ཞར་བྱུང་བསྟན་པའི་གནས་ཚད་བཤད་པ།
༈ ཞར་བྱུང་བསྟན་པའི་གནས་ཚད་བཤད་པ་ནི། འདུལ་བ་ཕྲན་ཚེགས་ལས་བསྟན་པ་ལོ་ལྔ་སྟོང་དུ་བཤད་པ་དང་། འཕགས་པ་བློ་གྲོས་མི་ཟད་པར་བསྟན་པའི་མདོ་ལས། སླད་མའི་དུས་ལྔ་བརྒྱ་ཐ་མ་ལ། ཞེས་པའི་འགྲེལ་པར་ཤཱཀྱ་ཐུབ་པའི་བསྟན་པ་འབྲས་བུ་ཐོབ་པ་དང་། ཤིན་ཏུ་རྒྱས་པའི་དུས་ནི་ལོ་སྟོང་ཞིག་འཛམ་བུའི་གླིང་དུ་གནས་སོ། །དེ་ཡང་ཕྱེད་དུ་བགོས་ཏེ། ལྔ་བརྒྱ་པ་སྔ་མ་ནི་འཕེལ་བའི་དུས་སུ་བཞག་ལ་ལྔ་བརྒྱ་ཐ་མ་ནི་བྲི་བའི་དུས་ཞེས་བྱའོ། །ཞེས་དང་། སྙིང་རྗེ་པདྨ་དཀར་པོ་ལས། ང་མྱ་ངན་ལས་འདས་ནས་ལོ་སྟོང་དུ་དམ་པའི་ཆོས་གནས་པར་གྱུར་ཅིགཡང་ལོ་བརྒྱར་དམ་པའི་ཆོས་ཀྱི་གཟུགས་བརྙན་གནས་པར་གྱུར་ཅིགཅེས་དང་། ཟླ་བའི་སྙིང་པོས་ཞུས་པའི་མདོ་ལས། ང་མྱ་ངན་ལས་འདས་ནས་དམ་པའི་ཆོས་ཀྱི་གཟུགས་བརྙན་ལོ་ཉིས་སྟོང་དུ་གནས་པར་འགྱུར་རོ། །ཞེས་
དང་། ཆོས་ཉིད་རང་གི་ངོ་བོ་ལས་མི་གཡོ་བ་ཐ་དད་པར་སྣང་བའི་མདོར། འཇམ་དཔལ་ང་མྱ་ངན་ལས་འདས་ནས་ལོ་ལྔ་བརྒྱ་དང་། དགུ་བརྒྱ་དང་། སྟོང་དགུ་བརྒྱ་དང་། ཉིས་སྟོང་དང་། ཉིས་སྟོང་ལྔ་བརྒྱའི་བར་དུ་ཆོས་ལ་བརྟག་པའི་མཐའ་ལྔ་པོ་འདི་དག་ལ་སོ་སོར་རྟོག་པའི་གང་ཟག་རིམ་པས་འབྱུང་ངོ་། །ཞེས་དང་། རྡོ་རྗེ་གཅོད་པའི་འགྲེལ་པར། ལྔ་བརྒྱ་ཐ་མ་ཞེས་བྱ་བ་ལ། བརྒྱ་ཕྲག་ལྔའི་ཚོགས་ནི་ལྔ་བརྒྱ་སྟེ་བཅོམ་ལྡན་འདས་ཀྱི་བསྟན་པ་ལྔ་བརྒྱ་ཕྲག་ལྔའི་བར་དུ་གནས་ཞེས་གྲགས་པས། དེའི་ཕྱིར་ཐ་མ་ཞེས་བྱེ་བྲག་ཏུ་གསུངས། ཞེས་དང་། བསྐལ་བཟང་ལས། དམ་པའི་ཆོས་ལོ་ལྔ་བརྒྱའི་བར་དུ་གནས་སོ། །ལོ་ལྔ་བརྒྱའི་བར་དུ་ནི་དམ་པའི་ཆོས་ལྟར་སྣང་ངོ་། །ཞེས་དང་། དཾཥྚ་སེ་ནའིི་འབུམ་ཊཱིག་ཏུ། ཕྱི་མའི་དུས་ལྔ་བརྒྱ་ཐ་མ་ཞེས་པ། བཅོམ་ལྡན་འདས་ཀྱི་བསྟན་པ་ལོ་ལྔ་སྟོང་དུ་གནས་པ་ལ་སྟོང་ཕྲག་རེ་རེ་ཕྱེད་ཕྱེད་ཏུ་བཅད་པས། ལྔ་བརྒྱ་ཕྲག་བཅུ་ལ་ལེའུ་བཅུར་འགྱུར་ཏེ། དེ་ལ་ལྔ་བརྒྱ་པ་དང་པོ་དང་གཉིས་པ་དང་། གསུམ་པ་རྣམས་