གསུམ་པ་སྐྱེད་པའི་རྒྱུ།
གསུམ་པ་སྐྱེད་པའི་རྒྱུ་ནི།
རྣམ་པ་བཞི་ཡོད་དེ། བྱང་ས་ལས། བྱང་ཆུབ་སེམས་དཔའི་ཡོན་ཏན་བཞི་དང་ལྡན་ན་གཟུངས་འདི་དག་ཐམས་ཅད་འཐོབ་སྟེ། གང་ཡང་རུང་བ་མ་ཚང་བས་ནི་མ་ཡིན་ནོ། །བཞི་གང་ཞེ་ན། འདོད་པ་རྣམས་ལ་ལྷག་པར་ཞེན་པ་མེད་པ་དང༌། གཞན་མ་ཐོས་པ་དག་ལ་ཕྲག་དོག་མི་བསྐྱེད་དེ། ཕྲག་དོག་མེད་པ་དང༌། བསླངས་པ་ཐམས་ཅད་རབ་ཏུ་སྦྱིན་ཞིང་འགྱོད་པ་མེད་པར་སྦྱིན་པ་དང༌། བྱང་ཆུབ་སེམས་དཔའི་སྡེ་སྣོད་ཀྱི་མ་མོ་ལས་བརྩམས་ཏེ། ཆོས་ལ་ཀུན་ཏུ་དགའ་ཞིང༌། ཆོས་ལ་དགའ་བ་ཡིན་ནོ། །ཞེས་གསུངས་པས་སོ། །ཡང་ན་རྒྱན་ལས། རྣམ་སྨིན་ཐོས་ལ་གོམས་པ་དང༌། །ཏིང་ངེ་འཛིན་གྱི་གཟུངས་དག་ནི། །ཆུང་ངུ་དང་ནི་ཆེན་པོ་སྟེ། །ཆེན་པོ་དེ་ཡང་རྣམ་པ་གསུམ། །ཞེས་སྔོན་ཚེ་རབས་སྔ་མ་ལ་གཟུངས་ཐོབ་པར་འགྱུར་བའི་ལས་རྣམ་པར་དག་པ་བསགས་པ་ལས་འདིར་དམ་པའི་ཆོས་ཀྱི་ཚིག་དང་དོན་མང་པོ་འབད་པ་མེད་པར་འཛིན་ནུས་ཤིང༌།མི་བརྗེད་པའི་དྲན་པ་དང་ཤེས་རབ་ནི་རྣམ་པར་སྨིན་པ་ལས་བྱུང་བའི་གཟུངས་དང་མཐོང་བའི་ཆོས་ཚེ་འདི་ཉིད་ལ་ཆོས་མང་དུ་མཉན་པ་ལ་བརྟེན་ནས། ཚིག་དང་དོན་མང་པོ་འཛིན་ནུས་པའི་དྲན་པ་དང་ཤེས་རབ་ནི་ཐོས་པ་ལ་གོམས་པའི་གཟུངས་དང༌། ཟབ་མོ་སྟོང་པ་ཉིད་ལ་སོགས་པ་བསྒོམས་པ་ལས་བྱུང་བའི་ཤེས་རབ་ལ་བརྟེན་ནས་དམ་པའི་ཆོས་ཀྱི་ཚིག་དང་དོན་མང་པོ་ཡུད་ཙམ་གྱིས་འཛིན་ནུས་ཤིང་མི་བརྗེད་པ་ཏིང་ངེ་འཛིན་གྱི་གཟུངས་དག་སྟེ་གསུམ་ཡིན་ལ། དེ་ཡང་རྣམ་པར་སྨིན་པ་དང་ཐོས་པ་གོམས་པའི་གཟུངས་གཉིས་ནི་ཆུང་ངུ་དང་ནི་ཏིང་ངེ་འཛིན་གྱི་གཟུངས་ནི་ཆེན་པོ་ཡིན་ཏེ། ཆེན་པོ་དེ་ཡང་རྣམ་པ་གསུམ་དུ་འགྱུར་རོ། །དེ་ཡང་འདི་ལྟར། བློ་ལྡན་མ་ཞུགས་ཞུགས་པ་ཡང༌། །མ་དག་ས་པ་རྣམས་ཀྱི་ནི། །ཆུང་ངུ་དང་ནི་འབྲིང་པོ་སྟེ། །དག་པའི་ས་པའི་གཟུངས་ཆེན་ཡིན། །ཞེས་བློ་ལྡན་ས་ལ་མ་ཞུགས་པ་མོས་སྤྱོད་པ་རྣམས་ཀྱི་གཟུངས་ཀྱི་ཆོས་ཉིད་མངོན་སུམ་དུ་མ་མཐོང་བས་དམན་པ་དང༌། ས་ལ་ཞུགས་པ་ཡང་མ་དག་ས་བདུན་ལ་གནས་པ་རྣམས་ཀྱི་ནི་ཆོས་ཉིད་མཐོང་ཡང་འབད་རྩོལ་དང་བཅས་པའི་ཕྱིར་བར་མ་ཡིན་པས་རིམ་པ་ལྟར་དམན་པ་ཆུང་ངུ་དང་ནི་བར་མ་འབྲིང་པོ་སྟེ། དག་པའི་ས་གསུམ་ལ་གནས་པའི་གཟུངས་ནི་འབད་རྩོལ་མེད་ཅིང་ལྷུན་གྱིས་གྲུབ་པས་ཆེན་པོའམ་མཆོག་ཏུ་གྱུར་པ་ཡིན་ནོ། །
བཞི་བ་བྱེད་ལས་ནི།
རྒྱན་ལས། བྱང་ཆུབ་སེམས་དཔའ་ཡང་དང་ཡང༌། །དེ་ལ་ཡང་དག་བརྟེན་ནས་ནི། །རྟག་ཏུ་དམ་པའི་ཆོས་དག་ཀྱང༌། །རབ་ཏུ་སྟོན་ཅིང་འཛིན་པར་བྱེད། །ཅེས་བྱང་ཆུབ་སེམས་དཔའ་རྣམས་ཡང་དང་ཡང་རྒྱུན་མི་འཆད་པར་གཟུངས་གསུམ་པོ་དེ་ལ་ཡང་དག་པར་བརྟེན་ནས་ནི་དུས་རྟག་ཏུ་དམ་པའི་ཆོས་ཀྱི་ཚིག་དང་དོན་ཕུན་སུམ་ཚོགས་པ་དག་ཀྱང་གཞན་ལ་རྒྱ་ཆེར་རབ་ཏུ་སྟོན་ཅིང་རང་ཡང་ཡུན་རིང་དུ་འཛིན་པར་བྱེད་པ་ཡིན་ནོ། །ལྔ་བ་ས་མཚམས་ནི། རྒྱན་དང་བྱང་ས་ལྟར་ན་ལམ་མ་ཞུགས་ནས་སངས་རྒྱས་ཀྱི་སའི་བར་དུ་ཡོད་པར་སྣང་སྟེ། གོང་དུ་དབྱེ་བ་སྟོན་བྱེད་རྒྱན་གྱི་ལུང་སྔར་བཀོད་པ་དང༌། བྱང་ས་ལས། དེ་ལ་ཆོས་ཀྱི་གཟུངས་དང༌། དོན་གྱི་གཟུངས་ནི་བྱང་ཆུབ་སེམས་དཔའ་བསྐལ་བ་གྲངས་མེད་པ་དང་པོ་འདས་ནས་ལྷག་པའི་བསམ་པ་དག་པའི་ས་ལ་ཞུགས་པའི་ཚེ་ཐོབ་པར་འགྱུར་ཏེ། ངེས་པ་དང༌། བརྟན་པ་དང༌། རྒྱ་ཆེ་བ་ཡིན་ནོ། །དེ་ཚུན་ཆད་ནི། སྨོན་ལམ་གྱི་དབང་ངམ་བསམ་གཏན་ལ་བརྟེན་ནས་ཐོབ་པར་འགྱུར་ཏེ། ངེས་པ་ཡང་མ་ཡིན། བརྟན་པ་ཡང་མ་ཡིན། རྒྱ་ཆེ་བ་ཡང་མ་ཡིན་ནོ། །ཆོས་དང་དོན་གྱི་གཟུངས་ཇི་ལྟ་བ་བཞིན་དུ་གསང་སྔགས་ཀྱི་གཟུངས་ཀྱང་དེ་དང་འདྲ་བ་རིག་པར་བྱའོ། །ཞེས་གསུངས་པས་སོ། །