བཞི་པ་རྡོ་རྗེ་ཉི་མའི་རིགས་ཀྱི་རྒྱུད།
བཞི་པ་རྡོ་རྗེ་ཉི་མའི་རིགས་ཀྱི་རྒྱུད་ནི།
ཕྱོགས་འདིར་འགྱུར་བ་རྡོ་རྗེ་བདུད་རྩི་ཁོ་ན་ཡིན་ཞིང༌། རྒྱུད་འདི་གྲུབ་ཐོབ་བདུད་རྩི་གསང་བས་མཁའ་འགྲོའི་གནས་ནས་སྤྱན་དྲངས། རྒྱ་གར་དུ་སློབ་དཔོན་དྲི་མེད་བཟང་པོའི་ལུགས་དང༌། སློབ་དཔོན་བྷ་གོ་ཞེས་པ་སྐལ་ལྡན་གྱི་ལུགས་ཏེ་གཉིས་བྱུང༌། བོད་དུ་དང་པོ་བྱུང་བ་ནི་ལོ་ཙཱ་བ་ལྕེ་བཙན་སྐྱེས་ཀྱིས་བསྒྱུར། ཕྱིས་སྨྲྀ་ཏི་དང་གྱི་ཅོ་ཟླ་བའི་འོད་ཟེར་གྱིས་ཆོས་སྐོར་ཅི་རིགས་བསྒྱུར། ད་ལྟ་རྡོ་རྗེ་འཕྲེང་བའི་ནང་གི་དབང་རྒྱུན་ཙམ་ཞིག་བཞུགས་སོ། ། ལྔ་པ་པདྨ་གར་དབང་གི་རིགས་ལ། པདྨ་གར་དབང་ཉིད་ཀྱི་རྟོག་པ་བ་རི་ལོ་ཙཱ་བས་བསྒྱུར་བ་དང༌། རིགས་ཀྱི་འཇིག་རྟེན་མགོན་པོ་ལྔ་བཅུ་པ་ཞེས་བྱ་བའི་རྒྱུད་ཡར་ལུང་ལོ་ཙཱ་བ་གྲགས་པ་རྒྱལ་མཚན་གྱིས་བསྒྱུར། དྲུག་པ་རྟའི་རྒྱལ་པོའི་རིགས་ཀྱི་རྒྱུད་ནི་སྔོན་སྔ་དར་གྱི་དུས་སུ་དཔལ་བདུན་པའི་རྒྱལ་པོ་ཞེས་བྱ་བའི་རྒྱུད་འགྱུར་ཏེ། ད་ལྟ་བཀའ་སོགས་མེད། སྒྲོལ་མའི་ཕྱག་འཚལ་ཉེར་གཅིག་དང༌། ཕུར་པ་རྩ་དུམ་སོགས་ཀྱང་རིགས་འདིའི་ནང་ཚན་ཡིན་ཞིང༌། མགོན་པོ་མངོན་བྱུང་གི་རྒྱུད་ཀྱང་འཕྲིན་ལས་ཀྱི་རིགས་ཡིན་པས་ཕྱོགས་འདིར་བསྡུ། སྒྲོལ་མ་འབྱུང་བའི་རྒྱུད་འདུས་པ་དོན་དམ་པ་ཞེས་བྱ་བ་གསར་དུ་བསྒྱུར་པ་འདི་ནི་གྲུབ་ཐོབ་རོལ་པའི་རྡོ་རྗེ་དང་ལོག་པྲ་ད་གཉིས་ཀྱིས་སྒྲུབ་ཐབས་སོ་སོར་མཛད་པས་ལུགས་མི་འདྲ་བ་གཉིས་ཡོད་ཅིང༌། ཕྱིས་གྲུབ་པའི་དབང་ཕྱུག་ཞི་བ་སྦས་པས་དར་བར་མཛད་དེ། སློབ་དཔོན་པ་བ་དྱཱ་ནཱ་ཐ་དང༌། བུདྡྷ་གུཔྟ་ནཱ་ཐ་དང༌། པུརྞ་བཛྲ་སྟེ་གསུམ་ལས་འཇམ་མགོན་ཏཱ་ར་ནཱ་ཐས་གསན་ཞིང་བསྒྱུར་བར་མཛད་པ་ཡིན། རྒྱུད་འདི་ལས