་ཞིང༌། །བློ་དམན་པ་ཡི་ངོ་རུ་ནི། །མདོར་བསྡུས་པ་ཡི་སྒྲུབ་པའི་ཐབས། །ཇི་ལྟར་དེ་ཉིད་
མོས་པ་ལའང༌། །སྦྱོར་དོན་སྐྱེས་པ་བསྐྱེད་པའི་ཕྱིར། །སངས་རྒྱས་རྒྱུད་དུ་གསུངས་པ་ཡི། །རང་གིས་ཤེས་ན་རབ་ཏུ་འཇུག །གཙོ་བོ་དམ་ཚིག་རབ་ཏུ་བསྟན། །དེའི་ཕྱིར་ན་རྒྱས་པར་བཤད། །སྔགས་པས་རེ་ཞིག་ཐོག་མར་དུར་ཁྲོད་དམ་གཡུལ་ལ་སོགས་པའི་སའམ། ཡིད་དང་མཐུན་པའི་གནས་སུ་སྟན་བདེ་བ་ལ་གནས་ནས། ཞལ་བཞིའི་སྔགས་ཀྱིས་ཕྱོགས་བཞིར་བསྔགས་ཤིང་བྱིན་གྱིས་བརླབ་པ་ནི། ཨོཾ་སུཾ་བྷ་ནི་སུཾ་བྷ་ཧཱུཾ་ཧཱུཾ་ཕཊ། ཨོཾ་གྲྀཧྞ་གྲྀཧྞ་ཧཱུཾ་ཧཱུཾ་ཕཊ། ཨོཾ་གྲྀཧྞ་པ་ཡ་གྲྀཧྞ་པ་ཡ་ཧཱུཾ་ཧཱུཾ་ཕཊ། ཨོཾ་ཨཱ་ན་ཡ་ཧོ། །བྷ་ག་ཝཱ་ན་བཛྲ་ཧཱུཾ་ཧཱུཾ་ཕཊ་ཕཊ་ཅེས་བྱ་བས་སོ། །དེའི་རྗེས་ལ་རང་གི་སྙིང་གའི་ས་བོན་ལས་འོད་ཟེར་སྤྲོས་པས་བླ་མ་དང་སངས་རྒྱས་ལ་སོགས་པ་ནམ་མཁའི་ཕྱོགས་སུ་སྤྱན་དྲངས་ལ། ཡང་དག་པར་མཆོད་དེ། སྡིག་པ་བཤགས་པ་ལ་སོགས་པའི་ཆོ་ག་བྱས་ནས། དེ་ནས་སེམས་ཅན་ཚད་མེད་བའི་སྡུག་བསྔལ་གྱི་རྒྱ་མཚོར་བྱིང་བའི་ཡུལ་ལ་བལྟས་ནས་ཚད་མེད་པ་བཞི་བསྒོམ་པར་བྱ་སྟེ། དེ་ལ་ཕན་པ་དང་བདེ་བ་ཉེ་བར་འདོད་པ་ནི་བྱམས་པའོ། །སྡུག་བསྔལ་གྱི་རྒྱུ་ལས་ཐོན་པར་འདོད་པ་ནི་སྙིང་རྗེའོ། །སེམས་ཅན་སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་ཞིང་བདེ་བ་ལ་སེམས་རངས་པ་ནི་དགའ་བའོ། །དེ་ཁོ་ན་ཉིད་དུ་རོ་གཅིག་པས་རྙེད་པ་དང་མ་རྙེད་པ་ལ་སོགས་པ་འཇིག་རྟེན་གྱི་ཆོས་བརྒྱད་ཀྱིས་མ་གོས་པ་ནི་བཏང་སྙོམས་སོ། །བསྒོམ་པ་ནི་དེའི་གཟུང་བ་དང་འཛིན་པའི་རྣམ་པར་བྱད་པའི་སྔགས་བརྗོད་པར་བྱ་སྟེ། ཨོཾ་སྭ་བྷཱ་ཝ་ཤུདྡྷཿ་སརྦ་དྷརྨཱཿ་སྭ་བྷཱ་ཝ་ཤུདྡྷོ྅ཧཾ། དེའི་རྗེས་ལ་ཆོས་ཐམས་ཅད་རང་བཞིན་མེད་པའི་ངེས་པར་རྣམ་པར་བསྒོམ་པར་བྱ་བ་ནི། སེམས་ཙམ་ཉིད་ཀྱིས་རྣམ་པར་རྟོག་པ་ཙམ་དུ་རྟོགས་ནས་སྔགས་ཀྱི་དོན་མངོན་དུ་བྱ་ཞིང༌། སྟོང་པ་ཉིད་ཀྱི་སྔགས་བརྗོད་པ་ནི། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། དེ་ནས་ཐང་ཅིག་ཙམ་དུ་སྟོང་པ་ཉིད་ལྷག་པར་མོས་ནས་དེའི་རྗེས་ལ་སྟོང་པ་ཉིད་ལས། ཡཾ་ཡིག་དུ་བ་ལས་བྱུང་བ། །རླུང་གི་དཀྱིལ་འཁོར་གཞུའི་དབྱིབས་ཅན། །དེ་སྟེང་ཟླ་བའི་དཀྱིལ་འཁོར་ནི། །ཨ་ཡིག་ས་བོན་ལས་བྱུང་བ། །དེ་ལ་དྷཱིཿ་ཡིག་འོད་འབར་བ། །བསྒོམས་
ནས་དེ་ཡི་འོད་ཟེར་གྱིས། །བདེ་གཤེགས་རྒྱལ་བ་ཡང་དག་བསྐུལ། །དེ་རྣམས་ཐམས་ཅད་ཡང་དག་འདུས། །འཇམ་དཔལ་དབྱངས་སུ་ཡང་དག་བསྒོམ། །རལ་གྲི་པོ་ཏིས་ཕྱག་བྲེལ་བ། །གངྒཱའི་གསེར་གྱི་འོད་དང་ལྡན། །དེ་ཡི་སྙིང་གར་བསྒོམ་པ་ནི། །ཨ་ལས་ཉི་མའི་དཀྱིལ་འཁོར་རོ། །དེ་ལས་འོད་ཟེར་ཡང་དག་འབྱུང༌། །ཕྱོགས་ནས་རྫོགས་སངས་རྒྱས་བཞུགས་དང༌། །ཁྲོ་བོ་བྱང་ཆུབ་སེམས་དཔར་བཅས། །དེ་བཞིན་རིག་པའི་ལྷ་མོ་ཚོགས། །ཡང་ན་ཉི་མ་དེ་ཉིད་ལ། །བསྐུལ་ནས་ཡང་དག་བཞུགས་པར་འགྱུར། །དེ་ཡང་དུས་གཅིག་འཇམ་པ་ཡི། །ཉི་མའི་དཀྱིལ་འཁོར་དུ་ནི་གྱུར། །རོ་གཅིག་ཏུ་ནི་ཡང་དག་འབྱུང༌། །མཆོག་ཏུ་ཤིན་ཏུ་འོད་གསལ་བའོ། །དཔལ་ཚད་བརྒྱ་རུ་རྣམ་རྒྱས་པས། །འཇིག་རྟེན་གསུམ་ཁོངས་གསལ་བ་དང༌། །བདུད་ཀྱི་ཚོགས་ནི་འཇོམས་པར་བྱེད། །ཡིད་ཀྱིས་བརྟན་པར་བསྒོམ་པར་བྱ། །དེ་ཡི་སྟེང་དུ་ནག་པོ་ཆེ། །ཧཱུཾ་ཡིག་འོད་ཟེར་ལྔ་ལྡན་པ། །དེ་ལས་འོད་ཟེར་ངེས་པར་འབྱུང༌། །དེ་ཉིད་དུ་ནི་ཡང་དག་འདུས། །ཡང་ནི་འོད་ཟེར་ཕྲེང་བ་ཡིས། །འགྲོ་བ་མ་ལུས་སངས་རྒྱས་བྱས། །སངས་རྒྱས་ལྔ་ནི་རབ་འབྱོར་བ། །ཧཱུཾ་གིས་དེ་ཉིད་ལས་སྦྱོར་བྱས། །རྡོ་རྗེ་ཆེན་པོ་རྣམ་བརྩིགས་པ། །རྩེ་དགུའི་འོད་ཟེར་ཤིན་ཏུ་རྣོ། །བསྒོམས་ནས་དེ་ཡི་འོད་ཟེར་གྱིས། །ཕྲ་མོའི་གཟུགས་ཀྱིས་རྒྱལ་བ་སོགས། །ཉི་མ་ཡི་ནི་འོག་ཉིད་དུ། །གཟུགས་བརྙན་འདྲ་བར་ཡང་དག་བལྟ། །དེ་ཡིས་སེམས་ཅན་ཡོངས་སུ་སྨིན། །དེ་ཡིས་ངེས་པར་ཡང་དག་བསྡུ། །རྡོ་རྗེ་གཟུགས་བརྙན་གཟུགས་གཅིག་ཏུ། །བློ་ལྡན་གྱིས་ནི་བཞུགས་པར་བསམ། །དེ་འོག་ཐམས་ཅད་ཡོངས་གྱུར་བ། །བསྐལ་པའི་མེ་ལྟར་བཟོད་དཀའ་བ། །སྐུ་མདོག་ནག་པོ་དྲག་ཆེན་པོ། །འཇིགས་མཛད་ལྗགས་ནི་འདྲིལ་བ་ཡི། །མ་ཧེའི་ཞལ་ནི་སྐུ་ཆེན་པོ། །འཇིག་རྟེན་གསུམ་པོ་ཟ་བར་ནུས། །དཀོན་མཆོག་གསུམ་སོགས་གནོད་པ་ལ། །སྡིགས་མཛུབ་ཀྱིས་ནི་མཆོག་ཏུ་རྒྱལ། །གཞོན་ནུ་གདོང་དྲུག་ལ་སོགས་གསོད། །ལྷ་དང་ལྷ་མིན་བསྡིགས་པར་མཛད། །
དབང་པོ་ཉེ་དབང་དྲག་དང་ཚངས། །ཧ་ཧའི་སྒྲ་ཡིས་སྐྲག་པར་བྱེད། །བདུད་ཀྱི་དཀྱིལ་འཁོར་རབ་འཇོམས་པ། །གཡོན་བརྐྱང་བ་ཡི་ཞབས་ཀྱིས་གསོད། །ས་འོག་ཏུ་ནི་རབ་ཏུ་གཡོ། །མགོ་བོའི་ཕྲེང་བས་འཕྲོག་ཆེན་པོ། །ཐོད་པའི་ཅོད་པན་གྱིས་ནི་མཛེས། །ཞལ་གྱི་མཆེ་བ་གཙིགས་པ་དང༌། །སྤྱན་གསུམ་དམར་ཞིང་ཟླུམ་པ་ཡིན། །རྭ་རྣོ་སྐྲ་ནི་འབར་བ་བཞིན། །སྨ་ར་སྨིན་མ་རབ་མགྱོགས་འཇིགས། །སྣ་ཚོགས་ཆུ་སྐྱེས་ཉི་མར་གནས། །དབང་པོ་ཡི་ནི་གདེངས་ཀས་བརྒྱན། །ཐུང་ཞིང་ལྟོ་འཕྱང་བརྗིད་པ་ཡིས། །མཚན་མ་གྱེན་འགྲེང་དྲག་དང་བཅས། །གཡས་དང་གཡོན་གྱི་ཕྱག་བསྣམས་པ། །ཐོད་པ་དང་ནི་གྲི་གུག་འཛིན། །སྔགས་པ་ཡིས་ནི་རྟག་ཏུ་བསྒོམ། །དཔལ་ཆེན་རྡོ་རྗེ་འཇིགས་བྱེད་ནི། །ཡང་ན་ཞལ་གསུམ་ཕྱག་དྲུག་བསྒོམས། །ལྷག་མ་མདའ་གཞུ་ཁ་ཊྭཱཾ་ག །ཕྱག་གཉིས་བགེགས་ཀྱི་པགས་པ་འཛིན། །ཞལ་གསུམ་དཀར་དང་དམར་བའོ། །གཡས་དང་གཡོན་གྱི་བསམ་གཏན་ནི། །དྲག་དང་བཞད་དང་འཇིགས་པའོ། །ལྷག་མ་ཀུན་ནི་སྔར་བཞིན་ནོ། །གཤིན་རྗེ་གདུག་པ་མ་ཧེའི་སྟེང༌། དེའི་མདུན་དུ་མགོན་པོ་ནི། །ཅིག་ཅར་དུ་ནི་ཡང་དག་བསྐྱེད། །རྡོ་རྗེ་འཇིགས་བྱེད་དཔའ་བོ་ཡི། །ཕྱག་དང་ཁ་དོག་མཆོག་ཏུ་འདྲ། །སྤྱན་གསུམ་མཆེ་བ་གཙིགས་པ་ཡིས། །རོ་ཡི་སྟེང་ན་ཡང་དག་གནས། །གདུག་པ་ཅན་རྣམས་བསད་པའི་ཕྱིར། །སྙིང་རྗེའི་བདག་ཉིད་ཀྱིས་ནི་བསྒོམ། །དེ་རྗེས་ཡེ་ཤེས་སེམས་དཔའ་དགུག །ཇི་ལྟ་བ་ཡི་ཆོ་གས་གཞུག །མཆོད་ཡོན་ཞབས་བསིལ་ལ་སོགས་སྦྱིན། །དམ་ཚིག་ལ་ནི་ཡང་དག་གཞུག །དེ་ནས་དབང་བསྐུར་ཡང་དག་སྦྱིན། །རིགས་ཀྱི་བདག་པོས་སྤྱི་བོར་བརྒྱན། །མཉམ་པར་བཞག་པས་སྔགས་བཟླས་པས། །མྱུར་དུ་འགྲོ་བའི་དོན་ནི་བྱས། །སྔགས་པ་སྐྱོ་བར་གྱུར་ན་ནི། །ལངས་ནས་བྱ་བ་གཞན་དག་བྱ། །སྨོན་ལམ་དེ་བཞིན་བྱས་ནས་ནི། །རྣལ་འབྱོར་བློ་ལྡན་དེ་ནས་ལངས། །སྔོན་དུ་བསྙེན་པའི་ཆོ་ག་ནི། །སྙིང་རྗེའི་བདག་ཉིད་སྔགས་བཟླས་པས། །མྱུར་དུ་འགྲོ་བའི་དོན་ནི་
བྱ། །འབུམ་ཕྲག་གསུམ་གྱི་གྲངས་ངེས་པས། །འགྲུབ་པར་འདིར་ནི་ཐེ་ཚོམ་མེད། །དེ་ལ་སྔས་ནི་ཡི་གེ་བཅུ་བ་རྒྱུན་མི་འཆད་པར་ཀུན་དུ་དེ་དྲན་བཟླས་པ་ནི། །རིང་དང་ཐུང་དང་བུལ་བར་མ་ཡིན་བློ་ལྡན་མི་སྨྲར་གྱུར་པས་ཐམས་ཅད་དུ། །དཔལ་ལྡན་རྡོ་རྗེ་འཇིགས་བྱེད་སྔགས་པས་མི་སྤོང་དངོས་གྲུབ་ཀྱི་ནི་གཞི། །ངེས་པར་སེམས་ནི་བརྟན་བྱས་མངོན་པར་འདོད་པ་ཇི་སྲིད་མཚན་མ་མ་བྱུང་བར་དུའོ། །དེ་ནས་རྣལ་འབྱོར་པ་ནི་སྙིང་རྗེའི་མཆོག །ཁྲོ་བོའི་ང་རྒྱལ་ཡིད་ཀྱིས་ནི། །བྱས་ནས་རྡོ་རྗེ་ཅན་གྱིས་བསད། །འཇིགས་བྱེད་བསད་པའི་ལས་ནི་གཙོ། །གཤིན་རྗེའི་གཟུགས་ནི་བྱ་བ་ལ། །གྲོག་མཁར་བདུན་ལས་ཡང་དག་འབྱུང༌། །འཇིགས་བྱེད་རྣལ་འབྱོར་ལྡན་པ་ཡིས། །དུས་སོགས་ཤེས་པས་འདུས་བྱས་པས། །གཅེར་བུ་རལ་གྲི་མི་མགོ་གཟུང༌། །གསུས་པ་ཆེ་ལ་ཞལ་གཅིག་པ། །སྐྲ་སེར་གྱེན་བརྫེས་མིག་དམར་བ། །གདུག་སེམས་ཅན་ནི་འཇིགས་པ་ཡིས། །དེ་ནི་གྲུ་གང་ཙམ་གྱི་ཚད། །མི་ཐོད་ལ་བྲིས་སྙིང་གར་གཞུག །བླ་མའི་མན་ངག་རྟོགས་པ་ཡིས། །དེ་ཡི་སྒྲུབ་ཐབས་ངེས་པར་སྦྱར། །ཁ་སྦྱར་དབྱེ་བར་བྱས་ནས་ནི། །སྲུང་བ་དགུག་པའི་སྦྱོར་བ་དང༌། །ལུས་ནི་སྟོང་པར་གྱུར་པ་ལ། །བསད་ན་དངོས་གྲུབ་མྱུར་དུ་ཐོབ། །གཤིན་རྗེའི་ལུས་ནི་རྫོགས་པ་དང༌། །བསྒྲུབ་བྱ་མདུན་དུ་བྱས་ནས་ནི། །ཉི་མ་བདུན་གྱི་གྲངས་ཀྱིས་ནི། །ཇི་ལྟར་ཆོ་ག་ཐུན་གསུམ་དུ། །བཟླས་དང་སྦྱིན་སྲེག་སོགས་རྫོགས་པས། །མངོན་སུམ་དུ་ནི་མཚན་མ་ཐོབ། །མཚན་ཕྱེད་ཀྱི་ནི་དུས་སུ་བྱ། །མི་མགོ་གསུམ་གྱི་སྟེང་དུ་བསྡུ། །ཁྲོ་བོའི་ང་རྒྱལ་སེམས་ཀྱིས་ནི། །འདི་ལྟར་བརྟན་བྱས་རྣལ་འབྱོར་བ། །གང་བསྟན་དེ་ནི་བྱས་པ་ན། །ཐམས་ཅད་བོར་བར་ངེས་པར་འགྲོ། །གང་ཡང་འདིར་ནི་དམྱལ་བ་ཡང༌། །སྤངས་ནས་བདེ་བ་ཅན་དུ་འགྲོ། །སྔགས་དང་རྒྱུད་ཀྱི་མཐུ་དང་ནི། །བསམ་གཏན་བསམ་བྱ་རྣལ་འབྱོར་བས། །སྡིག་པ་ཆེན་པོ་བྱས་པ་ཡང༌། །དེ་ནི་ཐབས་ཀྱིས་སྦྱིན་པ་ཡིན། །ཉེ་བར་བྱས་པའི་ཐབས་ཡིན་ནོ། །གཞན་དུ་ན་ནི་སྐྱོན་དུ་འགྱུར། །རྡོ་རྗེ་འཇིགས་
བྱེད་ལས་བསྒྱུར་བས། །གསོལ་བཏབ་པ་ལ་ཐུགས་བརྩེ་ནས། །རིན་ཆེན་རྡོ་རྗེ་ཟླ་བ་ལྟར། །འདི་ཉིད་ལ་གུས་བདག་གིས་བྱས། །ཇི་ལྟར་ཐོབ་པའི་དགེ་བ་དེས། །བདེ་བ་བསྒྲུབ་པའི་སྒྲུབ་ཐབས་ནི། །ཆུ་རྒྱུན་འདོད་པའི་སེམས་ཅན་ནི། །དེ་ནི་རྡོ་རྗེ་འཇིགས་བྱེད་ཤོག །འཇམ་པའི་དབྱངས་ཀྱིས་རབ་མཛད་པ། །ཕྱག་གཉིས་པའི་སྒྲུབ་ཐབས་རྫོགས་སོ།། །།རྒྱ་གར་གྱི་མཁན་པོ་ཨཱ་ཙཪྻ་ཨ་ནནྟ་དང༌། བོད་ཀྱི་ལོ་ཙཱ་བ་དགེ་སློང་རྡོ་རྗེ་གྲགས་ཀྱིས་བསྒྱུར་བའོ།།