བཞི་བ་གཟུངས་ཀྱི་ཚོགས་བཤད་པ།

བཞི་བ་གཟུངས་ཀྱི་ཚོགས་བཤད་པ་ལ།

སྤྱི་དོན་དང༌། མཐའ་རགས་ཙམ་དཔྱད་པ་དང་གཉིས། དང་པོ་ལ། གཟུངས་ཀྱི་མཚན་ཉིད། དབྱེ་བ། སྐྱེད་པའི་རྒྱུ། བྱེད་ལས། ས་མཚམས་དང་ལྔ། དང་པོ་མཚན་ཉིད། ཚེ་རབས་སྔ་མར་གོམས་པ་དང༌།ཐོས་བསམ་སྒོམ་པ་ཅི་རིགས་ལ་བརྟེན་ནས་ཚིག་དོན་སོགས་ཡུན་རིང་མི་བརྗེད་འཛིན་པའི་ཁྱད་འཕགས་ཀྱི་དྲན་པ་དང་ཤེས་རབ་ཅི་རིགས་དང་མཚུངས་ལྡན་གྱི་རིགས་གནས་ཀྱི་ཤེས་པ་དེ་ཡིན་ཏེ། ཡུམ་གསུམ་གནོད་འཇོམས་ལས། དེ་ལ་གཟུངས་ཐོབ་ཅེས་བྱ་བ་ནི། འཛིན་པར་བྱེད་པས་ན་གཟུངས་ཞེས་བྱའོ། །ཞེས་དང༌། ཉ་ཊཱིཀ་མཆན་ལས། ཆོས་རྣམས་ཀྱི་ཚིག་དོན་འཛིན་པར་ནུས་པས་གཟུངས་ཏེ་མདོར་བསྡུས་ན་དྲན་པ་དང་ཤེས་རབ་ཅེས་འབུམ་ཊཱིཀ་ཀོ །ཞེས་དང༌། རྒྱན་གྱི་ས་འགྲེལ་ལས། བྱང་ས་ལས་ངོ་བོ་དྲན་པ་དང་ཤེས་རབ་ཀྱི་སྟོབས་སྐྱེད་པ་ཐོབ་པ་སྟེ། ཞེས་སོགས་གསུངས་པས་སོ། ། གཉིས་པ་དབྱེ་བ་ནི། ཡུམ་གསུམ་གནོད་འཇོམ་ལས། གཟུངས་དེ་ཡང་རྣམ་པ་བཞི་སྟེ། བྱང་ཆུབ་སེམས་དཔའི་བཟོད་པ་ཐོབ་པའི་རྒྱུར་གྱུར་པའི་གཟུངས་དང༌། གསང་སྔགས་ཀྱི་གཟུངས་དང༌། ཆོས་ཀྱི་གཟུངས་དང༌། དོན་གྱི་གཟུངས་སོ། །ཞེས་དང༌། ཉ་ཊཱིཀ་ལས། ཚིག་དང་དོན་ལ་སོགས་པའི་གཟུངས་བཞི་སྟེ། ཞེས་གསུངས་པ་ལྟར་རོ། །དེ་ལ་བཟོད་པའི་གཟུངས་ཀྱི་མཚན་ཉིད་ནི། སྐྱེ་མེད་སོགས་ཀྱི་དོན་ལ་བཟོད་པའི་གཟུངས་དེ་ཡིན་ཏེ། ཉ་ཊཱིཀ་ལས། བཟོད་པའི་གཟུངས་ནི། ཨ་ར་པ་ཙ་ན་ལ་སོགས་པའི་ཡི་གེའི་དོན་དེ་བཞིན་དུ་སྒྲོ་བཏགས་ནས་བསྒོམས་པས་བསྒོམ་པ་རྫོགས་པ་ན་ཡི་གེ་དེའི་དོན་དམ་པ་ལ་བཟོད་པ་སྐྱེ་བ་ནི། བཟོད་པའི་གཟུངས་ཏེ། དཔེར་ན་དོན་སྐྱེ་བ་མེད་པར་བཏགས་ཏེ་བསྒོམས་པས་བསྒོམ་པ་རྫོགས་པ་ན་ཆོས་ཐམས་ཅད་སྐྱེ་མེད་དུ་རྟོགས་པའི་བཟོད་པ་ཐོབ་སྟེ། དེས་ན་བཟོད་གཟུངས་སོ། །དག་ལྡན་ནོ། །དེས་ན་ཆོས་ཐམས་ཅད་ཀྱི་གནས་ལུགས་རྟོགས་པའི་སྒོ་སྟེ་ཐབས་སོ། །ཞེས་གསུངས་པས་སོ། །ཆོས་གཟུངས་ཀྱི་མཚན་ཉིད་ནི། མིང་ཚིག་ཡི་གེའི་ཚོགས་མཐའ་ཡས་པ་འཛིན་ནུས་ཀྱི་གཟུངས་དེ་ཡིན་ཏེ། ཉ་ཊཱིཀ་ལས། ཚིག་གི་གཟུངས་ནི། ས་ཐོབ་ནས་སངས་རྒྱས་བྱང་སེམས་ཀྱིས་བསྟན་པའི་ཆོས་ཀྱི་མིང་ཚིག་ཡི་གེའི་ཚོགས་ཚད་མེད་གྲངས་མེད་རྣམས་དུས་དཔག་མེད་དུ་རིམ་པ་དེ་ཉིད་ཀྱིས་མ་བརྗེད་པར་འཛིན་པའི་དྲན་པ་དང་ཤེས་རབ་མཚུངས་ལྡན་ནོ། །དེ་ཆོས་ཀྱི་གཟུངས། ཞེས་གསུངས་པས་སོ། །དོན་གཟུངས་ཀྱི་མཚན་ཉིད་ནི། དོན་མཐའ་ཡས་པ་མི་བརྗེད་པར་འཛིན་པའི་གཟུངས་དེ་ཡིན་ཏེ། ཉ་ཊཱིཀ་ལས། དོན་གྱི་གཟུངས་ནི། དེས་སྔར་གཟུང་བའི་ཆོས་རྣམས་ཀྱི་དོན་ཚད་མེད་གྲངས་མེད་རྣམས་དུས་དཔག་མེད་དུ་མི་བརྗེད་པར་འཛིན་པའི་དྲན་པ་དང་ཤེས་རབ་མཚུངས་ལྡན་ནོ། །ཞེས་གསུངས་པས་སོ། །གསང་སྔགས་ཀྱི་གཟུངས་ཀྱི་མཚན་ཉིད་ནི།ཏིང་འཛིན་ལ་བརྟེན་ནས་སྡིག་པ་དང་ནད་སོགས་ཞི་བར་བྱེད་པའི་ཚིག་བྱིན་གྱིས་རློབ་པའི་གཟུངས་དེ་ཡིན་ཏེ། རྒྱན་གྱི་ས་འགྲེལ་ལས། ཏིང་ངེ་འཛིན་ཐོབ་པའི་བྱིན་རླབས་ལ་བརྟེན་ནས་སྔགས་ཀྱི་མཐུས་ཡམས་ནད་མང་པོ་ཞི་བར་བྱེད་པ་སྔགས་ཀྱི་གཟུངས་དང༌། ཞེས་གསུངས་པས་སོ། །