་སྒྲོལ་མའི་སྐུ་གསུང་ཐུགས་ཀྱི་དཀྱིལ་འཁོར་དང༌། དབུགས་དབྱུང་དྲུག་ལ་སོགས་པ་དཀྱིལ་འཁོར་ཡང་མང་དུ་འབྱུང་ཞིང༌། རྫོགས་རིམ་རྒྱས་པར་བཤད་ཡོད་དོ། །དུས་འཁོར་གྱི་རྒྱུད་འགྲེལ་བཤད་པ་ལ་འཇུག་པ་ལས། དྲང་དོན་དུ་ཕ་རྒྱུད་མ་རྒྱུད་གཉིས་སུ་དབྱེ་བ། ངེས་དོན་དུ་ཐམས་ཅད་གཉིས་མེད་ཀྱི་རྒྱུད་དུ་བསྟན་པའོ། །ཞེས་དང༌། དུས་ཀྱི་འཁོར་ལོའི་རྒྱུད་འདི་རྒྱུད་གསུམ་དུ་ཕྱེ་བའི་ཡ་གྱལ་གཉིས་མེད་ཀྱི་རྒྱུད་ཡིན་པར་བཞེད་པ་མང་ཡང༌། རྒྱུད་འགྲེལ་འདི་ཉིད་ལས། དྲང་དོན་དུ་ཐབས་དང་ཤེས་རབ་ཀྱི་རྒྱུད་གཉིས་སུ་ཕྱེ་བ་གསུངས་ཀྱི་ཐབས་ཤེས་གཉིས་མེད་ཀྱི་རྒྱུད་དང་གསུམ་དུ་དབྱེ་བ་གསུངས་པ་མེད་ཅིང༌། ནང་ལེའི་འགྲེལ་པར། དུས་ཀྱི་འཁོར་ལོའི་རྒྱུད་རྣལ་འབྱོར་མའི་རྒྱུད་ཡིན་པར་གསུངས་པས། དྲང་བའི་དོན་དུ་དུས་ཀྱི་འཁོར་ལོ་ཡང་མ་རྒྱུད་ཡིན་ནོ། །ཞེས་དང༌། ངེས་པའི་དོན་དུ་ན། རྒྱུད་ཐམས་ཅད་ཐབས་ཤེས་རབ་གཉིས་སུ་མེད་པའི་རྒྱུད་ཡིན་ཏེ། རྒྱུད་ཀྱི་དོན་ནི་རྣལ་འབྱོར་ཞེས་པ་ཐབས་ཤེས་རབ་དབྱེར་མེད་དུ་སྦྱོར་བའི་དོན་ཡིན་ལ་དེ་མེད་ན་རྣལ་འབྱོར་དང་རྣལ་འབྱོར་མའི་རྒྱུད་དུ་མི་འགྱུར་བའི་ཕྱིར་ཏེ། ཞེས་པའི་ལུང་དེ་དག་གིས་གསུང་ཟིན་ལ་དུས་འཁོར་གྱི་རྒྱུད་མ་རྒྱུད་ཡིན་པ་ལས་རྒྱུད་གསུམ་དུ་ཕྱེ་བའི་མ་རྒྱུད་མ་ཡིན་པ་དང་ངེས་དོན་དུ་རྒྱུད་ཀུན་གཉིས་མེད་ཀྱི་རྒྱུད་ཡིན་པ་ལྟ་བུར་གསུངས་པ་དང༌། གོང་དུ་བཀོད་པའི་འབའ་མདའི་དུས་འཁོར་དབང་ཆེན་གྱི་ཆོ་ག་ལས་རྒྱུད་ལ་རྣམ་པ་གསུམ་ཡོད་པ་ལས་དུས་འཁོར་གྱི་རྒྱུད་གཉིས་མེད་ཀྱི་རྒྱུད་ཡིན་པར་གསུངས་པ་དང་འགལ་བ་མེད་ཚུལ་ལ་དཔྱད་པར་བྱའོ། །དེ་ལྟར་རྣལ་འབྱོར་བླ་ན་མེད་པའི་རྒྱུད་ཀྱི་དབྱེ་བ་རྣམས་བཤད་ཟིན་ཏོ། །