གསུམ་པ་རྩོད་པ་སྤོང་བ་ལ་གསུམ།

གསུམ་པ་རྩོད་པ་སྤོང་བ་ལ་གསུམ་ལས།

དང་པོ་ནི། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་ལ་སྡིག་པ་མཚམས་མེད་འབྱུང་ཞིང་ལྟུང་བ་སྦོམ་པོ་བྱུང་བ་ན་ལྟུང་བ་སྦོམ་པོའི་བཤགས་བསྡམས་ཚུལ་བཞིན་དུ་བྱས་པ་ཉིད་ཆོས་ཅན། ལྟུང་བ་སྦོམ་པོ་དེ་དང་ངོ་བོ་གཅིག་པའི་སྡིག་པ་མཚམས་མེད་དེ་དག་པར་ཐལ། ལྟུང་བ་སྦོམ་པོ་དེ་དག་པའི་ཕྱིར་རོ། །རྟགས་གཞུང་གིས་གྲུབ་སྟེ། རྩ་བར། མིང་དང་རིགས་དང་ལྡན་པར་བརྗོད་ན་ལྟུང་བ་ལས་སོ། །ཞེས་གསུངས་པས་སོ། །གོང་དུ་ཁྱབ་པ་མེད་ན་སྡིག་ལྟུང་དེ་གཉིས་ངོ་བོ་གཅིག་ཡིན་པ་ཉམས་སོ། །འདོད་ན། ཆོས་ཅན་སྔར་བཞིན་སྡིག་པ་མཚམས་མེད་ཀྱིས་སྡོམ་པ་སྐྱེ་བ་ལ་བར་དུ་གཅོད་པ་ལས་གྲོལ་བར་ཐལ། སྡིག་པ་མཚམས་མེད་ལས་གྲོལ་བའི་ཕྱིར་རོ། །འདོད་ན། འདི་ལ་སྐྱེ་བའི་ཆོས་ཉིད་མེད་པར་ཡང་འདྲའོ་ཞེས་ཚེ་དེ་ལ་གྲོལ་བའི་སྐབས་མེད་པར་བཤད་པ་དང་འགལ་ལ། སྤྱིར་བསྟན་གྱི་ཊཱི་ཀ་ལས། ཕ་མ་བསད་པ་ལ་སོགས་པ་གཏན་གྱི་བར་ཆད་དང་ལྡན་པ། ཞེས་གསུངས་སོ་ཞེ་ན་ཐལ་འགྱུར་དང་པོ་འདོད་ཅིང༌། ཐལ་འགྱུར་གཉིས་པའི་རྟགས་ལ་བརྟག་སྟེ། ལྟུང་བ་སྦོམ་པོ་དང་ངོ་བོ་གཅིག་པའི་སྡིག་པ་མཚམས་མེད་དེ་ལས་གྲོལ་བའི་ཕྱིར་ཞེས་ཟེར་རམ། སྡིག་པ་མཚམས་མེད་ཀྱི་རྒྱུན་སྐད་ཅིག་གཉིས་པ་ཕན་ཆད་ཀྱི་མཚམས་མེད་དེ་ལས་གྲོལ་བའི་ཕྱིར་ཟེར། དང་པོ་ལྟར་ན་ཁྱབ་པ་མེད་ཅིང༌། གཉིས་པ་ལྟར་ན་རྟགས་མ་གྲུབ་བོ། །འོ་ན་སྡིག་ལྟུང་ངོ་བོ་གཅིག་ཡིན་པ་ཉམས་སོ་ཞེ་ན་མ་ཡིན་ཏེ། དཔེར་ན་ཟངས་བུམ་དང་ཟངས་རྫས་གཅིག་ཀྱང་ཟངས་བུམ་བཤིག་པ་ན་ཟངས་ཀྱི་རང་བཞིན་མི་དོར་བར་རྒྱུན་གནས་པ་ལྟར་སྦོམ་པོ་དེ་མཚམས་མེད་དང་རྫས་གཅིག་ཀྱང་དེ་བཤགས་པ་ན་མཚམས་མེད་ཀྱི་རང་བཞིན་གྱི་རྒྱུན་མི་དོར་བར་གནས་པའོ། །ཞེས་མཚོ་ཊཱིཀ་ལས་གསུངས་སོ། །འོན་ཀྱང་སྡོམ་གསུམ་རིམ་གྱིས་མནོས་པའི་སྡོམ་པ་གསུམ་ངོ་བོ་གཅིག་ཡིན་ན་གཅིག