༣ དགག་དབྱེ།
༡ དགག་དབྱེའི་སྒྲ་བཤད་ནི། དབྱར་གྱི་ནང་དུ་ལྟུང་བ་ལྒིང་དྲན་དང་། ནན་ཏུར་བྱེད་པ། དབྱར་གྱི་རྙེད་པ་བགོ་བ། མཚམས་ཀྱི་ཕྱི་རོལ་ཏུ་སྡོད་པ་རྣམས་དགག་པ་ལས་འདིར་དེ་དག་བྱ་རུང་བར་བྱེད་པའོ། །དགག་དབྱེའི་ལྒིང་གཞི་ནི། སྟོན་པ་གཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་ཀྱི་ཀུན་རར་དབྱར་ཞལ་གྱིས་བཞེས་ཚེ། ཚེ་དང་ལྡན་པ་དག་ལྟ་སྤྱོད་འཚོ་བ་དང་། ཚུལ་ཁྲིམས་ཉམས་པའམ། ཆུ་རའི་བུམ་པའམ། ཁྲུས་བུམ་ལ་ཆུ་ལེན་པ་རྩོད་ཅན་དུ་གྱུར་ཚེ། གཅིག་ལ་གཅིག་མི་སྨྲ་བར་ཁ་རོག་གེར་འགྲོ་བ་སོགས། སྟོན་པ་ལ་ཞུས་པས། བཅོམ་ལྡན་འདས་ཀྱིས་སྐྱེས་བུ་གཏི་མུག་ཅན་དག་འདི་ལྟ་སྟེ། མི་སྨྲ་བ་ནི་མུ་སྟེགས་ཀྱི་རྒྱལ་མཚན་ནོ། །དེ་ལྟ་བས་ན། དགེ་སློང་གིས་མི་སྨྲ་བར་དམ་བཅའ་བར་མི་བྱའོ། །དགེ་སློང་གིས་མི་སྨྲ་བར་དམ་བཅས་ན་འགལ་ཚབས་ཅན་དུ་འགྱུར་རོ། །འོན་ཀྱང་། དབྱར་གནས་པར་དམ་བཅས་པའི་དགེ་སློང་གིས་དགེ་འདུན་ལ་མཐོང་བ་དང་ཐོས་པ་དང་དོགས་པའི་གནས་གསུམ་ཀྱིས་དགག་དབྱེ་བྱའོ། །ཞེས་དབྱར་གནས་ཀྱི་མཇུག་ཏུ་དགག་དབྱེ་བྱ་དགོས་པའི་བཅས་པ་མཛད་དོ། །
༢ དགག་དབྱེའི་དུས་ནི། བདུན་པའི་ཉེར་དགུ་འམ་གནམ་གང་ལ་བྱ་དགོས་ལ། སྔ་ཉིན་གླིང་ཡོངས་ལ་གད་བདར་དང་། རྩྭ་དུར་བ་སོགས་ལ་ཆངས་པ་རེ་འདང་ངེས་ཚགས་སུ་ཆུད་པར་བྱ། དབྱར་ཁས་ལེན་སྔ་ན་བསོད་ནམས་ཆེ་ཞིང་། དགག་དབྱེ་འཕྱི་ན་བསོད་ནམས་ཆེ་བར་གསུངས་ལ། དབྱར་གནས་གུང་ཚིགས་གྲོལ་རྗེས་སུ། གཎྜི་མཆོད་ནས། རྫས་ཀྱི་དགག་དབྱེའི་ཆེད་དབྱར་རྫས་བཟུང་ལ། དགེ་ཚུལ་སློང་ཆབས་ཅིག་གནས་བཅུ་དང་འདུལ་བ་རྒྱ་མཚོའི་སྙིང་བོ་གསུངས་ཏེ། ཐམས་ཅད་བཞེངས་ནས་ཕྱོགས་བཞིར་གཡས་བསྐོར་དུ་ཕྱག་བཞི་གསུམ་བཅུ་གཉིས་འཚལ་བ་འདི་ལ་ཕྱག་ཟིང་བོ་ཟེར་ལ། དེ་ནི་དབྱར་གནས་སྐབས་དགེ་འདུན་ཐུགས་འགལ་འདྲ་བྱུང་ཡོད་ན་དེ་བཤགས་ཆེད་ཡིན། དེ་ནས་དུར་བ་བཀྲམས་ཚུལ་དང་། འདོན་ཆ་ཕྱག་ལེན་ནི་ཆོ་ག་ལྟར་གྲུབ་རྗེས། བརྒྱད་པའི་ཚེས་གཅིག་ལ་ལྗོངས་རྒྱུར་ངེས་ཅན་དུ་འབྱོན་དགོས་པས། རང་རེའི་ཡུལ་ཕྱོགས་འདིར་ལྗོངས་རྒྱུའི་དོད་དུ་དབྱར་སྟོན་གྱི་བསྙེན་བཀུར་བྱེད་པའི་སྲོལ་དར་ཡོད་ལ། དེ་ཡང་གཎྜིའི་བརྡ་བཏང་སྟེ། ཆོས་གོས་རྣམ་གསུམ་གསོལ། གདིང་བ་ཕྲག་ལ་གཟར། གནས་བརྟན་གྱིས་མཁར་གསིལ་དང་ལྷུང་བཟེད་ཐོགས་ནས་དབུ་དྲངས་ཏེ། བསླབ་པའི་གོ་རིམ་ལྟར། ཚུལ་མཐུན་གྱིས་ཕེབས་ལ། ངལ་གསོའི་སྐབས་སུ་གནས་བརྟན་གྱིས་དབུ་སྐུལ་ཏེ། སངས་རྒྱས་གཙོ་ལ་སོགས་འདོན་རིམ་ལྟར་གསུངས་ནས་ཕེབས་པའི་ཕྱག་ལེན་ཡོད།
༣ དགག་དབྱེ་བྱས་པའི་དགོས་པ་ནི། ཞེ་སྡང་ལ་སོགས་པའི་ཉོན་མོངས་མངོན་གྱུར་བ་རྣམས་དགག་ཅིང། དགེ་བའི་བསམ་པ་མངོན་གྱུར་ཤུགས་དྲག་བསྐྱེད་པ་དང་། ལྟུང་བ་སྡེ་ལྔ་མཐའ་དག་ལེགས་པར་བརྟགས་ཏེ། བཤགས་པར་འོས་པ་རྣམས་བཤགས། བསྡམ་པར་འོས་པ་རྣམས་བསྡམས། བྱིན་གྱིས་བརླབ་པ་ནི། རང་གི་མ་ཤེས་པའི་ལྟུང་བ་ཅི་བྱུང་བ་ཐམས་ཅད་དགེ་འདུན་རྣམས་ལ་ལྒིང་དྲན་བྱེད་པར་ཞུས་ཏེ། ལྟུང་བ་མཐོང་ཐོས་དོགས་གསུམ་ཅི་བྱུང་བ་ཐམས་ཅད་འཕྲལ་དུ་བཤགས་ཤིང་དག་པར་བྱས་པས་ན། ཚུལ་ཁྲིམས་རྣམ་པར་དག་པར་འགྱུར་བ་དང་། དགག་དབྱེ་བྱ་དགོས་པར་ཐུབ་པས་བཅས་པ་དེ་བསྲུང་ཞིང་། དེ་ལས་འདས་པའི་ཉེས་པ་མི་འབྱུང་བ་དང་། སྦྱིན་བདག་དད་པ་ཅན་གྱི་བསོད་ནམས་སྤེལ་བ་སོགས་དགོས་པ་ཁྱད་པར་ཅན་མང་བོ་ཡོད་པར་ཡོངས་འཛིན་ཡེ་ཤེས་རྒྱལ་མཚན་གྱིས་གསུངས་སོ། །ཞིབ་ཏུ་འདུལ་འཛིན་གྲགས་པ་རྒྱལ་མཚན་དང་། ཡོངས་འཛིན་ཡེ་ཤེས་རྒྱལ་མཚན། གུང་ཐང་བློ་གྲོས་རྒྱ་མཚོ། རྗེ་འཇིགས་མེད་རིགས་པའི་བློ་གྲོས་སོགས་ཀྱི་གཞི་གསུམ་གྱི་ཆོ་ག་ལ་བལྟ་དགོས་སོ། །
#div1 ལེའུ་བཞི་བ། ཆོས་སྲོལ་རིག་གནས།