ལ་རིམ་པ་ལྟར་དགྲ་བཅོམ་པ་དང་ཕྱིར་མི་འོང་བ་དང་རྒྱུན་དུ་ཞུགས་པ་མང་དུ་བྱུང་བས་དེ་རྣམས་ཀྱི་ལེའུ་ཞེས་བྱ་སྟེ་ཁོང་དུ་ཆུད་པའི་ལེའུ་གསུམ་དང་། དེ་ནས་ལྔ་བརྒྱ་པ་བཞི་པ་དང་ལྔ་པ་དང་དྲུག་པ་རྣམས་ལ་གོ་རིམ་བཞིན་དུ་ལྷག་མཐོང་དང་ཏིང་ངེ་འཛིན་དང་ཚུལ་ཁྲིམས་དང་ལྡན་པ་མང་དུ་བྱུང་བས་དེ་རྣམས་ཀྱི་ལེའུ་ཞེས་བྱ་སྟེ་སྒྲུབ་པའི་དུས་ཀྱི་ལེའུ་གསུམ་དང་། དེ་ནས་ལྔ་བརྒྱ་བདུན་པ་དང་བརྒྱད་པ་དང་དགུ་པ་རྣམས་ལ་རིམ་པ་བཞིན་མངོན་པ་དང་མདོ་སྡེ་དང་འདུལ་བ་སྟོན་པ་མང་དུ་འབྱུང་བས་དེ་རྣམས་ཀྱི་ལེའུ་སྟེ་ལུང་གི་ལེའུ་གསུམ་དང་། ལྔ་བརྒྱ་པ་བཅུ་པ་ནི། རབ་ཏུ་བྱུང་བའི་རྟགས་ཙམ་ལས་ལྟ་སྤྱོད་རྣལ་མ་དང་མི་ལྡན་པས་རྟགས་ཙམ་འཛིན་པའི་ལེའུ་སྟེ་འདི་ལ་ལྔ་བརྒྱ་པ་ཐ་མ་ཞེས་བྱའོ་ཞེས་བཤད་དོ། །དེ་ལྟར་ན་མཁས་པ་ཕལ་ཆེར་ལོ་སྟོང་ལ་སོགས་པ་དགོངས་པ་ཅན་དང་། ཡང་དག་པའི་བསྟན་པའི་གནས་ཚད་ལྔ་སྟོང་ཉིད་ཞལ་མཐུན་པ་ཤས་ཆེ་བ་དང་། ལུང་དང་ཡང་མཐུན་ཤས་ཆེ་བས་རེ་ཞིག་འདིར་ཡང་ལྔ་སྟོང་དུ་གནས་པ་ཁས་བླང་ངོ་། །དེ་ལྟར་འདས་ལོ་ཕུག་ལུགས་དང་བསྟུན་ནས་བརྩིས་
ན་སྔར་ཕན་འབྲས་བུའི་དུས་གསུམ་དང་། སྒྲུབ་པའི་དུས་ལས་ཤེར་ཏིང་གཉིས་དང་། ཚུལ་ཁྲིམས་ལས་གྱ་དྲུག་ཙམ་འདས་ཤིང་། ད་ཕྱིན་ཚུལ་ཁྲིམས་འཕྲོས་དང་། ལུང་གི་དུས་གསུམ། རྟགས་ཙམ་འཛིན་པ་སྟེ། ལྔ་བརྒྱ་ཕྲག་ལྔར་ཉེ་བ་ཙམ་ཡོད་པར་གཏེར་ཆེན་བླ་མ་ཉིད་ཀྱིས་གསུངས་སོ། །ངེས་དོན་ཐུན་མོང་མ་ཡིན་པའི་བསྟན་པའི་གནས་ཚད་ནི། གསེར་འོད་དམ་པ་ལས། སངས་རྒྱས་མྱ་ངན་ཡོངས་མི་འདའ། ཆོས་ཀྱང་ནུབ་པར་མི་འགྱུར་རོ། །ཞེས་དང་། ཡིད་བཞིན་རྣམ་པར་བཀོད་པའི་རྒྱུད་ལས། སེམས་ཅན་ཀུན་གྱི་ཚོགས་ཆེན་པོ། །ཇི་སྲིད་རྣམ་པར་གནས་དེ་སྲིད། །སངས་རྒྱས་སྤྲུལ་པ་རྒྱུན་མི་ཆད། །གྲོལ་བའི་ཆོས་ཀྱང་ནུབ་པ་མེད། །ཅེས་གསུངས་པའི་ཕྱིར། ཆོས་འབྱུང་བསྟན་པའི་ཉི་མ་ལས། རིག་གནས་དང་བསྟན་པའི་གནས་ཚད་བཤད་པའི་སྐབས་ཏེ་གསུམ་པའོ།། །།