་བཏང་ན་གསུམ་ག་བཏང་བར་ཐལ་བ་འཕེན་ཚུལ་སྔར་བཤད་ཟིན་པ་སོགས་ཀྱིས་དཔྱད། པཎ་ཆེན་བསོད་གྲགས་པའི་འདུལ་བའི་མཐའ་དཔྱོད་ལས། དེའི་ཕྱིར་དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བའི་སྡིག་ལྟུང་གཉིས་ཀ་སྟོབས་བཞི་ཚང་བས་བཤགས་པས་ཚེ་འདིར་འདག་ནུས་པར་ཁས་བླངས་སོ། །ཞེས་གསུངས་པ་ལ། འོ་ན་མཚམས་མེད་པའི་ལས་དེས་དམྱལ་བར་སྐྱེ་ངེས་མ་ཡིན་པར་ཐལ་ལོ། །འདོད་མི་ནུས་ཏེ། མཛོད་ལས། འཕགས་དང་མཚམས་མེད་བྱེད་པ་དག །ཡང་དག་ལོག་པ་ཉིད་དུ་ངེས། །ཞེས་གསུངས་པའི་ཕྱིར་ཟེར་བ་དང༌། དེ་མ་ཟད་མཚམས་མེད་བྱེད་པ་དག་ལ་སོར་སྡོམ་ཚེ་དེར་སྐྱེ་བ་མེད་དེ། མདོ་རྩ་ལས། འདི་ལ་སྐྱེ་བའི་ཆོས་ཉིད་མེད་པ་འདྲའོ། །ཞེས་གསུངས་པའི་ཕྱིར་ཟེར་ན་དཔྱད་དོ། །ལྕགས་བསྲེགས་དམར་ལྷང་གི་གནས་སྐབས་ན་མེ་ལྕགས་རྫས་གཅིག་པ་ཡིན་གྱི། ཕྱིས་ཆུ་གྲང་གི་ནང་དུ་བྱིང་པ་ན་རྫས་གཅིག་མ་ཡིན་ནོ་ཞེ་ན། དེ་བཞིན་དུ་འདིར་ཡང་སྦོམ་པོ་བཤགས་བསྡམ་མ་བྱས་པའི་གནས་སྐབས་ན་དེའི་སྡིག་ལྟུང་སྦོམ་པོ་བཤགས་པ་ན་ངོ་བོ་གཅིག་པ་མ་ཡིན་ནོ། །འདིར་ཁ་ཅིག་ན་རེ་ལྟུང་བ་བཤགས་པ་བྱས་པས་ལྟུང་བའི་མངོན་གྱུར་བྱེད་པ་དང་བཅས་པ་དག་ཅིང༌། ལྟུང་བ་དག་ཚོད་དུ་དེའི་ཆའི་སྡིག་པ་དག་པར་ཐལ་བ་འདོད་ཅེས་ཟེར་རོ། །འདི་ནི་མི་རིགས་ཏེ། མྱོང་ངེས་ཀྱི་ལས་དང་མྱོང་ངེས་མ་ཡིན་པའི་ལས་གཉིས་ལས་མཚམས་མེད་ལྔ་ལ་སོགས་རྣམ་སྨིན་མྱོང་ངེས་ཀྱི་ལས་དང་འབྲེལ་བའི་ལྟུང་བ་དེ་བཤགས་པའི་ཆོ་ག་ལན་གསུམ་བརྗོད་ཅིང་བསྡམས་པ་ཙམ་གྱིས། མཚམས་མེད་པའི་ལས་ཀྱི་མངོན་གྱུར་བྱེད་པ་དང་བཅས་པ་དག་པར་འགྱུར་རམ་ཅི། དེ་ནི་མི་རིགས་ཏེ། དེ་ལྟར་ན་མྱོང་ངེས་ཀྱི་ལས་ཡིན་པ་དང་འགལ་བའི་ཕྱིར་རོ། །ལས་མྱོང་ངེས་མ་ཡིན་པ་དང་འབྲེལ་བའི་ལྟུང་བ་ནི་ཚུལ་བཞིན་དུ་བཤགས་བསྡམ་བྱས་པ་ན་ལྟུང་བ་དག་ཚོད་དུ་དེའི་ཆའི་སྡིག་པ་ཡང་དག་པར་རིགས་ཏེ། འདི་ལ་ལུང་རིགས་གཉིས་ལས། ལུང་ནི་གཞི་དང་ཀརྨ་ཤ་ཏཾ་ལས་ལྷག་མའི་དབྱུང་བ་མ་བྱས་པའི་སྐབས་སུ་ངན་སོང་དུ་འགྲོ་བར་གསུངས་ལ། དབྱུང་བ་བྱས་པའི་སྐབས་སུ་མཐོ་རིས་སུ་འགྲོ་བར་གསུངས་པས་ཤེས་ལ། ལུང་ལ་བརྟེན་པའི་རིགས་པས་ཀྱང་ནི་ཤེས་ཏེ། སྡིག་པ་ནི་སྟོབས་བཞིས་འདག་ལ། ལྟུང་བ་ཕྱིར་བཅོས་ལ་སྟོབས་བཞི་ཚང་བའི་ཕྱིར་རོ། །དེ་ཡང་གང་གི་མདུན་དུ་ཕྱིར་བཅོས་པའི་ཡུལ་དེ་རྟེན་གྱི་སྟོབས། འགྱོད་པ་སུན་འབྱིན་པའི་སྟོབས། ཕྱིན་ཆད་སྡོམ་པ་སོར་ཆུད་པའི་སྟོབས། ཕྱིར་བཅོས་བྱེད་པ་ཉིད་དགེ་བ་ཡིན་པས་གཉེན་པོའི་སྟོབས་སོ། །རྩོད་པ་གཉིས་པ་ནི། འཁྲིག་ཚིག་སྨྲ་བའི་ལྷག་མ་བྱུང་ནས་སྤོ་མགུ་དབྱུང་བར་མི་བྱེད་པར། འཁྲིག་ཚིག་ངག་ཀྱལ་གྱི་སྡིག་པ་སྟོབས་བཞིས་དག་པར་བྱས་པ་ཆོས་ཅན། སྡིག་པ་དེ་དང་ངོ་བོ་གཅིག་པའི་ལྷག་མའི་ལྟུང་བ་དག་པར་ཐལ། སྡིག་པ་དེ་དག་པའི་ཕྱིར་རོ། །ཁྱབ་པ་མེད་ན་སྡིག་ལྟུང་དེ་གཉིས་ངོ་བོ་གཅིག་ཡིན་པ་ཉམས་སོ། །འདོད་ན། མིང་དང་རིགས་དང་ལྡན་པར་བརྗོད་ན་ལྟུང་བ་ལས་སོ། །ཞེས་ཆོ་ག་ལ་བརྟེན་ནས་ལྟུང་བ་དག་པ་དེ་ནི་མིང་རིགས་བརྗོད་པའི་ཕྱིར་བཅོས་ལ་ལྟོས་པར་བཤད་པ་དང་འགལ་ལོ་ཞེ་ན། དོན་ལ་དག་པར་ཐལ་ཟེར་རམ། དག་པའི་ཐ་སྙད་ཀྱང་འཐོབ་པར་ཐལ་ཟེར། དང་པོ་ལྟར་ན་འདོད་པ་ཡིན་ཏེ། སྡིག་པ་དག་པའི་རྟགས་ཐོན་གྱི་བར་དུ་སྡིག་སྦྱངས་བྱས་ནའོ། །གཉིས་པ་ལྟར་ན་ཁྱབ་པ་མ་གྲུབ་སྟེ། དོན་ལ་དག་ཀྱང་དག་པའི་ཐ་སྙད་མི་ཐོབ་པ་ཡོད་དེ། དཔེར་ན་ཕམ་པ་འཆབ་མེད་བྱུང་བ་བསླབ་པ་སྤྱོད་པས་མཐོང་ལམ་ཐོབ་པའམ་ཕྱིར་མི་འོང་ཐོབ་པ་ན་ཕམ་པ་དོན་ལ་དག་ཀྱང་དག་པའི་ཐ་སྙད་མི་འཐོབ་ཅིང༌། དག་པའི་ཐ་སྙད་ཐོབ་པ་དེ་དགྲ་བཅོམ་ཐོབ་པ་ལ་ལྟོས་པ་བཞིན་ནོ། །འོ་ན་ལྟུང་བ་དང་ངོ་བོ་གཅིག་པའི་སྡིག་པ་སྦྱངས་ཀྱང་ལྟུང་བ་དག་པའི་ཐ་སྙད་མི་ཐོབ་པ་རྒྱུ་མཚན་ཅིའི་ཕྱིར་སྙམ་ན་བཅས་པའི་དབང་གིས་ཏེ། དེ་ལྟར་མ་ཡིན་ན་ལྷག་མ་ལ་སོགས་པའི་ལྟུང་བ་བྱུང་ཡང༌། སྐུ་གསུང་ཐུགས་ཀྱི་རྟེན་གྱི