གཉིས་པ་མཐའ་རགས་ཙམ་དཔྱད་པ།
གཉིས་པ་མཐའ་རགས་ཙམ་དཔྱད་པ་ལ།
བྱང་ས་ལས། བྱང་ཆུབ་སེམས་དཔའ་བཟོད་པ་འཐོབ་པར་བྱེད་པའི་གཟུངས་སོ། །ཞེས་དང༌། རྒྱན་གྱི་ས་འགྲེལ་ལས། མོས་སྤྱོད་ཀྱི་སའི་བཟོད་པ་ཆེན་པོ་ཐོབ་པ་ནི་བཟོད་པའི་གཟུངས་ཞེས་པ་བཞི་གསུངས་ཤིང༌། ཞེས་དང༌། མདོ་ལུགས་མ་ལས། དེ་ལ་བཞི་སྟེ་བཟོད་པ་འཐོབ་པར་བྱེད་པའི་རྒྱུར་གྱུར་པའི་གཟུངས་དང༌། གསང་སྔགས་ཀྱི་གཟུངས་དང། ཆོས་ཀྱི་གཟུངས་དང༌། དོན་གྱི་གཟུངས་སོ། །ཞེས་དང༌། ཉ་ཊཱིཀ་ལས། བཟོད་པའི་གཟུངས་ནི། ཨ་ར་པ་ཙ་ན་ལ་སོགས་པའི་ཡི་གེའི་དོན་དེ་བཞིན་དུ་སྒྲོ་བཏགས་ནས་བསྒོམས་པས་བསྒོམ་པ་རྫོགས་པ་ན་ཡི་གེ་དེའི་དོན་དམ་པ་ལ་བཟོད་པ་སྐྱེ་བ་ནི། བཟོད་པའི་གཟུངས་ཏེ། དཔེར་ན་དོན་སྐྱེ་བ་མེད་པར་བཏགས་ཏེ་བསྒོམས་པས་བསྒོམ་པ་རྫོགས་པ་ན་ཆོས་ཐམས་ཅད་སྐྱེ་མེད་དུ་རྟོགས་པའི་བཟོད་པ་ཐོབ་སྟེ། དེས་ན་བཟོད་གཟུངས་སོ། །དག་ལྡན་ནོ། །དེས་ན་ཆོས་ཐམས་ཅད་ཀྱི་གནས་ལུགས་རྟོགས་པའི་སྒོ་སྟེ་ཐབས་སོ། །ཞེས་པ་ནས། ཆོས་ཐམས་ཅད་བརྗོད་མེད་དུ་རྟོགས་པས་དགའ་བ་ཆེན་པོ་སྐྱེ་སྟེ་བཟོད་པའི་རྒྱུར་གྱུར་པའི་གཟུངས་སོ། །དེ་ནས་དེ་མ་ཐག་ཏུ་ས་དང་པོའི་ཡེ་ཤེས་སྐྱེ་བ་དང་མཐུན་པའི་བཟོད་པ་སྐྱེ་སྟེ་དོན་དམ་པའི་ཆོས་ལ་བཟོད་པས་ན་བཟོད་པའོ། །དེ་ལ་གཟུངས་ཀྱི་བཟོད་པའམ་ཡེ་ཤེས་ཞེས་བྱའོ། །དེ་མོས་སྤྱོད་དུ་གཏོགས་སོ། །ཞེས་སོགས་ལུང་དེ་དག་གིས་བཟོད་གཟུངས་དང་བཟོད་པའི་རྒྱུ་གྱུར་པའི་གཟུངས་གཉིས་ལ་ཁྱད་ཡོད་མེད་དཔྱད་དགོས་སོ། །ཡང་གོང་དུ་ས་མཚམས་བཞག་པ་དང༌། ཉ་ཊཱིཀ་མཆན་ལས། གཉིས་པ་ནི། སྔོན་གྱི་རྣམ་སྨིན་ལས་བྱུང་བ་དང་ཚེ་འདིར་མང་དུ་ཐོས་པ་ལས་བྱུང་བ་གཉིས་ཆུང་ངུ་གོམས་པ་དང༌། །ཏིང་ངེ་འཛིན་གྱི་གཟུངས་དག་ནི། །ཆེན་པོ། ཆུང་ངུ་དང་ནི་ཆེན་པོ་སྟེ། །ཆེན་པོ་དེ་ཡང་རྣམ་པ་གསུམ། །མོས་སྤྱོད་པའི་ཆུང་ངུ༌། ས་བདུན་པའི་བར་འབྲིང༌། བརྒྱད་པ་ཡན་ཆེན་པོའོ། །ཞེས་སོགས་ཏེ་སྔར་བཤད་དང་ཚུལ་ཅུང་མི་འདྲའོ། །ཞེས་ས་མཚམས་དེ་ལྟར་མི་རིགས་པར་ཐལ། ཡུམ་གསུམ་གནོད་འཇོམས་ལས། མོས་པ་སྤྱོད་པའི་ས་ཉིད་ལས་འཐོབ་བོ། །གཞན་གཟུངས་གསུམ་པོ་ནི་བསྐལ་བ་གྲངས་མེད་པ་དང་པོ་འདས་ནས་ས་དང་པོ་ལ་སོགས་པ་ལ་འཐོབ་བོ། །ཞེས་དང༌། ཉ་ཊཱིཀ་ལས། དང་པོ་མོས་སྤྱོད་རྫོགས་པ་ནས་དང་གསུམ་ས་ཐོབ་ནས་སོ། །ཞེས་དང༌། མདོ་ལུགས་མ་ལས། དེ་ལ་གཟུངས་དང་པོ་ནི་མོས་སྦྱོད་ཀྱི་ས་ཉིད་ལ་འཐོབ་ཅིང༌། ལྷག་མ་གསུམ་པོ་ནི་ས་དང་པོ་ལ་སོགས་པ་ལ་འཐོབ་པོ། །ཞེས་གསུངས་པའི་ཕྱིར་ཟེར་ན་མ་ཁྱབ་སྙམ་སྟེ། ངེས་པ་དང༌། བརྟན་པ་དང༌། རྒྱ་ཆེ་བའི་དབང་དུ་བྱས་ནས་བཤད་པར་སྣང་ངོ༌། །དེ་ཡན་གྱིས་གཟུངས་བཤད་ཟིན་ཏོ། །