་མདུན་དུ་སྟོབས་བཞིའི་བཤགས་པ་ལ་འཇུག་ཅིང༌། གང་ཟག་གི་མདུན་དུ་ལྟུང་བ་ཕྱིར་འཆོས་པ་རྒྱུན་བཅད་པར་འགྱུར་བའི་ཕྱིར་ན་ལྟུང་བ་ལ་འཛེམ་པ་མེད་པར་འགྱུར་བས།སངས་རྒྱས་ཀྱི་བསྟན་པ་ལ་མེ་བཏང་བའི་སྐྱོན་དུ་འགྱུར་བའོ། །གལ་ཏེ་སྟོབས་བཞིས་བཤགས་བསྡམས་ཚུལ་བཞིན་དུ་བྱས་ནས་སྲོག་གཅོད་པའི་སྡིག་པ་དག་ལ་ལྟུང་བ་མ་དག་པའི་སྐབས་ཀྱི་སྲོག་གཅོད་ཀྱི་ལྟུང་བ་ཡོད་ན་ཁྲིམས་ཉིས་བརྒྱ་ལྔ་བཅུ་རྩ་གསུམ་ལས་འདས་པའི་ལུང་མ་བསྟན་གྱི་ལྟུང་བ་རེ་རེ་ཡོད་པར་འགྱུར་བས་མི་འཐད་དམ་དཔྱད་དོ། །རྩོད་པ་གསུམ་པ་ནི་དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བའི་ཁ་ན་མ་ཐོ་བ་ཆོས་ཅན། སྡིག་པ་དང་ལྟུང་བ་ཆེ་ཆུང་མེད་པར་ཐལ། སྡིག་ལྟུང་ངོ་བོ་གཅིག་པའི་ཕྱིར་རོ། །འདོད་ན། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་ལ་སྡིག་པ་ཤིན་ཏུ་ཆེ་བ་མཚམས་མེད་འབྱུང་ཡང་ལྟུང་བ་ན་སྨད་ལས་མི་བསྐྱེད་པར་བཤད་པ་དང་འགལ་ལོ་ཞེ་ན་རྫས་ཆེ་ཆུང་མེད་པར་ཐལ་ཟེར་རམ། ལྡོག་པ་ཆེ་ཆུང་མེད་པར་ཐལ་ཟེར། དང་པོ་ལྟར་ན་འདོད་པ་ཡིན་ཏེ། སྡིག་ལྟུང་རྫས་གཅིག་པའི་ཕྱིར་རོ། །གཉིས་པ་ལྟར་ན་ཁྱབ་པ་མ་གྲུབ་སྟེ། ཐ་སྙད་དུ་བུམ་པ་ངོ་བོ་གཅིག་ཀྱང་ལྡོག་པ་ཆེ་ཆུང་གཉིས་ཡོད་དེ། རི་བོ་ལ་ལྟོས་པའི་ལྡོག་པ་ནས་ཆུང་ལ་ཏིལ་འབྲུ་ལ་ལྟོས་པའི་ལྡོག་པ་ནས་ཆེ་བ་བཞིན་ནོ། །ངན་སེམས་ཀྱིས་ཁྲག་ཕྱུང་བ་འདི་ལ་སྡིག་པ་ཆེ་བ་ནི་རྣམ་སྨིན་ཆེན་པོ་འབྱིན་ནུས་ཀྱི་ལྡོག་པ་ནས་ཡིན་ལ། ལྟུང་བ་ཆུང་བ་ནི་བཅས་པ་ཆུང་ངུ་ལས་འདས་པའི་ལྡོག་པ་ནས་ཡིན་ནོ། །བཅས་པ་ཆུང་བའི་རྒྱུ་མཚན་བཅས་པ་རྣམ་འཇོག་གི་དགག་བྱ་ཆུང་བའི་ཕྱིར་ཏེ། དེ་བཞིན་གཤེགས་པ་མཐོང་ན། རབ་ཏུ་དང་བ་སྐྱེ་བ་འབྱུང་ཉེ་བ་དང་ངན་སེམས་ཀྱིས་ཁྲག་འབྱིན་པ་འབྱུང་རིང་འབྲེལ་ཆུང་དགག་བྱ་གནས་སྐབས་ཀྱི་སྒོ་ནས་མི་རྫོགས་པའི་ཕྱིར་རོ། །དེ་ལྟར་ན་སྡིག་ལྟུང་གཉིས་ལ་མུ་བཞི་ཡོད་དོ། །